- أنا حقيقي مش فرحان إن بدايتي تكون مع الإعلامي والنائب توفيق عكاشة، طب أعمل إيه؟.. غير إننا قلنا إمبارح إنه لا هيستقيل ولا هيهاجر وكل ده "هري × هري".
- الحقيقة إنه إمبارح اعتذر للمؤسسات والأشخاص اللي هاجمهم، وقال: "كنت باختبر الدولة وأشوفها"، والأهم إن الكلام اللي في الأول والآخر يستوجب الحساب، وده بجد مش مكانه مجلس الشعب، يعني ممكن يكون الوراق ورا أي مصنع أو العباسية.. أيهما أقرب.
- لا وكمان بيستظرف، وقال: "أمي هتزعل مني عشان دفعت 65 جنيه عشان التوكيل اللي كنت هأقدم استقالتي بيه للمجلس بعد ما أهاجر"، وده يخليك تتشبث بالدعاء الذي نقوله في حق كثيرين: "ياريتها كانت بركت عليك".
- وسيرة توفيق تفكرنا برئيس نادي "الزمالك" مرتضى منصور.. اوعى تفتكر إن كلامه إمبارح عن اللعيبة وعلاقتهم بالسيدات جديد، وإنهم بيروحوا الشقق وكده.. أبدا والله، قاله من 26 يوم مع وائل الإبراشي، وأفكرك قال إيه: "اللاعب يكلم البنت ع النت يروح ع الكافتيريا.. ومنها يروح للشقة، وعشان كده قفلت النت في النادي".
- طب فيه جديد في كلامه إمبارح اللي قاله في قناة "العاصمة"، أقولك أنا: "قال أنا عارف اللعيبة بالاسم اللي بيروحوا ل(سارة ودادا)، وده مش مهم، الأهم إن الاتنين دول هيكونوا سبب في تأخر حالة المنتخب القومي، أصل دول (وعكتين يا شحاتة)، أو كما قال حسن مصطفى في فيلم (شحاتة أبوكف): وشحاتة برضه كان زملكاوي".
- طب و"الأهلي" ملايكة، أبدا.. آه الحكم جاملهم بفشله إمبارح، ادى دقيقة وقت ضايع والأهلي جاب جون في الدقيقة التالتة، وكمان اللي جاب الجون التالت "قزازة الميه" مش إيفونا.. لو مش مكانها كانت الكورة طلعت بره.
- وده ما ينسيكش إن دعوة مجلس "المحلول" محمود طاهر، للتظاهر يوم الجمعة اسمه "عّك.. وعك أصلي"، يعني يا باشمهندس ده شأن قضائي، شغل التظاهر ده مش هياكل.
- وده يفكرك إن الاستشكال هيتنظر يوم الحد الجاي، وهيتنظر برضه قدام نفس المستشار، يعني هيطلع نفس القرار وهو الحل.. أيون الحل.
- ولو سبنا الكورة، أقولك من يومين مانع نفسي أكتب عن علي جمعة، الشهير ب"مفتي مصر السابق"، وكلامه عن الحشيش والأفيون لا يبطلان الصلاة، وظني إن الأزهر رد وقال: "من لم تنهه صلاته عن الفحشاء والمنكر لا صلاة له".
- طب والأهم إيه من "البوق" اللي قاله علي جمعة؟ أقولك أنا: الكنيسة الأرثوذكسية في المنيا طلعت بيان ب"الصدفة" كده، اعترضت فيه على شرب الخمر والحشيش أثناء عقد الزواج، وهددت بإلغاء مراسم الزواج في حالة "الشرب"، وإن هذا الفعل داخل الكنيسة يغضب الله.. "أي والله".
- وفي الوقت ده يجي الجماعة "السلفيين" يقولوا: "لا تقولوا للأقباط كل سنة وأنتم طيبين.. وده حرام وكده"، الدين لله يا شيخ إنت وهو، وكل سنة والمسيحين بخير.. نقول كمان!.
- كل العك ده والفرم ما ينسيكش إن الرئيس السيسي افتتح اليوم مشروع المليون ونصف مليون فدان، وبدأت ب10 آلاف فدان وبيوت و40 بئرا جوفيا، وهو عمل عظيم ونتمنى يكمل، لأن قبل كده كانوا يدوا الشباب الأرض ويقولوا لهم "استصلحوا"، وسنة والشاب يخسر اللي وراه واللي قدام بنت خالته.. أيون.. "قولوا يا رب".
- وده كل ما ينسيكش إن اليوم عيد ميلاد كوكب الشرق أم كلثوم، وعشان كله ميبقاش "ضرب.. ضرب.. ضرب"، ممكن نقول "يا اللي عمرك ما خلفت ميعاد في عمرك.. أخرك إيه عني.. مستحيل الدنيا عني تأخرك.. بالأمل مستني تيجي لي يا حبيبي وأسهرك.. تعالى.. تعالى.. تعالى.. تعالى".