أنا متمرد

نعم أنا متمرد فالوضع أصبح أكثر من أن يحتمل وأن نظل نتمسك بحدود اللياقة واللباقة فى الحديث عن الوضع الذى نعيشه، وأخيراً وجدنا ضالتنا فى كلمة التمرد التى باتت هى الأمل الأخير لخروجنا من المأزق التى تعيشه مصر على جميع النواحى، وبما أننا فى مصر فسأسرد بعض المعطيات التى تبرر تمردى كفرد فى المنظومة الرياضية وكمواطن مصرى عادى.
أنا متمرد عشان مفيش فى مصر مسئول قادر ياخد قرار يحسسنى إن احنا فى بلد محترمة، ليها كيان، وبالعكس إحنا بنكذب على نفسنا إن احنا عندنا منظومة رياضية ننفق عليها الملايين، ولكن انظر إلى ترتيبك فى أى من الأولمبياد أو كأس العالم وأنت تعرف حجمك الحقيقى فى قاع العالم.
أنا متمرد عشان احنا بنصرف ملايين على كرة القدم ولم ننجح أن نحتل فيها مركزاً متقدماً على مستوى العالم، فى حين أننا نهمل ألعاباً أخرى تحقق لنا إنجازات ولدينا فيها أبطال بحجة واحدة من ساعة ما اتولدت مش باسمع غيرها، وهى كذبة «اللعبة الشعبية الأولى».
أنا متمرد عشان عندنا أسهل حجة يطلع اللاعبين أو المدربين بيها أول ما يخسروا هى أن الإعلام بيهاجمنا، وهو ما بدأت الدولة نفسها تقوله فى النظام اللى ماسك البلد حتى لحظة كتابة هذه السطور، ولكن لو حد فيهم اشتغل بدون النظر للإعلام -ده لو هو عاوز يشتغل أصلاً- ببساطة كان ممكن يشتغل من غير ما يبص للإعلام ويكون نجاحه وعمله هما الدافعين لبقائه.
أنا متمرد عشان الجمهور مسلّم عقله وبيعمل لنفسه أزمات زى ما اقتحم الملاعب فى ماتشات الأهلى والزمالك الأخيرة، بدون ما يكون للماتشات دى قيمة، وهو نفس اللى عمله النظام اللى حاكم مصر برضو لما نزل أنصاره للشوارع لتهديد مظاهرات 30 يونيو.
أنا متمرد عشان شايف موارد بلدى بتستنزف سواء رياضية أو اقتصادية، ومحدش عنده دم وعايز يقول كده حرام.
أنا متمرد عشان لسه بلدنا ماشية بالمحسوبية ومبدأ إن محدش ينفع ينجح غير بالواسطة والمحسوبية، يعنى مثلا كل الناس عايزة واسطة عشان ولادها يدخلوا قطاعات الناشئين فى الأندية، ده مثل بسيط ما بالك باللى بيحصل فى طلبات الوظايف للشباب اللى مش لاقى شغل؟
أنا متمرد عشان المسئولين اللى بيتقاتلوا على مناصب المفروض أنها تطوعية بدون أجر، وواحد زى رئيس اللجنة الأولمبية بيشتكى مصر وممكن يوقف النشاط الرياضى بالكامل عشان لائحة تنظم الانتخابات، والمشكلة إن احنا مفيش كبير، وهو نفس اللى بيحصل فى البلد من استقواء كل طرف بالخارج سواء دول عربية خليجية أو استقواء بالقوى العظمى.
أنا متمرد عشان لحد دلوقتى مش عارفين نحترم بعض، وعشان محدش فينا خايف على الدم وبقينا كل واحد بيستقوى على التانى بأهله وعشيرته، رغم أننا المفروض كلنا أهل فى بعض.
أنا متمرد عشان واحد كان محروم إنه يحكم زى ممدوح عباس فى الزمالك مثلا، ومش عاوز يسيب الحكم فى النادى، وواحد زى حسن حمدى فى الأهلى برضو اشتكى للجنة الأولمبية الدولية عشان يستمر فى حكم النادى وماشبعش بعد 11 سنة رئيس للأهلى، وهو نفس اللى بتمر بيه مصر فالإخوان مش عايزين يسيبوا الحكم، واللى قابليهم اللى لسه متوغلين فى كل مؤسسات البلد برضو مش عايزين يسيبوا الحكم. وفى الآخر أنا هتمرد ومعظم شباب مصر هيتمرد، بس الأهم إن محدش يسرق مننا تمردنا زى ما جم ناس بدقون وسرقوا مننا ثورتنا، عشان أنا عاوز أشوف يومين حلوين فى البلد دى، لأن أنا خدت قرار إنى مش هسيبها وهعيش عمرى كله فيها.