يحدث في مصر

رشا مجدى :مساء الخير اعزائنا المشاهدين فى كل مكان واهلا بكم فى حلقة جديدة من يحدث فى مصر اكيد من حق المواطن المصرى ان يتمتع برعاية صحية ومن حقة ايضا ان يحصل على العلاج بسعرمناسب وان يحصل على خدمات صحية فى جميع المستشفيات
محمد موافى :يمكن الدولة بتشتغل على توفير الخدمات الصحية لجميع افراد الشعب من خلال الارتقاء مستوى الخدمات الصحية دلوقتى اجمالى الاستثمارات اللى اتنفذت فى قطاع الصحة بلغت اكثر من 30 مليار جنية
رشا مجدى :اسمحولى اقول مع حضراتكم شوية ارقام القطاع الصحى شاهد زيادةعدد لمستشفيات بنحو خمسة الالاف وسبعمائة وخمسين منشأة منهم 1878 مستشفى و 3874 منشأة علاجية زادت عدد المستشفيات القروية الى 1192 مستشفى
محمد موافى : يمكن الاسرة اوالسرايرزادت لحد 133000 و900 سرير بنتكلم فى 134 الف سرير زيادة وزادت عدد الوحدات الصحية الريفية اكثر من 4700 وحدة الاطباء زادوا حوالى 79000 طبيب
رشا مجدى : الليلة دى هنتعرف على تطور قطاع المستشفيات والى مدى وصل العلاج على نفقة الدولة لكن اسمحوا لى فى البداية ارحب بضيفنا فى الاستديو,الدكتور حاتم الجبلى وزير الصحة مساء الخير يا افندم
د.حاتم الجبلى : اهلا وسهلا
رشا مجدى :اسمح لنا فى الاول نشوف التقرير ده وبعدين نرجع
د.حاتم الجبلى : اتفضلى
تقرير
شهدت مصر خلال السنوات العشرين الماضية تطورا كبيرا فى مؤشر التنمية الاجتماعية الخاصة بالصحة حيث زاد متوسط الاعمار بنسبة كبيرة وانخفضت وفيات الاطفال بما يقارب المعدلات العالمية والتى ترجع بشكل اساسى للطفرة النوعية لكافة الخدمات الصحية المقدمة للمواطنين
مواطن :الخدمة دلوقتى تختلف اختلاف كبير عن 80 و70 وعن الايام اللى فاتت دلوقتى فى دعم مالى القرارات على نفقة الدولة ساعدت ناس كثير من الفقراء
مواطن :الحاجات مسهلة دلوقتى كنت بتروح للمكان تتطعم دلوقتى بقى التطعيم بيوصلك لحد بيتك
مواطن :فى اهتمام الحمد لله حتى الطبيب باحس ان هو مش جاى يؤدى مهمة ويروح يعنى يؤدى اللى عليه ويروح لأ لكن هو حقيقى حريص على ان هو يعالج المريض
مذيع : جودة الخدمات الصحية المقدمة على خلفية النهوض بالكوادر البشرية وتحسين مهارات اطقم الاطباء والتمريض اضافة الى تحسين البنية التحتية لمعظم المستشفيات العامة والمركزية
دكتور: جهازالاشعة جهاز اشعة مقطعية كان المقطع بياخد حوالى دقيقة ونص اعدت سرعة الاجهزة دى تزيد حاليا بنسبة 320 مقطع فى ثلث ثانية ,يعنى حوالى 960 مقطع فى الثانية فا بنقدر نشوف اى حاجة مش ثابتة فى الجسم زى العظم ممكن القلب اى حاجة بتتحرك نقدر ندخل فى الجهاز التكنولوجى فى التقدم اللى حصل فى السنوات الاخيرة ديت كم هائل جدا والحمد لله احنا عندنا حاجات فى جمهورية مصر العربية نفس التقنيات اللى موجودة فى كل دول العالم من ناحية منظاير الجهازالهضمى يمكن زى ما لاحظنا حضرتك بتشوف معايا الحالة فى تغيير فى الالوان ودى حاجة اسمها التصوير الطيفى ودى حاجة حديثة جدا حصلت فى اخر 5 سنين ان هما اخترعوامناظير ليها القدرة ان هى تبين ان كان فى اورام او بدايات اورام
محمد موافى : مواصلة تطوير المنظومة الصحية هدفة الوصول بالخدمة العلاجية للمواطنين من مستوى الازاحة الى مستوى الجودة والتميز فى الاداء
محمد موافى : دكتور يمكن الامثلة اللى جت كل دكتور بيقول التطور اللى هو شايفة مكانة فى المناظير فى يعنى دكتورحاتم الجبلى وزير الصحة لما نتكلم احنا كنا فين وبقينا فين تفتكر اية وهو مركز ان هو اطور فعلا كان حلم من ساعت ما بدأنا لحد دلوقتى ان هو يتغير
د.حاتم الجبلى :لأ فى حاجات كثيرة جدا يعنى سواء الممارسة اوتجهيزات ومبانى يعنى مثلا انت مثلا لما تبص على مستشفى زى القصر العينى اتبنت ازاى كان الوضع شكله اية فى السبعينيات طبعا الاجهزة كانت كلها اجهزة من شرق اوروبا اجهزة قديمة واحنا اياميها لما كنا نواب مكناش يعنى بنلاقى اى حاجة نشتغل بيهاحقيقتا يعنى انا فاكر كان عندنا جهاز اسمة الاشعة من سنة 47 لحد مثلا سنه 77 كان شغال وزى ما بيقولوا كان شغال بالمنفلة يعنى انما دلوقتى طبعا التغيير جذرى ليه بقى حصلت حاجتين حصل ان الطب نفسة اتقدم الى تخصصات دقيقة والحمد لله مع كل الصعوبات اللى بتقابلها الدولة وكل الصعوبات فى التعليم بتتكون اجيال جديدة من الاطباء قادرين على الدخول فى هذه التخصصات الدقيقة زى ما شفتوا مثلا فى المنظار بتاع الامعاء اللى هو الجديد او زى ماشفت طبيب الاشعة اللى هوبيتكلم على احدث تقنية فى التطوير الطبى بالاشعة المقطعية اللى هى 320 مقطع فى ثلث ثانية دى النقطة الاولى النقطة الثانية ان الدولة انفقت مبالغ ضخمة جدا فى التجهيزات فى اماكن كثيرة جدا هديك مثلا بسيط فى التخصص بتاعى انا اللى هو الاشعة سنه 78 فى مصر كان فى جهاز واحد فقط اشعة مقطعية لمصر كلها فى القصر العينى كا ن لسة جديد انما حاليا احنا السنة اللى فاتت لوحدها فقط فى وزارة الصحة ركبنا 70 جهاز سنه واحدة تلاقى فى سملوط فى جهاز فى مش عارف مثلا فى اسوان اكثر من جهازين دلوقتى الاقصر فى يمكن جهازين او ثلاثة يعنى اصبحت الخدمة اللى هى كانت متاحة
محمد موافى :مبقاش مركزى؟
د.حاتم الجبلى :مباقش مركزى فى لا مركزية دى نقطة النقطة الثالثة بقى تصميم المستشفيات المبانى الجديدة كلها واخدة رؤية غير القديمة خد مثلا معهد ناصر مثلا اللى هو بقالة دلوقتى اكثر من 15 سنة شغال قطعا بيعبر عن تطور فى التجهيزات والتطورفى تصميم المبانى ومع هذا لو خت مثلا مستشفى مثلا زى القوات المسلحة مثلا طريق الاسماعيليه مستشفى متميز جدا مستشفى المعادى
رشا مجدى : المركزالطبى العالمى
د.حاتم الجبلى :الطبى العالمى وغيرة يعنى التطور حصل فى كل كل
محمد موافى :يا دكتور احنا كده بنلخص التطور حضرتك اتكلمت ثلاث حاجات وخاص كذا شئ بالتفصيل
رشا مجدى : بس انا اسأل حضرتك يا افندم كلنا شيفين يعنى فى حاجة باينة امام الكل محدش ينكرها لكن فى بعض المستشفيات مش عايزة اقول القديمة او اللى هى اصبحت الخدمة الصحية فيها فى تردى ومتهالكة وبيقولوا ان وزارة الصحة ما بتعملش دور الرقيب على هذه المستشفيات
د.حاتم الجبلى : لأ دى
رشا مجدى : اهتمت مستشفيات المركز والكبير لا وفى فى القاهرة برضه بعض المستشفيات وصلت لحالة صعبة شوية اية راي حضرتك
د.حاتم الجبلى :هو هو ده واقع حقيقة انما يعنى برضه لازم كل حاجة تقييم فى الاطار السليم بتعها ان الخدمة الصحية فى اماكن كثيرة اوعديدة لم تصل الى مستوى يتوقعة المواطن لان المواطن فى حد ذاتة توقعاتة ارتفعت يعنى ايه يعنى زمان انا فاكر فى الستينيات كان الاتاحة هوالامل يعنى مثلا كانوا يقولوا الوحدات الصحية دكتور نبوى المهندس هيدى السنة دى 200 وحدة صحية القرية بتاعتنا بقى فيها وحدة صحية اهم حاجة يبقى فى القرية وحدة صحية ليه مش مهم دلوقتى الوقت اللى احنا فية ده ما بقتش طلبات المواطن فى الاتاحة لأ بياخد دلوقتى بيدور على الجودة لان زادت طموحاتة وده حقة الشرعى يعلى الانفاق الصحى لان احنا مرينا بسنوات حروب ومرينا يعنى بسنوات صعبة جدا البلد خاضت فيها يمكن من الستينيات الى منتصف التسعينيات كان الوضع الاقتصادى على الدولة ما كنتش قادرة تصرف الانفاق المفروض تصرفها لا على التعليم ولا على الصحة فا لما جينا بقى ابتدينا هذا الانفاق ابتدت تركز الاول على المراكز الكبيرة ما انا لازم اركز فلوسى استخدمها باقصى طريقة كفاءة متاحة امامى مش هقدر معايا مثلا 100 جنية مش هوزعهم على كل 100 مكان مش هيعملوا حاجة انما ال 100 جنية د ى اصرفها على مكانين بس هوده اللى حصل وبالتالى تطوير المستشفيات ما مشيش بالمعدل اللى الناس كانت متوقعاة د ى النقطة الاولى النقطة الثانية احنا فى مرحلة ما برضه ما اهتمناش بالنظام ادارة المؤسسة اللى بندير المؤسسة كان كل حاجة نقول الدكتور كويس لكن العيب فى الممرضة والعيب فى النظام والعيب فى دلوقتى احنا مركزين على هذا ليه لان دلوقتى بقى عندنا مبانى حلوة جدا واجهزة حلوة جدا ومفيش استخدام سليم فا مهم جدا ان نظام العمل نفسه كان يتطور بنفس الصورة
محمد موافى : والادارة علم يا دكتور
د0 /حاتم الجبلى : ما تطورش كان كل واحد يقولك هات الدكتور فلان يدير المستشفى لا فاهم يعنى ايه ادارة ولا فاهم يعنى اية حسابات ولا فاهم يعنى تمويل
رشا مجدى : وبرضه فى الريف يا افندم والا بس فى المراكز يعنى
د0 /حاتم الجبلى : بكلمك دلوقتى على المستشفيات
رشا مجدى : ما انا باتكلم على المستشفيات
د0 /حاتم الجبلى : اه
رشا مجدى : فى المناطق والمحافظات البعيدة شوية يعنى مثلا مش عايزين نقول القاهرة والاسكندرية انا باتكلم على الصعيد ووجه بحرى
د0 /حاتم الجبلى : مضبوط احنا بقى وضعنا سياسة ان احنا نركز على ما هو خارج القاهرة وبعدين نركز فى القاهرة وهديكى امثلة حية يعنى يعنى احنا فى خلال 3 شهور بنفتح 3 مستشفيات فى بنى سويف جديدة هنفتح فى الفشن وهنفتح فى ناصر وهنفتح فى الواسطة الجنوب والوسط والشمال مستشفى الفيوم العام هنبنى مستشفى جديدة خالص الاقصر العام هنفتتحها خلال اربع خمس اشهر كفر الدوار العام كل دى ما بنتكلمش عن القاهرة كفر الدوار العام دى احنا استلمنها كانت بتتبنى بقلها 30 سنة من سنة 79 هنفتتحها خلال خمس ست شهور مرسى مطروح العام عملنا فيها ملحق جديد
محمد موافى : كان لسة
د /حاتم الجبلى : افتتاحة قريب جدا وهيقى فيها جراحة قلب مستشفى التأمين الصحى جددناها بالكامل علشان
محمد موافى : طب يا دكتور
د.حاتم الجبلى :كله دلوقتى ابتدى ياخذ معاملة احنا خلصنا لغاية دلوقتى 75 مستشفى المستشفيات
رشا مجدى :من اجمالى كام
د.حاتم الجبلى : من اجمالى حوالى 400 وشوية
محمد موافى : ده البرنامج الانتخابى
د.حاتم الجبلى : اه لأ البرنامج الانتخابى بيتبع تطوير الستشفيات مااخذت رقم لكن احنا شغالين حاليا بعد ال 75 دول بحوالى 110 - 112 مستشفى
محمد موافى : طب يا دكتور لو سألنا المسالة بالعكس هل مازال المواطن فى الريف او فى اقصى الصعيد محتاج ينزل القاهرة او يخش القصر العينى او يشوف واسطة لمستشفى ناصر
د.حاتم الجبلى : بص فى نخصصات دقيقة يعنى مثلا جراحة المخ والاعصاب لازالت فيها نقص شديد جدا فى الاطباء وبالتالى لو واحد عامل عمليه فى مخة ,يعنى مش هيجد يعنى فى الصعيد هيروح اسيوط انما مثلا اصاد كدة فى حاجات ثانية تطورت جامد جدا انا فى زيارة وسيادة الريس قريبا لمدينة سوهاج وشرحت له قلت له ان احنا من 31 يناير 2007 لحد الاسبوع الماضى عملنا 500 عمليه قلب مفتوح فى سوهاج عملنا 520 عمليه قلب مفتوح
رشا مجدى : مستشفى معهد ناصر
د /حاتم الجبلى : فى سوهاج عندنا نفس القصة فى دمياط مركز القلب فى دمياط عندنا نفس القصة دلوقتى هنعمل جراحات قلب مفتوح فى السويس خلال شهر باضبط من انهاردة فى سوهاج تم عمل 8 عمليات زراعة كلى فى سوهاج اخر ست شهور يعنى مركز سوهاج بتاع الاورام عالج الف مريض بالاشعة خلال السنة الماضية وعالج حوالى 10000 مريض علاج كيماوى فى المركز هناك خلال فترة 2009 ده مكنش متاح قبل كدة يمكن
محمد موافى : فى امثلة ثانية غير سوهاج
د /حاتم الجبلى :طبعا عندنا احنا عندنا دلوقتى 11 مركز للاورام تبع وزارة الصحة معهد الاورام اللى تبع التعليم العالى غيرسبع مراكز فى القوات المسلحةحاليا المراكز بتعتنا فى الصعيد موجودة فى المنيا وموجودة فى اسوان وموجودة فى سوهاج 3 مراكز اورام وعندنا فى بحرى بقى حوالى يمكن تقريبا 8 عندنا فى استكندرية
محمد موافى : دكتور هى الدنيا المسألة منتشرة
د.حاتم الجبلى : لأ هو اللى حصل انه سيادةالريس من حوالى 10 سنين لقى ان فية تكدس شديد جدا على معهد الاورام فى مصر فطالب ان يتعمل مراكز عشان الناس انها ما تضطرش انها تقطع مسافة كبيرة جدا من مدنها تيجى تأخذ علاج كيماوى وترجع تانى كل اربع اسابيع او كل ثلاث اسابيع فا بالتالى بدأت الفكرة دى فى عهد الدكتور اسماعيل سلام واحنا توسعنا فيها خلال الثلاث سنين اللى فاتت احنا صرفين على معاهد الاورام بتعتنا بتاعت وزارة الصحة اخر سنتين 200 مليون جنية منهم 100 مليون فقط فى سوهاج والمنيا
رشا مجدى :طب معالى الوزير خلينى اسألك سؤال
د.حاتم الجبلى : لأ اتفضلى انا النقد بالنسبة لى مش مشكله
رشا مجدى : نفايات المشتشفيات الطبية وحضرتك عارف كم التعامل معاها بشئ من التقصير لدرجة ان هما اخذوها استعملوها الشاش والقطن بتدخل فى صناعة المراتب لازم نجد اليه نجد بدائل لاستخدام هذه النفايات الموضوع ده اتكشف واناعارفة ان حضرتك وقت ادام الموضوع ده كثيراحنا موضوع النفايات ده دى منظومة متكاملة تبدأ من المكان اللى بيولد هذه النفايات وتنتهى بالتخلص منها بطريقة امنة مكنش فى اهتمام قوى لدى العاملين فى القطاع الطبى بهذا الموضوع كانوا قلقين منه مش قلقين مش مدينة اهتمامة يعنى اية احط الحاجة فى كيس ويرميها ويجى الزبال العادى ياخذها ويحطها فى عربيتة وبعدين بعد كدة يفرزوها ودى حاجة طبعا فى منتهى البدائية ابتدى طلعت منظومة بجمع النفايات فى مصر هى فى اطار المحافظة على البيئة وصحةالمجتمع احنا عندنا دلوقتى قطاع او ادارة والادارة دى حاليا السنة اللى فاتت جبنا لها 135 سيارة جديدة موزعة على كل محافظات مصر انما المفروض ان يتولى المنظومة بالكامل جهاز وليكن من القطاع الخاص زى ما حاصل فى الاسكندرية ولما بتحصل مخالفات احنا طبعا الشركة الاجنبية بتاعت الاسكندرية احنا طبعا وجهنا لها لوم شديد جدا اتخذنا ضدها اجراءات تتعامل مع محافظ الاسكندرية برغم انها معروفة جدا عالميا وكدة لان كان عندها تقصير فى الاداء فا الرقابة حاليا بدات واحنا من الناحية الثانية بدأنا من 2006 حاجة اسمها برامج مكافحة العدوى فى المستشفيات برامج مكافحةالعدوى دى تعلم العاملين فى المستشفيات ازاى يتخلصوا من النفايات الطبية بطريقة امنة بمعنى لما يكون عندك مثلا سرنجة ترميها فى كيس زبالة لازم تجيب لها علبة زى مثلا العلب البلاستيك بتاعت المربى وتبقى محطوطة فى كل حتة بتستخدم فى السرنجات دى لماتتملى تتفل العلبة ويتم التخلص منها بدفنها بطريقة معينة فى اكياس لونها احمر لنفايات معينة وفى اكياس لونها ازرق هى منظومة
محمد موافى :دكتور قضية ثانية غير النفايات يمكن قضية بقى فى الفترة لالا المشكله ان ضرتك برضه ما بتخبيش
د.حاتم الجبلى : اه
محمد موافى : دى حاجة بتتقال قضية
رشا مجدى :العلاج على نفقة الدولة
محمد موافى : يعنى بقت نفقة الدولة بقت 44 مليون جنية
د.حاتم الجبلى : اه
محمد موافى : ل 11 نائب حضرتك اللى قلت خلينا نشوف التقرير ده ونرجع
مذيع : على عبد الرؤوف عامل بسيط وواحد من مئات المواطنين الذين يترددون يوميا على المجالس الطبية المتخصصة بوزارة الصحة وذلك لاستخراج قرار على نفقة الدولة لعلاجهم باحد المستشفيات
مواطن : انا عندى تمزق فى الاربطة روحت الاول مستشفى الدمرداش الدكتور شخص لى الحالة بس الاول قالى اعمل الاشعة دى وروح الاول وزارة الصحة وكتب لى ا لقرار ده وعشان اخلص القرار ده ويارب يخلصة لى بسرعة
محمد موافى : منذ الصباح الباكر بدأ على اجراءات انهاء الاوراق الروتينية بين اللجان الطبية بالمجالس المتخصصة فى محاولة لاستخراج قرار العلاج الاجراءات التى طلبت منه نسيها على مع فرحة صدور القرار على انا الحمد لله رب العالمين اا خلصت القرار الكلام ده اخذ منى اجراءات يعنى ساعتين والحمد لله استلمت القرار ورايح اعمل دلوقتى الاشعة وربنا يسهل انشاء الله اذا كنت هعمل عمليه والا ايه زى ما يقولوا الاطبة
محمد موافى : رغم مشقة رحلة الحصول على العلاج يظل العلاج على نفقة الدولة احد اهمالاولويات التى توليها الدولة اهتماما خاصا لتحسين تلك الخدمة وتيسرها كافة المواطنين
محمد موافى : احنا شفنا التقرير واخذ القرار خلال ساعتين بس ده نموذج من وسط نماذج كثير مش مصدقة ليه الناس مش مصدقة ان هى قرارا ت العلاج على نفقة الدولة محتاج واسطة
د.حاتم الجبلى :المواطن بصفة عامة ما بيثقش فى الحكومة ده تاريخيا يعنى مش وبالتالى اى حاجة بيسمعها ما بيحاولش حتى يبحث اذا كانت حقيقة فا بياخذها كدة امر مسلم بة فا احنا فى العلاج على نفقة الدولة المواطن من حقة انه يخش وياخذ القرار زى ما انت شفت كده خلال ساعتين بدون اى وسايط هو نتيجة عدم ثقتة دى بيلجأ الى واسطة ما بيصدش ان فى حاجة ممكن تيجى وبدون اى وسايط
محمد موافى : والواسطة بتجيب تجارة
د.حاتم الجبلى : الواسطة طبعا بتفتح ابواب التجارة
محمد موافى : بالملايين يا دكتور
د.حاتم الجبلى : افندم
محمد موافى : فى تجارة بالملايين فى المسألة دى
د.حاتم الجبلى : انا اعتقد هذا هذا حقيقة اعتقد انه لا يعقل ابدا ان يجى واحد يقولك اصل انا باجيب للناس الغلابة قرارات علاج ب 7 مليون جنية فى الشهر ما اعتقدش الناس الغلابة يعنى محتاجة لواحد يجيب لها قرارات زى ما هى نفسها تروح المستشفى
محمد موافى : حضرتك قصت قلت 11 نايب بياخد 44 مليون جنية ليه بس حضرتك ما حددتش
د.حاتم الجبلى : نعم
محمد موافى :حضرتك ما حددتش
د.حاتم الجبلى : لأ ما انا مش هعلن اسماءهم للعامة لكن هبعث قائمة زى ما قال الدكتورفتحى سرور بيهم لرئيس مجلس الشعب فا الفكرة بيمثلوا كافة الطوائف
الاساسية بدون استثناء علشان بعض الناس متخيلة انهم فى اتجاة واحد لأ
محمد موافى :الا اللى على راسة بطحة
د.حاتم الجبلى : اه اللى على راسة بطحة
محمد موافى : دكتور صرفنا كام
رشا مجدى : لأ غير صرفنا كام يعنى حضرتك كنت لك تصريح قريب جدا بتقول ان هيتم الغاء العلاج على نفقة الدولة اول ما هيبتدى نظام التأمين الصحى
ده بقى خلى ناس كثير واقفة بقى اية ادام ادامك يعنى
د.حاتم الجبلى : لأ اصل هو المواطن مش هيحتاج المواطن فى نظام التأمين الصحى حضرتك هتبقى عايشة مثلا فى محافظة زى السويس اول لما يطلع قانون هيطلع لك كارت فى خلال ست شهور غنى او فقير كل مصرى هيطلع لهم قانون مش محتاج بقى فى المستشفى محدش هيعرف اذا كان ده فقير والا غنى
رشا مجدى : بس ده ضد رغبات ناس كثير بقى
د.حاتم الجبلى : معلش بقى دى قضية بس احنا بنعمل دائما لما هو لصالح العام ملناش دعوة بمصالح الاقليه ليا دعوة بالمصالح العامة ووضع نظام فى عدالة اجتماعية وفى حماية للفقير من الاستغلال
محمد موافى : علشان كده يا دكتور فى معارضة للقانون
د.حاتم الجبلى : لأ هو مفيش معارضة للقانون هو فى كلام على غير اساس يتهم القانون باشياء غير حقيقة وهى مهياش موجودة فى القانون بمعنى امبارح مثلا احد اعضاء حزب التجمع فى مجلس الشورى وقال القانون ده لا يراعى الفقراء تعالى بقى نتكلم على القانون بيقول ايه القانون بيقول فى المادة الاولى تلتزم الدولة دى اول مرة تطلع فى القانون تلتزم الدولة بعلاج غير القادرين فلم تكن موجودة فى القانون عز الاشتراكية سنه 64 انا بس بقول للعضو المحترم ده وهو استاذ فاضل واستاذ كريم ان ايام الاشتراكية اللى هو بيدافع عنها بحزم انهاردة اللى العالم نسيها خالص هو ما طلعش قانون الزام على الدولة بعلاج غير القادرين فدى بس احد الحاجات دى نقطة النقطة الثانية بيقولك مفيش يعنى بيعامل الناس كلها سواسية لأ هو بياخذ نسبة من دخل الناس وكل واحد طبقا لدخلة انا انهاردة دخلى كبير هاخذ نفس النسبة بس بدخلى الكبير واحد دخلة صغير هياخذ نفس النسبة بس من دخلة الصغير وفى 20 مليون بنى ادم ربع الشعب المصرى هيتعالج ببلاش تماما وفى حماية لاصحاب المعاشات اللى معندهمش حماية انهاردة بمعنى انك انت انهاردة بتقول ان اصحاب المعاشات هياخدوا اهم حاجة مشكله عند اصحاب المعاشات هو الدواء لو انا صاحب معاش وغير قادر مصنف غير قادر مش هدفع حاجة هياخذ الحاجة ببلاش انما افرض ان انا استاذ فى الجامعة وعندى ضغط وسكر ومش عارف ايه وبتاع وكدة ومعاشى الشهرى 1000 جنية تأخذ كل الادوية وما تدفعش اكثر من 40 جنية مهما ان كان ثمن الدواء
محمد موافى :فى ناس اساتذة كبار وحلتهم هما مش قادرين يدفعوا
د /حاتم الجبلى :عشان كدة احنا قلنا لو هومعاشة بسيط هيدفع هياخذ كل حاجة ببلاش لو معاشة زى 1000 جنية مثلا هيدفع مهما ان كانت تكلفة الدواء 40 جنية
محمد موافى : بس هيكلف الدولة اد ايه
د.حاتم الجبلى :هيكلف الدولة زيادة عن الحالى عن الوضع الحالى 17 مليار لما كل مصرى
رشا مجدى :طب 17 مليار دلوقتى احنا عندنا مشكله مع وزارة الماليه وزارة المالية قالت انا هجمد فى الوضع الحالى مش باتكلم لسة على قانون التامين الصحى انا هجمد التعامل مع العلاج على نفقة الدولة لان وزارة الصحة مديونة ليا بمليار جنية
د.حاتم الجبلى :على فكرة انا عاوز اقول حاجة
رشا مجدى : فى بعض المستشفيات ابتدت ترفض تاخذ حالا
د.حاتم الجبلى : ما انا هقول لحضرتك اولا احنا دائما بنحاول نظهر الماليه بصورة المتعنت اللى رافض التعامل مع الناس ود غير حقيقية مش بقول كده مجاملة للدكتور يوسف لكن بقول ان هو راجل فاهم شغلة كويس جدا
محمد موافى : ودى طبيعة شغل مين
د.حاتم الجبلى :واحنابنتعامل معاة بمنتهى الموضوعية وهو اذا كان هيجمد هذه الفلوس فهو محق ليه بقى لان احنا احنا ما عملناش انضباط اصلا فى الانفاق انا انهاردة وهو بيدنى مليار و400 مليون علشان علاج على نفقة الدولة يقوم جاى واحد عضو مجلس نيابى يطلع قرارات ب 7 مليون جنية فى الشهر
محمد موافى : مين اللى سمح له يادكتور
د.حاتم الجبلى : ماهى قرارا متسابة
محمد موافى :الله ماهو اللى بيجى بيروح لوزير الصحة يا افندم
رشا مجدى : لألألأ
د.حاتم الجبلى : بيروح لرئيس المجالس وبعدين بيبقى فى تربيطات وبعدين احنا نبهنا اكثر من مرة لدرجةان احنا فى الاخر بقى قلنا خلاص بقى مش هنسمح بده وخلاص مش هنسمح ما نقدرش الدولة ماتقدرش تتحمل هذا فا احنا ما نلمش وزير الماليه بدل ما تلمونا احنا كاصحة احنا الاول نصلح وضعنا اللى احنا بنعملة دلوقتى وبعدين بعد كدة نبقى نتكلم مع الماليه لسداد الديون القديمة المستشفياات اللى ايه امتنعت ليه لان المستشفيات مش هتاخذ فلوسها
رشا مجدى :اه
د.حاتم الجبلى : لان عدد علاج الزيادة فى قرارات العلاج على نفقة الدولة فى عام 2009 زادت عن 2008- 54% يعنى زادت النصف من ساعة ما اتوجدت العلاج على نفقة الدولة من سنة 75 فا طبعا ده شئ غير مقبول لان الزيادة نفسها غير مبررة وبالتالى الضوابط مطلوب انها تتحط وانس الضوابط اتحطت اعتقد الدكتور يوسف
محمد موافى : المسألة بقى
د.حاتم الجبلى :هيدفع الديون كلها اللى عليه وانا مطلع قرار دلوقتى وهنفذة خلال شهر بالكتير او شهرين بدأ من العام المالى علشان ابقى دقيق جدا اللى جاى مفيش قرار يطلع الا لو كان متعطى ماليا
رشا مجدى : انا برضه عايزة امسك العلاج على نفقة الدولة وصل لينا ان العلاج على نفقة الدولة هناك بعض عمليات تجميل سواء زرع اسنان
محمد موافى : ادوية ب 25000 جنية
رشا مجدى :هناك ايضا القادرين كان بيتصرف لها علاج على نفقة الدولة
د.حاتم الجبلى : القادرين بيطلع لهم مجاملة وده برضه ما شوفى العلاج على نفقة الدولة اصلا طلع سنة 75 علشان الناس تتعالج برة مش تتعالج جوة احد الناس بدون ذكر اسمة من جهة سياسية علشان يحصل على دعم من اعضاءالمجالس النيابية علشان يقولوا عليه ده بطل ان هوبيجاملهم فا العمليه فلتت فلتت بس الاول لما تحولت الى علاج داخلى اول موازنة كان 95 مليون جنية وصلت السنة اللى فاتت 4ر2 مليار قفزة غير عادية فا الاول لازم نرجع نظبتها تانى واللى له حق ياخذ انا قلت لن يمنع اى مواطن بعد اللى شفناة ده انه ياخذ حقة انما هنمنع سوء الاستخدام
رشا مجدى : هو احنا بنعالج برة احنا لسة بنعالج برة
د.حاتم الجبلى :اه بنعالج برة ناس كثير
رشا مجدى : اللى يقدر يتعالج برة واى دول
د.حاتم الجبلى : لأ بصى بيجوا بيتعلجوا يعنى احنا بنبعث الى انجلترا وفرنسا وامريكا وايطاليا
رشا مجدى : دول بعينها
محمد موافى : قرار مين ده يا افندم
د.حاتم الجبلى :قرار لجنة
محمد موافى : قرار الوزير
د /حاتم الجبلى : لازم الاول يتعرض على لجنة وبعدين اللجنة بتقر ان ده الشخص يسافر وبالتالى بيعالج معظم الناس اللى بيسافروا بيبقوا اطفال اللى همابيسموا اطفال الزرق اللى هما بيتولدوا اللى هما الولد بيتولد وبيبقى عندة عيب خلقى معقد جدا وهما ناس مش معروفين والبعض يقولوك دى وسايط ومجاملات وكده انا اقول لك اه فى وسايط لا تتعدى 5% انما 95 % من اللى بيسافروا النا س نفسهم مش مصدقين ان هما سافروا
محمد موافى : طب يا افندم 17 مليار حجم تغطية مصر كلها على كام سنة احنا انظام التأمين الصحى يطبق خلال عشر سنين الاول هنبدأ احنا بدأنا فى السويس مستنين القانون فبنطبقة على غير القادرين وعلى اطفال المدارس لان دول الدولة متولياهم متولياهم دلوقتى بنوضب لسوهاج اخر السنة دى وبنقول نطبقة برضه على الفقراء اللى هما الدولة بتتولاهم لحد ما القانون يطلع فى الاسكندرية وبعدين كل سنة 3 محافظات
محمد موافى : دكتور يمكن اتكلمنا على المستشفيات والاطباء والتطور فى مرفق مهم جدا بيسموه مرفق الاسعاف ده عايز يمكن حلقة مستقلة دكتورحاتم الجبلى شكرا جزيلا والحقلة الجاية يا افندم نتكم عن مرفق الاسعاف شكرا
رشا مجدى : شكرا يا افندم
د.حاتم الجبلى : شكرا
رشا مجدى : مشاهدينا الكرام انتهت وقت حلقتنا سريعا لكن اسمحوا لنا ان احنا نستكمل الحوار مع معالى وزير الصحة الدكتور حاتم الجبلى حتى نلتقى بذلك الموعد الى اللقاء
محمد موافى : تصبحوا على خير