إيمان طفشت من بيتها وتزوجت عرفياً وأنجبت «شهد»

هناك بالقرب من شارع 26 يوليو أمام مطعم آخر ساعة، تجلس إيمان وابنتها الصغيرة، تلاغى المارة تستعطفهم بساندوتش لابنتها، ترتدى عباية سوداء بلون أيامها وإلى جوارها ابنتها «شهد» لم تتجاوز العامين ونصف العام، تلعن كل يوم حظها الذى دفعت ثمنه ابنتها التى لا تحمل لها أى أوراق.
التقينا بها وجعلناها تحكى حكايتها فقالت:
أنا اسمى نفوسة عندى 27 سنة بس هنا بيقولولى يا إيمان، والدى والدتى متوفيين وإخواتى قاعدين فى الهرم، وأنا سبتلهم البيت وأنا عندى 12 سنة.
واتجوزت رسمى وأنا عندى 17 سنة واحد أكبر منى بعشرين سنة وخلفت منه ولد، وأنا طفشت وسبتله البيت لأنه كان بيضربنى وبيهنى.
وبعدين اتعرفت على واحد من روض الفرج فى سنى وقال إنه هيتجوزنى وأنا قلتله إنى ما اطلقتش وإنى هربت وأنا على ذمة جوزى، فقالى خلاص هنكتب ورقة عرفى.
ولما خادنى وودانى بيتهم أمه قالتله دى من الشارع تجبها إزاى هنا بس هوه وقف فى وشهم وقالهم عجبانى وفعلا عشنا فى أوضة فى شبرا.
وبعدين؟
- وبعد كدا حملت فى شهد بنتى، واتولدت عيانة لأنى مكنتش باكل كويس، وساعتها بدأت المشاكل بينا.
بنتك عندها شهادة ميلاد؟
- لأ بنتى مالهاش أى ورق ولا أى حاجة معندهاش شهادة ميلاد وجالها نزيف فى المخ وهيه عمرها سنة وأنا بعالجها فى مستشفى أبوالريش وبحوشلها فلوس عشان أعالجها، أنا ببيع المناديل عشان أعالجها ومابعش نفسى.
جوزك الأول مادورش عليكى؟
- أكيد دور عشان ابنى بس هو كان عارف إنى ما بحبوش وبعدين هيدور عليه فين الدنيا واسعة.
وجوزك الثانى ماحولش يرجعك لما سبتيه؟
- أساسا حصل مشاكل بنا وكدهوه، وخدت منه البنت وهربت.
- أمال عايشه فين دلوقت؟
- أنا رجعت تانى عشت فى الشارع وخدت أوضة أنا وبنتى فى قليوب وقاعدة فيها أنا وبنتى، بس هو عرف مكانى وجانى هنا بس لميت عليه الناس وخدت منه البنت.
بنتك بعد عشر سنين هتبقى زيك هيبقى الحل إيه هتجوزيها إزاى ولا هدخليها المدرسة إزاى؟
- ربنا هيفرجها من عنده.
لو اضطريتى تعملى حاجة وحشة هتعملى ده؟
- بيحصل كتير هنا ولو أنا عايزة مش هيبقى فيه أسهل من كده، السريحة اللى حواليا كلهم شباب صغير هنا بيطمعوا فيا وساعات بيرخموا عليه، ومرة لاقيت واحد فيهم جاى جنبى وجايب سيجارة حشيش وعايزنى أشربها عشان يدوخنى وياخدنى بس بصراحة أى قرش حرام هييجى على بنتى، القرش الوحش بالشكل ده مش بيعمر بيت أنا قبل ما أتجوز كنت بشتغل فى مصانع، وساعات كنت بتاخد من هنا تسول بس عمرى مامسكونى فى شقة ولاحاجة الحمد لله.
بتقولى للناس إنك متجوزة؟
- أنا بقول للناس إن أبوها ميت لأنى أنا مش معترفة إن ده أبوها أساسا، أنا قعدت معاه 6 شهور أو 7 شهور محاولش إنه يعملها حاجة أو حتى يوديها للدكتور.
ومفكرتيش ليه ترجعيله؟
- أنا لاقيته مش نضيف.
يعنى إيه؟
- يعنى بيحب الستات وكل اللى يهمه إنه ينام معايا وخلاص وأنا سبته وهربت لما لاقيته بيشرب وبيجيب زمايله البيت، وأكتر من مرة يحاول واحد منهم ينام معايا وهوه مش فى وعيه بس أنا كنت برفض، ومرة قاللى تعالى فيه واحد هيدينا فلوس كتير بس عايزك يومين.
فيه زيك بنات كتير هنا؟
- وسط البلد لمه كتير قوى، اللى طفشانة من أهلها واللى طفشانة من جوزها واللى معاها جوزها وبتسرح.
نفسك فى إيه؟
- نفسى إن ربنا يمشينى صح، ويشفيلى بنتى ويخليها أحسن منى وأحسن الناس، ومش عايزاها تسرح زيى أو تشوف راجل وحش زى اللى أنا شوفته أو تشوف الدنيا اللى أنا شفتها، وماتشفش الحزن وتمشى زى البنات اللى بتمشى قدامى، أنا مش عايزة لنفسى أى حاجة أنا شوفت الدنيا وعرفتها الحلو والوحش وأنا مش هعيش أحسن من دنيتى أنا بس خايفة من بكرة على بنتى وخايفة يحصلها اللى حصلى.