عبد اللطيف المناوي: السيدات والسادة مساء الخير ، وبدأت الدراسة ورُفعت حالات الاستعداد القصوى في ظل خوف يخشاه الجميع حكومة ومواطنين من أنتشار فيروس أنفلونزا الخنازير تأجل لأسبوع بعد جدل وحوار ثم بدأ أمس العام الدراسي الاستثنائي حسب الظروف الاستثنائية التي أحاطت بالعملية التعليمية أسئلة كثيرة على ألسنة الناس كيف تسير خطة وزارة الصحة لمكافحة انتشار الفيروس الذي يسجل حالات جديدة كل يوم وماذا عن التنسيق بين الصحة والتعليم وما الذي يمكن أن يقدمة المجتمع المدني في مسألة تمس حياة أبنائنا ومستقبلهم وما هي الإجراءات المباشرة التي يتعين على أولياء الأمور إتباعها ، ثم الحديث غير المباشر الذي أثار جدلا وشكوكاً عن ما اسماه البعض بزنس الأمصال والتربح من الأزمة التي يوجهها العالم كله ثم يعني تنصل الحكومة من مسئولية أية أعراض جانبية لمصل الوباء وهل تنصلت فعلا أنفلونزا الخنازير بين التهوين والتهويل في صحة المصريين الليلة في وجهة نظر الليلة ومعنا الدكتور حاتم الجبلي وزير الصحة وأبدأ معاك بالكلمتين الأخيرتين التهوين أو التهويل وهل إحنا في خانة التهويل كما يعتقد البعض د/ حاتم الجبلي – وزير الصحة: طبعا التغطية الإعلامية الضخمة يمكن هي اللي خلقت حالة من القلق يمكن المبالغ فيه بعض الشيء لكن في نفس الوقت القلق أفضل من التهوين من القضية لأن التهوين يمكن أن يؤدي إلى كارثة إنما التهويل يمكن أن يجعل الناس في حالة اهتمام والموضوع بالتالي تفادي مشاكلة وبالتالي بذل أقصى جهد في مواجهته ، فانا أميل أكتر ناحية التغطية الإعلامية الضخمة عن إن أنا أبسط الموضوع .. إنما هو كمرض – ناخد الناحية العلمية – مرض انفلونزا عادية حتى هذه اللحظة يُعالج بالأدوية العادية ومُخفضات الحرارة والسوائل والراحة لمدة أسبوع عبد اللطيف المناوي: أنا حكلم حضرتك في ده لكن خلينا في مسألة التهوين والتهويل يعني قبل التسجيل احد الزملا بيسألك وهو بالرغم انه على مستوى ثقافي عالي إنما بيسألك أودي ولادي المدرسة ولاّ ما أوديهمش د/ حاتم الجبلي: السؤال ده أنا بتسئله ألف مرة في اليوم عبد اللطيف المناوي: من كافة المستويات د/ حاتم الجبلي: من كل الناس .. طبعاانا بقول ودوا اولادكم الدارس لسبب بسيط هو النهاردة قرر كده انه مش هيودي ولاده المدارس وقرر كده وقال لما اشوف الاسبوع الاول هيعملوا ايه واوديه في الاسبوع التاني فممكن يحصل العدوى في الأسبوع التاني يبقى هو خسر أسبوع وكل مانخش ع الشتا كل ما احتمالات العدوى بتزيد إنما في نفس الوقت عايز اطمنهم ان احنا كحكومة بنتابع الموقف يوم بيوم مش عايز اقولك ساعة بساعة عشان ما ابقاش ببالغ إنما على الأقل بيجيلنا تقرير مرتين أو تلاتة في اليوم لو احنا لاحظنا في أي وقت من الاوقات ان فيه ظاهرة غير طبيعية سواء في منطقة او في مدينة او في محافظة او في مجموعة من المحافظات عندنا القرارات جاهزة حتى لو تطلب الام ان احنا نوقف الدراسة بالكامل هنوقف الدراسة بالكامل عبد اللطيف المناوي: قبل كده هسالك دكتور جبلي هل هناك مؤامرة من الحكومة على اولياء الامور لاعادة الدراسة وتحصيل المصروفات ثم بعد ذلك تنفض المسالة وكل عام وانتم بخير د/ حاتم الجبلي: الكلام دا طبعا غير حقيقي جدا الحكومة ملزمة انها توفر العام الدراسي لازم العام الدراسي يتم مش ممكن نضيع على الولاد سنة طالما ان الموقف الحالي لا يتطلب ذلك ، الموقف الحالي لا يتطلب ذلك ، مؤامرة ايه ماهي المصاريف اللي هياخدوها هيحطوها في المدرسة وهيصرفوا بيها على المدرسة زي ما وزير التعليم ادى تعليماته لكل المدارس في مصر لاتوجد مؤامرة على الاطلاق انما القلق البالغ والمبالغة في ردود الافعال زي ماحضرتك قلت قد تؤدي بالناس الى افكار غير سليمة بعد فترة انا اعتقد خلال نهاية اكتوبراوبداية نوفمبرالامور هتستقر جدا جدا عبد اللطيف المناوي: من يتحمل اتخاذ قرار ببدء الدراسة مين اللي اتخذ قرار عودة الدراسة ؟ د/ حاتم الجبلي: الحكومة بالكامل عبد اللطيف المناوي: ليس وزير التربية والتعليم وحده وليس وزير الصحة وحده د/ حاتم الجبلي: وبناء عل تقارير قادمة من الجهات المعنية سواء الجهات دي الصحة او التربية والتعليم او جهات رقابية عبد اللطيف المناوي: اذن هو قرار الحكومة بالكامل وليس قرار الافراد ؟ د/ حاتم الجبلي: قرار بالاجماع عبد اللطيف المناوي: هل يمكن التاكيد على انه ليس هناك أي شكل من الاشكال الخلافات او الاختلافات في المعالجة ما بين وزارتي التربية والتعليم والتعليم العالي ووزارة الصحة من طرف اخر ؟ د/ حاتم الجبلي: لا ماعتقدش هو كل ماهنالك في بعض لااحيان بيحدث انه لسه التناغم مش بنفس الدرجة اللي متوقعهم على مستوى القاعدة ، مستوى القمة مفيش أي مشكلة احنا على اتصال مع الدكتور هاني هلال وهو اول مرة في شهر مايو اللي فات وانا اجتمعت مع عمداء كليات الطب واجتمعت مع رؤساء الجامعات كلهم دا في مايو واحنا بنوضب للي بيحصل النهاردة من مايو اللي فات بالنسبة للتربية والتعليم احنا بنشتغل معاهم من يوليو واجتمعت انا مع الدكتور يسري في 4 اغسطس و19 اغسطس مع سيادة الريس في سبتمبر يعني كان فيه اجتماعات مستمرة على مستوى القيادة حتى في حضور الدكتور يسري مع رئيس الوزارة في الاسكندرية يوم 12 اغسطس ..لا 12 اغسطس دا كان حج.. كان فيه تنسيق على اعلى مستوى وحضرت معاه ال video conference من حوالي 3 اسابيع ففيه تنسيق مع الدكتور يسري على كل الخطوات انما ايه بقى مثلا وانا ببمر يعني جم بتوع الصحة قالوا انا قلت العزل في مدرسة من المدارس حصلت في مدرسة واحدة فدا مديرة المدرسة كلمته مديرةالمنطقة بتاعته قالت احنا اللي نقول مش الصحة اللي تقول الكلام دا صغير قوي وامره سهل يعني انما على مستوى الاستراتيجية وعلى مستوى الدولة ككل ..لا.. عبد اللطيف المناوي: قرار عودة الدراسة اتخذ وفيما يبدوانه قرار صحيح ؟ د/ حاتم الجبلي: هل تجد بلد في الكرة الارضية اوقفت الدراسة؟ عبد اللطيف المناوي: طيب السؤال هو هل الاجراءات اللي تم اتخاذها على مستوى المدارس والجامعات في مصر بشكل عام هي اجراءات مطمئنة لك كمسئول اول عن الصحة في هذه المدارس ؟ د/ حاتم الجبلي: اللي احنا خدناه اجراءات متفق عليها عالميا نحن لم نخترع هذه الاجراءات انما مطمئنة فاعليتها هتبان خلال الفترة القادمة ولو اني مع شايف حضرتك اتوقع ان عدد الحالات هيزداد مع افتتاح المدارس في كل دول العالم الحالات بيحصل فيها زيادة على طول يعني عندك انجلترا مثلا في اول اسبوع في الدراسة سجلوا 2500 حالة تاني اسبوع من الدراسة سجلوا حوالي 5200 حالة تالت اسبوع سجلوا 9000حالة الاسبوع اللي منتهي يوم الجمعة اللي فات سجلوا 14 الف حالة ففيه زيادة انما فيه ملايين الطلبة في انجلترا ال14 الف مش هيوقفوا ملايين فدي نقطة ، الناس هتقولك احنا غير انجلترا اه احنا غير انجلترا ايجابا وسلبا الجو عندنا مش برد زي انجلترا فبالتالي انتشار الفيروس مش هيبقى اكتر اه عندنا مشاكل في المناطق المتكدسة انما عبد اللطيف المناوي: ومشاكل خاصة بالنضافة ومشاكل .... د/ حاتم الجبلي: بس هقولك حاجة يعني في مروري على المدارس انا مريت على 6 او 7 مدارس اعتقدان الرسالة وصلت كل الناس اللي اقدر اقولهلكم بوضوح جدا كل واحد بيعمل في المدرسة فيه تباين في الفهم اه محتاج ان احنا نتابع واستفدنا من شوية حاجات في الزيارة مثلا يعني انا طلبت من ناس عندي انه بيتمرنوا او بيوعوا مديري المدارس ان هما كمان يوعوا مدرسي العلوم لان مدرس العلوم دا اسهل واحد يقدر يشرح يعني ايه فيروس فاحنا دي مكانتش على بالنا بس دلوقت هنركز عليها اكتر بناء على رد الفعل اللي شفناه مثلا احنا استفدنا في الصحة من المرور دا انت عارف كل الناس تقولك لو حد عنده حالة مشتبه فيها وديها الحميات ..لا.. احنا طلعنا قرار بنقول فيه ان الطفل او الطالب يحول الى اقرب مستشفى والمستشفى دي تتعامل معاه اذا كانت حالته بسيطة يا اما بتقرر علاجه في البيت بالادوية العادية بدون تاميفلو انما اذا لقت ان الظروف في البيت لاتسمح بعزله في اوضة لوحده بتوديه بتخليه في المستشفى اللي هو فيها انما اذا حالته تدهورت بعد يومين او تلاتة فيجب ان تحوله للحميات عبد اللطيف المناوي: جزء من التعامل مع انتشار الفيروس او خطر انتشاره هو الاعدادالكافي والصحيح للمعلم للزائرة الصحية او للزائر الصحي هل بتعتقد ان المدرسين بعضهم بيتكلم بيقول احنا مش مهيئين بعد هل هناك دورات تمت هل هناك اعداد د/ حاتم الجبلي: لا احنا دربنا حوالي 41 % من مديري المدارس عبد اللطيف المناوي: وليس المدرسين د/ حاتم الجبلي: لا المدرسين لا دول مليون مقدرش ادربهم انا في خمس او ست اسابيع انما المفروض اللي بيتعلم بينقل المعلومات لكن كل مدرسة راحت لها شنطة الشنطة دي فيها بوسترات في كل المدارس عبد اللطيف المناوي: نسبة المشاركة كام في المية ؟ د/ حاتم الجبلي: كنا بنعمل فحص من حوالي اسبوع كان 18% انما اقدر اقولك بمرور النهاردة مفيش مدرسة واحدة ناقصة لكن محتاجة زيادة قطعا ..احنا كنا فاهمين ان المدرسة عبارة عن مبنى واحد لكن فيه مجمعات المدارس فمجمعات المدارس دي بتبقى تلت او اربع مباني قيدوهم شنطة واحدة فطبعا قليلة فاحنا هنكثف قوي البوستر، كذلك في الحتة دي في الشنطة دي الصغيرة اللي هما بيصوروها وبيوزعوها على المدرسين فيه اسطوانة ممغنطة تتحط على أي كمبيوتر بيشرح لكل واحد مخاطر المرضوازاي يحمي نفسه منه وما الى ذلك هدفنا في دي احنا كصحة بنوحد المعلومات محدش يفتي اصل هنا بقى في الاجواء اللي زي دي الناس بتفتي وبتخترع اساليب جديدة وفي نفس الوقت بتطلع اشاعات كمان يعني عندك مشكلة في ان الناس تقول كلام غلط او الناس تقول معلومات غلط فاحنا بنحاول بتوحيد المعلومات وتوحيد مصدر المعلومة ان احنا نقلل بقدر الامكان من هذا عبد اللطيف المناوي: هل لديكم او ايه هي مساحة الاطمئنان لديكم ان لديكم القدرة على الفعل لد ى الدارس على مستوى مصر على ادارة والتعامل مع هذه الازمة قد ايه احساسكم بالارتياح ؟ د/ حاتم الجبلي: بص مقدرش اقولك أي تغير بيحصل في المجتمع اقدر اقولك عندي نسبة من الاحساس انما دا ها يبان من المتابعة شهر او الشهر ونص اللي جايين يعني احنا بنتابع يوم بيوم وعندنا الية عمل مسجلين فيها ونفعتنا جامد في انفلونزا الطيور فاهمين ازاي نتعامل على هذا المستوى الضخم يعني احنا من ناحية قدرتنا على رصد أي تغير بيحصل في المجتمع اقدر اقولك ان احنا عندنا احنا في الصحة عندنا قدرة عالية جدا جدا ودي العامل المحدد اللي هتاخد على اساسه القرار انما ان انا اقولك ان مثلا كل مدرس او كل مدير مدرسة فاهم القصة زي ما المفروض تتفهم 100% ..لا طبعا .. عايزة وقت على الاقل شهر كمان عبد اللطيف المناوي: توقعاتكم ايه فيما يتعلق بالاسابيع الاولى من الدراسة هل تتوقعوا انه يحصل حالة ازدياد والازدياد دا نسبته قد ايه تقريبا ؟ د/ حاتم الجبلي: اتوقع انه طبعا هنجد حالات اصابات مفيش نقاش يعني لكن ما اعتقدش ان الاصابات في شهر اكتوبر هتبقى اعدادها مرتفعة افرض مثلا ان احنا سجلنا في عشرات المدارس، ايه عشرات المدارس مقارنة ب44 الف مدرسة يعني مقدرش اعطل 17 مليون طالب عشان مثلا الفين او 3 الاف طالب محدش في الدنيا عمل كده ويبقى قرار خاطئ جدا انما انا لو رصدت ظاهرة غير طبيعية... عبد اللطيف المناوي: ايه هي الظاهرة غير الطبيعية ؟ د/ حاتم الجبلي: 3 حاجات .. اولا الحالات اللي اتحولت مستشفيات عددها كبير ومن 5 الى 10% منها يبقى فيها التهاب رئوي عبد اللطيف المناوي: الحالات القصوى ؟ د/ حاتم الجبلي: اه اللي هي متحولة للمستشفيات دي اول حاجة الحاجة التانية انه يبقى عندي نسبة وفيات في المجتمع من الحالات المسجلة عندنا في الوزارة من 1 الى 2% الحاجة التالتة ان الاعداد بتتضاعف مش بتزيد ومتوالية هندسية في اقل من اسبوع عبد اللطيف المناوي: يعني 2 4 8 16 ؟ د/ حاتم الجبلي: بالظبط كده اعرف ان فيه حاجة عندي غلط ..اتنين من التلت عوامل دول يخلوني ارفع العلم الاحمر سواء لمنطقة او لمدينة او لمحافظة او لمجموع المحافظات اوللدولة كلها عبد اللطيف المناوي: التعامل بشكل جزئي وفقا لكل حالة ؟ د/ حاتم الجبلي: اه ..اه عبد اللطيف المناوي: احنا بعيد عن الحالة دي قد ايه ؟ د/ حاتم الجبلي: لحد دلوقت مش عايز اقول عايز امسك الخشب يعني انا مابقولش دا عن ثقة لان المرض دا اخطر حاجة فيه انه مالوش نمط معين ممكن وانت في احسن احوالك زي ماحصل مع جنوب افريقيا لغاية نص اغسطس جنوب افريقيا النهاردة فيها 90 حالة وفاة و13 الف واحد في اقل من شهر فمالهاش كبير يعني انما لحد دلوقت احنا طبعا الحمد لله عبد اللطيف المناوي: نرجع مرة تانية للاستعدادات الصحية الخاصة بالمدارس ..المدارس منتشرة في كل مصر وهي مرتبطة بالمنظومة الصحية ايضا في مصر السؤال هو الى أي مدى المنظومة الصحية في مصر السؤال هو الى اي مدى المنظومة الصحية قادرة على التعامل مع هذه الازمة في حالة مالو حدثت بمعنى انه لو النهاردة في مدرسة في الوادي الجديد ولا لو حصل في مدرسة في مطروح ولا في وسط القاهرة هل هناك من الخدمات الصحية المناسبة والسريعة القادرة على التعامل مع هذا الموضوع ؟ د/ حاتم الجبلي: اعتقد اه في الاطار المعقول عبد اللطيف المناوي: يعني ايه الاطار المعقول ؟ د/ حاتم الجبلي: يعني هقولك مثلا لو انت النهاردة عندك اصابات في حدود عشرات الالاف اه تقدر تتعامل بسهولة يعني مفيش مشكلة لكن لو عندك اصابات بالملايين طبعا مفيش أي نظام صحي في العالم يقدر يشيلها انما يعني الازمات بتخليك تتصرف بطريقة ملائمة مع الظروف انما النظام الصحي في مصر النهاردة وانا بكلم حضرتك اعتقد انه انت تقدر تحكم الاداء في الفترة اللي فاتت اللي هما اخر 5 شهور وتقدر تحكم في الاداء بتاع انفلونزا الطيورماليش دعوة بالفراخ ماتحاسبنيش على الفراخ انما حاسبني انى انا عندي 87 حالة انفلونزا طيور فيهم 27 حالة وفاة السنادي منهم 36 حالة السنادي فيهم فقط 4 حالات وفاة انا النهاردة عندي نسبة وفيات في انفلونزا الطيور اللي هو كل واحد يطلع في الجرايد يقولك فشل الحكومة في انفلونزا الطيور انا بقولك من ناحية الصحة احنا حققنا شئ بتدرسه منظمة الصحة العالمية نسبة وفيات تعادل سدس نسبة الوفيات العالمية عبد اللطيف المناوي: دا مرتبط بايه بالكشف المبكر ولا بالوعي ؟ د/ حاتم الجبلي: بالوعي طبعا احنا قدرنا النهاردة عن طريق التركيز اعلاميا على نشر هذه الثقافة وخطورة هذا المرض و..و..و..ان كل ام بتلاقي ابنها تعبان او هي نفسها تعبانة بتجري جري على اقرب دكاترة وفي نفس الوقت الدكاترة عندنا خلاص مابقوش زي زمان يقولك خلاص دا مش عارف ايه ..لا.. بياخدوا الحالة بشكل جدي جدا انت عندك السنادي 36 حالة جديدة فيهم 4 حالات وفيات، السنادي كان فيه 7 حالات في الصين ال7 ماتوا وفيه 7 حالات في فيتنام ال7 ماتوا احنا عندنا 36 حالة وفيات 4 بس فطبعا دا يقولك ان النظام الصحي قادر على انه يستوعب هذا النوع من المرض عبد اللطيف المناوي: هل حالة الخوف الزائد من التعامل بشكل التهويل بانفلونزا الخنازير هل دا مرتبط بوجود انفلونزا الطيور وبالتالي الخوف من خروج الجيل التالت؟ د/ حاتم الجبلي: اه طبعا التحذيرات اللي احنا شرحناها في اكتر من اجتماع لمجلس الوزرا من مايو الماضي وبالتالي طبعا احنا لازم نبقى اكثر حيطة لانه لازالت انفلونزا الطيور اللي هي H1N1 متوطنة في مصر ومتوطنة بدرجة كبيرة وهيبقى عندنا حالات كتيرالشتا دا دي توقعاتي انما ان احنا نخلط بين الاتنين طبعا العملية في منتهى الخطورة عبد اللطيف المناوي: بمناسبة موضوع التوطن عايز حضرتك تشرح لي التناقض الحادث ما بين ان عندنا 36 حالة و4 حالات وفاة ويعتبر هذا نموذج بتدرسه منظمة الصحة العالمية ؟ د/ حاتم الجبلي: من ناحية البشرالتاني احنا بنتكلم على الفراخ بقى عبد اللطيف المناوي: احنا رقم 2 او 3 في العالم متوطن فيها انفلونزا الطيور ؟ د/ حاتم الجبلي: احنا رقم 3 في العالم انما انا بتكلم الفراخ متوطن في الفراخ مش في البني ادمين والتوطن في الفراخ انا ليا وجهة نظر واضحة جدا وبقولها في كل اجتماع وانا على الهوا دلوقت اذا صناعة الدواجن العشوائية ماخرجتش من الدلتا هيفضل عندنا المرض دا طول العمر لازم صناعة الدواجن العشوائية تخرج من الدلتا وتروح على الظهير الصحراوي الغربي في البحيرة اوالشرقي في سينا شمالا او جنوبا انما طول ماهي موجودة عشش واصحاب المصالح واصحاب النفوذ يعرفوا يهربوا فراخ وفيه نوع من عدم الجدية على مستوى القاعدة مابين بعض المسئولين مش هنعرف نسيطر على المرض لازم يوقف تماما التربية العشوائية في محافظات الدلتا وينقل تماما في مناطق مرفقة بنظام واحد safety by security سواء في الظهيرالصحراوي في البحيرة او في الغرب او في الشرق ناحية سينا عبد اللطيف المناوي: احنا هنفتح قوس في الحتة دي احنا بنتكلم في موضوع المدارس والخنازير ولكن هنا نقطة مهمة في الحقيقة جدا السؤال هنا انت بتتكلم عن الصناعة العشوائية الخاصة بتربية الدواجن هل انت بتضع من ضمنها التربية الخاصة لدى ربة البيت والفلاح ؟ د/ حاتم الجبلي: دي هتيجي بعدين لوانا خرجت الصناعة دي من الدلتا هي مش هتلاقي كتاكيت لكن لوانت شايف المفارخ اللي هي طالعة دي روح بلد زي "بيرنا "نفسي تجيلك فرصة تروح تزور بلد اسمها "بيرنا "في الغربية حاجة مخيفة يعني عبد اللطيف المناوي: ايه اللي في بيرنا ؟ د/ حاتم الجبلي: بيربوا فراخ عندهم 2 او 3 مليون فرخة عندهم بيتربوا في البيوت وكل حتة بط على فراخ على وز على كل حاجة واقتصاد هذه المدينة قائم على الحاجة دي ..عاوزة تخطيط واضح وعايزة تتنقل هذه المنطقة الى منطقة صحراوية فيها تماما المرافق صح وفيها الامان البيولوجي المظبوط عبد اللطيف المناوي: الكلام دا قلته في مجلس الوزرا يادكتور ؟ د/ حاتم الجبلي: لا قلته في اللجنة عبد اللطيف المناوي: ورد الفعل كان ايه ؟ د/ حاتم الجبلي: في اجراءات بتتخذ في هذا المجال القانون اللي طلع وعندك منع دخول الطيور الحية القاهرة دلوقت السيد رئيس الوزرا في القاهرة واسكندرية اكدها واعتقد هيحصل توسع والمجلس قالوا اللي عايز يقفل المحافظة بتاعته يبلغ وزير الزراعة ووزيرالزراعة هيطلعله قرارعلى طول، دا قانون .. عبد اللطيف المناوي: طيب هنرجع تاني لموضوع المدارس وصحة الاولاد في المدارس هل توزيع الكمامات او الاقنعة الواقية هل هذه مسالة يمكن ايضا ان تكون احد العوامل للتخفيف ؟ د/ حاتم الجبلي: بص انا النهاردة لما قعدت ابص على المكتب اللي بيقعد عليه كل طالب هتساعد جدا القصة دي هتساعد ليه بقى هو طبعا الخوف وانا لقيت ام ذكية جدا في احد المدارس اللي زرتها قالت لي قالت لي ممكن العيال يعدوا بعض كل واحد يقلع ويبدل مع التاني ولقيت واحد النهاردة دمه خفيف جدا في احد المدارس مركبه على عينه وسايب العين التانية يعني العيال انت عارف بقى كل واحد بيلعب انما هو ميزته ان لوالولد عطس رذاذ العطسة مش هيروح الفصل ولو واحد عطس قريب منه برضه مش هيستنشق كميات كبيرة عبد اللطيف المناوي: يعني هو يحمي نسبيا وانت توصي بان يتم استخدامه ؟ د/ حاتم الجبلي: اه .. انا باوصي في بعض الدول بتقولك لا منظمة الصحة العالمية بتقولك فعاليته فيها كلام فيها في الحد من المرض بس منظمة الصحة العالمية معندهاش الخبرة على مستوى الكرة الارضية زي ما احنا بنمر النهاردة هي نفسها محدش عارف هو فاعل ولا مش فاعل على مستوى المرض بهذا الشكل فانا اخد الاحوط عبد اللطيف المناوي: طيب بالنسبة اذا ماكان هناك تلميذ او طفل او طالب اصيب ، القرار ان الفصل بيغلق اسبوعين واذا انتشرت المدرسة بيغلق المدرسة كلها اسبوعين السؤال هو مرة اخرى هل ينبغي على الطالب او التلميذ او المصاب ان هو يروح على المستشفى او يروح الحميات ولا يقعد في البيت واذا كان القرار ان هو يقعد في البيت هل بتعتقد ان لدينا من الامكانيات والوعي والاشراف الطبي الممكن ما يسمح بان احنا نخرج نتجاوز المحنة ؟ د/ حاتم الجبلي: ناخدها حاجة حاجة دلوقت انا لقيت طالب عنده حرارة وعنده رشح وعنده صداع او مكسر فعنده اعراض الانفلونزا باخده بوديه اوضة العزل في المدرسة بتشوفه الزائرة الصحية اللي بتستدعي الطبيب كل 3 مدارس فيه طبيب مخصص ليها واذا لقوا الطبيب هيتاخر نتيجة ظرف معين في مدرسة تانية يروح لاقرب مستشفى فالنهاردة هذه المستشفى بييجي طبيب انف واذن او طبيب بيكشف عليه اه بيلاقي انه عنده انفلونزا عادية حرارة وصداع وشوية رشح بيساله سؤال محدد اهله هل فيه اوضة في البيت بيقدر يقعد فيها لوحده ولا لا.. قالولوه لا اهل المريض قالوله صعب دا قاعد مع اخوه في الاوضة دا لازم يروح في المستشفى حتى لو كانت حالته بسيطة في المستشفى ما بيعالجش بالتاميفلو يعالج بمخفضات حرارة وسوائل لو الحرارة استمرت 3 ايام او جاله نهجان شديد او ابتدى يكح بلغم بكميات ضخمة لازم ياخد التاميفلو ويتعمله اشعة على صدره ويتأكد ان هو معندوش التهاب رئوي ويحتاج الى مضادات حيوية عبد اللطيف المناوي: قبل التاميفلوهل بيتم اختبار ما اذا كانت العينة ايجابية اوسلبية ؟ د/ حاتم الجبلي: اه طبعا .. بتؤخذ بس مش لازم تؤخذ في كل واحد لكن افرض انك جيت في مدرسة اول عيل سخن دا اللي بتاخد منه عينة لكن ممكن تبتدي معاه التاميفلو وهو لسه النتيجة ماطلعتش طلعت النتيجة سلبية بتوقف التاميفلو عبد اللطيف المناوي: دا بعد 3 ايام ؟ د/ حاتم الجبلي: لا.. افرض احنا النهاردة بنتكلم على الاصابات الاولى غير الاصابات المتكررة ، الاصابات الاولى اللي هو اول اسبوع اول 10 ايام فاحنا عاوزين هل فعلا فيه H1N1 في المنطقة دي ولا لا فبنحلل انما افرض النهاردة زي انجلترا عندهم في الاسبوع 5 الاف 6 الاف حالة مش هحلل لل5 الاف او ال6 الاف طالب كل اللي باعمله ان انا بعالجه بالادوية العادية وخلاص بعتبر ان انا عندي H1N1 وفيه حاجة اسمها الانتشار المجتمعي community transmit ion خلاص انما في المرحلة الاولى طبعا لازم احلل ... عبد اللطيف المناوي: اذن الحالات الاولى في الاسبوع الاول من الدراسة هيتم التحليل ؟ د/ حاتم الجبلي: اه عبد اللطيف المناوي: طيب هنا السؤال قبل ما نستكمل الخطوات التالية هل هناك امكانية للتحليل على مستوى محافظات مصر ام ان المسالة مركزية ؟ د/ حاتم الجبلي: لا بص احنا عندنا 5 معامل معتمدة عندنا في القاهرة وعندنا في الاسكندرية وعندنا في المنيا اعتقد في الاقصر او اسوان وبعدين اضفنا في شرم الشيخ والغردقة عشان السياح انما عندنا خطة بتقول لو حصل ضغط جامد جدا هنبتدي نستخدم معامل الجامعات 6 جامعات اتحددوا دلوقت اولهم جامعة المنصورة انما لو احتاجنا اكتر هنستخدم ال17 جامعة الحكومية عندنا ليه احنا مانعينه من القطاع الخاص لان القطاع الخاص ممكن يحصل زي ماحصل بالظبط في بني تميم لما قالوا ان فيها تيفويد وماطلعش فيها تيفويد دكتور غير مؤهل حلل ل10 انفار طلع التتر بتاع التيفويد طبيعي وقال ان دا مش طبيعي وراح طابع ورقة وموزعها في البلد فانتشرات الاشاعة تخيل بقى دا لو عملته في H1N1 مش هزار بقى دي مسالة امن دولة دي امن قومي اه هتجيب الدكتور وهتقفل عيادته بس هتكون الدنيا ادربكت فلازم اكون انا متحكم في دي تماما عبد اللطيف المناوي: اذا مسالة التحليل تظل في الحكومة ولا تفعل في أي مختبر ؟ د/ حاتم الجبلي: فيه بقى القطاع الخاص بيحلل انفلونزا A او Bتحليل عام لكن ما بيحللش H1N1 لو لقاك انفلونزا Aيروح يقولك روح بقى حلل في المعامل المركزية عبد اللطيف المناوي: ِA تكون اقرب انها H1N1 د/ حاتم الجبلي: بالظبط وبعدين عايز اقولك حاجة الكواشف اللي بتستخدم للبني ادم الواحد بتكلف الف جنيه تلاقي واحد عاملك تحليل ب650 جنيه ، 650 جنيه دا يبقى دكتور نصاب لا يمكن تحليل ال H1N1 لان الكواشف الواحدة ب1000 جنيه عبد اللطيف المناوي: انا هستكمل مع حضرتك الاجراءات اللي ينبغي اتخاذها مع الطفل في حالة مالو ولكن بعد هذا الفاصل القصير فاصل عبد اللطيف المناوي: السيدات والسادة اهلا بكم من جديد دكتور حاتم الطفل الذي يكتشف انه حالة في الاسابيع الاولى ايه الاجراءات د/ حاتم الجبلي: بعد ما الزائرة الصحية تشوفه وتحوله في المستشفى القريب من المدرسة او يجيله طبيب من التامين الصحي انا بقول بقى في الظروف العادية اوكي هنبعته يحلل دي اول خطوة دا في الاسابيع الاولانية بعد كده هيعتبر اذا كانت حالته بسيطة هيقول اتعالج في البيت لو عنده اوضة يقدر ينعزل فيها انما اذا كان كده الظروف ماتسمحش يقعد في المستشفى اسبوع وبعدين يرجع بعد كده بيته وبعدين يرجع بعد اسبوعين المدرسة هو دا اللي هيحصل بالظبط ، بقية زملاءه بقى بيراقبوا من قبل الزائرة الصحية عبد اللطيف المناوي: مابتقفش الدراسة يعني ؟ د/ حاتم الجبلي: لا بتقف بيبقى فيه كارت محطوط فيه عنوانه ورقم تليفونه واحنا بنفتش عليهم بطريقة عشوائية زي ما بنعمل في المطار كده عبد اللطيف المناوي: طيب هل معنى كده ان أي طفل يجيله انفلونزا في الفصل بتاعه الفصل كله يقعد اسبوعين ولا لما قبل ان يثبت ؟ د/ حاتم الجبلي: لو طلع الانفلونزا بنرجع الفصل عبد اللطيف المناوي: يعني أي فصل تطلع فيه الظاهرة دي حالة انفلونزا واضحة ايا ماكان هيتوقف فورا ؟ د/ حاتم الجبلي: لحد ما نتاكد لقينا انها انفلونزا الاولاد اللي عندهم بنمشيهم وبقية الفصل بالكامل عبد اللطيف المناوي: ممكن يقعد يوم يومين مفيش ممكن الدراسة تبقى متقطعة ؟ د/ حاتم الجبلي: عشان كده انت عندك سجل للاولاد عشان كده انا لما حد قاللي في الاول مثلا في مايو اللي فات لما سالوني في التطبيق في الاول قلت أي تطبيق في الاول لازم بيحصل فيه تساؤلات ومشاكل وكده لحد ما الامور تستقر بعد اسبوعين تلاتة تلاقي الناس كلها عرفت النظام زي ما بنراقب الناس في المطارات احنا شايفين دلوقت فوق ال2 مليون او ال3 مليون في المطارات من مايو اللي فات انما الناس بيتفتش عليها بطريقة regular وعشوائية وبنتابع .. النهاردة لو حللت الالف حالة اللي عندنا تجد انه 40% منهم اكتشفوا مبكرا و40% منهم اكتشفوا من الاتصال بدول اللي احنا لاقيناهم في المطارات يعني ال follow up وصلنا لدول مش راحوا بنفسهم ..لا .. المتابعة سجلت لا دا فيه واحد حد معاه في الطيارة طلع عنده كذا دا فيه كان معاه في المكان الفلاني وطلع عنده كذا وهكذا عبد اللطيف المناوي: ودي اهمية البطاقات اللي بيتم تسجيلها في الدخول ؟ د/ حاتم الجبلي: فيه طبعا ناس مستهترة بتكتب اسماء أي كلام وبتكتب عناوين أي كلام بس دي مش مسئوليتنا ، دي مسئولية المواطن نفسه مقولش لما اشوف دول شاطرين ولا مش شاطرين ولا حاجة هو مين الخسران في الاخر هو مين الخسران لو هو سخن وعيا ولاده مش عارف راسه من رجليه هيبقى محتاس .... عبد اللطيف المناوي: هنا هيبقى في الحالة دي الاجراء اللي بيتم مع الطفل بيتم اغلاق الفصل ليوم او يومين ؟ د/ حاتم الجبلي: ثم خلاص once الولاد رجعوا المدرسة خلاص انما اذا قعد الفصل اسبوعين خلاص محدش يرجع يعتبر كل الولاد عندهم H1N1 عبد اللطيف المناوي: طب قبل مانغلق الجزء الخاص بالمدارس هطلب منك مرة اخرى التاكيد على كيف يمكن صحة الاطفال في المدرسة ؟ د/ حاتم الجبلي: اول حاجة غسيل الايدين دي 50% من الوقاية بالمية والصابون محدش بقى يقعد يقول بجيب ديتول وبعمل مش عارف ايه والمناديل المبلولة دي للناس اللي عاوزة تدلع نفسها انما بتكلم على الغالبية العظمى من الولاد كل اب او ام يدوا ابنهم صابونة صغيرة وفوطة صغيرة وفي المدرسة المفروض المدرس يتاكد ان الولاد بيغسلوا ايديهم على الاقل مرة كل 3 او 4 حصص لازم كل ساعة ساعتين اذا الظروف سمحت بقدر الامكان دي رقم واحد، رقم اتنين ان الولد يبقى معاه قماشة قديمة كيس مخدة قديم والدته تقصهوله ويروح كل يوم ينضف بيه المكتب بتاعه والكرسي بتاعه ، رقم تلاتة اللي هو طبعا الكمامة احنا هنوزعها عليهم وبعض الناس بتقول انها مفيدة وبعض الناس بتقول انها غير مفيدة انما احنا بنرى ان مفيش أي ضرر منها ، اربعة اللي هو تفادي التجمعات بقدر الامكان يعني نركز الدروس الخصوصية هنحتاج شغل جامد فيها قدام انما مثلا السينمات القهاوي المطاعم واحنا داخلين على الشتا كمان ان الدنيا بتبقى مكمكمة والناس قافلة الشبابيك ، في وسائل النقل والمواصلات مهم قوي الام وهي مودية ولادها الصبح المدرسة او غيره حاجتين احنا علينا كدولة واحنا قلنا لمنظمة النقل من مايو ازاي تنضف المترو وازاي تنضف الاتوبيسات العمومية واعتقد السادة المحافظين مهتمين انما خلوا الشبابيك مفتوحة احتمالات الاصابة في وسائل النقل العام مش عالية لان فترة التلازم بين البني ادم والاخر ووجود التهوية الجيدة فترة تلت ساعة او نص ساعة وناس بتدخل وناس بتطلع و..و..الى ذلك عبد اللطيف المناوي: وفيه تجديد بشكل مستمر ؟ د/ حاتم الجبلي: اه..فيه بقى الميكروباصات لان دي الحتة اللي قلقاني دي انا شخصيا لان سواق الميكروباص اصلا لما تشوف شكله يعني مانتاش متقبل ان هو هينضف العربية ان أي واحد معاه قماشة او منديل يمسح بيه العمود اللي في الكرسي اللي قدامه لان دي بيبقى واحد عطس في ايده وبعدين مسك جوة اسانسير اكرة باب الدراع هو دا اللي بينقل ومانخليش السواق يقفل الاتوبيسات في الشتا هي دي النقطة ال مهمة جدا عبد اللطيف المناوي: اه يعني نتحمل برد الشتا اكتر مانتحمل الفيروس؟ د/ حاتم الجبلي: اه طبعا طبعا ..هي كلها حاجات بسيطة جدا اذا حد جاله دور انفلونزا يقعد في البيت اسبوع حتى لو ماحللش يقعد في البيت اسبوع دا الاسلم انه يقعد في البيت بدون تحليل وبعدين احنا طلعنا مع الدكتور صفوت نحاس طلع منشور لموظفي الحكومة ازاي ياخدوا الاجازات ان النهاردة فيه مدرس بيقولي طب افرض ان النهاردة جاتلي انفلونزا اعمل ايه قلت له تقعد في البيت قال لا دول بيعاقبوني في ادارة التعيين قلت لا ما احنا النهاردة احنا هنكشف عليك ونتاكد فعلا ان انت عندك انفلونزا ليه بقى اخطر حاجة حضرتك اشرت الى نقطة في منتهى الاهمية اخطر حاجة بتسببها الانفلونزا H1N1 مش الوفيات ولا الاصابات .. الخلل في النظام الاقتصادي الاجتماعي ، سواق اتوبيس مايروحش سواق مترو بيستعبط مدرس مايروحش النظام العام بقى يحصل فيه خلل ، عمال في مصنع يدعي انه هو عنده انفلونزا الادعاء هو اللي اخطر وبالتالي انا بطلب برضه انه يبقى فيه رقابة شديدة على الحصول على الاجازات عبد اللطيف المناوي: احنا ننتقل دلوقت الى الجزء الاخر من المسالة وهو المرتبط بالامصال والعلاج ، في الاول ابدا مع التاميفلو فيه trend حاصل فيه حالة كده حاصلة ان فيه بعض الناس وهما جايين من برة او من جوة يشتروا تاميفلو يحطوه عنده في التلاجة اوان بعض الصيدليات بدات تتاجر بشكل او باخر لحد ماوصل ل500 او 1000 جنيه في بعض الاماكن السؤال هنا ايه اهمية ان يكون دا موجود؟ د/ حاتم الجبلي: دا استغلال سئ للموقف.. بص انا هقولك حاجة احنا في الاعلام وحضرتك طبعا متولي شئون الاخبار في التليفزيون وعندك اخبار البلد كلها من يوم مابدانا في انفلونزا الخنازير اظن عمرك ماسمعت عن واحد طلب التاميفلو ومالاقهوش يبقى اذا هو متوفر في كل انحاء مصر وعلى كل المستويات .. اللي الناس بتهربه من برة انا بقول للناس اللي شايفانا في التليفزيون النهاردة بقول احذروا الادوية المغشوشة خاصة التاميفلو لانه هناك رفضت حالات كثيرة جدا لغش التاميفلو في العالم مرصودة وبالتالي احنا بنحذر ، اللي هيحتاج التاميفلو هيلاقيه في وزارة الصحة ، الطعوم بقى قضية اخرى قضية في منتهى الحساسية وفي منتهى الدقة، النهاردة عندك فيروس جديد طلع في شهر ابريل اللي فات اتعزل وابتدوا يطلعوله طعم مضاد له ، كل الشركات في العالم سواء صينية او اوروبية او هندية اللي هما اكبر مصنعين او استرالية انتجت كميات من هذا الطعم اخيرا في شهر سبتمبر وبداية شهر اكتوبر اخدت حقيقي موافقة هيئة الادوية الامريكية او اخدت موافقة هيئة الادوية الاوروبية اللي هما هيئتين محترمين جدا في العالم او منظمة الصحة العالمية يعنيفيه شركات اخدت دا وفيه شركات اخدت دا وفيه شركات اخدت دا ، انما التجارب نوعين.. فيه تجربة معملية فيه واحد كاتب الله الحكومة بقى عاوزة تتنصل من مسئوليتها طب فين بحوث الرقابة الدوائية وفين الاختبارات اللي بتتعمل على المصل ، البحوث اللي بتتعمل على الرقابة الدوائية دي بتتعمل على انه ميكونش ملوث انه يكون فاعل انما ماتقدرش تحكم منها على اثره على جسم البني ادم في المدى القصير والمتوسط والآجل الا بعد استخدامه بكميات ضخمة على فترات طويلة فالوضع اللي احنا فيه وضع غريب جدا الطعوم لها اثر قوي جدا في منع انتشار العدوى وكل منظمات الصحة العالمية وكل الدول الكبرى بتؤكد انها لازم تستخدم في نفس الوقت لم تجر عليها التجارب السريرية بالقدر الكافي بيجرب 250 و300 حالة وكده احنا مش عايز اقول حظنا كويس او وحش لكن احنا عقبال ما هنحقن الحجاج في النصف التاني من اكتوبر هيكون اتطعم على الاقل 10 مليون واحد فهيكون عندنا على اقل الاثار الجانبية العامة اللي ممكن تحدث من الطعم في اثناء تناوله ، التقرير اللي جالنا في 24 سبتمبر من اسبوع من منظمة الصحة العالمية بيقول ان الاثار الجانبية حتى هذه اللحظة لا تتعدى الاثار الجانبية اللي تحدث من التطعيم بتاع الانفلونزا الموسمية شوية صداع شوية تكسير الم في المفاصل ارتفاع في درجة الحرارة احمرار والم مطرح الحقن هي دي الحاجات انما الراجل الالماني المحترم اللي قال انه بيعمل سرطان دا انا اعتقد انه راجل مخرف لان السرطان دا مع خالص احترامي اولا عمرنا ماسمعنا عن طعم هذا الكلام كلام غير علمي وياريت تستضيف حد من اساتذة الاورام اللي هما بيشتغلوا معمليا لهم ابحاث وبيشتغلوا في الجانب الباطني لان دول اللي بيدرسوا نمو الخلايا واثرها وكده ، لازم يبقى عندك استمرار غذاء مستمر للخلية عشان تتحول لخلية سرطانية 100% يا اما يعني مثلا افرض الاشعة ، الاشعة لما بتتعرض لها في فترة قصيرة قوي ممكن تبوظ لك النخاع لكن ماتجيبلكش سرطان في لحظتها انما لو انت بتاخد كميات قصيرة على 20 سنة او فترات طويلة يجيلك سرطان ليه لانه طول الوقت عمال تخبط عالخلية بشئ غريب عليها يغير التركيبة بتاعتها تخليها تتجنن ما السرطان دا الخلية بتتجنن او مثلا السجاير السرطان اللي بييجي من السجايرلوانت بتشرب سجاير لو انت شربت 10 سجاير النهاردة مش هيحصلك حاجة ولو شربت 10 سجاير لمدة سنتين تلاتة برضه مش هيحصل لك حاجة انما 20 سيجارة لمدة 20 سنة يويما يجيلك حالة فهل معقول انت عمرك سمعت عن واحد اخد تطعيم وجاله سرطان عمرك سمعت كده عبد اللطيف المناوي: خلينا الموضوع تحديدا عشان نبدا فيه واحدة واحدة طب هنا خلينا نقول حاجة برضه عشان احط وجهة النظر الاخرى لماذا رفض في مرحلة من المراحل بعض الاطباء خليني اسميها وبعض الممرضين والممرضات ان هما ياخدوا هذا التطعيم في فرنسا ؟ د/ حاتم الجبلي: دي حصلت في فرنسا 63% من الدكاترة في اول اسبوع والممرضات رفضوا ياخدوا التطعيم لانه هما مش عارفين اثاره الجانبية بعد ست اشهر او بعد سنة او بعد سنتين او تلاتة طب ما أي دوا جديد كده أي دوا جديد بيحصله كدا انا مش بدافع عنه بس انا بقولك طبيعي ده انت ساعتها هنا كشخص بتوزن الميزة مقابل العيب يعني مثلا الطعم بتاع الحصبة ماهو بيعمل التهاب في المخ حالة من كل 100 الف حالة هل احنا ما بنطعمش ضد الحصبة هل الفايدة اللي من طعم الحصبة بتعادل المخاطرة بتاعة حالة التهاب في المخ كل 100 الف حالة طبعا بنطعم ونحن نعلم انه هيعمل في كل 100الف حالة ، حالة فيها التهاب في المخ عبد اللطيف المناوي: طيب هنا السؤال مفهوم الجدوى هل يمكن القولبان الجدوى من التطعيم بالنسبة لانفلونزا الخنازير الجدوى من التطعيم اكبر من المخاطر اللي ممكن ان تتاتى منها ؟ د/ حاتم الجبلي: في المرحلة الحالية مش هقدر اجاوب اجابة امينة انما اقدر اجيب على السؤال دا يمكن في شهر ديسمبر هنشوف التطعيم بمئات الملايين من الناس هيخفض انتشار المرض ولا لا دا اهم حاجة عندي عبد اللطيف المناوي: طيب في هذه المرحلة التطعيم هييجي هيبدا مع شركات الحجاج في هذه المرحلة احنا في هذه المرحلة من ينبغي ان ياخذ التطعيم مين هما ؟ د/ حاتم الجبلي: القايمة معروفة القايمة اللي حدتها منظمة الصحة العالمية اول حاجة فيها الاطباء والتمريض اللي بيشتغلوا في مستشفيات زي مستشفيات الحميات او مستشفيات الصدر او المستشفيات اللي بتستقبل حالات كتيرة من حالات الانفلونزا او ال مستشفيات اللي فيها ناس فيها المناعة بتاعتهم منخفضة زي مستشفيات الاورام وغيرها لان الناس دي يسهل جدا انها يجيلها انفلونزا وبعدين الحوامل وبعدي غيرها وبعدين تخش بعد كده على العاملين في المرافق الحيوية دول طبعا جزء منهم في القوات المسلحة وجزء منهم في الشرطة وجزء منهم في محطات المية ومحطات الكهربا ووسائل النقل العام وغيرها وبعدين تخش في فئة اخرى الفئة اللي عندهم امراض مزمنة وبعدين اللي وزنهم تقيل قوي لان دول اكتر عرضة للاصابة بالمرض وبعدين تخش بقى على المهن لو انت عندك كمية كافية من تبتدي تديها زي مثلا المدرسين اللي بيحتكوا بالناس وبعدين شباب الجامعات قبل الاطفال والحضانة لان دول اكثر عرضة للاصابة عن الاطفال من سن 5 الى 15سنة ، شباب الجامعات اخطر قوي فنبتدي بشباب الجامعات تعتمد على توافر المصل طبعا فيه مشكلة عالمية في تواف المصل الدول الغنية اللي بتكلمك كل يوم عن حقوق الانسان تقعد تديك محاضرات راحت منتجة المصل ومخلياه لنفسها وادت الكرة الارضية دي كلها خارج نطاقها 150 مليون جرعة وخلوا 850 مليون عندهم عبد اللطيف المناوي: طيب هنا هيطرح سؤال وهنرجع تاني للامصال هل في مثل هذه الاوقات مش المفروض ان حقوق الملكية الفكرية بتسقط الحق ؟ د/ حاتم الجبلي: لا لسه 5 سنين عبد اللطيف المناوي: حتى في انتشار مرض بنعتبره وباء ؟ د/ حاتم الجبلي: مش قبل 5 سنين عبد اللطيف المناوي: يعني احنا مانملكش ان احنا في مصانعنا حتى لو امكنا ان احنا نصنع دا ؟ د/ حاتم الجبلي: لا مانملكش احنا كان عندنا صناعة امصال متميزة جدا لكن للاسف اهملت اهمال شديد جدا في فترة زمنية كده لكن احنا النهاردة بالصدفة عندنا اجتماع يعني بحاول اجمع فريق من مختلف قطاعات مصر لان لقيت ان احنا صرفنا ملايين من الجنيهات على شباب اتعلم تعليم كويس جدا بس تلاقي واحد في دمنهور واحد في اسكندرية واتنين في المركز القومي للبحوث وتلاتة في فاكسيرا فانا بجمع الناس دي كلها وهاعملهم معمل يقدر يصنع الامصال يتكلف حوالي 50 مليون جنيه ويبتدي نشتغل فيه النهاردة في تقديرنا بعد كله يقدر يطلع انتاجه بعد سنة ونص عبد اللطيف المناوي: احنا ايه اللي وصلنا للمستوى دا في مسالة انتاج الامصال ؟ د/ حاتم الجبلي: دي عاوزة بقى قعدة تانية عبد اللطيف المناوي: لازم قاعدة تانية لان هذا ليس مانستحقه كمصريين وليس هذا ماتستحقه مصر ؟ د/ حاتم الجبلي: احنا كنا بننتج امصال سنة 48 ما بننتجهاش النهاردة انا نفسي تجيب استاذة اسمها كوكا استاذة بجامعة عين شمس تحكيلك القصة من اولها لاخرها ست فاضلة يعني ست تعتبرالسبب الرئيسي في المعرفة دي في مصر يعني عبد اللطيف المناوي: الملف دا ينبغي انه يفتح بالفعل في الوقت المناسب والوقت المناسب الحقيقة في هذا التوقيت لازم يفتح قريبا خليني ارجع مرة تانية لموضوع المصل اوالتطعيم عشان فيه حالة panic فيه حالة رعب عند الناس السؤال هنا حضر تك بتتكلم عن الحصبة خلاص معروفة انه كل 100 الف حالة بيحصل حالة damage معينة في المخ ، السؤال هنا هل معروف بالنسبة للمصل الجديد اللي تم اختراعه او تم اكتشافه ان هو على العدد الكبير على عدد 10 سنين او 15 سنة هل له اثار جانبية عامة وليست اثار جانبية متطرفة ؟ د/ حاتم الجبلي: لحد دلوقت كل اللي بيقولوا ان هو امن انما مانقدرش نحكم طبعا ابقى راجل غير امين لو قلت لك اثاره بعد 10 سنين هيبقى شكلها ايه انما انا بشوف دلوقت انه اذا فعلا ثبت ان هو فعلا عمل حد لانتشار هذا المرض خوفا من تحوره اعتقد انه هيبقى له طبعا ... عبد اللطيف المناوي: احنا محتاجين طعم قد ايه تطعيم قد ايه ؟ د/ حاتم الجبلي: احنا جبنا 5 مليون ودا الحد اللي قالته منظمة الصحة العالمية انما احنا لو عايزين نغطي ممكن يصل الى 20 او 25 مليون عبد اللطيف المناوي: على مدى زمني قد ايه ؟ د/ حاتم الجبلي: سنتين عبد اللطيف المناوي: امكانياتنا ايه ان احنا نعملهم ؟ د/ حاتم الجبلي: لا نقدر نجيبهم طبعا مفيش صعوبة يعني .. هقول لحضرتك حاجة سيادة الريس لما قعد معانا في الموضوع دا قعد 3 مرات يعني مدي تعليمات مفيش عقبات في هذا الموضوع ايا كانت التكلفة وقال الاخذ بالاحوط هذه كانت توجيهات وتعليمات واضحة جدا الاخذ بالاحوط احنا ماشيين بهذا الاساس وعندنا النهاردة 1000 حالة وغيرنا عنده 6 الاف وهو ربع سكاننا عبد اللطيف المناوي: لك تصريح نسب اليك مؤخرا ان هناك احتمال ان يتم الغاء الحج في حالة عدم وصول الجرعات الكافية ؟ د/ حاتم الجبلي: الكلام دا حقيقي عبد اللطيف المناوي: دا الجزء الاول الجزء التاني هل عندكم توقع ان يحدث تاخر في وصول هذه ؟ د/ حاتم الجبلي: لا احنا معندناش توقع .. الشركة اكدت احنا جبنا رئيس الشركة في مصر يوم الخميس اللي فات من كذا يوم يعني وقلته من دلوقت لقى ان التصريف هيكون في موعده وكان معايا النهاردة مساعد الوزير لشئون الصيدلة واكد ان الامور هتوصل في ميعادها لكن افرض ماجاش لاي سبب ما ..خط انتاج مصنع حصل فيه حريقة عبد اللطيف المناوي: يعني في حالة المسائل القدرية فهنا السؤال امتى تتوقعوا انه يوصل العدد دا ؟ د/ حاتم الجبلي: يعني خلال 10 ايام او 12 يوم احنا هدفنا انه يكون عندنا الطعم قبل 6 نوفمبر بحوالي اسبوعين عبد اللطيف المناوي: طيب هنا حضرتك بتتكلم عن انه التطعيم او الطعم ليس هناك امكانية ان يكون هناك حج او المسافر الحاج..؟. د/ حاتم الجبلي: دا الشرط حاطاه السعودية عبد اللطيف المناوي: لكن في نفس الوقت قيل واكد لي دا حضرتك ان كل حاج بياخذ هذا التطعيم بيكتب اقرار على نفسه انه ياخذ هذا التطعيم على مسئوليته الخاصة ؟ د/ حاتم الجبلي: صحيح عبد اللطيف المناوي: حضرتك النهاردة ناوي تحج وانا كرجل عندي منتج لا اعلم اثاره الجانبية دا ينطبق عليا وعلى غيري العقود اللي احنا مضيناها في مصر في كل دول العالم واحنا خدنا جواب من الشركة ان كذا دولة مضت على هذا بما فيها الدول الاوربية لان محدش عارف لكن انا واجبي كوزير صحة ان انا احذرك ان حتى هذه اللحظة لا نعلم الاثار الكامنة لهذا الطعم ، حضرتك النهاردة لما بتاخد أي دوا ان شالله اسبرين مش بتطلع معاه نشرة لو استخدم في كذا الاثار الجانبية كذا هو دا اللي احنا بنعمله احنا بنقولك والله دا دوا جديد اثاره الجانبية زي اثار الانفلونزا الموسمية انما اثاره الطويلة والمتوسطية منعرفهاش لازم اقولك دا واجبي واذا ماعملتش معاك كده ابقى مش راجل امين عبد اللطيف المناوي: وهي مسئولية خاصة بالحاج هو اللي يقرر ؟ د/ حاتم الجبلي: اذا كان عايز ياجل الحج او يستنى السنة الجاية اهلا وسهلا عاوز ومصمم انه يحج السنادي يبقى لازم يلتزم بما حددته السعودية ان يتطعم ضد الالتهاب السحائي يتطعم ضد انفلونزا الموسمية ويتطعم ضد انفلونزا الخنازير عبد اللطيف المناوي: اذا كان الامر هكذا ليه هتعطي هذا المصل للاطباء والممرضات والمرضين والعاملين على مسئولية مين ؟ د/ حاتم الجبلي: اللي يحب ياخد واللي مايحبش ماياخدش مش هافرض عليه احنا بنتكلم على المجموعة اللي جاية في اكتوبر ودول عددهم 80 الف انما التطعيم الضخم عندي هيبدا في يناير فمن اول اكتوبر لحد اخر ديسمبر هيكون اتطعم على الاقل 400 مليون واحد هنكون عرفنا هتكون الدنيا اتضحت لنا هل فعلا الدوا دا مفيد ولا مش مفيد ولا مش مفيد واثاره الجانبية هيبقى فيه معلومات على ما ابتدي التطعيم بتاعي على نطاق واسع في شهر يناير هقدر اقولالوضع بالظبط عبد اللطيف المناوي: بس ساعتها هيكون التطعيم مش على مسئولية المطعّم في هذه الحالة ؟ د/ حاتم الجبلي: انت طعمت 400 مليون بني ادم الايام الجاية دي هتطعم 600 الف امريكي، اخر الاسبوع دا على الخميس الجاي هيكون فيه من 2 الى 3 مليون صيني اتطعموا وكذلك استراليا فيها 6 مليون هيتطعموا من اكتوبر وكذلك دول اخرى فلما تجمع دا كله هيبان لك على طول اذا كان فيه مشكلة ولا لا عبد اللطيف المناوي: لكن فكرة وجود التطعيم بشكل خليني اسميه اجباري او الزامي دا مرحلة لسه ماوصلنلهاش بعد يعني ليس هناك استعجال ان الناس تطلب التطعيم ؟ د/ حاتم الجبلي: المرض مرض بسيط وبيتعالج بشوية بنادول وسوائل وراحة ..هو الطعم ظهر ليه احنا حاليا مش قلقانين من المرض الحالي احنا قلقانين من ايه .. منظمة الصحة العالمية قلقانة من ايه قلقانة ان الفيروس اللي بيسبب المرض الحالي يتغير يبقى فيروس عنيف بقى عبد اللطيف المناوي: ودا اكبر مخاطره مع فيروس انفلونزا الطيور؟ د/ حاتم الجبلي: بالظبط ..لو دا حصل بقى حتى الطعم دا مش هيبقى ليه أي قيمة عشان كده احنا في اتفاقنا مع الشركة مش هنخسر غير تلت تمن الطعم دا اتفاقنا ان احنا يجيلنا الطعم الجديد بنفس الكميات بتلت القيمة فقط عبد اللطيف المناوي: واحنا بنتكلم عن تلت القيمة وكل القيمة وكذا هناك من يتحدث عن ان هناك مؤامرة كبيرة فيها اساطين صناعة الدواء وبعض الدول لاثارة هذا الموضوع لاستنزاف مليارات الدولارات من كل الدول انت مع فكرة المؤامرة دي ولا هي حالة حقيقية ؟ د/ حاتم الجبلي: انا شخصيا بالرغم من ان صناعة الدواء افادت البشرية انما محبش ان الناس يبقى عندها قوة زائدة عن الحد ودول زي ما انت شايف في امريكا واقفين حال الناس الغلابة ودلوقت اوباما عايز يعمل قانون تامين صحي يدخل فيه 40 مليون واحد فمش قادرين يدفعوا تمن التامين الصحي وهما طبعا عشان مصالحهم الشخصية بيحاربوه عاملين لوبي ..من ضمن الحاجات الطريفة جدا كان فيه مرة تقرير من اكتر من 10 سنين يقولك ارباح اكبر 4 شركات دوا في سويسرا مقابل 4 بنوك في سويسرا اكبر 4 شركات دوا في سويسرا هي بلد الادوية كانت زمان يعني الاربع شركات ادوية ارباحهم اكتر من ارباح الاربع بنوك ب21% شفت كمية الفلوس اللي عملوها عبد اللطيف المناوي: هل دا احد الاسباب لتصعيد المخاوف لدى العالم من موضوع انفلونزا الخنازير ؟ د/ حاتم الجبلي: انا شخصيا كان ليا وجهة نظر اعلنت عنها في الاعلان اكتر من مرة ان منظمة الصحة العالمية مكانتش موفقة خوفت الناس زيادة عن اللزوم وكان في حديث مع احد المسئولين الكبار جدا جوه منظمة الصحة العالمية ان المراحل اللي اتحكم بيها احنا المرحلة الاولى ولا التانية ولا التالتة ولا الرابعة دي كانت معمولة لانفلونزا الطيور فلما فوجئوا بانفلونزا الخنازير راحوا مركبين دي على دي مع ان المرضين مختلفين جدا عن بعض واحد فيه نسبة وفيات 8 في الالف والتاني 60% انما ركبوا دي على دي وكركبوا الكرة الارضية وكركبوا كياننا وكيان الناس كلها فمحدش قادر يتراجع النهاردة عبد اللطيف المناوي: هتقول الكلام دا لما تشوف ممثلي الصحة العالمية ؟ د/ حاتم الجبلي: اه هقوله اه عبد اللطيف المناوي: هتعملوا ايه في اجتماعات المغرب ؟ د/ حاتم الجبلي: اجتماعات المغرب احنا اهم حاجة تهمنا انه لازم الدول النامية والدول الفقيرة تاخد حقها في الطعوم كنت انا مع الوزير احمد ابو الغيط بعتنا جواب لبان كي مون لرئيس منظمة الصحة العالمية بنحاول نعمل تجمع لدول عدم الانحياز نعملهم مؤتمر هنا في مصر وناخد وق احنا برضه لنا كدول برضه احنا مش اغنيا زي التانيين لكن احنا بنمثل لشركات الدوا سوق كبير جدا لما تجمعنا على بعض بقى سوق كبير جدا يبقى لنا وسيلة ضغط فهما اخيرا قروا يفرجوا عنا شوية قبدلا من ان يدونا 150 جرعة بيتكلموا عن 300 مليون دلوقت عبد اللطيف المناوي: ومفوضات المغرب من اجل زيادة هذه ؟ د/ حاتم الجبلي: اه طبعا .. وبعدين الحاجة التانية عايزين نعرف اخر موقف عالمي بالنسبة للامان بتاع الطعوم دول اهم سؤالين بالنسبة لنا عبد اللطيف المناوي: نتمنى انك تعود باجابات مطمئنة في الاساس صحة المصريين هي الاساس وكما استمعنا فان التعليمات الاساسية من الرئيس مبارك هو اتخاذ الاحوط فينا يتعلق بمرض انفلونزا الخنازير وبصحة المواطن هذا هو الاهتمام الكبير بذلك الموضوع بشكر الدكتور حاتم الجبلي وزير الصحة شكرا جزيلا لك السيدات والسادة شكرا لكم والى لقاء في مرات قادمة باذن الله
