سيجارة صيني

عم أيوب مصري موظف حكومة مرتبه 600 جنيه في الشهر
عم أيوب عنده 55 سنة وعنده بنت على وش جواز واللي جاي على قد اللي رايح ودايما يسأل نفسه سؤال، أجيب منين ؟
عم أيوب مدخن قديم بس قرر يوفر تمن علبة السجاير الكليوباترا اللي ب 6 جنيه ويشتري الصيني اللي بالمناسبة تمنها 3 جنيه !
عم أيوب بقى بيشرب سجاير صيني عشان عايز يجهز بنته ويسترها
يا ترى عم أيوب هيكون رأيه ايه لو جاله عريس مصري مش صيني بس معندوش تمن الشبكة الدهب وهيشجع الصناعة الصيني !!
المشكلة الحقيقية مش في فكرة عم أيوب عن السيجارة الصيني اللي بيشربها ولا عن الدهب "اللي مش صيني" اللي بيطلبه لبنته، المشكلة ان عم أيوب مش واخد باله انه بقى كله صيني .. من هدومه .. لأوضة نومه .. لنضارته أو لمعة عيونه ... انا خايف عم أيوب يطلع هو كمان صيني !!!
عم أيوب عنده أسرة بسيطة مكونة من زوجة وولد وبنت
الزوجة صابرة ودايما خايفة من بكره، اهتماماتها تنحصر في عم أيوب والبنت والولد، ومش بتطلب حاجة لنَفسها لكن نِفسها كل اللي حواليها يكونوا كويسين ولسة بتحلم ببكره ...
البنت بتكتب كل يوم سطر جديد في كتاب حياتها اللي "مش ورق" لكنه طريق ماشياه وشايفاه بعيون بريئة فيها لمعة غريبة بتقول لاي حد يشوفها ان الحياة قصيدة حب ...
الولد عايز يعيش الحياة بس هي بتلحقه، كان صغير بيحلم بس كان مستعجل يشوف نفسه كبير وفجأة كل حاجة اتغيرت لما دخل دوامة الحياة ومشي في طريق عم أيوب ...
عم أيوب كان برضه صغير بيحلم وخدته دوامة الحياة ولما جاب ابن نسي يفكره عاللي نسي هو يعمله وبقت الدنيا في عينين عم أيوب سيجارة صيني وفي عينين ابنه نفس الحكاية !!!
اذا اخترنا ان نعيش الحياة فلنعيشها كما خلقها الله، عالم هادئ جميل بديع لا يحمل شرا او حقدا او ضغينة