هناك سيل من الانتقادات اللاذعة لبعض قرارات البنك المركزى.
تقول إحدى الصديقات:
أسوأ خبر وصل لى والموضوع طلع بجد مش إشاعة، واتأكدت منه فعلاً، إن محافظ البنك المركزى أصدر قرار النهارده واتبعت لكل البنوك على البريد الإلكترونى بأن الحد الأقصى للسحب النقدى خارج مصر (200 دولار) فى الشهر والشراء بالكارت (الفيزا أو ماستر كارد) 550 دولار فى الشهر خارج مصر وكمان القرار بقى على البطاقتين (Debit / Credit).. واخد بالك معايا ((فى الشهر))، ده غير وقف التعامل بالdebit card المصرى بره مصر نهائياً.
يعنى مش كفاية عليهم إنهم خسفوا بقيمة الجنيه المصرى وهتكوا عرضه.. النهارده خلوا كل المصريين اللى عايشين أو مسافرين بره مصر «شحاتين».
النهارده لو عندك مليون جنيه فى حسابك المصرى وسافرت فى إجازة انت وعيالك بره مصر ولا حتعرف تدفع الفندق ولا تشترى هدوم أو هدايا ولا تأجر عربية ولا تاكل ولا تشرب وحتتبهدلوا زيكوا زى اللاجئين لحد ما يبان لكم صاحب.
للأسف حيفضل البنك المركزى يتعامل مع المصريين على أنهم عيال صغيرة فى حضانة وهم بيوزعوا «فلوسنا» لينا بمزاجهم حتة حتة.
أنا نفسى أعرف حاجة، هم المسئولين اللى طلعوا القرار مش فاهمين أو مستوعبين حجم المصيبة وتداعيات القرار على المصريين بره مصر؟
ذنبهم إيه المصريين اللى بره مصر إنهم يدفعوا نتيجة فشل البنك المركزى فى الحفاظ على الجنيه وسعر الدولار فى السوق السوداء.
حتقول لى أصل فيه عصابات بتسافر وبتسحب دولارات من بره وبترجع مصر تبيعها فى السوق السوداء.. طيب أنا ذنبى إيه إن فيه جشع عند البعض وإن إنت فاشل إنك ترصده وترصد تحركاته وتعمل له كمين.
طيب دماغك الذَّرية إلى طلّعت القرار ده ما فكرتكش إنك لازم تدرس الموضوع وتنفذ القرار تدريجياً بعد دراسة لأبعاده وردود الفعل وتأثيره على المصريين ولّا حضرتك فاكر إنك بتلعب المزرعة السعيدة وملعون أبوهم الناس بره مصر اللى مسافر يتعالج أو مسافر يتعلم أو يتفسح ولّا انتَ ناوى تلعب لعبة «الى مش عاجبه ما يسافرش» وجوّ التخوين بتاع مؤامرة ضد البلد وكل المصريين إلى بره مصر تجار عملة واللى معاه أكتر من كارت ده عضو فى عصابة دولية.
حد يفهم محافظ البنك المركزى إنه بره مصر ال550 دولار زى ال550 جنيه عندنا علشان واضح إنه مش واعى أو مدرك حجم المصيبة.
حد يفهّم محافظ البنك المركزى إن ممكن يكون فيه مصرى دلوقتى فى مستشفى بره مصر ومش عارف يدفع بسبب قراره الحكيم.. وفيه طبعاً أمثلة كتيرة أخطر من دى.
حد يفهّم محافظ البنك المركزى إن اللى بيعمله ده «جريمة فى حق كل مصرى».
مطلوب رد وتوضيح من البنك المركزى؛ لأن قطاعاً من الناس لن يتكيف إلا بأن يفهم.
لم يكتفِ محافظ البنك المركزى بخسف قيمة الجنيه المصرى ووصوله لأدنى مستوى حتى بدأ بخسف قيمة المواطن المصرى وكرامته.