ننشر نص حوار أحمد فؤاد نجم مع الإعلامية دينا عبد الرحمن

قال الشاعر الكبير احمد فؤاد نجم أن الشعب المصري عايش , وعمره ما يخياف من أى شخص أو جماعة , مؤكداً على عدم وجود أى حساب شخصى له عبر مواقع التواصل الإجتماعى فيس بوك أو توتير .

وجاء نص الحوار كالأتى :

دينا : عمنا وحبيبنا شاعرنا المحارب القديم اللى لا هزمته السلطة ولا السنين سفير الفقرا والغلابة اللى كلامه زاد وزواد الثورة والثوار شاعرنا الكبير احمدفؤاد نجم .. متفائل

نجم : جدا.. هو الشعب مات الشعب ما ماتش والست المصرية تقوليلها صباح الخير تحبل مصر ولادة
دينا : طب ايه هو بالعدد

نجم : امال ايه .. بالعدد من النوعية المصرية اللى جينات الحضارة فيه من سبعة آلاف سنة انا لفيت تلات اربع العالم وباشوف كويس ورحت عان اتفرج ولما اوصل اى حتة كنت اقولهم فرجونى على المدن الساحلية اللى عندكم ما فيش مقارنة بينها وبين اسكندرية هى اسكندرية واحدة وبس .
دينا : ما تغيرتش مصر ماتغيروش المصريين

نجم : وماله لما يتغيروا دول بنى آدمين مش حجارة المهم بيرجع لاصله على طول
دينا : كنت فين بقى استراحة محارب قديم ولا معتكف

نجم : باتفرج لان العيال جايين معاهم كل حاجة بتاعته قلتها للشريعى ده جيل تانى دول جايين معاهم مزيكانيتهم وشعراءهم وسباكينهم انا كان عندنا راديو وكنت متخيل لفترة كبيرة ان المذيع قاعد جوه الصندوق وبنتى زينب دلوقتى بتكلم صاحبتها فى كندا وصاحبتها بتقول لى انا شايفاك يا عمو
دينا : امال بتدخل ازاى على تويتر والفيس بوك وبتكتب تعليقاتك واشعارك
نجم : مش بتاعتى .. وزى ما قال لى الصادق النيهوم قال لى انت بتلعب دور جحا فى العصر الحديث وبينسبوا ليك حاجات زى ما بينسبوا حاجات على لسان جحا
دينا : امال قصيدة سيادة المخلوع ارجعلنا شفتها ؟ عجبتك

نجم : اوى .. هما بيستخبوا فى انا فى روحى فرحان اوى بيهم انا ابوهم مش ممكن يطلع منهم شاعر عبقرى
دينا : بس فيه ناس بتقول ممكن الشعر يكون لطيف ظريف بس مش بقيمة الشاعر الكبير احمد فؤاد نجم

نجم : المهم يقول ما يسكتش
دينا : ما فكرتش تعرف هما مين
نجم : انا مش عايزاعرفهم انا كده فرحان بيهم انا ابوهم الشجرة بتطرح اهه يا بختى وهناى
دينا : الجيل الجديد مغنيين وشعرا ومطربين عندهم امل يتعاملوا معاك ومنهم مصطفى السعيد الموسيقى العالمى الجديد
نجم : ده عالِم.. وغنالى اغنية اضراب وده من حسن حظى وجالى البيت لقيته مع ميشيل غالى ابنى اللى متبنيه وقعد يبوس فى ايدى قلتله عايز ايه ياد
دينا : سمعت اغنيته يا مصر هانت وبانت
نجم : آه عجبتنى اوى بتاعت تميم البرغوتى ده ابنى برضه .
دينا : امتى كتبت اضراب وليه
نجم : كنا فى طرة وكان مدير المنطقة المركزية حرامى كان فيها زراعة وصناعة وبيقبض وبيشتغل فى امن الدولة لما اتراذل علينا قلتله بينا وبينك اللايحة احنا مش اعداءك هو كان مرعوب تطلع قصيدة من عنده اطلعها انا وتتنشر فى انجلترا واوروبا زى " الجارديان"
دينا : كان سنة كام
نجم : كان سنة 77 ضحكنا عليه وقعدنا نطلع بيانات بالاضراب التصاعدى وكان معاى ناس مالهاش علاقة ببعض
دينا : كان فى عهد السادات انت اتسجنت فى عهده 9 سنين وفى عهد عبد الناصر 9 سنين برضه
نجم : اه
دينا : وزاملت الاخوان المسلمين والمهندس خيرت الشاطر
نجم : طبعا اعرفهم كلهم دول حبايبى انا مرة دخلت اضراب عشانهم لما ضربوهم علقة موت لسبب تافه سرًقٌوهم فى ربع فرخة فجابولهم العيال الدرجة التانية عجنوهم والظابط قال لى انت مالك حد عملك حاجة قلتله انا بنى آدم يا اخى وفضلت كده وجالى محمد قطب اخو سيد قطب وكان صديقى وجالى مع الشيخ كشك وقال لى احنا اتصالحنا مع الادارة قلتلهم انتوا اتصالحتوا مع الادارة شتمونى وقالوا لى امشى يا زنديق
دينا : بعد ما اضربت عشانهم وعملت كل ده قالوا لك امشى يا زنديق
نجم : اه والشيخ كشك جالى وقال لى متشكرين عشان اللى عملته عشانا قلتله انا عملته عشانى مش عشانكم انتوا فى الواحات بتدوا العساكر سجاير عشان يضربوا الشيوعيين كان فيهم عبد الرزاق حسن ومحامى مصر العظيم احمد نبيل الهلالى وقامات عظيمة
دينا : اللى هما كانوا بيدافعوا عنهم برضه لآخر وقت برضه
نجم : امال ايه ! ببلاش
دينا :هل ندمت على تضامنك معاهم و بعد عصرك ل اللمون
نجم : ندمت على انى اديت صوتى لمرسى لما قال دم الشهدا فى رقبتى قلت وماله اديته صوتى على طول بس طلع بقى
دينا : لو رجع الزمن حتعدل اختيارك
نجم : لو نزل ادام ابليس حانتخب ابليس لانى عارف انه فاسق انا يا مرسى شرقاوى زيك ده تار بينى وبينك مش حاسيبه
دينا : وازاى وامتى حتحس انك اخدت بتارك منه
نجم : قريب حيحصل هما مش كفاية انهم قاعدين هما دلوقتى بيفكروا يخرجوا ازاى فاكرة الخروج الآمن
دينا : اللى عمله طنطاوى لمبارك
نجم : اللى عملوه للمجلس الاعلى للقوات المسلحة
دينا : طب بتشوف ازاى ان الناس بتترحم على ايام المخلوع مبارك
نجم : لو مش خفة دم مصرية يبقوا غلطانين انما ايام مبارك هو اللى عمل فينا كده من 23 يوليو 1952 وانتكاسة للحركة الوطنية المصرية لولا الملحمة اللى عملوها ولادنا فى 73 ومبارك اللى كان بيعمله التلاتين سنة بيلم فلوس هو ده اللى كان بيعمله والمصريين لما كنت باشوفهم فى اى حتة باسافركنت باشوفهم فيها فى اليوم الاخير لى باشوف احوالهم وعاملين ايه كانوا بيقولولى ده بييجى يفضحنا هنا فى دول البترول.
دينا : اختلفت الاموركتير عن دلوقتى قرض الصندوق مثلا
نجم : صندوق ايه دول ناس هبل جايين يدمروا البلد طب ما ييجيبوا المليارات بتاعت مبارك عارفة يجيبوها ازاى يمسكوا ابنه ويقولوا له حندبحه لو ما جبتش الفلوس
دينا : بس احنا مش عايزين دولة القانون والثورة قامت عشان دولة القانون ؟
نجم : قانون ايه هو وجودهم دلوقتى فى السلطة قانون دينا : الرئيس مرسى رئيس منتخب وانت انتخبته
نجم : مرسى بس .. انما الباقى موجودين بناء على ايه
دينا : شايف الجماعة بتتدخل فى كل القرارت
نجم : وبغشم مش مصدقين نفسهم انهم بيحكموا مصر مصر مش زيمبابوى
دينا : وجود الرئيس مرسى فى السلطة لوحده مع مستشارين أَكفَاء ممكن يكون يكون افضل
نجم : انا عندى مبادرة باقولها من برنامجك باقول لصديقى العزيز الشاطر حسن اللى حينقذنا من رئيس الوزرا اللى ما ينفعش غير مدرس عربى حبيبى كمال الجنزورى الحق مصر مصر بتغرق
دينا : طب يا عم نجم انت بتقول لنا مصر للشباب والدكتور كمال الجنزورى اخد بدل الفرصة اتنين قبل وبعد الثورة
نجم : اقولك .. شوية ويمشى .. يقعد بس عشان الانتخابات ويلحق الاقتصاد قبل ما ينهار وبعدين يمشى وهو مش حيتاخر يعمل المهمة بتاعته ويمشى
دينا : كان فيه لقب بيطلقه عليك الرئيس السادات
نجم : الشاعر البذىء
دينا : كان من اكتر القصائد اللى بتثير غضبه بيان هام
نجم : بيان هام هنا شقلبان بيان هام محطة اذاعة حلاوة زمانهنا شقلبان محطة اذاعة حلاوة زمان
من القاهره ومن كردفان
وسائر بلاد العرب
واليابان
ومن فنزويلا
وايضا ايران
ومن اي دار
أو بلد مستباحه
بفعل السياحه
مع الأمريكان
هنا شقلبان
محطة اذاعة حلاوة زمان
وكانوا يقولوا الطلبة " خيشة " فى المدرجات مسجلينها امن الدولة وودوهاله اتفرج عليها
دينا : مين مقصود ب" خيشة "
نجم : هو عمنا واخونا مرسى ده اتهرى .. عما بقى يقول هنا شقلبان
بسم الله
سلام عليكم
وسلمون وموز
وأما المسائل
فهنجف ولوز
فيا اخوتي
ويا اخوات
اليكم بياني
كما هو آت
دينا : البيان الهام فى السبعينيات مختلف عن البيان الهام دلوقتى وخطابات الرئيس الحالى بالمقارنة بالرؤساء السابقين .
نجم : لا .. مختلف كان عبد الناصر ليه سحره بالعامية
دينا : رغم انك وصفته بعبد الجبار المفترى
نجم : كان عبد الجبار المفترى بس ابو دم تقيل يجيبلك اكتآب كارثة وانتى بتسمعيه ..عبد الناصر.. كنا بنسكت لما بيتكلم والسادات كان بيموتنا من الضحك كان بيحب التمثيل كنت احط التلفزيون فى حوش آدم واوطى التلفزيون ونموت من الضحك
دينا : وبعد كده كان فيه مبارك
نجم : لا ده ما كانش موجود خالص ده
دينا : ما كانش بيلفت نظرك باى حاجة لا بحلو او وحش
نجم: لا ما هوده طبيعى اللى ييجى بعده مرسى.. اقل من مين ما هم زى بعض
دينا : ايه اللى مش عاجبك اللغة .. الكلام .. الآداء
نجم : هو مش عارف بيقول ايه بيقرا من حاجة ادامه انا مندهش مش فاهم جابوه هنا ليه "مزبهل" ده ملك مصر .. ده بكتيره يقف فى المدرج
دينا : النهاردة فيه المتفائل رغم الصعاب وناس عندها احباط وعند احساس ان الثورة اتسرقت منه شايف الثورة اتسرقت
نجم : الثورة ما تتسرقش مادام مع الشباب هما سرقوا الكراسى بس الشباب مستنى الشعارات تتحقق العيش والحرية والعدالة الاجتماعة والاخوان بيقولوا "هييه " احنا كسبنا ده خطف ببلطجة وده سلوكهم ومش غريب عليهم واحد امبارح بيقول لى كنت باعلق على ولد ضربوه بيتعدوا على ولد فى اولى ثانوى ده مريض
دينا : فى مليونية تطهير القضاء شفنا مشايخ وملتحين بيضربوا واحد بس وضرب صعب
نجم : ايوة
دينا : بس فيه ناس بتقول فيه حرية والرئيس فى قناة الجزيرة قال ما فيش بلد فى الدنيا فيها حرية زى مصر حرية الاعلام حرية الكلام
نجم : حرية ايه هو يقدر يعمل اى حاجة لاى حد
دينا : لا ما هو فيه ضبط واحضار
نجم : هاتيلى ضبط واحضار نوارة بنتى قالت مش رايحة
دينا : وماراحتش
طالعة لمين طيب
نجم : لامها
خمسة وعشرين واحد ضربوها بالشوم عند التلفزيون وقالت للمرشد لدعة رجالة دول بنى آدمين وبيزعلوا لما نقول عليهم مماليك .. ده معقول !
دينا : فيه ناس بتقارن وبتقول طب احنا كنا ممكن نقول الكلام ايام مبارك او عبد الناصر او السادات
نجم : حد كان يجرؤ يطلع خمسة وعشرين راجل بالشوم يضربوا بنت
دينا : ما كان فيه برضه بلطجية ادام النقابة وفى حتت كتير
انت ساكن ادام المقطم وجنب الباب العالى
نجم : الميزة اللى باخدها النور ما بيتقطعش عندى ولا المية ابقى تعالى اسكنى عندنا تنورى
دينا : بس كان فيه احداث صعبة ادامه من فترة
نجم : العلقة دى ..انا كنت حاضر اتفرجت على حوالى ميت ميكروباص بسيوف وشوم بيقولوا الله اكبر ولله الحمد وكئنهم داخلين القدس بيفكرك بالانجليزلما المصريين كانوا يدوهم علقة موت بالحلل والمية السخنة والعيال اللى بيضربوهم اكبر عيل عنده 18 سنة ونوارة بنتى كانت تحوش وتقول لهم دول بنى آدمين يرد عليها واحد ويقول لها اسكتى دول كهربونى هما اللى عملوه فيهم بيجربوه دلوقتى .
دينا : طب ما انت حصلك برضه فكرت فى يوم انك عايز تنتقم كل الناس تشوف التعذيب فى اللى عذبوك
نجم : من المخبر اللى عذبنى
دينا : بس فاكر اسمه
نجم : طبعا وصوته ما بيطلعش من دماغى ما هما بيقولوا السمع والطاعة وهما زى المماليك كانوا بيضربوا الناس فى الشوارع
دينا : قصايدك اللى اتكتبت فى الستينات تمشى دلوقتى على اللى بيحصل فى مصر وتونس وكل مكان فيه ثورة وبيستمد منه الشباب الطاقة لحد دلوقتى
نجم : انا بتاع بكرة
دينا : والامل فى بكرة
نجم : انتى تعرفى تجيبى أخناتون تانى الامل دايما فى بكرة والشهداء والمعتقلين وشباب الثورة كلهم لحد ما ياخدوا حقهم نضربلهم تعظيم سلام حتفضلوا فى قلب مصر ام الدنيا عمركم ما حتخرجوا منه ابدا
دينا : طب ليه بتبكى
نجم : صعبانين على حبايبى
دينا : حاسس انه تضحياتهم من غير تمن
نجم : لا .. عشان كده لو ياسنا نبقى بنخونهم الشهدا والمصابين والمعتقلين والمستقبل كمان هما بكرة والمستقبل بتاع مصر
دينا : عشان كده قلت قصيدة عنبرة
عم نجم بتابع الاخبار
نجم : اون تى فى كنت باحب الجزيرة بس الاخوان وقعوها نحس
دينا : شايف الجزيرة منحازة
كل شىء اتكشف
دينا : بتحب مين فى اون تى فى
نجم : كلهم ريم مسميها البنت " ايزيس بنتى "
والواد يسرى طبعا وكلهم
دينا : مين بيضحكك
نجم : الرئيس مرسى .. كوميديان هايل عايز يعمل آلات استراتيجية راح روسيا يقول لهم كده قالوا له تعالى كل يوم بالذمة مش حاجة تضحك
دينا : بتحب باسم يوسف
نجم : اوى متابعه من اول ما ظهر قبل البرنامج بتاعه كان بيطلع على اون تى فى شكل جديد للاعلام المتحضر بحبه اوى
دينا : لما بتضحك بيخف حزنك لما يتزعل اكتر
نجم : كم ذا بمصر من المضحكات ....و لكنه ضحك كالبكا المتنبى
دينا : بس انت متفائل
نجم : طول ما المراة المصرية موجودة متفائل لانها ولادة
دينا : دلوقتى كله متصنف شيعى وسنة وخايفين على السنة من الشيعة
نجم : الحاكم المستبد يعمل ده الثورة الايرانية لما طلعت كلنا كنا معاها السادات قال دول شيعة
دينا : قصيدة دول شيعة واحنا سنة وكئنك كتبتها النهاردة كتبتها امتى يا عم نجم
نجم : ايام الثورة الايرانية وغيرها صباح الخير على الورد اللى فتح فى جناين مصر كلها كوارث
دينا : فيه غضب على وجود سياح ايرانيين وخوف على مصر من الخطر الايرانى
نجم : ايه الخيبة اللى احنا فيها دى خطر ايرانى ولآ صهيونى امريكانى ايه ده ؟؟؟ انت " احول " ده منطق يعنى ؟ ! عايزين يدخلونا فى ودنك منين يا جحا .