_انه من الطبيعي أحمد عز يبقى "ملطشة " اللي رايح واللي جاي.. وانه عمل كده لنفسه.. يعني كان من أول اتصال يكفي ع الخبر ماجور ويربي العيلين ويربي زينة ويخلص من القصة.. بدل ما هو ليل نهار يحلف "والله ما ولادي".. طب وليه جبنا السيرة دي
_أقولك أنا محامي زينة.. طارق جميل سعيد قال النهارده انه "هيرزع" أحمد عز شوية بلاغات.. أولهم سب وقذف وتشهير.. والتاني نفقة ل"العيل" ده وال"العيل" ده.. وبعدين مصاريف مدارس.. يعني أحمد "لَبْس وهيلبس".
_وسيبك من السيرة دي ب"اللي فيها" ونتكلم عن "الرجالة " شوية.. من جديد ادعو للنقيب الشاب محمود الكومي اللي كتبنا عنه من أسبوع.. واتبترت رجليه الاتنين .. وفقد عينه اليمنى، ولسه فيه إصابات في اليسرى .. محمود سافر امبارح على لندن .. والهدف إنقاذ "عينيه ".. تعرفوا طلبات محمود إيه؟!
_محمود اللي فقد قدميه وعينه.. طلب من اللواء محمد صقر مدير الحماية المدنية واللي زاره قبل السفر انه يرجع من بره لنفس مكان خدمته ويكمل شغله في "المفرقعات ".. طب هو فيه كده.. بلاش تستغربوا.. لسه فيها حاجة حلوة
_و زي ما فيها حاجات حلوة.. فيها حاجات "مش ولابد ".. وآخرها كلام وزير الري امبارح اللي قال اكتشفنا بير جوفي يكفينا مياه لمدة 100 سنة.. من امتى احنا عندنا وزراء فاهمين ملفاتهم ولا عندهم فكرة بيقولوا ايه.
_وسيبك من كلام واحد معندوش فكرة خالص وميعرفش ان البير ده اكتشفوه من 50 سنة.. طب بالذمة ده تصريح يطّلع من وزير واحنا داخلين في صراع وسد نهضة وإثيوبيا.. مين انت جاي يا دكتور حسام.. من انهي جامعة اتحدفت !
_وبمناسبة الجامعات.. تخيل ان الترم الأول في جامعة عين شمس شهد 902 حالة غش.. يعني ب"الصلاة على النبي" كده.. حوالي 1000 غشاش في 3 أسابيع.. ولسه بنسأل.. فين الضمير وليه المصالح الحكومية بايظة وكله ب"الفلوس" والرشاوى.
_وسيبك من هروب بيسيرو من الأهلي.. أو إن الأهلي أقاله.. أفكركم بكلام المعلق الرياضي أحمد الطيب من شهر ونص.. لما قال القمة المصرية أهلي وزمالك بقيادة فنية من ميدو وحسام البدري (آه لسه حسام مجاش).
_وهوب ميدو اتخانق مع حسني عبدربه ومشي من الإسماعيلي.. وهوب الزمالك مش مديره الفني الأجنبي وهوب جاب ميدو.. وبعدين بيسيرو مشي وممكن البدري ييجي.. مش معقول كده يا "طيب".. طب وبيسيرو قصر مع الأهلي.
_أبدا والله.. شال تلاتة من سموحة وخسر من المقاصة واتعادل 3 ماتشات.. وراح حضر عزا حمادة إمام وجري يومها ع الشيخ نعينع وقاله "أنا مش فاهم اللي انت بتقوله بس مَس قلبي".. وكمان راح الغربية امبارح وحضر عزا والد أحمد عبد الظاهر.. من الآخر برحيله الأهلاوية فرحانين والزملكاوية فرحانين.. بس_وده ما ينسيك إن فيه 20 واحد مصري اتكتب لهم عمر جديد.. وبعتنا طيارة الصبح ورجعناهم من ليبيا بعد خطفهم.. وال20 مسيحيين ومن الصعيد.. والحمد لله رجعوا قبل "الدبح" والريس استقبلهم في المطار.
_وعشان كله ميبقاش ضرب.. ضرب.. ضرب قول "ابعد دقايق بلاش ساعات ساعات تضايق الشوق ساعات صعب البعد عليا ظهر الشوق في عينيا مستحملش يا عمري بعدك عني شوية ".