أول شيء لازم تقيم مشاعرك إنت تجاه الحضانة، إيه الشيء اللى عايز طفلك يخرج بيه من الحضانة؟ إيه أهم شيء طفلك محتاجه فى البرنامج اليومى للحضانة؟ هل إنت بتشعر بالتردد والصعوبة تجاه إنك توديه؟ فده هيأثر عليه سلبيا وهيوصله كلامك عن خوفك وترددك لإنك توديه وهيحسسه بالقلق، لذلك طالما قررت لازم تتكلم بإيجابية قدامه عن الموضوع، وتبقى واثق إنه هيبقى مفيد جد ليه.
لازم تاخد وقتك فى إنك تتعرف على الحضانات اللى فى منطقتك، وتعوده كمان على جو الحضانة قبل ما يدخلها.
ممكن تاخده زيارة لحضانات جنبك، وتقعد وياه وقت هناك.. بهدف إن المكان يبقى مألوف بالنسبة له.. كل ما المكان كان مألوف للأب والأم كل ما الطفل تقبله.
وإنت موجود هناك هيبقى فى فرصة تاخد فكرة عن "مؤهلات وتدريب المدرسين، نظام الحضانة، الوجبات، الظروف اللى بتحصل هناك".. كده هيبقى عندك خلفية كاملة عن الجو اللى هيقعد فيه الطفل.
لازم تعوده ينام بدرى ويصحى بدرى، بحيث يقدر "ياخد وجبة خفيفة، يروح الحمام، يبقى هادئ كده وهو بيجهز نفسه لإنه يروح الحضانة"، لإن التسرع بيخليه يقلق ويتضايق.
بالليل لازم تدى له فكرة بطريقة غير مباشرة عن إن بكرة فى حضانة، زى مثلا "تحب نحط تفاح ولا موز في الوجبة بتاعة الحضانة بكرة؟"، "طب إنت ناوى بكرة تلعب لعبة إيه فى الحضانة؟"، بتخليه وكأنه بيحط خطة لنفسه وبيقرر هيعمل إيه، فيصحى الصبح عارف برنامجه ومش محتاج تقنعه لأنه هو اللى قررها.
لازم تتحمل مسؤولية إنك تقعد معاه فى أول فترة دخوله الحضانة كل يوم، وتفضل وياه لحد ما يبقى مرتاح للمكان والمدرسين، وتكون فى مكان ثابت يقدر يشوفك فيه، بتقرأ كتاب مثلا، من غير ما تلف حواليه عشان يبقى مركز مع مدرسه، والمدة اللى هتقعد معاه فيها ممكن من أسبوع لشهر أو 6 شهور، حسب الطفل ده اجتماعى وبيتعامل مع غرباء بسرعة ولا لأ.
لما هتيجى تسيبه وتخرج لازم تعرفه إنك خارج، رايح مثلا تجيب آيس كريم وهتعدى بعد الظهر تاخده معاك، وإذا تشبث بيك ممكن تدى له لعبة مثلا وتقول له خلى بالك منها لحد ما أرجع آخدها منك.. وكأنك حملته مسؤلية، وهو هيحب فكرة إنك بتعتمد عليه جدا.
حاول ديما تأكد جواه فكرة إنه خرج برة نطاق البيت وراح الحضانة، لأنه بيكبر وبينمو.. فلازم تحييه ذهابا وإيابا وتلاحظ كل التغييرات اللى بتظهر عليه، هل عنده حماس يروح؟ اسمع لكلامه وإحساسه.
كمان حاول تقوى علاقتك بالمدرسين.. وتتأكد إنه فيه حد بيحبه، سواء زميل أو مدرس أو دادة هناك، بيلجأ ليهم لما يحب.
فكرة إنك تاخد الطفل تحطه فى الحضانة وتسيبه وتمشى شيء مُرعب للغاية، وكلنا عيطنا وكرهنا إنه يحصل لينا كده، وإحنا نفسنا لو روحنا مكان غريب وسابونا فيه هنخاف.
ياريت كل الأمهات الجدد يبقى عندها وعى وتحاول تطبق ده، الأمر بسيط ومهم للغاية، ندى لولادنا جزء من وقتنا ونساهم فى تربيتهم تربية صح.