أنا بنت عندي 19 سنة مشكلتي إني مندفعة جدا من ناحية الارتباط، مش باعرف أفرّق إن كان ده حب ولا إعجاب ولا عطف، ارتبطت أكتر من مرة عاطفيا أنا مش عارفة أنا بارتبط ليه، لكن بمجرد لما اللي أنا أرتبط بيه يقول لي بحبك، وإنه مش قادر يعيش من غيري أبدأ أنا أبعد عنه، وأدخل في علاقة جديدة، لما يقول لي بحبك، وأبعد، وأدخل للمرة التالتة في علاقة. أنا باحس إني متقلبة عاطفيا، وكل صحابي بيقولوا لي إن شخصيتي غريبة ومتقلبة، وإني مريضة نفسيا، أنا فعلا تعبت.. عايزة أعرف إمتى أحب؟ وإزاي؟ وأعرف إن ده حب إزاي؟ fokak
عندي إحساس إنك مش عايشة مع باباكي لسبب أو لآخر، أو بيغيب عنك كتير، عادة غياب الأب أو عدم وجود الأخ في حياة البنت هو اللي بيخليها طول الوقت بتحاول تدور على تعويض عنهم في شخص، لكن الشخص ده اللي بيدخل حياتك كحبيب أو صديق أو حتى ممكن يكون بيتسلى، إنت مش بتلاقي فيه اللي إنتي بجد بتدوري عليه؛ عشان كده بتسيبيه وبتدوّري على شخص تاني يفهمك، اندفاعك ما لهوش حل غير إنك تفكري مع نفسك.. إنتي فعلا بتدوري على إيه؟ على تسلية لوقت فراغك؟ ولا حب حقيقي وارتباط رسمي؟ ولا شخص يملى فراغات حياتك ووقتك وأنتي وحظك؟، ولما تعرفي أنت عاوزة إيه كويس، هتبطلي تندفعي وتبصي لكل ولد بتقابليه على إنه مشروع ارتباط، لكن هتتعاملي مع الجميع كأصدقاء لغاية ما تلاقي اللي إنتي فعلا بتدوري عليه. بتسألي إزاي أفرق بين الحب والإعجاب والعطف.. يمكن يحصل انجذاب من أول نظرة، ويمكن يعجبك زميلك في الجامعة عشان شكله ظريف وطيب أو رجل أوي في كل تصرفاته، ويمكن تعطفي على واحد دايما بيبص عليكي من بعيد، وعينيه بتقول لك إنه بيحبك، ويمكن تعلقه بيكي يخليكي إنتي كمان تنجذبي له لفترة. ده كله مش حب.. الحب مش مجرد نظرة.. ولا ميعاد.. ولا شهر واحد أو سنة.. الحب علاقة قوية.. الوقت هو مقياسها الوحيد.. يعني الاستمرارية. عدم استمرار علاقاتك لفترة طويلة أكبر دليل على إنها مش حب، هتقولي طب وازاي أعرف من الأول إنها مش حب حقيقي؟، وهو لازم نستنى سنين عشان نعرف الحب الحقيقي؟ هاقول لك ما تضحكيش على نفسك وتسمي أي علاقة "حب". سمي المواقف باسمها الحقيقي، يعني لو شاب قرب منك يبقى معجب بيكي، ولو إنتي كنت منجذبة له تبقى برضه معجبة به، لما تتعودوا على وجود بعض، وما تقدروش تبعدوا عن بعض، يبقى إنتم اتعودتوا على بعض. لكن لما يتقدم لك.. ويخاف عليكي.. ويتعب عشان يوصلك.. يبقى بيحبك، لما تضحي بحاجات كتير عشان خاطره، وتكوني عارفة عيوبه، ومستحملاها تبقي إنتي كمان بتحبيه. طبيعي إنك تحسي إنك متقلبة، وكمان الناس تشوفك كده؛ لأن علاقاتك كتير ومش بتستمر، بس حتى لو إنتي كده تقدري تغيري ده، وما تقلقيش من موضوع المرض النفسي، كلنا مرضى نفسيين وكل واحد عنده عقده، بس إنتي تمام، إنتي بس محتاجة شوية حنان وحب في حياتك، محتاجة تحسي إن فيه حد بيرعاكي وواخد باله منك، بس بالأفعال مش بالكلام، وعشان كده رغم إن اللي بيقرب منك بيقول لك: "بحبك وما أقدرش أعيش من غيرك"، بتبعدي عنه، عشان الحب الحقيقي مش في الكلمتين دول، الحب الحقيقي أفعال.. إمتى بقى تحبي؟ نصيحتي بلاش تدوري على الحب، أو تسألي نفسك عن الوقت؛ لأن الحب دايما بييجي في الوقت اللي ما بنكونش مستنينه فيه.. وازاي تحبي؟ لما يكون حب حقيقي قدام كل الناس وفي الخير، وقتها سيبي نفسك على فطرتك، وخليكي صادقة معاه، ومع نفسك، وهتلاقي نفسك بتعرفي إزاي تحبي أجمل وأكبر حب في الدنيا.. وتعرفي إزاي إنه حب؟ هتعرفي إنه حب لما تلاقيه حب أوي بيعاند الزمن والناس والتقاليد والصعوبات، ومافيش حاجة قادرة تقف قصاده. ويا رب تلاقي الحب اللي بتحلمي بيه.