ضحك ك "البكاء".. أي والله.. لما تعرف إن الحكومة اللي قالت إن مركب كفر الشيخ اللي غرقت ومات فيها 15 غير مرخصة.. هي نفس الحكومة اللي طلع إنها إدت ترخيص لنفس المركب يوم 1 نوفمبر 2015 حتى 31 يناير 2016.. ده بس اللي يضحك.. أبداً والله مش هو ده خالص.
اللي يضحك إن "الحكومة" إدت الترخيص لصاحب المركب.. وصاحب المركب عند ربنا..أيوه .. زي ما بقولك كده.. يعني الترخيص باسم محمد خليل محمد واللي مات في يونيو 2014 يعني خد التصريح بعد مات سنة و5 شهور.. يا خبر إسود.. يا خبر إسود.. إيه ده.. ومش عايز الناس تغرق وتموت !!!.. عموما.. ده كله منشور في "الوطن" بعددها الصادر اليوم.. طب نحاكم اللي إدى الترخيص ل"المرحوم" ولا نحاكم "المرحوم" .. هاااااااااااا.

وبمناسبة "المرحوم واللي عند ربنا".. فالأستاذ مفيد فوزي طلع إمبارح في "الحياة" واتكلم عن الراحلين عبدالحليم حافظ.. اللي مات في 30 مارس 77 وسعاد حسني اللي ماتت في 21 يونيو 2001.. والأستاذ مفيد.. للمرة ال 949 في حياته وتصريحاته يقول: "عبدالحليم متجوزش سعاد لإنه مكنش ينفع يتجوزها بسبب إنه مش هيقدر يؤدي واجباته".. حقيقي زهقنا من "البق" ده اللي ب"تطرشه" كل ما تطلع.. كفاية هري.

وبعيدا عن الهري.. القوات البحرية مسكت مركب في جزيرة رأس محمد جنوب سيناء محملة ب 4 أطنان ونصف "بانجو" وده كان كفيل إنه "يسطل" حوالي 450 ألف مصري.. بحكم إن الطن ألف كيلو.. وإن الكيلو الواحد ممكن يكفي 100 سيجارة.. وهل ده له علاقة بموضوع الجن والعفاريت بتاع الشرقية !.
أقولك أنا.. مينفعش ننكر إن الإعلام يفتقد بشدة الإعلامية ريهام سعيد.. اللي كان زمانها دلوقتي في قريتي صافور في ديرب نجم والشرقاوية بكفر صقر.. وبتحقق في قضية الجن اللي بيولع في البيوت.. وكان زمانها معاها الراجل اللي معاه توكيل "الجن والعفاريت" النائب السابق علاء حسانين.. جن إيه الي إنت جاي تقول عليه.
وإوعى موضوع الجن ينسيك إن الزمالك غير "باكيتا" مديره الفني وجاب ميدو.. وبكده الزمالك السنة دي هيكون غير مدربين أكثر من عدد بطولات الدوري اللي أخدها في تاريخه.. يا أستاذ مرتضى.. والله لو هتفضل تغير كل مدير فني يخسر ماتش.. مش هتلاقي مدربين يا بيه.ولسه مع الزمالك.. فتصرف "كهرباء" إمبارح مع حكم مباراة المقاصة بعد الماتش عشان الوقت الضايع "طبيعي جدا".. اللي مش الطبيعي إن الحكم الأخ "جهاد جريشة" خلاه بص في الساعة.. بدل ما يدليه إنذار.. حكااااااام تعبانة.. مش كفاية محسبتش ضربة جزاء ل"المقاصة".. الحمد لله إن كهرباء مطلبش يشوف حاجة تاني غير الساعة.. أي والله.
ده ما ينسيك إن ياسر برهامي قال: "التهئنة بالأعياد الدينية أشر من الخمر وأشر من فعل المنكر والفواحش".. يعني تشرب خمرة.. وتعمل "الغلط" وترتكب الفاحشة ولا تقول لجرجس وعماد ومريم وروماني وفلتس.. كل سنة وإنتم طيبين ..طب كل سنة وانتم طيبييين يا مسيحييين.. أيوه وكتاب الله المجيد.. كل سنة وانتم طيبين.

وعشان كله ميبقاش.. ضرب.. ضرب.. ضرب.. قول: "إني بشوق متى الأيام تجمعنا.. وأسعد فؤادي بقربي من محياك.. والطير يشدو بهمس حين يسمعنا.. وجاوب الدمع من عيني عيناك.. أهيم فيك ونار البعد تؤلمني.. وقلبي الخفاق بالأشواق ناداك".