_ كان أول حاجة عرفتها الصبح إن ممثلة اسمها ميرهان حسين اتخطفت واتحجزت في قسم الهرم وده نشره النجم خالد الصاوي.. وشفت الفيديو بتاعها هي والضباط.. والحقيقة أنها قالت ألفاظ "سيئة جدًا".. يعني متتكتبش أبدًا.. أبدًا ألفاظ بتتقال في "الخرابات" وبس .
_وعشان "منظلمش" البنت هنقول إن فيه "حدث" قبل الفيديو.. ربما رخامة ربما تهزيق.. وده الل طلعها عن شعورها.. وحدث ما حدث من وفيه اتهام ليها بأنها ضربت ضابط بالقلم ومعاها زجاجتي خمر.. وعموما.. ننتظر قرارات النيابة وهنشوف ألفاظ "الخرابات" دي فيها محاسبة ولا القانون مش بيعاقب عليها .
_وبمناسبة "الخرابات".. كان فيه سيرك امبارح نصبه عمرو أديب أول ما طلع على الهواء وجه كلامه لرئيس نادي الزمالك مرتضى منصور.. وقال له: "أدي الحلقة طلعت أهه.. وميدو جاي أهوه ولا كسرت الإستوديو".. وميدو قال: "يا مرتضى انت مسافرتش أوروبا.. مفيش خرابات في أوروبا.. ربما أنت اعتدت على هذا الأمر.. لكن في أوروبا لا".. ورد عليه عمرو أديب ضاحكا: "مرتضى خبير خرابات".. طب وميدو سكت أبدا.. جاب القديم والجديد.. وقال لو هموت مكمل.. ويا ريس -مخاطبًا الرئيس- ده مرتضى قال عليك متخلنيش أقلب عليك وازاي تسكت له.. وهوب راح داخل على حتة "بتوجع" مرتضى أوي أوي.. وقال: "أنا وقفت معاك لما وايت نايتس تبولوا عليك.. لما رموا كيس على قفا مرتضى من سنة ونص".. والقصة دي تحديدًا.. مرتضى مسمهيا "رموا عليا مية نار".. وراجع جميع فيديوهاته.. وده يؤكد لك أن مرتضى طيب وميعرفش يفرق بين البول ومية النار.. طب ومرتضى سكت!!.
_مرتضى حقيقي عمل حركة "صايعة شويتين".. امبارح الضهر قرر يغلوش على حوار ميدو ويطلع فريق كورة مع وائل الإبراشي..وهوب شحن المدير الفني الجديد للزمالك "ماكليش" وإسماعيل يوسف وأحمد مرتضى وعلي محمدين والسيد عكشة وعلي السيد والسيد علي ومحمد أحمد وأحمد محمد وباسم مرسي ومحمد زيدان.. والحقيقة إن كل الفريق ده "مكلش" خالص.. وحلقة ميدو مع عمرو -اللي مقطع البطاقة- زعلته أوي.. أوي.. أوي.
_والغريب ايه إن أحمد مرتضي قال: "ماكليش هيجيب الدوري والكأس وكأس إفريقيا وهنروح كأس العالم.. ولو فيه بطولة كونية هنجيبها.. والأغرب أن محمود طاهر رئيس الأهلي قال لمارتن يول المدرب الجديد.. هتجيب لنا الدوري والكأس وكدهون -بصوت توفيق الدقن- لو ده هيجيب الدوري والكأس وده هيجيب الدوري والكأس.. أومااااااااااال مين اللي هيتغلب".
ومتنساش "هاشتاج".. #بلوك_مرتضى.. وأحد الداعين له كتب: "عشان احنا اللي بنعمل بإيدينا الناس المجانين والحمقى والشتامين وبنشهرهم عشان لولا إننا اهتمينا بيه وعملناله قيمه مكنش حد عبره، مرتضى رمز لانحدار الأخلاق والذوق في كل حاجة .. الرياضة والسياسة والخوض في الاعراض وتوريث ابنه السياسة والرياضة برضه" ..يلا البلوك المتين".
_ طب نروح إسكندرية.. المحافظ عزم وزير الثقافة ب40 ألف جنيه على جمبري وسمك وبوري وبلطجي "مشوي ومقلي وسلطات وبابا غنوج".. والحقيقة دي جريمة.. ولو حقيقي كان لازم المحافظ يمشي.. أي والله.. بس ده صح ولا غلط ..أقولك أنا .
_ اللي كانوا في الغداء..المحافظ والوزير و78 فرد تانين.. من الطاقم يعني 80 واحد.. والمطعم "فش ماركت" مع "الغداء الجماعي" بيعمل تخفيض.. وعليه العزومة تكلفت حوالي 10 آلاف جنيه مش أكتر.. واللي حاسب اتحاد الناشرين وليس المحافظة!! وده كلام من زملاء في الإسكندرية أثق فيهم.. والمحافظ مش راضي يرد وقال: "الموضوع ميستاهلش ."!!
_وعشان فيها حاجة حلوة.. وفيها أمل.. وفيه رغبة.. الشاب أحمد رجع لأسرته بعد 24 عاما من "التوهان"..الولد من أسيوط وتاه وعمره 3 سنين ولاقوه في المطرية بالقاهرة.. واحتفظ بصورة وكبر وكبر وبقى مهندس.. وفضل يدور على أسرته.. وكتب من شهرين رسالة لأمه اللي ميعرفهاش عبر فيس بوك: "أنا أحمد يا أمي وفيها علامات في ايدي وفي صدري.. وأحمد رجع.. ايه ده..ايه الدراما دي.. دراما أوقع بكثير من السينما وفيه لينك أهو من "الوطن" حاكي القصة كاملة
http://www.elwatannews.com/news/details/999790
_وعشان كله ميبقاش ضرب ..ضرب ..ضرب: "
إنت الأمل اللي أحيا بنوره
عمره ما يبعد يوم عن عيني
وانت الشوق اللي اسمع صوته
لما تغيب عني يناديني
وانت الحب اللي مفيش غيره
لو يسعدني أو يشقيني
وعمري ما اشكي من حبك
مهما غرامك لوعني
لكن أغير م اللي يحبك
ويصون هواك أكتر مني"#انت_وبس_ اللي_ حبيبي