زيارة لدار أيتام .. ياريت الكل يشارك

كتبت: حنان جلال
هحاول أحكي اللي شفته من غير أي فزلكة و لا كلام كبير ...الحقيقة المرة و راء مؤسسات الخير في مصر ..زي ما كل حاجة فيها فساد دي كمان فيها !!!... أنا رحت دار الوفاء و الولاء ...هما فعلاً محتاجين مساعدتنا جداً ...الموضوع طلع زيه زي البيزنس بالظبط ...في حيتان كبيرة بتاكل الصغير ...دور رسالة و مصر الخير و الأورمان و بنت مصر مكوشين على كل الاهتمام و التبرعات ...حاطين نفسهم في الضوء قوي و حتى يوم اليتيم بقى سبوبة ليهم لوحدهم و اللي مش عندهم يضيع ....لأ كفاية بقى كده عليهم ....أنا عن نفسي ما كنتش عارفة الطريق و أديني لقيت ناس تانية تستاهل و ما حدش سائل فيهم و غيرهم كتير علشان مش مشهورين وبيطلعو في الاعلانات زي رسالة وغيرها !!! ...أما رسالة فكفاية أوديلهم الورق القديم عشان مشروع إعادة التصنيع ده مشروع مفيد برضة .
.. الناس دي بتشتغل بجد من غير شهرة او اعلانات محتاجين مساعدتنا بجد
أنا رحت قابلت مدام / جيهان مديرة الدار ...كانت فرحانة قوي إن حد جه يساعد ويقف جنب اولاد وبنات الدار ....أنا ما أنكرش إني كنت داخلة بسرعة زي مفتش البوليس ....بس لما دخلت و قعدت اتغير الحال بالنسبة ليه ...و حسيت الموضوع مش بس فلوس ...أهم منها الاحساس بالناس دي ...الست بتعاني من مشاكل رهيبة... و كمان هية زعلانة قوي من اللي اتكتب على الفيس بوك إن الأولاد بيناموا من غير عشاء ....قالتلي أنا مش ممكن أسيبهم من غير أكل رغم أنها مقدرة إن اللي كتب كده كان قصده يساعد طبعاً.....بس الموارد بتقل و الظروف وحشة ...الناس بعد الأزمة الاقتصادية اللي البلد فيها ...قللوا تبرعاتهم ...ده غير مشاكلها مع الحي والإتاوات !!! ...الدنيا ما فرقتش كتير بعد الثورة !! لسه الفساد موجود و خصوصاً وزراة الشئون الاجتماعية .
ارجوكم لازم كلنا نكون ايد واحدة ونحاول نساهم ونساعد ناس بتشتغل لاطفال محرومين من كل حاجة حتي الصحة لان فيهم اطفال كتير معوقين وعنوان الدار هو
مؤسسة الولاء و الوفاء لرعاية الأيتام المعاقين
مدام / جيهان حنفي
38 شارع عبدالله ابن الطاهر متفرع من أبو دواوود الظاهري(من ناصية بنك HSBC ) متفرع من مكرم عبيد – مدينة نصر الدور الأول
ت: 22742510
رقم الحساب: البنك التجاري فرع عباس العقاد 01490105671
اللي عايز يروح البنك على طول يروح و اللي عايز يتعب شويه و ياخد ثواب و يزورهم ويقعد مع الاطفال يا ريت يروح !! احنا كمان محتاجين نغسل روحنا ...و ممكن نجيب الاشياء العينية أكل أولبس حتي لو لبس قديم كل واحد يقدر يساعد بأي شيء ...هما أعمار مختلفة و بنات و ولاد ...الأكل يكون حاجة طرية زي البسبوسة و توينكي مثلاً عشان مش بيعرفوا ياكلوا زينا ..أو تموين زي شنط رمضان مثلا ...الحالات اللي شوفتها تخلي أي حد يقول الحمدلله على نعمة الصحة و كل النعم اللي إحنا ناكرينها ...سامحنا يارب ...أنت كبير قوي قوي
و الناس اللي بيراعوهم دول ثوابهم عظيم قوي
برجاء النشر و جزاكم الله خير !