- عم صيام: الكلام دا كان زمان.. دلوقت ما عدش.. ما انت عارف يا عزت بيه.
- عزت: يا راجل إحنا فى أيام مفترجة، مشى له الطلب.. ينوبك فيه ثواب.
- الشاب: أنا خريج زراعة وبقى لى شهور بدور على شغل مش لاقى.. قلت أعمل مشروع تسمين عجول.. وعرفت إنكم بتدعموا الحاجات دى فى وزارة الزراعة.
- عم صيام: وانتو هتفضلوا عايشين ع الدعم لإمتى.. إيه مش هتتفطموا أبداً؟!.. مفيش ميزانية.. عندنا عجز.
- عزت (مستهجناً): بدال ما تساعده بتقول له الكلام دا؟!
- عم صيام: عاوزنى أساعده ع الضلال فى الشهر الكريم.. دا حتى ربنا يحاسبنى.. بص يا ابنى.. فكك من حدوتة الدعم والكلام دا.. ادعم نفسك بنفسك.. إحنا فى رمضان.. اعمل لك عربية فول وكام قدرة على شوية سلاطات هتلم فلوس قد كده.. وتبقى حليت مشكلتك بعيد عننا.
- الشاب: بقول لك ما معييش حاجة.. هشترى عربية فول بكام.. وأجيب باقى حاجتها منين؟!
- عم صيام: أجّر يا أخى.. اتصرف!
- الشاب (بحزن): يعنى مفيش حل؟
- عم صيام (ضاحكاً): إنت زعلان منى دلوقتى.. بس بكره تدعى لى.
- الشاب (بتهكم): أدعى لك؟!
- عم صيام: طبعاً.. (وهو يمد يده للسماء): هتقول الله يكرمه عم صيام.. فطَّمنى.. وعلمنى أدعم نفسى بنفسى.
- عزت: مفيش فايدة!
- عم صيام: إنت هتعوم على عوم العالم الواطية.. إيه مفيش فايدة دى.. ما أنا اديتكم الفايدة.
- الشاب: بعد إذنكم!
- عزت: اتفضل يا ابنى.. ربنا يسهل لك الأمور.
- عم صيام: يا سلام.. فاز ابن الإيه بالدعوة دى.. بقول لك يا عزت بيه.. المكنة طلعت قماش ولا لسه؟!
- عزت: مفيش جنيه نزل.. المكافآت والحوافز.. كله متأخر.
- عم صيام: دا إيه الهم دا.. هُمّا مش عارفين إن إحنا فى رمضان.. ورمضان بيحب الصرف.
- عزت (ساخراً): غريبة.
- عم صيام: إيه الغريب فى كده؟
- عزت: الكلام اللى كنت بتقوله للشاب اللى كان هنا من شوية.
- عم صيام: الوضع مختلف.. الحكومة ما بتجبيش علينا.. دى فلوسنا.. أُمّال إحنا بنشتغل ليه.. مش عشان نقبض؟.. ما قدامك أهه.. ساعة وأنا بوجع قلبى مع الواد اللى كان هنا.
- عزت: وانت عملت له حاجة؟!
- عم صيام: نصحته.. كان عاوز بقرة اديته جمل.. النصيحة عند العرب بجمل.. فيه أحلى من كده؟
- عزت (ساخراً): إيدك فرطة!
- عم صيام (وهو يفتح رسالة على الموبايل): أبشر يا عزت بيه.. زودوا كل فرد فى التموين 3 جنيه.
- عزت: أنا ما عنديش بطاقة تموين!
- عم صيام: انت بتتكلم جد؟
- عزت: ربنا غانينى.. بسيب التموين للى يستحقه.
- عم صيام: هو فيه حد مستحق التموين قد الموظفين؟!.. وبعدين هى 3 جنيه دى زيادة.. دا المفروض على رمضان يغرقونا سكر ورز وزيت وشاى.
- عزت: ما عشان فيه ناس عندها بطاقات وهى مش محتاجة.. الدعم مش بيوصل للى يستحقه.
- عم: صيام: إنت هتغنى لى بكلام المسئولين.. كل حاجة الميزانية لا تسمح.. عندنا عجز.. شوية شوية هتقول لى «ادعم نفسك بنفسك».