.....مبيسألش عليا البحر......

مبيسألش عليا البحر
ولا حتى اصحابى
لما باغيب
برضه البحر بيفضل بحر
بس صحايى
مبيبقوش أصحابى
الموت مراوح بتطير الذكرى لبعيد
وانت وانا بنجمع الاحلام قصايد
هدية للموت الجديد
فاكر كلامك؟قلبك وطن
الموت عشانه شهادة
ممكن تفسرلى
ايه معنى تأشيرة الهجرة اللى ف عينك
البنت اللى بتشوف الملايكة
بتحب اسم البحريطلع فى القصيدة
تشبك اديه شمس الحروف
ف السطر يضحك او يعيط مش مهم
السطر يضعف ولا يقوى
بس ينطق بالحقيقة
البنت اللى بتشوف الملايكة
عينها بتخاف الحقيقه
تكره قصايد فاتحة شباك الوجع للناس
وتحبها لما
تجر همومها براها
البنت تايهة
اكمن جن الخوف بيتحدى الملايكة
والملايكة طيبين
والخوف كبير أكبر من البحر بكتير
والبحر يصغر
والخوف بيكبر والسطر يضعف
والجن يقوى
والملايكة لسه برضه طيبين
والبنت مش عايزة الحقيقة
تقلع عنيها ومن ساعتها
مبقتش بتشوف الملايكة
رغم ان ملاية الفرش اللى انا نايمة عليها
مش بيضا
والاوضة بتاعتى من غير أرقام
واللى بتييجى تشد الصبح من عينى
مبتعرفش عيونها تفرق بين الأبيض والأسود
ومفيش جنبى اى ورود بتموت علشانى
بالرغم دا كله
احساس جوايا بيقوللى انى ف نفس الاوضة
نمرة تمانية
سألنى بدهشة منين الثبات؟
فكانت إجابتى
قوايم سريرى بتزرع ف ضهرى
نخاعه الجديد بديل اللى مات
وقلبى المشبك كدانتيلا سودا
تصور................
بيعشق ف غزل البنات
البنت اللى بتحلم تصبح أم لعروسه بلاستيك
حبت واحد من تلج ونار
جمد أحلامها ف عز الحب
وسيح آخر دمية
ممكن تنطق
ماما
أحلامنا ف المركبة بتغرق
يا تخلص الأحلام
يا تطير المركبة
يا تنشف البحر
يا تمووووووووووووووووووتنى
لسة باحب العصفور
واستنى يجيبلى الصبح ويجى
مع إنى عارفة ان زمان جدا
لما عيونه لمحت حلمه
كان عايز ينطق
صوب
صور
صون
بس أما رياح الخوف هزت عشه
واتحول حلمه مواسم غربة
مقدرش يكمل
مقدرش يقول غير
صو............صو.................صو
Comment *