- عم صيام: عيل هايف؟!.. يعنى إيه؟!.
- طارق: يعنى واد طَرِى.. اللى يقفشه بإيده.. يفرده ويتنيه زى ما هو عاوز.
- عم صيام: الحقى يا مُنى.. تعالى اتفرجى ع الواد ابن أخويا اللى عاوزانى أجيب له هدية بالشىء الفلانى.
- منى: ما له؟!.
- عم صيام: طلع واد هايف.. البت اللى خاطبها ممشّياه على مزاجها.. تلاقيها هى اللى قالت له خلّى عمك يجيب لك هدية ولا يديك قرشين يساعدونا فى الجواز.. آآآآه فاكرانى على كل شىء قدير.
- منى: اتقى الله.. كل ده عشان تهرب مِ الهدية؟!.
- عم صيام: عاوزانى أبعتر فلوسى على شوية عيال هايفة؟.. لست هذا الرجل.
- طارق (ضاحكاً): وهو هايف أى هيافة!
- عم صيام (ضاحكاً): ها ها ها.
- طارق: انتو متعرفوش معاذ.. دا أنا مرة سمعته بيكلمها فى التليفون.. وبيقول لها حاضر.. حاضر.. حاضر.. بسأله بعدها: بتقول لها حاضر على إيه؟.. قال لى عاوزانى أشحن لها الموبايل ب100 جنيه.. كل يومين تطلب منه كده.. مع إنها مقضياها معاه رنات.. ترن له يتصل فورى.. (وهو يضحك)!.
- عم صيام: ها ها ها.. مش قلت لك يا منى.. يرضيكى فلوسى تروح فى كروت شحن لعيل هايف زى دا؟!.
- منى: انت حر.. معاذ ابن أخوك.. والموضوع فى وشك انت.
- عم صيام: ولا يهمنى.. أنا وشّى مكشوف.
- منى (ساخرة): وشك بس؟!.
- عم صيام (وهو يتحسس رأسه): قلت لك أنا اللى حلقت زيرو.. عشان رمضان.
- طارق: إيه ده.. هو الواحد لازم يحلق شعره فى رمضان؟!.
- عم صيام (بتلعثم): مش شرط.. بس الأحسن كده.. (مستدركاً): لأ شرط.. إحنا مش قبل ما ندبح فى العيد الكبير ما بنقصش شعرنا ولا ضوافرنا ولا بنحلق دقننا؟!.
- منى: الكلام ده للى بيحج.. مش للى قاعد ياكل لحمة!.
- عم صيام: الصح نعمل زى اللى بيحجوا.. العيد الكبير نستقبله وشعرنا طويل.. والعيد الصغير براس ع الزيرو.. أُومال سمّوا ده كبير وده صغير ليه؟.
- طارق (ضاحكاً): فكرتنى بالواد الهايف؟!.
- عم صيام (بلهفة): إيه؟.. خطيبته خلّته يحلق زيرو؟!.
- طارق: يحلق إيه؟.. ده خلّته يجيب لها 3 فوانيس.. فانوس ليها.. وفانوس لأخوها الصغير.. وفانوس كبير يحطّوه فى البيت.
- عم صيام: يعنى مضيع فلوس الدروس الخصوصية عليها.. ربنا مش مبارك له عشان رفض يدى دروس فى الجامع.
- منى: بقول لك إيه.. شيماء عاوزة موبايل جديد.. الموبايل بتاعها اتكسر.
- عم صيام: اسمعى بقى.. اللى اتكسر يتصلح.. موبايلات جديدة مش هجيب.
- طارق: هى كل شهرين عاوزة موبايل.. عيلة مهملة.. اوعى تديها يا حاج؟!.
- عم صيام (مبتسماً): يا سلام.. شوفى طارق ودماغه.. عيل مفرود بصحيح.. مش هايف زى ناس؟!.
- طارق: عيب عليك يا حاج.
- عم صيام: تعجبنى يا واد.. صحيح عرفت تربّى يا صيام.
- طارق: بمناسبة ساعة الرضا دى يا حاج.. عاوز 3 آلاف جنيه؟!.
- عم صيام: نعم ياخويا؟!.
- طارق: عاوز أجيب موبايل.. هدية لعلياء.. عيد ميلادها كمان يومين.
- عم صيام: علياء مين؟!.
- منى (ساخرة): علياء صاحبته.. سبب هيافته!.
- عم صيام (بفزع): يا نهار هايف!.