عزومة رمضان.. تخطيط وإتيكيت

صلة الرحم من الحاجات اللي بنؤكد عليها جداً في رمضان أكتر من أي وقت تاني...
علشان كده بنلاقي إن في رمضان العزومات بتكتر...
وخصوصاً إن رمضان السنة دي جاي في الصيف، وبالتالي بيكون عندنا وقت أكتر إننا نزور بعض...
وطبعاً الاستعداد لاستقبال الضيوف لازم يتم بأحسن شكل زي ما أمرنا رسولنا الكريم صلى الله عليه وسلم في الحديث الشريف: "من كان يؤمن بالله واليوم الآخر فليُكرم ضيفه".
وده بيكون في حدود إمكانياتنا وقدراتنا، لكن المهم إننا نبذل أقصى ما في وسعنا علشان نكرم ضيوفنا ونسعدهم ونحسسهم إننا مهتمين بهم وسعداء بوجودهم...
ولأن ست البيت هي أكتر واحدة بتكون شايلة هم العزومة...
لأنها دايماً بتفكّر إزاي تكون عزومتها مميزة جداً، وترضي كل الموجودين...
فكرنا إننا في عدد النهارده نكون معاكِ وإنتِ بتحضّري لعزومتك...
وهنقول لك على الخطوات اللي المفروض تعمليها من الألف للياء...
* اختيار يوم العزومة
اختيار يوم العزومة خطوة مهمة جداً وإنتِ بتحضري لأي عزومة؛ لأن كل ما كان اختيارك ليوم العزومة مبني على أساس صح، كل ما ده هيريحك أكتر وإنتِ بتحضّري لها، وعلشان تختاري ميعاد العزومة صح، لازم تحطّي في حسابك حالتك الصحية والمزاجية في اليوم ده، علشان تقدري تتحملي التعب والإجهاد اللي هتتعرضي له وإنتِ بتحضّري للعزومة.
كمان الميعاد لازم يكون مناسب مع الضيوف اللي هتعزميهم، يعني ما ينفعش مثلاً إنك تختاري يوم في نصف الأسبوع؛ لأن ده هيكون مُتعب جداً لضيوفك وخصوصاً لو كانوا بيشتغلوا؛ لأنهم مش هيكون عندهم الرغبة أو القدرة إنهم يزوروا حد بعد ما يرجعوا من الشغل بعد يوم طويل ومرهق في الشغل، وبعد زحمة المواصلات اللي هيتعرضوا لها وهما راجعين من الشغل.
علشان كده من الأفضل إنك تعملي العزومة في يوم إجازة؛ لأن ده هيكون أفضل ليكِ وهيديكي وقت أكبر للتحضير، وكمان هيكون مناسب لضيوفك؛ لأنهم هيكونوا جايين وهما في حالة استرخاء وراحة، وبكده هتقدروا تقضوا كلكم يوم لطيف.
* اختيار الضيوف
اوعي تستغربي إني باقول لك إنك هتختاري الضيوف؛ لأنك فعلاً لازم تختاريهم كويس جداً علشان عزومتك تعدي بسلام، لإنك لو مثلاً هتعزمي أكتر من عيلة مع بعض لازم تراعي جداً إن الأفراد اللي هتعزميهم يكونوا على وفاق مع بعض، ويكونوا بيحبوا يقعدوا مع بعضهم، يعني بلاش تعزمي الناس اللي إنتِ عارفة إن فيه بينهم دايماً مشاكل أو بيختلفوا مع بعض في وجهات النظر كتير؛ لأنهم ممكن يحطوكِ في مواقف محرجة كتير أثناء العزومة، ومش هتعرفي تتصرّفي ساعتها؛ لأنك مش هتكوني عارفة تيجي في صف مين لأنهم طبعاً كلهم ضيوفك وفي بيتك.
وبعد ما تختاري ضيوفك كويس، لازم تبلغيهم بميعاد العزومة قبلها بيومين أو ثلاثة على الأقل علشان يلحقوا يستعدّوا ويعملوا حسابهم، وما تنسيش كمان إنك تكلّمي ضيوفك علشان تأكّدي عليهم العزومة قبل ميعادها بيوم.

حددي قائمة الأكل وشوفي إيه الحاجات اللي محتاجة تشتريها من السوق
* تحضير قائمة بالأكل
قبل العزومة ب4 أو 5 أيام، لازم تعدّي مع نفسك وتعملي قائمة بأصناف الأكل اللي هتقدّميه يوم العزومة، وطبعاً يُفضّل إن الأصناف دي تختاريها على أساس حاجتين:
أول حاجة: إنك تختاري أصناف ما تكونيش هتجرّبيها لأول مرة يوم العزومة، يعني حاولي تختاري أصناف تكوني عملتيها قبل كده، وتكوني متأكدة إنك بتعمليها كويس، علشان ما تجيش يوم العزومة وتلاقي نفسك مرتبكة، ومش عارفة تعملي إيه.
تاني حاجة: إن الأصناف اللي هتعمليها تكون على قدر الإمكان بترضي كل الأذواق، يعني لو هتعملي صنف فيه لحمة، لازم تعملي صنف تاني فيه فراخ علشان اللي ما بيحبش حاجة يلاقي حاجة تانية ياكلها.
وعموماً فيه حاجات أساسية لازم تكون موجودة في أي عزومة، زي السلطة واللي ممكن تعملي منها أكتر من نوع زي السلطة الخضراء ومعاها سلطة طحينة أو سلطة الكول سلو، والشوربة طبعاً من الأطباق الأساسية وخصوصاً في رمضان، وكمان صنفين أو ثلاثة خضار، وطبعاً النواشف مهمة جداً؛ لأن كل الناس بتحبها وبتكون سهلة في تحضيرها زي البانيه والكفتة.
بعد ما تحددي قائمة الأكل اللي هتعمليها يوم العزومة، تبدئي تشوفي إيه الحاجات اللي محتاجة إنك تشتريها من السوق؛ علشان كل حاجة تكون موجودة عندك في البيت من قبل العزومة، وما تتفاجئيش يومها إن في حاجة ناقصاكِ.
* استعدي من قبل العزومة بيوم
طبعاً كل ما بتقرّبي من يوم العزومة، بتحسي أكتر إنك مرتبكة، وإنك مش هتلحقي تعملي الأكل، وإن كل حاجة هتطلع مش مظبوطة معاكِ، علشان كده يُفضّل إنك تبدئي في التحضير للعزومة من قبلها بيوم، علشان أعصابك تهدى وتحسي إنك مستعدة كويس.
ولازم تعرفي إن اليوم السابق ليوم العزومة بيكون في نفس أهمية يوم العزومة؛ لأنك ممكن تحضّري فيه الحاجات الأساسية اللي ينفع إنك تحضّريها وتشيليها في الثلاجة من غير ما يحصل لها حاجة.
يعني ممكن تعصجي اللحمة المفرومة اللي هتستخدميها في صواني الجلاش والمكرونة بالبشاميل، وتتبلي الفراخ واللحمة اللي هتعمليها في الصواني، وكمان ممكن تحشي السمبوسك وتشيليها في الثلاجة، ولو هتعملي محشي ممكن إنك تحشيه وتشيليه في الثلاجة، ويوم العزومة مش هتكوني محتاجة إلا إنك تضيفي له الشوربة أو المية وتسويه على النار، كمان ما تنسيش إنك تحضري نوع أو نوعين عصير علشان تقدميهم.
* ترتيب وتنظيف البيت
ترتيب البيت وتجهيزه لاستقبال الضيوف ممكن تعمليه من قبل العزومة بيوم، لكن لو عندك حد يساعدك في ترتيبه يبقى من الأفضل إنك تنظفيه يوم العزومة، علشان يفضل محتفظ ببريق النظافة، وما تنسيش وإنتِ بترتبي البيت تحطي بعض الزهور أو النباتات في الأماكن اللي هيقعد فيها ضيوفك.
* اختيار الملابس المناسبة
حاولي تختاري الملابس اللي هتقابلي بها ضيوفك، قبل العزومة بيوم أو يومين، ونظفيهم واكويهم وخليهم جاهزين عندك، وراعي في اختيارك للملابس إنها تكون خفيفة ومش مقيدة في الحركة علشان ما تضايقكيش أو تحسسك بالحر، وممكن تلبسي عباية شيك أو جيب وبلوزة فضفاضة.
أما بالنسبة للحذاء اللي هتلبسيه فلازم تراعي إن كعبه يكون مش عالي أوي، علشان تكوني حرة في حركتك.

حضّري السفرة قبل ما الضيوف توصل
* رتبي سفرتك واظهري تميّزك
ما فيش شك إن ترتيب السفرة بطريقة حلوة شيك بتأكّد على إن صاحبة العزومة ست بيت شاطرة ومتميّزة وبتعرف في أصول الذوق والإتيكيت، علشان كده وإنتِ بتحضري لعزومتك الجامدة، لازم تعملي حسابك إنك تسيبي مساحة من وقتك قبل ما الضيوف توصل علشان ترتبي السفرة كويس، وتبقي متأكدة إن ما فيش أي حاجة ناقصة..
ودلوقتي هاقول لك إزاي ترتّبي سفرتك بالطريقة الصحيحة:
- افرشي السفرة بمفرش شيك: أول حاجة تعمليها إنك تحطّي مفرش شيك ونظيف على السفرة قبل ما ترصّي عليها الأطباق، وبعد كده ممكن تحطّي في نصف السفرة فازة فيها زهور، بس بشرط إنها ما تكونش عالية أوي ولا الزهور اللي فيها تكون طويلة أوي علشان الناس تقدر تتكلّم مع بعضها أثناء الأكل من غير ما يكون فيه عائق في النصف، وممكن إنك تستغني عنه وتحطّي مكانه طبق شيك وفيه فاكهة.
- ترتيب الأطباق: ودي بترصيها بترتيب معين، يعني بتحطي الأطباق اللي هيتاكل فيها الوجبة الرئيسية الأول وده بيكون كبير ومسطح، وفوقيه بتحطي طبق مسطح تاني أصغر من الأول في الحجم، وده علشان الضيوف ياكلوا فيه السلطة، وبعد كده بتحطي فوقيهم طبق غويط للشوربة.
- ترتيب الشوك والمعالق والسكاكين: بعد ما بترصّي الأطباق بالطريقة اللي قولنا عليها بتبدئي ترصي الشوك والمعالق والسكاكين...
ونبدأ بالسكينة واللي بتحطيها على يمين الطبق؛ بحيث إن الناحية الحادة للسكينة هي اللي تكون في اتجاه الطبق.
بعد كده بتحطّي معلقة الشوربة بعد السكينة على مسافة صغيرة منها بحيث إن السطح المقعر للمعلقة يكون لفوق.
في الناحية الشمال من الطبق بتحطي الشوكة، بنفس الاتجاه اللي حطيتي به الملعقة، وممكن إنك تحطي شوكتين واحدة للسلطة وواحدة للأكل العادي، ولو هتقدّمي سمك مع الأكل يبقى بتحطي شوكة وسكينة خاصة بالسمك على السفرة، أما بقى لو كان الأكل اللي هتقدّميه مش محتاج لسكينة يبقى ممكن تحطي شوكة الأكل مكان السكينة على الناحية اليمين للطبق.
وراعي وإنتِ بترصي الشوك والسكاكين والمعالق، إن نهاياتهم كلها تكون على مستوى واحد.
- ترتيب الأكواب والكاسات: بتحطّي كوب خاص للماء فوق الطبق على الناحية اليمين، وبتحطي معاه كأس أو كأسين علشان تحطي فيهم العصاير اللي هتقدّميهم مع الأكل زي قمر الدين والعرقسوس والكركديه، وطبعاً الكوبايات دي بتكون مليانة قبل ما الضيوف يقعدوا على السفرة.
- وفي الآخر ما تنسيش تحطّي أكتر من "ملاحة" اللي بيكون فيها الملح والفلفل في منتصف السفرة علشان لو حد من الضيوف احتاج إنه يزوّد ملح للأكل.
* لو عدد ضيوفك كبير
لو كنتِ عازمة عدد كبير من الضيوف وما عندكيش مساحة في سفرتك لهم كلهم، ممكن تتغلبي على المشكلة دي بطريقة بسيطة جداً وهي إنك تعملي بوفيه مفتوح، تحطّي فيه كل أصناف الأكل اللي هتقدّميها، وعلى فكرة دي كمان طريقة شيك جداً، ومش هتقلل من شياكة عزومتك في أي حاجة، بس أهم حاجة إنك توزّعي أصناف الأكل بطريقة متفرّقة، يعني بلاش تحطّي صنفين أكل شبه بعض جنب بعضهم.
وراعي كمان وإنتِ بترتبي البوفيه إنك تحطي في الأول الأطباق الفاضية اللي ضيوفك هياخدوا فيها الأكل، وبعد كده الفوط، وبعد كده رصّي أصناف الأكل ومع كل صنف حطي الحاجة اللي هيغرفوا بها الأكل في الأطباق، وآخر حاجة هتحطيها على البوفيه هي الشوك والمعالق والسكاكين، وممكن تخصصي ترابيزة تانية صغيرة تحطي عليها المية والعصير.
وبكده يبقى إنتِ استعديتي للعزومة كويس جداً...
بخطوات سهلة ومريحة هتخليكِ واثقة من نفسك قدام ضيوفك...
ويا ريت تتابعينا في العدد الجاي علشان هنعرف مع بعض إتيكيت الضيافة...
سواء لو كنتِ صاحبة العزومة أو لو كنتِ معزومة...
سلام،،،