شرايح

وإنت بتنهى قراية آخر نص من فضلك
يا تسيب الديوان مفتوح
يا تقطع أوراقه
علشان البنت.. متلمّش نفسيها
من فوق صفحاته
تتشبك روح من أول وجديد
تحلم
من تانى تحس
وأضطر أقطعها شرايح
جايز تعجبكم.. وجايز لأ
حيرة
مضايق مخنوق
مش قادر تكتب
حاجة بتكتم ع لى نفسك
عارفة.. نفسك.. شيلها
طيب حتشيلها إزاى
وإن راحت منك
حتعيش إزاى
وإن فضلت فيك
ح تكون إزاى
آه وسط الناس
ويا الشعر.. وسط البحر.. قلب الحلم
واما تموت فيهم
ح تعيش فيهم
وإن مت بجد
راح تستغرب كل الدنيا
وتقول.. مات
طيب مات إزاى..؟
إبريل
ليه مايكونش كل اللى أنا فيه
كدبة إبريل
وإنك مدتنيش قلبك
بعد ما شبح الخوف قطع كل حبال بكرة
والحزن طلع له مخالب
نهشت اسمك قبل ما تيجى
ليه مايكونش اللى أنا حاساه دلوقت
تفسيره هبوط حاد فى الدورة الدموية
مش إحساس تانى بيخوفنى
ليه مايكونش الدمع اللى بيحضن خدى
ليه أى سبب تانى غير إنك مش جنبى
ياه كنت نسيت أسأل
ليه ورق الوردة اللى وقفت قصادها لحد ما دبلت
مفهوش إبريل.
فستان
الروح فستان الجسم
وأنا جيت للدنيا لقيتك
آخر فستان
بس خسارة
مش عايز تنزل من فوق الشماعة
فحكمت على أفضل
طول العمر مجرد جسم.
حلم
كل اللى يجينى ويسأل عنك
ويدور فيا
فى قصايد شعرى
بين صفحات الحزن اللى ف عينى
بين دقات الساعة الواقفة
أو دقات قلبى اللى بتتحرك خوف
مش بتردد
وبقول.. مت.. فعلا.. مت
بس
ماعرفش إزاى لسه باقاوح
وبقول ممكن
لما تلاقى روحك ح تخش النار
ترجع لى
أنانية
منى بتحس القوة
وبتشرب من أحزانى صبر
منك باخطف بكرة البردان فى عنيك
وأحطه فى حضنى يتدفى
وأما أرده لعينك
متشوفش ف قلبى غير البرد
وفاء بغدادى.
مواليد الإسكندرية
ومعتمدة من الإذاعة والتليفزيون
صدر لها (زى الحقيقة) صدر عن وزارة الشباب والرياضة - (الحتة اللى بتحلم فى) (بير مسعود) - (مش ملك حد) (شرايح من روح بنت) حاصلة على تمهيدى ماجيستير - كلية الإعلام - جامعة القاهرة
حاصلة على العديد من الجوائز من وزارة الشباب والرياضة والهيئة العامة لقصور الثقافة.