متجوز وبحب اتنين غير مراتي.. أعمل إيه؟

أنا متزوج ولديّ طفل، متزوج جواز صالونات في ظروف صعبة بعد وفاة والدتي، أحببت زميلة لي أثناء الخطوبة وماقدرتش أرتبط بيها لإن كان صعبان عليّ أسيب خطيبتي.
ومرت الأيام وماقدرتش أقطع علاقتي بحبيبتي في العمل، حتى بعد زواجها لم تنقطع العلاقة، وكانت حياتي صعبة في البيت وماقدرتش أحب زوجتي، وماكانش فيه تفاهم بالمرة لأن كان طبعها صعب، هي عصبية وأنا كمان عصبي وكانت الخناقات كتير.
وفي أثناء العمل كانت علاقتي بحبيبتي تسوء جدا، وانقطعت العلاقة بيننا وتعرفت على أخرى وأحببتها، وبعد ذلك رجعت لي حبيبتي الأولى.
وأنا الآن مشتت بين الثلاثة، مش عارف أحكي دلوقتي أكتر من كده.. شكرا للرد.

new.life


أكيد إنت مش متوقع مني أديك نصايح إزاي تحافظ على التلاتة في وقت واحد.
أو حتى تخليك مع اتنين وتبعد عن التالتة، وأكيد برضه أي حد عنده عقل أو شيء من المنطق هيقول لك لازم ترجع لمراتك أم ابنك، ولو مش عشانك يبقى عشان الولد، وكل الكلام المعروف ده.
لكن أنا عاوزة أتكلم معاك في حاجة تانية، إنت محتاج حاجة ومش لاقيها في مراتك، وده اللي بيخليك تدوّر عليها برة، واللي عاوزاك تسأل نفسك عليه هو إيه الحاجة دي.
إيه الحاجة اللي ناقصاك؟ يا صديقي زميلتك اللي في الشغل مش حب حقيقي، ولو كانت حب حقيقي ماكنتش لما علاقتكم هتسوء تجري تتعرف على واحدة تانية وتحبها، أو تسيبها وترجع لزميلتك.
تعالى نفكر سوا إيه اللي إنت محتاجه وبتدور عليه عند الستات التانية.
هل مراتك من وقت ما خلّفت اهتمامها بيك قل مثلا؟ أو يمكن إنت محتاج لاهتمام وعواطف ورومانسية وكده؟ يا ترى عصبية مراتك مالهاش حل وإنت بتدور على حد هادي تقعد معاه وتريّح أعصابك وتحس إنك فرحان ومبسوط في وجوده؟ يا ترى الاتنين دول بينك وبين كل واحدة فيهم علاقة؟ ولا كل اللي بينكم إنكم بتروحوا وتيجوا وتتكلموا وتخرجوا وتنبسطوا وتمسك إيديها في الشارع وخلاص؟
أول طريق لحل مشكلتك هو إنك تكتشف إنت ليه بتعرف زميلتك في الشغل أو صاحبتك الثانية، إيه اللي بيخليك عاوز تعمل علاقة في السر أو تحب شخص تاني؟ يمكن بتحس وقتها إنك حر أكتر واتحررت من مسئوليات البيت والجواز.
فيه ناس كده يحبوا دايما يتمردوا على الواقع، أصل عصبية مراتك مش سبب أبدا، وخصوصا إنك ماقلتش عيوب تانية، يعني لو لاقيت زوجة مافيهاش عيوب غير العصبية يبقى إنت في إيدك كنز وإنت مش مقدّره، كمان ماتنساش إن الستات جواهم ردار، الردار ده بيعرف وبيحس أحيانا لو جوزها على علاقة مع حد تاني، عمرك ما فكّرت إن شك مراتك فيك أو إحساسها إنك بتعرف واحدة تانية ممكن يكون سبب من أسباب عصبيتها.
صديقي.. عاوزاك تعرف إنت عاوز إيه بالظبط، يعني مثلا تقول أنا محتاج شوية رومانسية وحنيّة، أو محتاج حد يسمعني ويفهمني، أو محتاج من وقت للتاني أكسر روتين حياتي.
أول ما تعرف إنت عاوز إيه بالظبط، هات مراتك من إيديها واقعدوا في الصالون، وقول لها أنا محتاج كذا كذا كذا، ونفسي ألاقيه معاكي بدل ما أدوّر عليه برة.. شركاؤنا في الحياة مش أطباء روحانيين هيفهموا من نظرة عين، ولا هيشموا على ضهر إيديهم، إحنا محتاجين إيه، أحيانا لازم نكون مباشرين وواضحين جدا، عشان نقدر نفهم بعض.
اعرف إنت عاوز إيه واطلبه من مراتك، ولو ماقدرتش تديهولك، اتجوز غيرها أو عليها وماحدش هيلومك، إنما بالشكل ده، إنت بتظلمها وبتظلم نفسك وبتظلم بنات الناس معاك.

لو عايز تفضفض لنا دوس هنا