"فتة الكوارع" بالخل والثوم

صديقتنا العزيزة جدًّا "منامينو" النهارده بتشارك معانا لأول مرة بوصفة جامدة..
تعالوا نشوف "منامينو" هتقدّم لنا إيه..
السلام عليكم يا أجمل "بص وطل" وأجمل أصدقاء..
أنا أول مرة أشارك في الفقرة دي، بس أنا حبيت أقدّم أكلة تقيلة شوية، وهي "فتة الكوارع"..
يلّا بقى نشوف هنعمل إيه...
المقادير:
كوارع عجالي "خلي بالك إنك تشتري الكوارع الصغيرة؛ لأن طعمها بيبقى أحلى"
أرز "الكمية على حسب العدد"
2 معلقة كبيرة ما ورد
2 ثمرة بصل كبيرة
2 ثمرة جزر
ملح وفلفل
ورق لاورا
حبهان
قرفة
زبدة
ثوم
خل
عيش محمص بالزبدة أو في زيت زيتون
الطريقة:
1- أحضري الكوارع، واغسليها كويس جدًّا بالملح والفلفل ويُفضّل لو سبتيها منقوعة في ماء فيه ملح وفلفل لمدة ساعتين أو ثلاثة.
2- بعد كده اسلقيها على النار، ومعاها البصل وفصوص ثوم صحيحة والجزر والحبهان وورق اللاورا، بس خلي بالك إنها بتعد وقت طويل شوية على النار.
3- في أثناء ما الكوارع بتستوي على النار، ابدئي حضري الرز، وأول حاجة تعمليها إنك تغسليه كويس، وبعدين تشوّحيه في الزبدة على النار لغاية ما يبقى مفلفل والميه اللي فيه تنشف، وبعد كده ضيفي ماء الورد ومعلقة صغيرة قرفة مطحونة وملح، وقلبيه كويس على النار، وبعد كده اسقيه بشوربة الكوارع وسيبيه يستوي.
4- بعد كده ابدئي اعملي التقلية؛ وهي عبارة عن رأس ثوم مفرومة وبتشوحيها على النار في زيت زيتون أو زبدة لغاية ما لونها يبقى ذهبي وبعدين ارفعيها من على النار، وضيفي عليها كمية مناسبة من الخل، وممكن تبشري عليها ثمرة طماطم.
5- الخطوة الأخيرة اللي هتعمليها إنك تجيبي الصينية، وتحطي طبقة خفيفة من الرز، وبعدين عليها العيش، وبعدين باقي الرز، وبعدين تخلي الكوارع من العظم وترصيها على الرز من فوق، وبعدين ترشي تقلية الثوم عليها وتحطيها في الفرن شوية يعني مش أكتر من ربع ساعة علشان الكوارع تتشوح معاكِ.. وبالهنا والشفا.
ويا رب ما كونش طوّلت عليكم مع إني عارفة إنها أكلة شعبية ومعروفة، بس أنا حبيت أشارك.
وفي النهاية نحب نشكر صديقتنا العزيزة على وصفتها اللذيذة دي..
ونتمنّى إنك تجربيها.. وتبعتِ تقولي لنا على النتيجة..
وما تنسيش لو بتعرفي تعملي أكلة وشاطرة فيها جدًّا..
إنك تبعتيها لنا على صفحة..
"ورينا شطارتِك"
علشان ننشرها باسمك
مستيينكم،،،