أوعى اللي قاله إمبارح الإعلامي النائب الدكتور توفيق عكاشة عن الدولة البوليسية والعقلية الأمنية ينسّيك إنه قال أهم: "أنا مهاجر ألمانيا وعندنا بيت هناك، والنظام لو متغيرش أنا مش راجع"، والحقيقة اللي قاله عن "العقلية الأمنية" حااااصل بس إحنا معاك يا دكتور واطلع على ألمانيا وأنت عملت إمبارح توكيل للسيدة والدتك عشان "تستقيل" سافر يا دكتوووور.- وحالة "الشطح" اللي فيها عكاشة دي عشان إنه أعلى الأصوات في الانتخابات، مع إن المستشار مرتضى منصور في كل مداخلة بيقول: "أنا الأول، عكاشة مش الأول أنا عندي 8 مقاعد وعكاشة عند 6 و5 في 6 ب 30 يوم + 14= يبقى أنا الأول"، ولو مش مصدقني راجع كل مداخلات مرتضى منصور عن نتائج الانتخابات، أقسم بالله بجد.
-ده مش مهم، المهم إيه بأه، إن لا توفيق الأول ولا مرتضى الأول، أي والله، ليه بأه، الأول وحسب اللجنة العليا للانتخابات هو صلاح عفيفي واللي حصل 94% من جملة أصوات دايرته في أسوان، والثاني هو علي علي محمد بدر بنسبة وصلت 90% من جملة أصوات دايرته، وتوفيق عكاشة رقم 18 بنسبة 75% من عدد أصوات دايرته، يعني عكاشة يسكت وآخره "تجارة انتساااااااب"، ومرتضى بره التصنيف أصلًا، ده أكده لي زميلي محمود سعد الدين رئيس تحرير موقع "برلماني" منذ قليل، أوعي التصنيف يعورك.. أوعى يعورك!!
- ولسه في البرلمان النائب سعيد حساسين قال: "هستقيل من المجلس لو أبلة فاهيتا اتريقت عليا تاني"، والحقيقة إن من رأيي تعمل توكيل في الشهر العقاري لأقرب الناس إليك زي ما علمت الدكتور عكاشة وتروح ألمانيا معااااه، لا تتوقفي يا أبلة فاهيتا، لا تتوقفي يا غالية.
- طب ده ينسيك اللي حصل في الأهلي، أبدًا اللي أقام الدعوى راحوا بيها على وزير الرياضة والأهلي استشكل وجري على وزير الرياضة، والوضع على ما هو عليه، بس إيه بأه، الاستشكال هيتنظر عند نفس القاضي اللي طلع الحكم، يعني "هيتحل هيتحل، ويبقى محلولًا محلول"، بس إيه كمان فيه ضغوط على اللي أقاموا الدعوى والنهاردة فيه "محضر" راح بالورق عشان يعلن إدارة النادي، والإدارة قالت: "مش هنستلم" بس كده.
- وبمناسبة "المحضر" وكده، النهاردة أفراد الشرطة في قسم ثان كفر الشيخ لموا 1200 جنيه من بعض ودفعوهم لواحدة ست كانت هتتحبس والست دي كتبت وصل أمانة على نفسها عشان تجوز بنتها، المهم شباب الشرطة دفعوا الفلوس والراجل اتنازل والست روحت.
- الست دي روحت بيتها لكن فيها شاب برضه اسمه خالد في مدينة الحامول بكفر الشيخ مروحش بيتهم لأن شرطي قتله برصاصة في الراس بسبب أولوية المرور، وهقولك أيوه الشرطي في الراحة ودي خناقة عادية، هقولك "معاه سلاحه الميري لمواجهة اللصوص وليس لقتل خلق الله"، المهم إن الشرطي ده هيتحاكم ويدخل القفص.
- وجبنا سيرة القفص، يبقى نفتكر ناجي شحاتة والنهاردة اتوقفت محاكمة "خلية أوسيم" بسبب طلب الرد وده عشان الحوار اللي عمله ناجي شحاتة في "الوطن" وبان إن عنده "هوى سياسي" وكده، ونظر الرد هيكون يوم 2 يناير اللي جاي.
- ولأننا حفظنا بعض وهتقولوا لي طب وتامر بلغ، هأقولكم ناجي شحاتة في حواره المسجل مع "الوطن" قال إن الاعلامي تامر أمين بيروح ملهيين ليليين في الزمالك وده تشهير وتامر من حقه يبلغ ضد ناجي شحاتة لأنه شهر به، بس تامر والله، والله ما بلغ! بس.
- وعشان كله ميبقاش ضرب ضرب ضرب، قول ورايا: "آدي ابتسامتك يا حبيبي وانت غايب ع الشموع وآدي الشموع اللي ابتسامتك نورت فوقها الدموع، آدي خطوتك آدي همستك، آدي ضحكتك، آدي انت كلك نورك وضلك ورقتك، تعالى للأحلام للحب للإلهام، وقد ما يحلى لنا نسهر وغيرنا ينام".