يحدث في مصر

رشا مجدى : سيداتى وسادتى أهلا ومرحبا بكم فى حلقة جديدة من برنامج يحدث فى مصر ضيفنا وضيفكم فى هذه الحلقة
عمرو الشناوى : أهلا بسيادتك يا فندم إسمح لنا نشوف التقرير وبعدين نواصل الحوار
فاصل تقريرى
المذيع : تغطى هذه الشعب مجالات الصناعة والزراعة والصحة والعلوم السياسية والهندسية وتضم فى مجملها 111 قسما بحثيا متخصصا تظل تقدم الأبحاث العلمية التى تخدم المجتمع منذ إنشاء المركز عام 1956 و حتى الآن
د/ أحمد حسنى : المركزالقومى للبحوث بيعمل فيه 14 شعبة بحثية المجالات الزراعية بأنواعها المختلفة ، المجالات الصناعية بأنواعها المختلفة ، العلوم الأساسية والصحة العامة حاليا أحد ركائز العمل هو الاهتمام بالاقتصاد المبنى على المعرفة والتنمية المستدامة
المذيع : مردود البحث العلمي لايكون مباشرا كما هو الشأن فى الصناعة أو التجارة ولكن البحث العلمي له دورة يجب أن يمربها تبدأ بتقدم الباحث أو صاحب المشروع بمشروعه إلى الجهات العلمية كأكاديمية البحث العلمى وينتهى بمنتج يخدم الاقتصاد الوطنى
رشا مجدى : مرة أخرى نستكمل الحوارالذى لم يبدأ بعد مع الدكتورأشرف شعلان رئيس المركز القومى للبحوث أهلا بحضرتك مرة ثانية معانا نتحدث عن الهدف الأساسى الذى من أجله أنشئ المركز القومى للبحوث ؟
د/ أشرف شعلان : أهلا بك يا أستاذة رشا أنا سعيد إن أنا فى وسطكوا النهاردة لإن ده من الحاجات اللى مصر فعلا محتاجاها ومحتاجة إننا كلنا نقف وراها بشدة لمستقبل هذا البلد ومستقبل مواطنين مصر المركز القومى للبحوث بدأ سنة 56 بهدف إن يكون هناك أبحاث تطبيقية بهدف خدمة قطاعات الصناعة والزراعة والصحة والبيئة والخدمات فالهدف الأساسى إننا نعمل أبحاث وننشئ إنتاج علمى يفيد هذه القطاعات فبيبقى بشكل مباشر يعود على الاقتصاد القومى بالنفع ويزود رفاهية عيشة الإنسان
عمروالشناوى : طب خلينا نتكلم كلام يعنى الواقع العملى مثلا لما بنيجى نتكلم على تطور المجتمع وتقدمه لازم بندورعلى البحث العلمى أهم حاجة والمجتمع ده بيحط مجهود أد إيه وبيحط فلوس أد إيه عشان يضع من البحث العلمى مؤسسات كتيرة تواصل معاه بنديها إمكانيات كثيرة عشان نحافظ على دورها فى البحث العلمى هل المركز بيساعد كل المؤسسات أو الشركات اللى محتاجة تمارس وجودها فى هذا النشاط نشاط البحث العلمى ولكن ما عندهاش إمكانيات سواء بحثية أو أدوات أو آلات ؟
د/ أشرف شعلان : هوالمفروض أن يكون المراكز البحثية مش بس المركز القومى للبحوث المراكز البحثية كلها والباحثين فى الجامعات يكونو هم دول الآلة والأداة لتطوير كل الصناعات وكل الخدمات اللى موجودة فى البلد جميل قوى إن يكون هناك بعض الصناعات أو الشركات أو القطاعات اللى تعمل لنفسها مراكز بحثية ده جميل جدا وده موجود فى العالم كله يمكن فى مصر مش كثير
رشا مجدى : يعنى ده موجود عندنا ؟
د/ أشرف شعلان : فى بعض الحتت يعنى ما وصلش فى بعض الحتت قليلة وما وصلش بمستوى القطاعات البحثية فى هذه الأماكن إلى المستوى اللى تخليه يستغنى عن العلماء أو الجهات البحثية الرسمية اللى موجودة فى البلد إنما ده ما يمنعش إن فيه أنشطة ودى احنا نشجعها ونقول يا ريت يبقى فى كل مصنع وكل صناعة يكون لها الجزء البحثى بتاعها ودى بتبقى حاجات متخصصة يعنى لو قلنا أبحاث نسيج عندنا المحلة ، لو قلنا أبحاث الأخشاب عندنا دمياط
عمروالشناوى : طب خلينا فى النسيج والمحلة فيه قلعة فى صناعة النسيج والغزل فى المحلة ولكن ما أعتقدش إن عندهم إدارة بحث علمي يعنى قادرة على تطوير هذه الصناعة على الأقل على المستوى المصرى نوعية التعامل بينكم وبينهم والتعاون فى أى مجالات وبتوصلوا لهم أبحاث وبتطبقوهم إزاى
د/ أشرف شعلان : احنا عندنا فى المركز 14 شعبة زى حضرتك تعرف منهم شعبة إسمها شعبة بحوث النسيج ودى شعبة تطبيقية بحتة يعنى فيه بعض الشعب بتبقى شعب علمية أكثر منها تطبيقية وفيه بعض الشعب تطبيقية أكثر منها مجدىية فاحنا عندنا الشعبة دية شعبة مهتمة بتطوير شعبة النسيج فى مصر بقى لها فوق ال30 سنة أساس أبحاثها المستهدف اللى يخدمها هو مصانع النسيج اللى فى المحلة وفى غير المحلة ما كنت أشير إليه إنى كنت أتمنى إن هذه الشعبة تكون موجودة كمركز بحثى للصناعات النسيجية جوة المحلة إنما خلونا النهاردة فى المرحلة اللى احنا فيها احنا من هذه المرحلة بنخدم كل هذه المصانع والصناعة أيا كان موجودة فين فى مصرخلال هذه الشعبة بيعملوا أبحاثهم على نوعية النسيج المصرى على خصائصه وعلى تطويره هدى حضرتك مثال وده آخر مثال يعنى مش هجيب من بعيد أنا هجيب من الشهر اللى فات هناك أبحاث فى المركز انتهت إلى نسيج معالج كيميائيا بمادة آمنة ورخيصة هذا النسيج يكتسب خاصية قتل الميكروبات
رشا مجدى : بس ده لم يطبق بعد ؟
د/ أشرف شعلان : ده موجود
رشا مجدى : تم إنتاجه يعنى؟
د/ أشرف شعلان : وتم إنتاجه ومش بس كده ده تم تفصيل الهدوم منه واحنا دلوقتى فى مرحلة يعنى
رشا مجدى : تجربة؟
د/ أشرف شعلان : إنما خلاص كل ده خلص دى تطبيق احنا فى مرحلة الاتصال بقى بالمصانع عشان حد يتبنى أن يأخذ هذه التكنولوجيا الجديدة والرخيصة وينتجها ويستفيد منها
عمروالشناوى : احنا كده برضه هنستغرق شوية يعنى إيه تكنولوجيا يدخلها فى النسيج عشان تقضى على الميكروبات يعنى لو القماش ده فيه أدوية معينة هيتغسل ما هى الأدوية هتطلع
رشا مجدى : معالجة كيميائية مثلا؟
د/ أشرف شعلان : معالجة كيماوية بس بتصل إلى 50 غسلة وهو ما زال يتحفظ بخصائصه تخيلى بقى حضرتك لما نصنع منه بلاطى الدكاترة ، نصنع منه ملايات المرضى فى المستشفيات لو لا قدر الله موضوع أنفلونزا الخنازير ده لا قدر الله كان استفحل أكثر من كده محتاجين ماسكات الماسك بيقعد 3 أو 4 ساعات وبيترمى هل من المعقول إن أنا أستورد كل هذه الأعداد المهولة ملايين الملايين من الماسكات وللا لما يكون عندى حتة قماش أقص منها وأحط على مناخيرى وأنزل
رشا مجدى : يعنى هل انتوا كنتوا جاهزين لكده يا فندم يعنى فى حالة لا قدر الله انتشار هذا المرض كنتم جاهزين إنكم تنزلم بالماسكات دى المصنعة من القماش الجديد
د/ أشرف شعلان : بس طبعا كنا هنحتاج مصنع يصنع الكميات اللى محتاجينها أو الاستهلاكية البشرية
رشا مجدى : أو هو يمكن الرد على سؤال لنا فى البرنامج عن مردود تلك الأبحاث اللى بيقوم بها المركز القومى للبحوث على المواطن حضرتك رديت على جزئية أنا عايزة أثير مع حضرتك جزئية ثانية خاصة بالأدوية مهم جدا يعنى مسألة الحقوق للملكية الفكرية واحتفاظ طبعا الخارج أو الغرب بتركيبات الأدوية أصبح مش من السهل للدول الأخرى الدول النامية اللى ما عندهاش أبحاث فى مجال الأدوية هى تحصل على براءة اختراع
د/ أشرف شعلان : احنا لسة الفترة اللى جاية هندفع كثير قوى
رشا مجدى : هندفع كثير؟
د / أشرف شعلان : آه
رشا مجدى : طب عايزين مصر تكون رائدة فى منطقة الشرق الأوسط بالنسبة لصنع أدوية ومسألة الأدوية دى مسألة مهمة جدا لصحة المواطن المصرى يا دكتور إيه اللى بيقوم به المركز بصفة خاصة فى مسألة الأدوية اكتشاف أنواع جديدة ، صناعة الأدوية من النباتات والأعشاب الغنية بها البيئة المصرية
د/ أشرف شعلان : يعنى احنا فى المركز طلعنا شعبة ثانية إسمها شعبة الصناعات الصيدلية ودية هدفها الأساسى إنتاج مواد خام من البيئة المصرية تعالج الأمراض وعلى مدار الفترة اللى فاتت فيه كذا دواء طلع من براءات اختراع مسجلة فى مصر من علماء المركز القومى للبحوث وبيصنع ولنا تعاقدات وتعاملات كثيرة مع شركات أدوية يمكن يعنى مفيش داعى لذكر الأسماء إنما شركات وطنية للأدوية ومنتجاتنا بتتباع لحضراتكم فى الصيدليات مش كثير
رشا مجدى : أدوية لأمراض؟
د/ أشرف شعلان : آه مش كثير هدفنا إن احنا نزود الفكرة دلوقتى إن احنا بنحط رجلنا على الطريق وبنستمر خطوة إلى الأمام حطينا رجلنا من سنين طويلة وبنعلى شوية بشوية دة مشوار لسة ما خلصش كل اللى احنا فيه ده لا يرضى طموحنا طموحنا أعلى بكثير
عمروالشناوى : كفاءة الباحثين ، ميزانيتك هتساعدك فى حاجات؟
د/ أشرف شعلان : والله أى حاجة هقف فيها عند مستوى معين وأرتضيه يبقى أنا بتأخر ميزانيات آه عايزين نعمل
رشا مجدى : لا حدود للطموح؟
د/ أشرف شعلان : طبعا لإن أنا لو وفقت والناس بتتقدم هتأخر حتى لوأنا اقتنعت إن أنا بقيت زى الفل وإن المستوى اللى أنا فيه ده هو أحسن مستوى بس بعد سنة مش هيبقى أحسن مستوى
رشا مجدى : طيب حضرتك شايف إن إنجازات المركزالقومى للبحوث بيحس بها المواطن حضرتك شايف إن فى الشارع المصرى الناس حاسة بإن فيه حاجات جديدة بتحصل واللى كان واقف وراءها المركزالقومى للبحوث
د/ أشرف شعلان : فى بعض الحالات طبعا يعنى يمكن فى الفترة اللى فاتت دى كنا بنتكلم على العلاجات السرطانية بجزئيات الذهب وخلافه برضه هذا لا يرضى طموحنا احنا محتاجين إن احنا نعلم الشارع أكثر من كده بكثير بما ننجزه لإن احنا طبيعة الباحثين إن هم مش بتوع إعلان مش بتوع دعاية الباحث ده لو بقى بتاع إعلان ودعاية مش هيشتغل
رشا مجدى : ليه ما تعملوش مجلة خاصة بالمركز بتعلنوا يعنى مثلا حتى فيه دوريات طبية بتطلع ليه ما يكونش للمركز؟
د/ أشرف شعلان : عندنا هذه المجلة مجلة المستقبل وبيطلع فيها شهريا كل إنجازاتنا ومش بس كده دى مجلة موجودة فى السوق كمان الناس تشتريها مش بس الإنجازات مش علمية إخبارية دى فيها برضه أحدث ما توصل إليه العلم من اختراعات واكتشافات وفيها حتة تسالى وفيها حتة للتغذية
عمرو الشناوى : دكتور أشرف شعلان إسمح لى إعتبرنا صفحة فى المجلة وإدى لنا مجرد معلومة صغيرة فكرة إيه الجديد اللى فعلا بتجهزوه فى المركز القومى للبحوث أو وصلتم فيه لنتائج والناس هتحس به قريب
د/ أشرف شعلان : أنا مش عاوز يعنى أدى صورة غير حقيقية ومش عاوز أدى صورة عما يحدث إنما نتكلم فيما حدث قبل ما نتكلم فيما يحدث فما حدث حاجات كثير هدى لحضرتك منهم 3 أمثلة ؛ 1- أنا معايا 3 أطباق هوريهم لحضرتك دول طبقين والثالث إديناه لكم الأطباق دى فيها
عمرو الشناوى : غلة جميلة جدا
د / أشرف شعلان : فيها قمح
عمرو الشناوى : والسنابل مليانة كده؟
د/ أشرف شعلان : والسنابل مليانة يعنى كثيفة المحصول ، الطبق الثالث أهوة ده نوع ثالث هذه الأطباق مش معمولة فى معمل ولا فى قصرية زرع هذه الأطباق المحصول ده طلع
عمرو الشناوى : دى جاية من الغيط رأسا؟
د / أشرف شعلان : جاية من الغيط واتنفذت وأتمنى إن فيه معانا صورة أنا إديتها لسالم محى الدين إن هم يعرضوا هذه الصورة دلوقتى عشان الناس تشوف الأرض كان شكلها إيه فى هذا القمح أهية دى الأرض وسنابل القمح فيها ودول الثلاث أنواع اللى عندى دول احنا عندنا فيه حوالى 20 نوع إتزرعوا
رشا مجدى : الأرض اللى انتم زرعتم فيها القمح دى موجودة فين يا دكتور؟
د/ أشرف شعلان : دى أرض مزرعة المركز بس المشكلة مش مشكلة الأرض فين لإن أنا ما بزرعش على حتة أرض محددة أنا بزرع بمواصفات جديدة تغطى كل مصر بالذات فى الأراضى الصحراوية فأنا مش هسترسل النهاردة فى تفاصيل هذا لإن حضرتك شايفة إنها حاجة منتهية فهذه الاكتشافات والتطوير البحثى اللى احنا عملناه يعنى فى القريب العاجل هيبقى له اهتمام خاص من الدولة
عمرو الشناوى : واضح إن فيه 3 أصناف فنتخيل إن واحد منهم هيبقى يعنى على المية المالحة شوية .
د/ أشرف شعلان : لا هى سيادتك هتغششك بقى
عمرو الشناوى : الأبحاث عندنا الأرز احنا محققين فيه نتائج كويسة وفيه أصناف أرز عالية الإنتاجية عمل الأرز على مية مالحة ومية قليلة حاجة كده يعنى وكان جايب نتيجة كبيرة
د/ أشرف شعلان : احنا طبعا عملنا أبحاث ثانية على الأرز والأرز فيه اللى بينسميه الأرز الجاف وده برضه فى مراحله النهائية وإن شاء الله يمكن يكون لنا لقاء مع حضرتك برضه
رشا مجدى : أنا عايزة ....
د/ أشرف شعلان : إنما دلوقتى فيما يخص الملح اللى فى المية أيوة
رشا مجدى : عايزين نسأل حضرتك الكلام بالتفصيل عن الزراعات الجديدة الخاصة بمحصول القمح ولكن بعد فاصل قصير
فاصل
رشا مجدى : أهلا بكم مشاهدينا الكرام ونستكمل الحوار مع الدكتور أشرف شعلان رئيس المركز القومى للبحوث وحضرتك كنت بتتحدث عن أصناف جديدة للقمح
د/ أشرف شعلان : هذه الأصناف نتائج بحث طويلة جدا إنما اللى هقدر أقوله النهاردة عشان ما نحرقش الاكتشاف
رشا مجدى : يعنى إيه الفرق بين الأصناف دى والأصناف اللى موجودة؟
د/ أشرف شعلان : ده نوعين منهم اللى القمح بتاعه للخبز ونوع بيدى دقيق للمكرونة والنوعين دول منهم واحد مزروع فى أرض على آبار الأنواع دى بتتحمل ملوحة أعلى والنوع الثانى يتحمل جفاف أكثر أنا دائما بقول إن رئيس المركز أو الإدارى اللى فى مكان ما يجب أن يفتح الطريق ولكن اللى يتكلموا تفصيليا وعلميا هم العلماء اللى اشتغلوا
عمرو الشناوى : هحتفظ بحق إن احنا نعلن الاكتشاف ده لما تيجم تطبقوه أو تحبوا إنكم تعلنوا عنه طب فيه حاجات ثانية بتعملوها يعنى ؟
د/ أشرف شعلان : نسيب المجال الزراعى شوية ونبص على مجال البيئة والمجال الهندسى ودول حطوا إيديهم فى إيدين بعض وطلعوا لنا بيت ويمكن هذا البيت برضه هنعلن عنه قبل القمح ده خلال شهر 5 إن شاء الله هيكون فيه دعوة لافتتاح وزيارة هذا البيت اللى أدام حضراتكم على الشاشة ويعنى الكلمة الوحيدة اللى أنا هقولها إن هذا البيت مصنوع من قش الأرز
عمروالشناوى : البيت ده؟
د/أشرف شعلان : كل هذا البيت
رشا مجدى : يعنى فيه طوب والطوب مصنوع من قش الأرز؟
د/أشرف شعلان : كل حاجة فيه من قش الأرز الطوب طبعا من قش الأرز والسقف من قش الأرز
رشا مجدى : طب ده حضرتك اكتشاف رائع لإن احنا عندنا مشكلة السحابة السوداء بسبب حرق قش الأرز ما كناش عارفين نعمل إيه فى قش الأرز يعنى المسألة اتحلت ؟
د/ أشرف شعلان : ده البيت من جوة و إن شاء الله هدعوا حضراتكم لافتتاحه وده بيت ريفى وممكن يكون فى القرى السياحية ، ممكن يكون فى أى أرض
عمروالشناوى : الزلازل ما تأثرش والأمطار والسيول؟
د/ أشرف شعلان : مفيش حاجة
رشا مجدى : وبالنسبة للحرارة هل هو مثلا بيحتفظ بالحرارة السخنة أو يعنى؟
د / أشرف شعلان : المواصفات بتاعته روعى فيها الحوائط بتاعته معمولة بخلطة مختلفة عن الحوائط الخارجية والسقف ولو ده سريرعشان أقلل تكلفة البيت تماما مفيش داعى كمان إننا نحط عفش كثير جوة البيت ده سرير مرئى والكومود فيه اثنين كومود زى ما حضرتك شايفة على الأجناب اتحط عليه مرتبة ومخدتين ونعيش حياتنا
عمروالشناوى : وصلتوه لتكلفة معينة؟
د/أشرف شعلان : هنعرفها المرة اللى جاية إن شاء الله مع افتتاح هذا البيت
عمرو الشناوى : محتفظ بحاجات كثيرة قوى ؟
د/أشرف شعلان : أمثلة بسيطة يا أستاذ عمرو الأستاذة فى المركز القومى للبحوث عندهم الكثيروالكثير والكثير
عمروالشناوى : البيت ده له مساحة معينة وللا ممكن نشتغل فى أى مساحة
رشا مجدى : وده ممكن حضرتك قلت إنه صالح للقرى السياحية صالح كمان للعاصمة يعنى صالح للقاهرة؟
د/ أشرف شعلان : احنا فى القاهرة محتاجين توسع رأسى مش توسع أفقى
عمرو الشناوى : يعنى ده يصلح دور واحد مش متعدد الأدوار؟
د / أشرف شعلان : دور واحد لإن نظام الحوائط يتحمل مفيش عندى أساسات مفيهوش مسلح مفيش عندى حديد سيخ واحد
عمرو الشناوى : احنا بنتكلم على قوة المركز والباحثين وتدرجاتهم الوظيفية يعنى مصنفين إزاى ؟
د / أشرف شعلان : هو دى أكبر ثروة نفخر بها فى المركز القومى للبحوث احنا عندنا 5000 واحد بيشتغلوا فى البحث العلمى وفى المركز القومى للبحوث منهم 2500 ، 2600 حاصلين على الدكتوراه فى مراحل متفاوتة من الأعمار بادئين من الشباب الصغير ومنتهى بشيوخنا شيوخ المجدىاء ، فيه تخصصات 14 تخصص كل شعبة فيها أقسام عدد الأقسام فى المركز القومى للبحوث 111 قسم بحثى كل قسم له هدف وله تاريخه اللى أنشئ مع بداياته فى تطوير المركز
رشا مجدى : ليه يا دكتور أشرف دائما نسمع إن المركز القومى عدد الأرفف اللى فيه تحمل أطنان من الأبحاث لا يتم تطبيقها يعنى دائما فيه فجوة ما بين البحث المجدىى الدراسة الأكاديمية والتطبيق العملى والواقعى دائما نسمع إن دى فجوة موجودةوإنها مشكلة أساسية بتعانى منها مصر؟
د / أشرف شعلان : يعنى هتكلم فى الحتة دى بصراحة يا أستاذة رشا احنا العلماء عليهم دور والمجتمع عليه دور ، دور العلمااء إن أنا لما أعمل بحث أعمل بحث لحد قاعد مستنيه مش أعمل بحث وأدور على حد يستفيد به وده اللى احنا بنعمله فى الفترة اللى فاتت دية وده توجهنا الأساسى فى التطويربدل يعنى أنا كنت قريب قوى فى أحد اللقاءات وضربت مثل هو مثل صارخ أنا كنت بقول إن الباحث اللى عاوز يبحث خصائص العقلة الوسطانية فى الصباع الثالث فى رجل البرغوت أنا لا أدعمه ده علم أنا ما أقدرش أقول لا ده علم بس أنا علم مش محتاجه بلدنا ماهياش بالترف اللى تصرف على هذه النوعية من الأبحاث
رشا مجدى : فيه أولويات عند حضرتك إيه الأولويات ؟
د / أشرف شعلان : لما النهاردة أعمل أبحاث تحتاجها المصانع وتحتاجها الزراعة ويحتاجها الطبيب عشان يعالج مرضاه تحتاجها البيئة المجتمعية اللى فى مصر الجو والهواء والمياه هى دى الأبحاث اللى أنا ألاقى لها زبون أو ألاقى لها تسويق سهل احنا فى الفترة اللى فاتت من 2002 أنشأنا مركز داخل المركز مكتب لتسويق الأبحاث وخدمة المستثمرين ورجال الأعمال هذا المركز أثمر يعنى لحد هذه اللحظة عن 400 تعاقد لتسويق أبحاثنا مع جهات الإنتاج والخدمات من 2002 للنهاردة در على المركز 15 مليون جنيه بيتزايد بمعدلات ثابتة يعنى متزايدة يعنى ، ابتدينا فى أول سنة 2002 دخلنا كان 99 ألف جنيه فى السنة فى 2009 اللى هو 8/9 اللى هو من 1 ل 30 / 6 / 2009 دخلنا كان 5 مليون و7 أو 8 من عَشَرَة
رشا مجدى : وال5 مليون بقى بيروحوا فين؟
عمرو الشناوى : وقفزتم القفزة دى وزودتم 10 مليون
د / أشرف شعلان : فى 7 سنين الدخل بيبقى جزء منه مستلزمات أبحاث جزء منه بيروح مكافئات تحسين على مجهودهم فده تعاقدات خاصة أنا لما أملك علم أستطيع إن أنا أخدم به حد من المستثمرين المستثمر ده ما بيدفع ليش الفلوس إلا لما هو يستفيد بس طبعا لازم أنا أستفيد كباحث
رشا مجدى : عشان تصرف على الأبحاث؟
د / أشرف شعلان : ونلاحظ مستوى دخل الناس يعنى الناس دى المفروض إنها تكون كريمة المجتمع ماديا
رشا مجدى : أمال ليه بيقولوا إن المسألة فى المركز بتخضع الدرجات دى لميل الترقيات والدرجات يعنى المسألة مسألة روتينية بعض الشئ داخل المركز هل فيه ده وعادة احنا عارفين يا دكتور إن الروتين ده قاتل للإبداع وللابتكار هل ده اللى بيحصل جوة المركز؟
د/ أشرف شعلان : ما أقدرش أخبى فيه بعض الباحثين هدفهم من الأبحاث إن هم يترقوا وده أحد العيوب فى نظام الترقية الحالى احنا دلوقتى بنحط نظام أحدث إنما العديد والعديد من الباحثين ما بيصوش للترقية وفيهم ما بيبقاش عنده ترقية احنا النهاردة متوسط المترقيين 45 سنة مثلا بعد 45 سنة بيفضل يشتغل إلى أن يتوفاه الله هيعمل إيه دى مش أبحاث ترقية دى أبحاث تطبيقية الراجل عايز يستفيد وعاوزيفيد بعلمه
رشا مجدى : يعنى هو إحساسه بالسعادة الحقيقية لما يلاقى بحثه بيتم تطبيقه على أرض الواقع على الأقل هيحس بالفخرإن بيشوف الحاجة اللى هو فكر فيها ووصل فيها لنتيجة معينة يشوفها بتتطبق أعتقد إن الناس .....
عمرو الشناوى : ده بالنسبة للباحثين فى المركز إنما دور المركز القومى للبحوث أتصور إن هو كمان بيشمل الباحثين من خارج المركز يعنى ساعات كثيرة نقرأ فى الجورنال على باحث فى مركز إيه فى الأرياف توصل إلى اختراع معين بنطلع احنا كمان فى البرامج عندنا فى التليفزيون باحثين كثير مجتهدين لو باحث وصل لفكرة وعايز يطبقها أو طبقها وعايز يتوسع فيها بتساعدوه إزاى هل فيه إمكانية للتعاون معاه؟
د / أشرف شعلان : هرد الأول على الأستاذة رشا فى حكاية السعادة اللى بتجي ساعة الواحد يكون شايف لما حاجته بتتسوق أنا أعادلها تماما بسعادة حضرتك يوم ما بنتك تيجى تتجوز
رشا مجدى : إن شاء الله يعنى فعلا هو إبنه فعلا يعنى البحث اللعملى ده إبنه؟
د / أشرف شعلان : ده فى حد ذاته بيجى نوع من أنواع الإشباع النفسى للعالم والباحث بشكل غير طبيعى ثم آجى لسؤال حضرتك طبعا المركز فاتح ابه لأى حد من المجتمع العلمى أو حتى المجتمع غير العلمى إنه عاوز يستغل إمكانيات المركز إن هو يسبق شئ أو يطور فكرة فاضلة إن هى تاخد براءة اختراع أو خدت براءة اختراع ومحتاج تطبيقها واحنا عندنا إمكانيات أهلا وسهلا به لإن أنا عندى وحدات اسمها الوحدات التجريبية أو الوحدات نصف الصناعية فعندى فى المجال الهندسى وحدة كاملة فيها آلات وأجهزة قابلة لتطبيق معظم الأبحاث العلمية الهندسية وعلى التوازى وحدة كاملة للتكنولوجيا الحيوية برضه قابلة لتطبيق جميع أبحاث الهندسة الوراثية
رشا مجدى : أعتقد دكتور أشرف احنا محتاجين حلقة ثانية معاك يعنى الحديث ممتع جدا والبحث العلمى مجال واسع جدا استخداماته واسعة جدا وبالتالى احنا فعلا فى احتياج لحلقة ثانية مع حضرتك ونحتفظ بالعديد من الأسئلة لهذه الحلقة
عمرو الشناوى : أعزائى المشاهدين لقاءنا مع الدكتور أشرف شعلان رئيس المركز القومى للبحوث متواصل فى حلقة ثانية إن شاء الله تابعونا وتابعوا هذا اللقاء القادم إن شاء الله مع الدكتور أشرف شعلان نتعرف أكثر وأكثر وأكثر على هذا المركز ودوره الهام جدا
رشا مجدى : أشكركم مشاهدينا الكرام على حسن المتابعة ونلتقى فى الحلقة القادمة من يحدث فى مصر