شوربة الشوفان ومقلوبة بالباذنجان في عزومة الأسبوع على "بص وطل"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
****************************
عصير الليمون بالفانيليا
عصير الليمون بالفانيليا
المقادير
6 حبات ليمون
1/4 كيلو سكر
10 أكواب ماء
كيس فانيليا
الطريقة
اغسلي الليمون كويس وقشّريه، واضربيه في الخلاط مع السكر والماء والفانيليا، وبعد كده صفي العصير وحطيه في الثلاجة وعند التقديم صبيه في الكاسات وممكن تزينيه بشرائح الليمون الرفيعة.
****************************
سلطة الكول سلو
سلطة الكول سلو
المقادير
نصف كرنبة "وممكن تستخدمي الكرنب الملون سواء الأحمر أو البنفسجي"
2 ثمرة جرز متوسطة الحجم
كوب أو كوبين زبادي
مايونيز
سكر
الطريقة
1- اغلسي الخضار كويس، وأحضري الكرنب وقطعيه لشرائح رفيعة، وابشري الجزر.
2- اخلطي الزبادي مع المايونيز والسكر، والكمية بتاعة السكر والمايونيز بتكون حسب رغبتك، بس لازم تاخدي بالك إن الخليط لازم يكون تقيل شوية.
3- أحضري طبق التقديم، وقلّبي فيه خليط المايونيز والسكر والزبادي مع الكرنب والجزر، ودخليه الثلاجة شوية قبل التقديم.
*****************************
شوربة الشوفان
شوربة الشوفان
الشوفان ده من الحاجات اللي لها فوائد كتيرة جداً للصحة والجسم، وكمان شوربة الشوفان من الشوربات اللي لها طعم مميز ولذيذ جداً..
المقادير
2 كوب شوربة فراخ، وممكن تضيفي كمان قطع فراخ مسلوقة
كوب شوفان
كوب كريمة لباني "موجود في السوبر ماركت"
ملح وفلفل أبيض
الطريقة
1- سخني الشوربة على نار متوسطة.
2- بعد ما الشوربة تسخن كويس، ابدئي ضيفي الشوفان مع التقليب المستمر، وفي أثناء التقليب ضيفي بالملح و الفلفل.
3- بعد كده ضيفي الكريمة مع التقليب المستمر، وبعد كده صبي الشوربة في أطباق التقديم وقدميها سخنة وبالهنا والشفا.
*****************************
المقلوبة على الطريقة الخليجية
المقلوبة على الطريقة الخليجية
المقادير
كيلو صدور فراخ أو لحم ضاني "حسب الرغبة"
كوبان أرز "منقوع في ماء مملح لمدة ساعة"
ثمرة باذنجان كبيرة
2 ثمرة بصل مفرومين
فص ثوم
ملح + كمون + قرفة + كاري + حبهان
كوب حمص
زيت
الطريقة
1- أحضري صدور الفراخ أو اللحمة واغسليها كويس، وقطعيها لمكعبات كبيرة شوية، وحطيها على النار مع كوب ماء والثوم والقرفة والملح وسيبيها لغاية ما تستوي والمية اللي فيها تنشف خالص.
2- صفي الأرز من المية اللي منقوع فيها، وحطيه في وعاء على النار وحطي عليه كمية من المية تغطيه وتبليه بالملح والحبهان والقرفة والكاري، وسيبيه لغاية ما يتسلق وبعد كده صفيه من الميه اللي فيه.
3- أحضري الباذنجان واغسليه كويس، وقطعيه لشرائح بالطول من غير ما تقشريه، وحمريه في الزيت.
4- أحضري وعاء وحطي فيه كمية من الزيت وحطيه على النار علشان تحمري فيه البصل، ولما البصل لونه يبقى ذهبي ضيفي عليه الملح والقرفة والكمون والكاري، وبعد كده ضيفي الحمص وقلبيه مع البصل.
5- أحضري صينية وادهني قاعدتها بمقدار معلقتين زيت، وبعد كده حطي 1/3 كمية الأرز، وبعد كده حطي اللحمة أو الفراخ وخليط البصل والحمص، وبعدين رصي شرائح الباذنجان، وفي الآخر خالص بتحطي باقي الأرز، وسيبيه على نار هادية لمدة 20 دقيقة.
6- شيلي المقلوبة من على النار واقلبي الصينية في طبق التقديم، وبالهنا والشفا.
*****************************
كيكة البرتقال
كيكة البرتقال
مجموعة كبيرة من أصدقائنا طلبوا منا إننا نقدّم طريقة عمل كيكة البرتقال، وعلشان كده حبينا نقدّمها في العزومة، يا رب تجربوها وتعجبكم..

المقادير
2 كوب دقيق منخول
2/1 معلقة صغيرة ملح
كوب سكر
كيس بيكينج باودر
2/3 كوب زيت
3 بيضات
3/2 كوب عصير برتقال
ملعقة كبيرة بشر برتقال
الطريقة
1- قبل ما تعملي أي حاجة، شغلي الفرن علشان يسخن في الوقت اللي بتحضري فيه العجينة.
2- اخلطي الزيت مع السكر، واضربي البيض مع بشر البرتقال، وضيفيه على خليط الزيت.
3- اخلطي الدقيق المنخول مع البيكينج باودر، وضيفيه بالتدريج على خليط الزيت والبيض، واعجنيهم كويس مع بعض، وبعد كده ضيفي عصير البرتقال وقلبي كل المكونات مع بعضها كويس جداً.
4- أحضري الصينية أو القالب اللي هتعملي فيه، وادهني قاعدته سمن أو زيت، وحطي طبقة دقيق، وبعد كده صبي العجين بس خلي بالك وإنتِ بتصبيها إنك تصبيها بشكل متواصل، وبعد كده دخليها الفرن الساخن وسيبيها لمدة 20 دقيقة، وبعد كده خففي النار شوية وسيبيها لغاية ما تستوي، وبعد كده قدميها وبالهنا والشفا.
وفي النهاية نتمنى إن عزومة النهارده تكون عجبتِك..
وتجربي كل الوصفات وتبعتِ تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتك"
وإلى اللقاء في العزومة الجاية،،،