محمد صلاح: يا مساء الخير آثارنا أكثر بكثير قوى أكثر من متاحفنا اللى عايز يشوف كل الآثار المصرية محطوطة كلها فى متاحف يبقى عامل زى اللى عايز يشوف الفيل جوة المنديل فيه آثار أصلا ما ينفعش تتحط فى متاحف الأهرامات ، المعابد الكبيرة المنتشرة فى الأقصر وأسوان ومدن مصرية أخرى المشكلة دايما هتكون فى آلاف مئات الآلاف ملايين القطع الأثرية اللى المفروض تتحط فى متاحف يتقدر بها القمر ويتقدر فيها كمان الزائف احنا مش مطلعين الآثار خارج المخازن عشان خاطر نبهدلها والزوار لما يزوروا متحف مش داخلين شونة متخزن فيها شوية آثار عايزين متاحف زى المتاحف اللى بنتحصر عليها قوى لما نشوف آثارنا محطوطة فيها فى أوروبا والدول المتقدمة عن آثارنا ومتاحفنا هيكون لنا النهاردة كلام مسئول فاصل تقريرى ضاق المتحف المصرى بعد أكثر من مائة عام على إنشائه ضاق بكنوزه الأثرية لم يكن نقل المتحف بدعة فى أى وقت وإنما ضرورة فرضتها الرؤى الجديدة للمتاحف والمزيد من الكشوفات ، كان أول متحف للآثار الفرعونية فى مصر أسسه محمد على باشا عام 1835 فى منطقة الأزبكية وأسند مهمة الإشراف عليه للشيخ رفاعة الطهطاوى ثم انتقل المتحف إلى الأنتيكخانة فى بولاق أبو العلا بجوار مقر المركبات الملكية بعدها صمم المتحف المصرى الموجود حاليا فى ميدان التحرير إذا كان المتحف قد أنشئ ليضم 7 آلاف قطعة فإنه يضم الآن فوق ال100 ألف قطعة وهى الثروة التى لا مثيل لها فى العالم هذا التكدس أدى إلى الحاجة ليس إلى نقل المتحف لأنه سيظل فى مكانه وسيعرض كنوزه ولكن لمتحف جديد أكثر حماسة ورحابة فرضت الآثار المكتشفة طوال عقود والمستردة من الخارج واقع تخزين الآثار التى يمتلؤ بها المتحف المصرى بأقسامه المختلفة فوق وتحت الأرض والتى لا يوجد إحصاء وفى ولا دقيق بها كان التفكير وراء إنشاء متاحف أخرى أهمها المتحف الجديد فى منطقة الأهرامات بالجيزة ومناطق أخرى ، صمم المتحف المصرى كبير ليكون أكبر متحف فى العالم حيث بنى على مساحة 117 فدان أى 480 ألف متر مربع ويستوعب أكثر من مائة ألف من الآثار الفرعونية وقدرت تكلفته بحوالى 550 مليون دولار محمد صلاح: عملنا حلقات كثيرة جماهيرية ناقشنا فيها قضايا بتهم الناس البطالة ، التعليم ، الثقافة ، الأسعار ، الطريق الدائرى ، التكتك قضايا كثير كانت بتهم الناس خلونا النهاردة نتكلم عن حاجة بتيجى فى ذهن بعض الناس هو رغم كل المشاكل دى ليه مصر دائما بتفضل حلوة فى عيون حبايبها يمكن لإن كل واحد مننا له فى مصر دائما حاجة حلوة طب خلونا النهاردة نتكلم عن حاجة حلوة الأستاذ محمد غنيم المشرف على المتحف المصرى الكبير هيكون لنا معاه النهاردة كلام مسئول أرحب بالأستاذ محمد غنيم المشرف الفنى على مشروع المتحف المصرى الكبير منورنا يا أستاذ محمد أ / محمد غنيم: أهلا بك محمد صلاح: مع إن احنا فى ملعبك يعنى أ / محمد غنيم: والله ده ملعب مصر كلها وهو يعنى الشئ اللى مصر ممكن تفتخر به وتقول دى ملكى محمد صلاح: إن شاء الله ، أستاذ محمد فى المساحة المهولة دى اللى مفترض أن يشغلها المتحف المصرى الكبير اللى يفترض برضه إنه يفتتح بعد سنتين المتحف ده هيحل مشكلة الآثار المصرية المكدسة ويعنى واللى مش متفهرسة واللى مش مرصودة يعنى هيحل مشكلة أو معضلة بنتكلم عليها بقى لنا سنين طويلة أ / محمد غنيم: بلا شك يعنى هو أولا كان ضرورة إنشاء هذا المتحف لحل هذه المشاكل اللى سيادتك تفضلت بها المتحف المصرى بالتحرير وهو المكان الرئيسى للآثار المصرية كان بيعانى من اللى بتقوله هو لا يعانى من تكدس الآثار هو يمكن تخزين الآثار بشكل كلاسيكى تقليدى مفيش البيئة المتحفية اللى هى تساعد على عرض الآثار بشكل كويس أو تخزينها فى بيئة صحية أو تسجيلها وتوثيقها على قاعدة بيانات ومع تكنولوجيا المعلومات النهاردة عندنا إمكانيات كبيرة فى قواعد البيانات تم تسجيل فعلا لغاية الآن احنا المفروض نعرض فى المتحف ده 100 ألف أثر تم اختيار 86 ألف أثر تم تسجيلهم على قاعدة البيانات التوثيق والتسجيل ده ما بيبقاش فقط زى عهدة لا هى توثيق وتسجيل لمواصفات كل أثر، الحالة الترميمية لكل أثر، مقاسات كل أثر ، صورة كل أثر ساعة ما جبناه من المخازن وصورته بعد ما جاء إلى هذا المكان لكى يصنف فى المعامل المختلفة وأنا قلت لك إن هذا متحف الأحجار يعنى كل اللى بييجى من المواقع الأثرية أو من المتاحف الأثرية اللى هى معظمها بناخدهم من متحف التحرير حوالى 45 ألف أثر من 100 ألف أثر بيتصنف أحجار بيتصنف أيضا نسجيات بيتصنف موميوات بقايا آدمية محمد صلاح: أنا فهمت كده إن المتحف المصرى الكبير هبيقى متحف أحجار بس مش هيبقى فيه موميوات مثلا وللا هيبقى فيه أ / محمد غنيم: يعنى إزاى يعنى هيتعمل متحف هيبقى متحف إيه بترى لا ما ينفعش هنعمله للحجر بس هو الآثار المصرية الرائعة دى توت عنخ آمون مش فيه ذهب مش فيه كراسى خشب فهنا مادة خشب مش فيه أحجار ، فيه توابيت ، فيه جعارين ، فيه أشياء كثيرة المصريين مش بس كانوا مبدعين فى النحت على الحجر ولكن مبدعين فى صناعات كثيرة الآثار دى هنا موجودة بتخش المعامل المتخصصة والمرممين دول بيتخصصوا حسب تخصصاتهم من يعمل فى الحجر ومن يعمل فى المواد الأخرى كالخشب أو كالبقايا الآدمية أو غيره محمد صلاح: طب ليه كان فيه تفكير أصلا فى المتحف المصرى الكبير يعنى اللوفر مثلا لما حبوا يوسعوه بقى متاحف اللوفر يعنى يوسع فى مكانه هل متحف التحرير خلاص جاب آخره أ / محمد غنيم: انت لو مشيت شمال هتصطدم بالعمارات شمال على طول لو جيت يمين كنت هتصطدم بالهيلتون السابق اللى هو بريتز كارتن دلوقتى يعنى المكان هناك يضيق بأى توسعات حتى التوسعات اللى هى بتتعمل حاليا داخله فى الحديقة أنا بعتبر إن هى حل محمد صلاح: مسكنات بقى أ / محمد غنيم: مسكنات إنما جاء هذا المتحف أولا لكى يحافظ على تراث مصر يعنى انت لما بتجيب 100 ألف أثر ويتسع بعد هذا لأكثر من 100 ألف أثر فى المخازن انت بتحميها لإنك بتحطه فى حتة معقمة حتة رعاية كاملة معامل زى المستشفى محمد صلاح: أنا حاسس إننا دكاترة قاعدين أنا وانت دلوقتى أ / محمد غنيم: دول دكاترة يعنى كأنه طبيب الطبيب الخاص بالأشعة الطبيب الخاص بالكشف على العظم الطبيب الخاص بالكشف على الجلد الطبيب الخاص بمعاينة الزى ورصده أنا عايز أقول لك قاعدة البيانات دى بتدى كتالوج لكل متخصص سواء من الأثريين أو من المرممين أن يفعل بالأثر ما يجعله يعيش مئات السنين محمد صلاح: قل لى اللى هيتنقل هنا فى المتحف بعد افتتاحه إن شاء الله فى غضون سنتين تقريبا هيبقى من متحف التحرير يعنى وللا من متاحف مختلفة وللا من اللى متخزن أ / محمد غنيم: معظم الآثار من متحف التحرير 45 ألف أثر كما ذكرت لكن هناك أيضا قطع أثرية من متاحف أخرى مكانها الطبيبعى هو واجهة المتاحف أو متحف المتاحف المتحف المصرى الكبير لأنه أكبر متحف فى العالم وهو اللى احنا بنعرض فيه ما نزهو به من آثار انت لو شفت تصميم المتحف اللى هو هيتبنى من فبراير القادم احنا الآن ليه بنينا مركز محمد صلاح: طب خلاص يبقى قل لنا المراحل اللى مر بها المتحف منذ وضع الرئيس مبارك حجر الأساس أ / محمد غنيم: 117 فدان خصصوا من الرئيس مبارك من الدولة لوزارة الثقافة ، المجلس الأعلى للآثار لكى يبنى المتحف المصرى الكبير على 117 فدان دول مش البنى بس لا هناك أيضا منتزهات كبيرة بيتبنى فيها معابد بيتبنى فيها كافيتريات بيتبنى فيها مطاعم محمد صلاح: خدمات للزوار أ / محمد غنيم: خدمات بتجعله إيه بيقوم مش بس برسالته الأثرية أو رسالته التراثية ولكن أيضا رسالته الثقافية والترفيهية يعنى انت عندك مجمع ثقافى كبير داخل هذا المتحف تقدر تخش فيه دار عرض سينيما ثلاثية الأبعاد تقدر حضرتك تخش تنضم لفصول وورش للحرف اليدوية والصناعات التقليدية بتاعت الفراعنة اللى اندثرت تقدر تخش فصول تعليمية تاخد المناهج المختلفة فى تاريخ الحضارة المصرية ، تاريخ الفن المصرى كيف تكتب وتقرأ اللغة الهيروغليفية أشياء كثيرة يعنى هو مركز ثقافى تعليميى وأيضا أثرى فهو مجمع ثقافى كبير محمد صلاح: المراحل بقى المراحل أ / محمد غنيم: المراحل بدأنا بال117 فدان بإنك بتمهد الموقع ؛ الموقع كان فيه ركام كثير بعد ما تم الجس فى الأرض والحفر فى الأرض لمعرفة هل هذه منطقة أثرية ممكن إن احنا نعمل متحف أثرى مثلا فى الموقع نفسه مش داخل مبنى فلقينا إن الأرض خالية من الآثار وفعلا بدؤوا أعمال تمهيد الأرض وإعداد الموقع خدنا المرحلة الأولى ودى المرحلة الثانية اللى هى إنشاء مركز الترميم والمخازن ومركز الطاقة مركز الترميم فيه حوالى 14 معمل المخازن 6 مخازن كبيرة يمكن كل مخزن بتاع حوالى ملعبين كورة الحجر أو لكذا أو لكذا كما ذكرت عندنا أيضا معامل من ضمن ال14 معمل معامل علمية بتاعت طبيعة وبتاعت كيمياء وبتاعت محمد صلاح: المرحلة دى تخلص إمتى أ / محمد غنيم: دى خلصت محمد صلاح: المعامل كلها خلصت يعنى أ / محمد غنيم: كلها وبدأت تشتغل والشباب الجميل ده يمكن أشادت به السيدة سوزان مبارك لما جاءت افتتحت هذا المكان سألتهم يردوا بمعلومات دقيقة قالت أمال التعليم فى مصر بيقولوا عليه وحش ليه يعنى دول فعلا أنا بقول عليهم دول كريمة الكريمة cream d' la cream زى ما بيقولوا بالفرنساوى ولذلك هم بنوفرلهم الظروف لتحفيزهم على العمل لإن دول عملة نادرة محمد صلاح: المراحل بقى المراحل أ / محمد غنيم: المرحلة اللى احنا فيها دية هى المرحلة الأهم والأصعب إن أنا أنقل الآثار أجيبها بدأنا فى نقل الآثار وصلنا لحوالى 10 آلاف أثر من 100 ألف أثر محمد صلاح: حطتوهم فين بقى أ / محمد غنيم: فى المخازن محمد صلاح: فى المخازن أ / محمد غنيم: هواريك المخازن لو تحب تشوف يمكن فى التقرير اللى انت طلبت إنك تعمله بدأت فى المخازن وبدأت الآثار تتصنف وفيه أثريين على أعلى مستوى اللى هم عملاء العهد الأثرية واللى هم عندهم أيضا data base خاصة بهم يبقى عارف من على ال data baseمكان الأثر فى أنهى دولاب على أنهى رف أو فى أنهى دورج المسألة دى صعب إنك تعملها إلا بنظام علمى دقيق احنا يمكن التعامل مع اليابان أفدنا كتير ديبان قدمت 300 مليون دولار كقرض ميسر ب1.5 % محمد صلاح: خلينا فى المراحل يعنى امتى المتحف يخلص أ / محمد غنيم: المتحف كبناء سينتهى قبل نهاية عام 2012 كإعداد ونفنيش يعنى كإنهاء ل galleriesجاليريز اللى هى المدخل الرئيسى والجاليرى gallery بتاع توت عنخ آمون برضه فيما يسمى بالافتتاح الأولى يعنى هذا المشروع محتاج لعدد كبير جدا يعنى النهاردة المقاول الرئيسى بيختار من 4 شركات كبيرة هى التى فازت من خلال سابقة التأهيل وتدخل مناقصة البناء محمد صلاح: يعنى فى 2012 نقدر نقول هيكون فيه افتتاح أولى أ / محمد غنيم: افتتاح أولى للجاليرى الرئيسى من المدخل الرئيسى حيث رمسيس الثانى اللى هو كان بيعانى محمد صلاح: فى ميدان رمسيس أ / محمد غنيم: فى ميدان رمسيس محمد صلاح: ما هو الميدان بيعانى دلوقتى لوحده أ / محمد غنيم: النهاردة قبل الافتتاح بحوالى سنة بيترمم ويرجع ورا عشان يكون داخل مدخل المتحف حيث البيئة الصحية السليمة يعنى مش هيبقى واقف فى مكانه النهاردة فى الهواء الطلق الرياح بتيجى الرملة بتطسه لا على طريق اسكندرية الصحراوى ده هيرجع ورا ليكون هو من يستقبل أى زائر بيخش هذا المتحف محمد صلاح: بعد 2012 بقى يا أستاذ محمد أ / محمد غنيم: عايز أضيف حاجة إن معاهم أخذ قرار على مستوى السيد الوزير وأمين عام المجلس الأعلى للآثار أن تنضم زوجته إليه تمثال ميريت آمون وهو تمثال حجرى كبير موجود فى أخميم مرمى هناك فقالوا لا ده مكانه إنه يكون جنب رمسيس محمد صلاح: رمسيس وزوجته أ / محمد غنيم: يستقبلوا الذكور والإناث وبعد كده عندنا درج كبير يسمى الدرج الأعظم grand state case بتطلع عليه بتروللى كده أو على السلم تتفرج بهدوء على فراعنة مصر وكل من حكم مصر أو حتى من عمل مع هؤلاء الحكام تماثيل فى منتهى الجمال مسلات فى منتهى الجمال غير عادية يعنى ، يعنى انت أول ما هتخش هتقول رائع أمال فوق فيه إيه بتطلع بهذه الطريقة للدور الرابع ما لكش دعوة بالأول والثانى والثالث محمد صلاح: على أساس إيه أ / محمد غنيم: على أساس إن هو الجاليرى الرئيسى للعرض المتحفى ل50 ألف قطعة ده اللى فيه يعنى ما نزهو به جميعا مجموعة توت عنخ آمون حوالى 4800 قطعة معروضة فى أبهى تصميم معمول الآن داخل فترينات ، داخل أماكن على قواعد محمد صلاح: طب الدور الثانى والثالث فيهم إيه أ / محمد غنيم: الدور الرابع قلت لك فيه إيه الدور اللى تحته 50 ألف قطعة ثانية إسمه المتحف الأكاديمى لأن احنا عايزين برضه دراسة التاريخ المصرى فكل الدارسين من الطلبة دراسات عليا باحثين مركز تعليمى لتفحص تاريخ الحضارة وأيضا المصرية وكل تمثال على حدى وأى أسرة لكى يخرج فى آخر الأمر ما يصحح الكتب التى نشرت فى هذا محمد صلاح: ده فى الدور الثالث الثانى بقى أ / محمد غنيم: الثانى كل ما تخش فى conference center اللى هو مركز محمد صلاح: المؤتمرات أ / محمد غنيم: المؤتمرات وده هيبقى مسرح ومركز تعليمى وجنبه الفصول التعليمية اللى قلت لك عليها 6 فصول و5 ورش لإحياء الفن المصرى القديم يعنى إيه أهم حاجة موجودة ، الخشب ، الأثاث ، المجوهرات ، الحلى ، صناعة البردى بنزرع البردى جوة الورشة نفسها بيشوف الدارس ازاى بنحطه فى أحواض معينة محمد صلاح: أيوة خلص المراحل بقى يا أستاذ محمد المتحف يخلص إمتى بشكل نهائى أ / محمد غنيم: هو عشان الافتتاح الأولى 2012 أنا أعتقد إن ربنا يدينا العمر وإمكانيات وموجود على schedule يعنى يعد الآن نهاية 2014 محمد صلاح: طيب قلت لى إن اليابانيين دفعوا 300 ألف أ / محمد غنيم: مليون محمد صلاح: 300 مليون دولار مش كده أ / محمد غنيم: هم مش دفعوا هم واقفوا على واحنا سايبين محمد صلاح: هم ما دفعوش أ / محمد غنيم: لا دفعوا احنا فضلنا إن هم يخلوا ال300 مليون دولار مش عندنا هنا فى بنك اليابان الخاص بحكومة اليابان محمد صلاح: آه بيدوكوا أجزاء منه يعنى أ / محمد غنيم: احنا بنبعت ما نريد صرفه يعتمدوه ويصرفوا للمستفيد رأسا محمد صلاح: التكلفة الكلية أد إيه بقى أ / محمد غنيم: 550 مليون دولار محمد صلاح: الفرق جبتوه منين أ / محمد غنيم: عندنا اعتماد أساسا من صندوق تمويل وتطوير المتاحف الأثرية والمواقع الأثرية وترميمها ده هناخد منه حوالى 150 مليون دولار وعاملين حملة جمع تبرعات بتكمل المبلغ محمد صلاح: أنا سمعت الوزير فاروق حسنى من كذا شهر من مدة طويلة يعنى بيدعو المواطنين بالتبرع عشان خاطر ، هل الحملة دى جابت أثر يعنى أ / محمد غنيم: لا هى الحملة دى كانت حملة معنوية يعنى احنا لا نستهدف إن احنا ناخد من كل واحد جنيه أو 5 جنيه احنا النهاردة وصلنا بالتبرعات إلى حوالى 38 مليون دولار بدون بدأ حملة محمد صلاح: قبل الحملة أ / محمد غنيم: قبل الحملة محمد صلاح: 38 مليون دولار عندنا ولسة ما بدأناش الحملة أمال لما تبدأ بقى أ / محمد غنيم: لما ببدأ مش ببدأ بمصر بس لا ده جوة القاهرة ال38 دول من بنوك وشركات شركات أدوية ناس فى منتهى الحماس لإنشاء هذا المتحف ال38 مليون دولار دول جمعتهم وحدة تنمية الموارد المالية جمعتهم بإقناع بسيط جدا انتوا تساهموا وكل واحد بيتبرع بيتحط إسمه يعنى بنك الكذا بحط هذا المكان قد ساهم فى إعداده بنك كذا فلان الفلانى حتى لو هو بشخصه من الممكن أن يتبرع بيتبرع بإيه مش بمبلغ احنا عاملين costده بيكلفنى أد إيه عشان أخلصه 20 مليون دولار عايز تدفع ال20 مليون هسميه بإسمك بس مش بسميه ما أجيش على توت عنخ آمون وأقول متحف فلان لا أنا بقول ساهم فى لافتة صغيرة كده ساهم فى تمويل محمد صلاح: طب ده جميل بالنسبة للتمويل العائد ممكن يبقى إيه أ / محمد غنيم: العائد يعنى مبشر جدا لأن فيه دراسة جدوى هذا الموضوع أخد دراسة جدوى ووضع شروط مرجعية سبقت المعمارية لتصميمه ما يقرب من 7 سنين دراسة الجدوى بتقول أن هذا المشروع فى السيناريو المتشائم حتى لو كانت السياحة هتبقى مضروبة فى وقت من الأوقات يسدد قرضه فى 12 سنة رغم إن اليابانيين عاطيينا 30 سنة نسدد القرض وسامحين لنا بال10 سنين الأولى ما ندفعش غير فائدة القرض لكن ما ندفعش القرض نفسه يعنى أنا أمام مغريات مسهلة والحقيقة أنا بأشيد بدور اليابان فى هذا أيضا لأن اليابان بتدينا ما يسمى الدعم الفنى يعنى فيه ولاد كتير من المرممين سافروا اليابان فيه من الأثريين سافروا اليابان فيه ورش تدريبية لسة منتهية ورشة فى منتهى الجمال هنا فى مركز الترميم لتدريب هؤلاء المرممين على الموضوعات المختلفة اللى هم هيبقوا مسئولين عنها محمد صلاح: طيب عايزين نتكلم بصراحة كده يعنى الناس بقى اللى جاؤوا يصوروا البرنامج هنا ما جاؤوش بسهولة يعنى ، يعنى احنا كنا مفترضين إنه لما يتعمل متحف المتحف المصرى الكبير فى منطقة صحراوية خارج حزام المدينةالقاهرةوالجيزة إن الحياة هتبقى سهلة شوية احنا طلع عينينا عشان نوصل هنا أصلا فانت مش متخيل واحنا قاعدين على الدائرى قعدنا على الدائرى كده فترة طويلة مش عايز أقول لك أد إيه هو السائح هيتعب كده لحد ما ييجى المتحف أ / محمد غنيم : أعتقد محمد صلاح: ما القصة دى كانت موجودة فى متحف التحرير هنعيده تانى هنا وبعدين كمية الضوضاء أنا شفت كمية تكاتك وأنا جاى رهيبة أ / محمد غنيم: تكاتك محمد صلاح: آه موجودة هنا مش فى المتحف فى الطريق إلى المتحف أ / محمد غنيم: أنا ما شفتش ولا توك توك واحد محمد صلاح: لا واحنا خارجين أبقى أوريك يا أستاذ محمد فيه كتير كانوا بيريحوا بس وبالتالى الوصول إلى المتحف مفيش شبكة طرق كنا متخيلين إن هتبقى على طريق الفيوم طريق السمبوكسة اسكندرية الوضع ده مستحيل يبقى فيه متحف أ / محمد غنيم: هذا فرض وطرح على من محمد صلاح: لا ده واقع مش فرض أ / محمد غنيم: ما أنا بقول لك إهه الفرضية دى ما انت بتتكلم عن الواقع النهاردة فيه لجنة وزارية كبيرة وفيه أجهزة حكم محلى ووزارة نقل ووزارة إسكان ومحافظة الجيزة ووزارة الثقافة والأجهزة كلها شغالة على شبكة الطرق التى عندما يفتتح هذا المتحف تكون هناك سيولة فى المرور يمكن اتعملت حاجة أنا بعتبرها شئ جميل جدا محمد صلاح: ميدان الرماية أ / محمد غنيم: ميدان الرماية اللى كان فى نص سرة حديقة كبيرة جدا والناس حواليه العربيات حواليه فى منتهى الدقيق لما بقى وان واى ناحية الهرم اتعدل لا دى كلها حاجات كده تراتيب زى ما بيقولوا فاتح شهية إنما هناك خطة كبيرة جدا ولازم تواكب تنفيذ المتحف يعنى يوم ما أفتح فى آخر 2012 لازم يكون اتنفذ على الأقل الأنفاق اللى هو هيوديك الفيوم دون أن تمر على ميدان الرماية وال bridges اللى هى الhigh bridges محمد صلاح: الكبارى يعنى أ / محمد غنيم: الكبارى اللى انت هتعملها وتوسيع كل المداخل والمدخل ده مش هيتبنى على شفة طريق مصر – اسكندرية يعنى طريق اسكندرية الصحراوى ضيق أنا داخل بالمبنى لورا مش أقل من 150 متر يعنى فيه ساحة بنسميها الفياتسا وبتمشى فيها عشان توصل للهرم ممشى كبير إسمه الكرومينات المتنزه الكبير الواسع يعنى تمشى فيه كده انت والمدام وتبقى مستمتع من المتحف الكبير لغاية ما توصل الهرم كل ده مرسوم لو انت جيت عندنا عند السادة المهندسين اللجنة الفنية هتتفرج ريلى على ( really ) على حل لمشكلة المرور موجودة إزاى تصوريا ولكن عمليا هناك تكليف من الرئيس لكل الوزراء المعنيين بأن ينتهوا من هذا ده كل يوم بيفتح كوبرى وكل يوم بيعمل نفق كان الريس بيكلم الوزير أحمد المغربى عشان يعمل الكوبرى أو المحور اللى هو هيفتحه جديد فى يونيو الجاى لا هو بلا شك هناك حركة ، حركة نشطة فى موضوع شبكة المواصلات بص بقى محمد صلاح: أنا باصص أ / محمد غنيم: لا بس عشان تبقى عارف اليابانيون لم يوافقوا على القرض إلا بعد طرح أكثر من الأسئلة التى تطرحها يعنى أنا عندى النهاردة جاء لى 300 سؤال قبل ما يوافق على القرض اسمه استبيان جاوبنا على كل واحد بمستندات وبتقديم تعهدات من كل وزارة أنها ستعمل كذا وكذا يعنى خد مؤشرات السياحة فى مصر ده الكلام ده كان سنة كام 2003 إيه مؤشرات السياحة عندك كام سائح بيزورك إيه المؤشرات اللى تقدر توصلك لهذا قلنا المتحف المصرى فى التحرير بيستقبل كام مليون فى السنة 2،3 مليون أوكيه لا أنا هعملهم أقل من 2،3 مليون مين اللى بيزور الهرم كام واحد لقيناهم عدد كبير جدا هل من يزور الهرم لن يزور المتحف الكبير لا محمد صلاح: هو حكاية المتحف الكبير ، المتحف الكبير مش الإسم تقيل شوية يعنى ليه ما يبقاش المتحف الفرعونى متحف الحضارة أ / محمد غنيم: هيبقى عادى the grand Egyptian museum أشهر فندق فى لندن إسمه لانجراند محمد صلاح :فندق لكن مش متحف أ / محمد غنيم: المتحف المصرى الكبير طب هو كبير بأمارة إيه إنه أكبر متحف فى العالم محمد صلاح: أصل أنا حاسس كده إن هم إيه أو إن انتوا إيه أخدتم الإسم بالانجليزى وترجمتوه عربى أ / محمد غنيم: لا اللى حصل العكس التسمية بالعربى سبقت الإنجليزية ، الإنجليزية بس لتسهيل التفاهم مع الأجانب محمد صلاح: انت فى اللغات فظيع أ / محمد غنيم: ما تخش معايا يعنى الإسم النهاردة اشتهر افتح الويب سايت خش على الويب سايتس بتاعت المتاحف الأخرى احنا بيجى لنا كل يوم وفود من متاحف عالمية بيقولوا أرجوكم عاوزين نعمل تعاون مع هذا المتحف من الآن احنا نقدر نقدم لكم كذا واربطوا شبكتكم على شبكتنا عشان الزائر يقدر يخش على ما هو موجود من آثار فى المتحف البريطانى أو فى الميكروبولوتوف أو فى اللوفر أو فى الدورينو يخش على الأثر اللى مش موجود عندى علشان يكمل المجموعة اللى عندى يعنى من ضمن الحاجات تمثال عندى ناقص زراع لقيناه كده من غير زراع ورأس الرأس والزراع فى متحف ثانى برة وصل عملية تكنولوجيا المعلومات إن احنا بنربط ده مع الزراع والرأس اللى موجودة برة بزرار عن طريق البيوجرافى إنك تلاقى الرأس ركبت أدامك والزراع ركب فتشوف التمثال كله على بعضه محمد صلاح: أشوفه على شاشة يعنى أ / محمد غنيم: لا بشوفه على نفس التمثال يتعمل الضوء على نفس التمثال محمد صلاح: على نفس التمثال أ / محمد غنيم: على نفس التمثال وتيجى على الشاشة وتقرأ المعلومات محمد صلاح: يعنى وانت ماشى كده على التمثال الناقص ألاقيه كمل أ / محمد غنيم: لا تروح ضارب الزرار محمد صلاح: بعد ما أدوس الزرار هيكمل لوحده أ / محمد غنيم: وفيه كتير جدا فيه جرافيكس معمولة ودى إمكانيات بتعظم رؤيتك للآثار بتمتعك بإنك تشوف الأثر اللى انت مش شايفه بعينك لإن هو بيبدأ يحكى طب هو حفر ده اكتشف فين فى الأقصر فتضرب زرار ثانى تلاقى أدامك شاشة بتقول لك آدى الموقع الأساسى اللى جاء منه هذا التمثال فاصل إعلانى محمد صلاح: أستاذ محمد قل لى تصميم المتحف المصرى اللى موجود فى التحرير من الخارج تصميم فرنسى باين فى شكله قوى يعنى هنا بقى التصميم أيرلندى نسبة للمصمم أ / محمد غنيم :لا هو مش أيرلندى ولا هو المتحف اللى فى التحرير فرنسى محمد صلاح :شكله فرنسى أ / محمد غنيم: المتحف اللى فى التحرير ذو واجهة كريك كرومر مع أيضا كلاسيكى الخطوط وموجود أعمدة محمد صلاح: بس مش فرعونى خالص أ / محمد غنيم: هو فيه عناصر فرعونية موجودة فى المتحف أما إذا كنت بتتكلم إن ده تصميمه أولا اللى عمله ما تقدرش تقول عليه إن ده أيرلندى ده صينى اتولد فى أمريكا فبقى أمريكانى من أصل صينى اتجوز واحدة أيرلندية فخدته جنسته من أيرلندا محمد صلاح: ظروفه صعبة أ / محمد غنيم: وانت عارف إن الظروف صعبة مع الزواج محمد صلاح: قوى أ / محمد غنيم: فدخل بإسم بلاتنا فهو رجل كوزموبوليتيف عولمى أكتر من جنسية محمد صلاح: طب خلينا فى التصميم أ / محمد غنيم: التصميم معمول عبارة عن يعنى إسهام معاصر متواضع لكن براق محمد صلاح: بسيط يعنى أ / محمد غنيم: آه بسيط ولكن واجهته آلاباستر حيطة آلاباستر 650 متر طول فى ارتفاع 45 متر عرض بتتلألأ فى الصباح وأيضا تتلألأ فى المساء مع الأضواء ودخل نور لجوة المتحف طبيعى ده فى حد ذاته اسمه أيكونة المصرى الكبير الأيكونة بتاعتنا احنا بس مش عند حد ثانى انت هنا موجود فين فى أسفل تل هضبة الهرم هل تقدر تبنى أى تعقيدات معمارية حتى لو كانت حديثة تناطح الهرم لا يمكن ، هل تقدر تعلو بسقف التصميم ده أو البناء أعلى من الهرم مش ممكن هو مبنى يقدم احتراما ووقارا لمصر الفرعونية المتمثلة فى الأهرام محمد صلاح: طب خليك معانا ثوانى بقى أ / محمد غنيم: اتفضل محمد صلاح: لسة كمان فاصل فاصل محمد صلاح: بما إننا فى معمل من معامل الترميم فى المتحف المصرى الكبير أستاذ محمد احنا عملنا تقرير كده عن المعامل اللى هى كانت بدأت الشغل الرئيسى فعلا قبل البنى الرئيسى للمبنى نشوفه كده وبعد كده نعلق عليه إيه رأيك نشوف معامل الترميم فى المتحف المصرى الكبير فاصل تقريرى المذيعة : تم إنشاء مركز الآثار والمخازن الأثرية فى مرحلة متقدمة من مشروع المتحف الكبير وقبل إنشاء المبنى الرئيسى له حتى يتمكن المرممين من إعداد وتجهيز 100 ألف قطعة أثرية من المخطط أن يضمها المعرض ليلة افتتاحه مركز الترميم فى مبنى مستقل يرتبط بالمبنى الرئيسى للمتحف بنفق تحت الأرض يصل معامل الترميم بقاعات العرض ويقول المدير التنفيذى للمركز أسامة أبو الخير أ / أسامة أبو الخير : المتحف المصرى الكبير بيعتبر أكبر متحف على مستوى العالم وعشان كده تم إنشاء أكبر مركز ترميم على مستوى العالم بالنسبة للتجهيزات بتاعته ومن حيث حجم العمالة من حيث المعامل لإن احنا بنملك المعامل يمكن كل الزيارات الأجنبية اللى جاءت حصل لها حالة إبهار من حجم المعامل اللى عندنا وشكل التجيهزات وأنا بتمنى إن هو أو إن احنا نبقى على مستوى المسئولية اللى احنا متحملينها المتحف أو مركز الترميم يبقى فعلا درع الحماية والأمان لآثار مصر كلها وآثار المتحف المصرى المذيعة : وهكذا بدأ مركز الترميم بالآلات والمعدات اللازمة وبتمويل كامل بصندوق تمويل الآثار من المجلس الأعلى للآثار محمد صلاح: لما فيه أكتر من أو حوالى يعنى 100 ألف قطعة أثرية هيتم وجوده فى المتحف الكبير عايزين نعرف الكلام ده كله الحاجات دى كلها هتتنقل إزاى أ / محمد غنيم: الفكرة فى مدى السرعة والانضباط والتأمين طبعا عشان تأمن احنا مقسمين الآثار إلى آثار صغيرة وآثار عادية متوسطة الحجم ثم ما يسمى بالآثار الثقيلةheaves والآثار الضخمة super heaves والآثار الطويلة زى المسلات أصعب حاجة هتتنقل هى مركب خوفو المتحف اللى على هضبة الهرم ده المركب اللى جواه هتتنقل هنا ده صعب أصعب من رمسيس لإنك انت بتنقل خشب هل هتنقله مرة واحدة وللا قطع الدراسة شغالة عشان يحددها واحنا قلنا عشان الجدول الزمنى للتنفيذ ما يحصلش فيه خلل ندى الأجزاء الصغيرة والمتوسطة والتى يمكن نقلها محليا عن طريق المجلس الأعلى للآثار ونجحوا فى هذا وتم نقل 10 آلاف حتة لغاية دلوقتى محمد صلاح: إزاى بقى النقل بقى أ / محمد غنيم: نقل عادى بتخديع أولا تنظيف للأثر فى موقعه تغليفه وعمل ما يسمى بالإسعافات الأولية عارف يعنى زى ما يكون حاجة كده بتتعمل تنظيف وبعدين يعمل تغليف يتحط فى صناديق بشكل علمى مظبوط مفيش مسامير دق فيه ألاووظ آه عشان لحسن تتكسر وبعدين النقل بتأمين والأمن بيرافق الآثار دية إلى حتى دخولها المخازن بيبقى فيه لإن دى مسألة خطرة ففيه لجنة من الأثريين ومنها المرممين ومنها الأمن للحفاظ على الآثار أثناء النقل ونجحنا ومازال عندنا آثار يمكن تصنف إلى 20 ألف نقدر احنا نعملها فيه آثار بقى صعبة جدا يعنى مركبة خوفو دى بالإضافة إلى التماثيل الضخمة اللى جاية من المواقع المختلفة اللى هى هتتحط على الدرج الكبير ، الحاجات السوبر هيفيس دى والطويلة الحاجات دى كلها احنا هنعمل مناقصة بين الشركات المؤهلة العالمية وممكن تشترك مع شركة محلية عشان يعملوا هذا عشان ضمان وتأمين نقل الآثار الثقيلة والضخمة والطويلة بشكل آمن دى بتلتزم الشركة دى بالوقت اللى أنا عايزه محمد صلاح: هو ليه المتحف كده من كلامنا برضه فهمت يعنى إنه متحف فرعونى بس أ / محمد غنيم: لا هو متحف للحضارة المصرية للى يعنى متحف فرعونى للآثار الفرعونية إنما بادئين ما قبل التاريخ ومنتهيين فى كرومر لما حصل مارجينج نوع من الاندماج الحضارة اليونانية والحضارة المصرية اللى فيها اليونان تأثرت بالعقيدة الفرعونية محمد صلاح: ما كملناش ليه بقى وللا دة موضوع ثانى أ / محمد غنيم: ده بيعمله متحف الحضارة المتحف اللى هو المتحف الإسلامى ومتحف الحضارة فى الفسطاط ودة كمان حاجة عظيمة جدا مشروع عظيم فتح بنا الزمن تروح تتفرج عليه فى الفسطاط فخر وهيبقى موجود فيه بقى نماذج وآثار الحياة اليومية لإن انت فى الحضارة انت بتعرض للحياة اليومية للفراعنة وبتعرض للتقدم العلمى والتقدم الاجتماعى وهذا وصل إليه المصرى حتى العصر الحديث إنما هنا متخصصة فى بيرييت معينة خدنا قبطى وخدنا إسلامى وبناخد متحف التحنيط ده بيسموها سيماتيك يعنى متاحف ذات موضوع إنما ده بيحوى كل الموضوعات محمد صلاح: انت قلت إن المتحف المصرى الكبير مش هيبقى متحف حكومى بس قريت لك كلام زى كده يعنى وإن فيه شركات استثمارية هتساهم بشكل أو بآخر إنه سيتم الاعتماد على الأجانب بشكل أو آخر برضه يعنى قل لى بقى الشركات الاستثمارية دى هيبقى إيه دورها وإيه حكاية الأجانب دى أ / محمد غنيم: حتة الأجانب دى حتة شوفونية قوى إن تتحط ويتقال إنى هيتسعين بأجانب أنا بالصالح والمؤهل اللى هيفيدنى أكتر استثمارا وهيفيدنى أكتر فى الكواليتى بتاعت الخدمة المتحف لن يكون حكوميا 100 % المتحف يسمى عام خاص public – privet محمد صلاح: حلوة جديدة دى أ / محمد غنيم: آه الآثار حكومية تبع الدولة محمد صلاح :طبعا هو فيه آثار أ / محمد غنيم: ما تقدرش اللى من اليابان بقى الخاص بإيه المناطق اللى عندى الترفيهية والثقافية والعامة من الممكن أن يأتى ما يسمى بالمستثمر عن طريق مزايدة أو طريق جوينت فينشان شركة محاصة بينه وبينى عايز يدير مطعم بديه له وباخد منه فلوس محمد صلاح: دى الشركات أ / محمد غنيم: ممكن يكون االممستثمر أجنبى ودفع أكثر من المصرى وبيدينى كواليتى أكثر على الأقل إن أنا بقدم نموذج للخدمة مرتفع وبعدين فيه تأهيل سابقة تأهيل مش هيجى لى مطعم زى ما بيقولوا عزيز الزفارة وللا إيه فى المسلسلات محمد صلاح: لا عزيزة مش هتيجى أ / محمد غنيم: آه محمد صلاح :بقولك يا دكتور هو دلوقتى هيبقى كده إذا كانت إمكانيات الأجانب أكبر فى الخدمات فهم اللى هيفوزوا تقريبا فى المناقصات أم لها هيبقى العنصر المصرى الوحيد اللى فى المتحف كده الآثار أ / محمد غنيم : لا أنا طرح برضه هنا افتراضى وهو جميل جدا إنك تقول كده عندنا من المصريين من الأكفاء محمد صلاح: مش كده عايزين الناس تشتغل وتستفيد منه فى مجالات كثيرة أ / محمد غنيم: انت عارف هيوفر كام فرصة عمل محمد صلاح: آه قل لى أ / محمد غنيم: 5500 فرصة عمل محمد صلاح: جميل أ / محمد غنيم: خلال فرص العمل اللى هى جاية أثناء التنفيذ أثناء التنفيذ فيه 6 آلاف فرصة عمل لمقاولين ولعمال بناء وشركات نظافة وحاجات كثيرة جدا بس احنا بناخد دلوقتى بأساليب اقتصاديات الثقافة هذا مصدر كقناة السويس للدخل القومى آخده للأحسن واللى هيدينى أكثر بس مع تفضيل المصرى إذا كان مؤهلا يعنى أنا من ضمن الشركات اللى فازت عندنا كمقاولين وهتتبارى ما احنا عندنا شركات عملاقة مصرية 3 شركات مصرية محمد صلاح: طب إيه لازمة أ / محمد غنيم: دخلت مع شركات أجنبية محمد صلاح: يفترض إنه يكون فيه تهيأة للبيئة قريبة للى ساكنة حوالين لتأهيل الناس هناك أولا للتعامل مع المنطقة أولا مستشفى مثلا وكل مشروع كبير بيبقى مفيد للبيئة المحيطة به بيتخطى الهدف حتى إذا كان الهدف اقتصادى بس يعنى انتوا عملتوا حساب على الحكاية دى أ / محمد غنيم: ما هو هقول لحضرتك محمد صلاح: أنا بحس ساعات لما بسألك بتروح عامل كده متضايق من السؤال أ / محمد غنيم: أنا مش متضايق محمد صلاح: آه أ / محمد غنيم: أنا بس بقول لإن حاطيتك فى الأول 300 سؤال من الجانب اليابانى منها دول محمد صلاح: ما أنا ما كنتش مع اليابانيين بس بحس بهم أ / محمد غنيم: تعرف يابانى محمد صلاح: آه أنا فى اليابانى فظيع كمل أ / محمد غنيم: سوشى وللا يعنى عايز أقول لك المنطقة المحيطة من دلوقتى اترفعت أسعار الشقق فيها والفيلات محمد صلاح: لا أنا مش بتكلم حاجة تترفع أ / محمد غنيم: أنا هتكلم فى ثقافة استغلال موقع زى ده لرفع المستوى الاجتماعى والاقتصادى للمناطق المحيطة يعنى الدولة عاملة ماستر بلان 65 كيلو البوابة بتاعت اسكندرية دى هتتحرك كمان ليه لأن بدأ كله يدى على حس المتحف الكبير فيه بعض الأماكن عايزة تاخد العلامة التجارية بتاعتها من المتحف الكبير محمد صلاح: بس هسألك كده أنا مش فرحان قوى أنا هفكرك بحاجة بس أنا كنت عملت حوار مع الدكتور زاهى حواس بعد زيارة الرئيس الأمريكى أوباما للقاهرة وواجهته بمشهد لما كان بيتفرج أوباما على منطقة الأهرامات وأبو الهول وإنه لما كان متجه ناحية أبو الهول كان وراه غسيل منشور فهو طبعا الدكتور زاهى قال لك أنا فيه حاجات أقدر أسيطر عليها وفيه حاجات ما أقدرش أسيطر عليها وفى النهاية قرروا بناء سور حوالين المنطقة الأثرية فى الهرم وده شغالين فيه فانت مش هتفرحنى قوى إن بدأ فيه بناء بقىما هو هيبقى فيه طوب أحمر وفيه تكاتك والشغل اللى انت عارفه ده أ / محمد غنيم: بس أنا ما عنديش نزلة السمان هنا ولا هناك محمد صلاح: ما هى هتطلع لك أ / محمد غنيم :مفيش حد هيقدر يطلع محمد صلاح: دى حاجات بتطلع أ / محمد غنيم: ممنوع البناء على الأراضى المحيطة محمد صلاح: أمال فين البناء اللى حضرتك بتقول عليه حضرتك بتقول لى الأسعار ارتفعت وبتاع أ / محمد غنيم: ما هى موجودة ممنوع البناء أنا بكلمك فى الشقق اللى موجودة يعنى روح العمارات اللى وراء بتاعت القوات المسلحة محمد صلاح: عمارات الرماية يعنى أ / محمد غنيم: آه ارتفع السعر حوالى 3 أضعاف الأرض فاضية المسموح البناء فيها ارتفع السعر فيها محمد صلاح: بس ده موضوع ثانى أنا بتكلم على تأهيل الناس أو الاستفادة منهم للعمل أو أ / محمد غنيم: بص أولا احنا عندنا ثقافة الإحساس بإنك جنب مكان عظيم زى الأهرامات أو جنب المتحف الكبير بلا شك لابد أن يؤثر هذا على ذاك وذاك على هذا لازم هيبقى موجود فى ثقافة الناس إنه جنب مكان الشياكة فيه جامدة جدا حتى العناصر البشرية اللى جواه مستواها راقى جدا لازم هيرفع المستوى الاجتماعى لإن أنا لازم أعمل دمج بين هؤلاء السكان اللى جنب إن ده مكان ولازم ييجوا يقضوا فيه لإن هو هيبقى مفتوح لغاية 3 الصبح يعنى المتحف ده من 10 صباحا ل 10 بالليل محمد صلاح: كل يوم المقدر كام زائر كل يوم للمتحف أ / محمد غنيم: لا فى السنة أقدر أقولك فى السنة محمد صلاح :كام فى السنة ما احنا نقسمها أ / محمد غنيم :احنا عندنا سيناريو متشائم وسيناريو متفائل احنا خدنا بالسيناريو المتشائم بعد ارتفاع أو دفع حركة السياحة فى مصر زادت المعدلات أنا بقول هاخد السيناريو المتفائل هنوصل ل8 مليون فى السنة وبالتالى محمد صلاح: هتبقى محتاج بقى الكلام اللى احنا قلناه بقى الخدمات والطرق أ / محمد غنيم: جنبك إيه هنا فى الحتة دى حدائق الأهرام نمرة واحد وحدائق الأهرام وراك نمرة اثنين وجنبك أماكن لا تشوه المكان اللى بيشوه المكان هى المخازن اللى جنبى اللى أنا هستولى عليها كوزارة ثقافة طبعا هستولى عليها وأدفع فلوسها وعندنا تصور آخر أرجو أن ننجح فى إن الطريق اللى يطلع للهرم ده يبقى خالى دى عايزة شوية اتصالات وزير الثقافة فاروق حسنى بيعمل على هذا يعنى أنا عايز أولا احنا دلوقتى فى عهد مفصلى عايز أدى الحق له فى هذا المشروع هو صاحب فكرة هذا المشروع هو اللى فكر فى بناء أكبر متحف فى العالم لما سأل فى باريس مرة المتحف المصرى فى التحرير صغير محمد صلاح: صغير قوى أ / محمد غنيم: عاملين إيه فى الآثار قالوا لا ما احنا هنبنى متحف كبير كده جاءت كده محمد صلاح: ضربها من دماغه أ / محمد غنيم: ضربها من دماغه وعمل على تحقيقها وعرض على الرئيس والرئيس جاء اشتروا وهم اللى اختاروا المكان الرئيس اختار المكان فأنا عايز أدى له حقه هو أنجز كثيرا الآن الجهود كلها تكاتفت المجلس الأعلى للآثار معانا الدكتور زاهى حواس بيساعد بطريقة غير عادية وهو عضو اللجنة العليا لتنفيذ هذا المشروع السيد الوزير رئيس اللجنة العليا ولكن هو نائب رئيس اللجنة العليا احنا النهاردة شغالين كتيم فى المتحف الكبير محمد صلاح: طيب أ / محمد غنيم: مش محمد غنيم بس لا احنا معانا لجنة تنفيذية من 5 من الشخصيات اللامعة شغالين كفريق عمل كل واحد واخد اختصاص بيشتغل فيه ما بنقولش أنا اللى بنيت زى ما قال لك أنا اللى اخترت المخرج لما قال لك أنا اللى اخترت محمد صلاح: عادل عبد الواحد أ / محمد غنيم: عادل عبد الواحد لما قال لك أنا اللى اخترت وانت اللى اخترت الدائرى رغم إن الدائرة ده مش انت اللى اخترته يعنى محمد صلاح: لا أنا مش اخترت أبنيه أنا اخترت آجى من عليه أستاذ محمد دائما بيبقى فيه هوجس بتتعلق من مسألة الخوف من التأمين مش بس عشان زهرة الخشخاش واللى حصل فيها يعنى إنما مشهور إن احنا ناس طيبين وبعد كده هيبقى فيه فوضى وأى حد ممكن يقدر يروح أى حتة وممكن ياخد منها أى حاجة يعنى تأمين الآثار هنا هيتم إزاى بقى أ / محمد غنيم: بأحدث الإجراءات والمعدات اللى هى خش شوف التأمين اتعمل ازاى محمد صلاح: لا أصلا طلعوا عنينا عشان نيجى الرقم القومى ده موضوع عادة بيتم ضربه أو التغلب عليه بواسطة اللى عايز ييجى يسرق هيعرف يعنى أ / محمد غنيم: لا انت داخل مكان أولا مش للزائرين يعنى مركز الترميم ده للعاملين فيه بس لإن احنا بنعز قوى سيادتك والتليفزيون المصرى وبنعتبر برضه ده ترويج لفكرة المشروع والدعاية له انت سيادتك موجود معانا لكن احنا الدخول هنا لازم بإذن أمنى وإذن أثرى يعنى حضرتك كنت هتصور برة فى الساحة الخارجية المخرج نفذ رأيه وقال لك لا أنا عايز هنا محمد صلاح: انت عايز تثبتها يعنى إن هو اللى اختار المكان وأنا كنت عاوز برة أ / محمد غنيم: يعنى لازم أدى اللى وراء الكواليس حقهم محمد صلاح: طب كمل بقى فى التأمين بقى للآثار أ / محمد غنيم: بالنسبة لتأمين للآثار المركز الترميم نموذج لما سيكون عليه المتحف الجديد انت ما تقدرش تخش هنا إلا بكروت مغناطيسية لكل واحد ده معاه كارت يفتح الباب لكن الباب اللى جنبه ما يقدرش يفتحه الدخول ألكترونى ومعمول تحت مظلة الأمن القومى المصرى يعنى مش احنا عاملينه كده على مستوانا لا نحن ننسق ونأخذ بكل النصيحة والاستشارة وحتى التنفيذ فى المواصفات الأمن القومى المصرى مين بقى من الأمن القومى المصرى مش هقول لك محمد صلاح: المهم إن المتحف يكون متأمن أ / محمد غنيم: متأمن جدا احنا عندنا قيادة أمنية هنا ناجحة جدا فى وزارة الداخلية كان صعب إن احنا ناخده العقيد أيمن بدر الدين معاه جهاز عظيم جدا احنا عندنا هنا تأمين ال117 فدان بحالهم لأن المبنى ده خلص تحت فيه مبنيين هيتزالوا بعد شوية اللى هو اللجنة الفنية الهندسية ودى فيها كل شركات عندنا شركة إدارة محمد صلاح: معقولة انت بتتكلم بجد أ / محمد غنيم: إدارة المشروع أنا مش احنا محمد صلاح: أمال مين أ / محمد غنيم: شركة إدارة أجنبية – مصرية غير هاف وهاف بيعملوا إيه مش سايبينها للموظفين اللى هو احنا هم اللى بيقولوا لنا إيه الصح وإيه الغلط هم اللى بيراجعوا المناقصات ويقولوا ده مؤهل إنه ينفع وللا لا ده سعره معقول وللا لا يعنى لأول مرة فى مصر هناك شركة إدارة عدد العاملين فيها 140 خبير فى كافة المجالات الخاصة بالمتحف أنا ممكن آخدك دلوقتى أوريك من جميع الجنسيات ومنهم مصرييين لإن فيه شركة مصرية عندنا المبنى الثالث اللى هو اللجنة التنفيذية ومعانا زملاءنا ده مبنى صغير زى المعبد كده كل ده هيتهد علشان خاطر المبنى هيبنى من فبراير القادم محمد صلاح: 2012 هنحضر الافتتاح يعنى أ / محمد غنيم: أنا شاكك هنا أنا بس بأرجو إن ربنا يدينى العمر بلا شك لإن انت شاب جميل وفرص الحياة عندك أطول منى يعنى بس إبقوا افتكرونى لو حصل رحيل أو حاجة محمد صلاح: ربنا يديك طولة العمر يديك ويدينا طولة العمر احنا هنفتحه مع بعض إن شاء الله أ / محمد غنيم: ما تعرفش مين اللى يموت قبل مين محمد صلاح :انت هتضلمها فى آخر الحلقة ليه مشروع المتحف المصرى الكبير واحد من أعظم المشاريع المصرية فى القرن الواحد والعشرين ومشروع ثقافى علمى ترفيهى كبير بنحب يكون دائما فى مصر حاجة حلوة كل واحد بيلاقى فى مصر حاجة حلوة خاصة به يا ريت المتحف يبقى حاجة حلوة لكل المصريين بنشكر الفنى للمتحف الأستاذ محمد غنيم على كلامه معانا النهاردة كان كلام جميل كلام معقول أكيد كان كلام مسئول وخلص الكلام سلام أ / محمد غنيم: ممكن أضيف حاجة محمد صلاح: ضيف بسرعة قول أ / محمد غنيم: فى الحتت العشوائية اللى انت بتعملها انت قلت من أعظم المشروعات الثقافية فى العالم لا هو ثانى مشروع معمارى ضخم فى العالم بعد القرية الأولميبية فى الصين ده حسب مجلة التايمز نمرة اثنين هو سيكون أكبر مجمع ثقافى فى العالم لإن فيه كل أصلنا محظوظين جينا فى عهد تكنولوجيا المعلومات والاتصالات فاستخدمنا ما لم يستخدمه أحد محمد صلاح: بس قطعت قلبى انت بالكلمتين اللى فى الآخر دول وخلص الكلام سلام نلتقى فى الحلقة المقبلة لمشاهدة الحلقة كاملة " فيديو"
