وحلمت كأني مُت

قال حلمت كأني مُت..والحبايب غسلوني..بعد منها كفنوني..والحبايب والقرايب خرّجُوني..والصوات في الخارجة واجب..كله بينوح عليّ.. بالخصوص كل الحبايب
ملحوظة: هذه الرسالة وصلتنا من أحد زوار الموقع من خلال البريد الإلكتروني وننشرها كما هي
لو الحاج أمين الديب بيكتب مثل أحمد فؤاد نجم أو عبد الرحمن الأبنودي كانوا عملوا له تمثال من ذهب وسلطوا عليه الأضواء
دكتور علاء الدين عباس
قال حلمت كأني مُت
والحبايب غسلوني
بعد منها كفنوني
والحبايب والقرايب خرّجُوني
والصوات في الخارجة واجب
كله بينوح عليّ بالخصوص
كل الحبايب
واللي يزعق آه يا أبويا
والصُغَيَّر قال يا جدي.
آه يا جدي
كان بودي تبقي عايش
لما تحضر يوم جوازي
أما زوجتي تقول يا جوزي
آه يا جوزي
كنت طيب بالسلامة
الله يسامحك
كنا طبعًا زعلانين
أما جاري
علي ابن حيطة
جه عمل له ألف زيطة
قال يا أخويا بأعلى صوته
واترمي ع النعش يبكي
واللي شَدُّه من إيديه
واللي بيطبطب عليه
واللي قال ترحَّمّ عليه
واللي قال له الصبر واجب
قال له أصبر.!! أصبر إيه.?
انت فاكر إن موته مش خسارة.?
آه يا أخويا يا ميت خسارة
بس سامعه يقول في سرّه
روح في داهية وألف غارة
والبنات نازلين صوات
والشباب فردوا الكراسي
والكنًب والتكايات
واللي نادى ع المآذن
واللي قال قولوا لصحابُه
في البلاد النائية.. أو بالمكروفون
واللي قال مات الكبير
أصله طيب كان أمير
واللي بيعدد محاسني
واللي بيفتش عيوبي
واللي بيقَطَّع في توبي
واللي قال راجل وشهم
والعيوب صبحت سهام
كل واحد خد له سهم
والسهام فيها اللي صابت
والسهام فيها اللي خابت
أما شاعر جه يعزي..
قال أمين.?!!
ألف رحمة ونور عليه
عنده مبدأ
حَب مصر
حَب أهله.. وحب ناسه
والكلام كان هو فاسه
حتي غيطه.. كان عقول الفلاحين
كل واحد.. كان بيحصد من زراعته
كان فلاحته.. فكر راقي
كان بيزرع من كلامه
فكر في العقل الشراقي
كان خزين خبرة سنين
ألف رحمة ونور عليه
كل واحد قال آمين
واللي قال كان زهرة حلوة
انقطف قبل الأوان
كنت سامع كل كلمة
بس من غير الودان
كنت شايف كل حاجة
بس من غير العيون
كنت حاسس كل حاجة
بس من غير الحواس
كنت مخلوق شكل تاني
بس مش رجلين وراس
كنت همسة
كنت نسمة
كنت طيف
كنت باسبح في الهوا
والكون لطيف
كنت أشوف نفسي الحقيقة
مرة تانية
ألقى نفسي كنت زيف
كنت أشوف الناس ورايَا
زي أوراق الخريف
باختصار الشيخ دفنّي
والجميع بيودعوني بالأنين
واللي قاعد جنب قبري
يقرا من سورة تبارك
بعدما خلصت ياسين
واللي قال ثَبت سؤاله
يا إله العالمين
لما مِشيوم
الملايكة قوموني للحساب
يسألوني
والسؤال قد الجواب
قال لي: ربك.?
قلت واحد... هوّ رب العالمين
من رسولك.?
قلت أحمد... ابن عبد الله محمد
قال لي دينك.?
قلت مسلم.. زي كل المسلمين
قال لي أرقد.. والحساب وقت الحساب
هات جليسه
هوّ عمله يكون ونيسه.
قال لي شوف..!!
لو كان ونيسك جه كويس
يبقي عملك كان كويس
راح سايبني وتنه ماشي
أو تلاشي ما شفتهوش
جه ونيسي في أبهى صورة
قلت بسم الله تعالى..
انت مين.?
قال لي عملك.
قلت أهلا
قال لي أهلا مش فاكرني.?!!
قلت فاكرك
قال لي أيوه
اللي يزرع خير حيحصد
وانت زارع خير ح تحصد
اطمئن القبر واسع
وانت جيتنا ف دنيا تانية
دنيا واسعة وفيها جنة
والمطيع لله ح يلقي فيها أجر العاملين
بص شوف..?
بص شوف الأرض كورة
زي حبة رمل.. في صحراء فسيحة
بص شوف الشمس
زي نقطة ف بحر من غير لون وريحة
بص شوف الدنيا فانية
واللي فيها كله فاني
أصله محسوب بالثواني
وانت فيها كنت فاني
وانتهيت من دنيا فانية
وابتديت في اللانهائي.
لا نهائي للزمان
لا نهائي للمكان
لا نهائي للحدود
لا نهائي للخلود
بص شوف.?...
أحلى حاجة في الوجود..
قصر لؤلؤ..
لسه متشيد جديد
القصور لؤلؤ وماس
قلت قل لي والقصور النورانية
الثلاثة دول لمين
رد قال لي:
اللي في الأول وفاء
بعدها مسكن دارين
بعدها جنة آيات
قلت نفسي أكون شهيد
قال خلاص الوقت فات
كان يجوز قبل الممات
لو تموت من أجل دينك
تبقى زيه
لو تموت من أجل أرضك
تبقى زيه
لو تموت من أجل عرضك
تبقى زيه
قلت آآآه كنت نفسي أموت شهيد
رد قال لي حد حاشك
كنت فين
كنت فين لما اليهود
قيدوكم بالقيود
عشموكم بالوعود
فرقوكم من سنين
كنت فين?
كنت فين لما اليهود
اشتروكم بالخيانة
عيشوكم في المهانة
علموكم الاستكانة
وانت غرقان من سنين
كنت فين..؟؟؟؟
كنت فين وانت شايف
إن أخوك مطرود شريد
كنت فين والقدس بتضيع من إيديكم
ليه ما ثورتش وارتضيت عيشة العبيد
ليه ما شلتش قنبلة تنسف وجودهم
أو تفرق شملهم وتموت شهيد..
كنت فين...؟؟؟؟؟؟؟؟
كنت ميت ولاّ عايش..؟؟؟؟
قلت عايش.
ولا باحلم اني عايش
قال لي لأ
اوعي تنطق
اوعي تنطق تاني انك كنت عايش
كنت ميت.....
ولاّ اقولك
لما يأخدوا كل أرضك
تبقي عايش؟؟؟؟؟؟
والكلاب تنهش في عرضك...
تبقي عايش؟؟؟؟؟؟؟؟؟؟
لما يبقوا مكممينك
تبقي عايش؟؟؟؟؟؟؟؟؟
واليهود بتسب دينك
تبقي عايش؟؟؟؟؟؟؟
انت يا ابني كنت خايف
قلت فعلا كنت خايف
علَّمونا إزاي نخاف
لسه ح يكمل كلامه
العيال شدوا اللحاف
والمفاجأة أذهلتني
جت مراتي وقومتني
فوقتني وقعدتني..
بحلقت وقالت لي مالك
إيه جرى لك
ساعة بنخبط عليك
والعيال تنده عليك
كل ده ما سمعتناش
انت ميت؟؟؟؟؟؟؟؟؟؟؟؟
قلت أيوه كنت باحلم إني ميت
قالوا شيء ما يهمناش
قال بيحلم.
ياما لسه تعيش وتحلم
قوم وشوف الشعب ماله
كل واحد خد عياله
كله ماشي لأرض سينا
واللي جاي من صنعا والإمارات ومكة
واللي من بغداد وسوريا
واللي من لبنان وليبيا
واللي م المغرب وتونس
والجزاير والسودان
الشعوب جمعت شبابها
الشعوب فكت قيودها
والقيادة بإيد جنودها
ناوية تطرد إسرائيل
ناوية تطرد الأمريكان
يعني ثورة
قلت نفسي أسمعها تاني
قالوا تاني يعني إيه قالوا ثورة
يعني كل الشعب ثائر
قلت ثوره ضد مين.?
قالوا ضد المفسدين
ضد كل الأمريكان
والصهاينة وإسرائيل
التفت لقيت عيالي
فيه سؤال راح جاي في بالي
عقل بالي قال دا حلم
قلت دا مش زي حلمي
عقل بالي قال لي فعلا حد علمي
إن حلمك قد سنك
أما ده حلم الشباب
والشباب مليان طموح
بس مكتوف بالسلاسل
وانفجر رغم الجروح
انفجرت بأعلى صوتي
قلت باحلم
صدقوني لسه باحلم
حتي برضه الناس بتحلم
صاحية تحلم
نايمة تحلم
ولا يمكن عقلي شت
التفت لقيت عيالي
كلهم بيبحلقوا لي
قلت ليه بتقوموني
ما تسيبوني
ما تسيبوني ما كنت نايم
ما تسيبوني يا ريتني مت
ماتسيبوني يا ريتني مت
ما تسيبوني يا ريتني مت..