"غمونى يا أم ولادى فى الخندق" قصيدة جديدة لسعيد شحاتة

- راضعين من الصدر المشاكس -
راضعين من الضرع المعاكس لاحتضار صوت الحياه
يا قلبى يا موجوع
............. هاجوع وأشبع معاك
وان حد أعلن موته عند المفترق
........................... هنكون فداه
وان حد قال الكلمة سيف لاجل الرغيف
.........................................هنقول معاه
يا قلبى يا موجوع
.............. يا مركب للصعود الأعلى لدروب السما
راضعين وواقفين انتباه
.................... ضد انتصار الصمت وشيوع العمى
يا قلبى يا موجوع يا منزوع القرار
نزل الشيطان ع الأرض واحتد الحصار
طرحت شواشى النار على حدود النهار
رقص العيار جوا العروق واشتد
قاتلانى روحى ومين يقيم الحد
يا معلمانى الموت عشان القوت
ومدوّقانى القوت عشان الكَدّ
أنا كلمتين وقت الهزار فارغين
أنا طلقة عارفه السكّة ساعة الجد
أنا عنوانين للبحر... جزر ومدّ
أنا ضد لحظة ما أتخنق م الضّد
يا سد يا مفتوح على الشطين
الأرض وردة ف سلّة العشاق
والنيل قصيدة ف حضرة الواقفين
والخوف كمين بيغازل الخايف
يا قلب مش شايف حدود الضىّ
أنا حىّ أُرزق وابتسم واشتاق
واللا اللى قال الكلمة سيف مش حىّ
نزل الشيطان ع الأرض يشرب شىّ ويحارب
سابوا الملايكة الحبل ع الغارب
وقف الغلابة يوجهوا القارب ليمّ الشمس
صليت وراهم أمس فى التحرير
صليت إمام فى الكعبة أول أمس
غمونى يا أم ولادى فى الخندق
لكن عرفت إيديكى ساعة اللمس
قلبك قصايد همس وعيونك حياه
نزل الشيطان ع الأرض يحجل
.............. وانتشى الأتباع وراه
نزلوا الملايكه معاكى يسقونى الوطن
....... ويطيّبونى بميّة المحاياه
كانوا الملايكه ف ضحكتك مركب نجاه
خطّيت فى أرض الله وكدّبت الودَع
وف رمشك السهران فى حضن الشمس بدّعت البِدَع
يا أجدع الجدعان أنا عيّل جدع
لكن من السهل أنخدع فى الناس
إحساسى ما بيكدبش وانتى بتكدبى
وبتجبرينا نكدّب الإحساس
وبترغمينا نصدّق الحرّاس وننسى المهزله
ونغنّى لحظة ما الإمام
يبدأ فى سورة "الزلزلة"
يا أم الملامح تشبه الشاطر حسن
يا رموش بتحلم بيها أجدع مُكحله
يا قلب يشبه قلب سيّدنا المسيح
يا ضحكة العدرا البتول المُذهله
لسّه العيال واقفين بيتهجّوا الوطن
وبيرسموكى نهار على حدود الخلا
وبيهتفوا إن إنتى البسيطه المُعضله
وانتى اللى كنتى الناى وكنتى القنبله
كان البدن فلاح وروحك سنبله
كانت إيديكى الجنه وعنيكى الصلا
كنتِ الكلام السهل عند المفترق
والفرحه لما تموت جميع الأسئله