حديث المدينة

مفيد فوزى: أهلا بحضراتكم الفكر أضواء كاشفة والمفكر فى نهاية الأمر قنديل يضيئ العتمة هو واحد من قناديل مصر المضيئة يجمع بين الأدب والمقال والرواية وعلم النفس والسياسة الأستاذ الدكتور يحيى الرخاوى وفى المدينة جدل كبير يكاد يصم الآذان دكتور يحيى مباشرة فى زمان لا يحتاج الانتظار لماذا النخبة متهمة
د.يحيى الرخاوى: ازيك
مفيد فوزى: ازيك انت يا دكتور يحيى
د.يحيى الرخاوى: تعريف النخبة الأول مين هم النخبة ؟
مفيد فوزى: صفوة المجتمع ، الأحزاب
د.يحيى الرخاوى: لا صفوة المجتمع غير الأحزاب وكلمة النخبة يعنى فى كل عصر تختلف عن العصر الآخر يعنى النخبة نخبة المثقفين غير نخبة الأرستقراطيين غير نخبة السياسيين وهكذا لابد أن نحدد النخبة أظن إن كلمة النخبة دلوقتى بقت نادرة الاستعمال أو متعددة الاستعمال لدرجة الخلط فمن تقصد بالنخبة أولا هى متهمة وتستاهل الاتهام
مفيد فوزى: ليه سؤال
د.يحيى الرخاوى: طب مش الأول نعرف احنا بنتكلم على أنهى نخبة
مفيد فوزى: قوى أنت ترى أن النخبة التى تستحق الاتهام أى نخبة
د.يحيى الرخاوى: يعنى نخبة المثقفين مثلا بنقول على نخبة المثقفين الناس دول ناس أفاضل ومفكرين ومتنورين وتنويريين وكلام كده من الكلام الكويس ده قعدوا يطنطنوا بالديمقراطية وللديمقراطية كل العقود اللى فاتت وحينما اختبروا فى ممارسة الديمقراطية وأنا مش متحمس لها خالص وتحافظ عليها يمكن الكلام يجر بعضه يقول لك ليه وازاى وكان الأستاذ نجيب محفوظ الله يرحمه أكبر ديمقراطى شفته فى حياتى أقول له ده هم اللى خبطوك ده هم اللى هييجوا يقول لى معلش الديمقراطية هتصلح الديمقراطية أقول له ده هى سيئة جدا يقول لى عندك أحسن منها أقول له لا ، يقول لى مش هى أحسن الأسوأ أقول له آه ، يقول لى أحسن الأسوأ هو الأحسن لحد ما أقنعنى إن المرحلة تستلزمها الجموع بقى المثقفين نخبة المثقفين بذكائهم وبحرصهم على البلد قعدوا يتكلموا عنها دون أن يختبروا حين اختبروا أنا أظن إنهم كشوا من الديمقراطية وكادوا يتنازلوا عنها ولكن بطريقة تراجعية مش استيعابية يعنى أنا أظن وكنت دايما واحنا قاعدين مع الأستاذ نجيب أقول يا جماعة أنا ضد الديمقراطية لإنها بتقيس الرأى ما بتقيسش الوعى لأنها مع العامة إلى آخره إنما كان يقول ما عندكش حاجة بدالها غير الديكتاتورية أقول له لا يقول لى يبقى هى دى فكمرحلة لابد أن نحترم ونخضع ونفرح بما لا نحب وبما لا نقتنع به النخبة ما عملتش كده
مفيد فوزى: انت بتراهن دكتور يحيى الرخاوى على الشعب عندك رهان دائما على الشعب
د.يحيى الرخاوى: آه طبعا على عامة الناس
مفيد فوزى: على عامة الناس
د.يحيى الرخاوى: فيه الرأى العام وفيه الوعى العام
مفيد فوزى: انت بتراهن على إيه
د.يحيى الرخاوى: أنا براهن على الوعى العام ، الوعى العام ده هو أصل الوجود حتى عند الحيوانات فيه كلام دلوقتى على أنواع العقول الحيوانات عندها وعى عام الوعى العام بتاع الحيوان ما عندهاش وعى بالوعى الإنسان عنده وعى بالوعى إنما الحيوان عنده وعى بالبقاء ، قوانين البقاء حفظت على أحياء قليلة العدد واحد فى الألف يعنى أنا وانت من الواحد فى الألف معانا النمل ومعانا الطيور ومعانا السناجب ومعانا الثعابين ال999 انقرضوا مين اللى حافظ على الواحد فى الألف ده الإنسان واحد منهم عبر تاريخ الحياة أنا بتكلم على التطور يعنى بالوعى العام وعى النوع عمل برامج وقائية متبادلة ولقوها دى اللى حافظت على الواحد فى الألف فأنا مع الوعى العام والوعى العام المصرى أرقى بكثير جدا من الوعى العام
مفيد فوزى: يمكن الناس يا دكتور يحيى تحب تعرف هل فيه فرق نوعى بين الرأى العام والوعى العام
د.يحيى الرخاوى: آه طبعا
مفيد فوزى: لأن الناس تتصور أن الرأى العام هو الوعى العام
د.يحيى الرخاوى: لا الوعى العام هو فكر والفكر دلوقتى بينى وبينك يعنى الدنيا بتتغير
مفيد فوزى: هل هو العقل الجمعى
د.يحيى الرخاوى: لا هو الوعى الجمعى
مفيد فوزى: وأنا لما أقول العقل الجمعى بعدت عن الأساس
د.يحيى الرخاوى: أصل استعمال كلمة العقل حتى يعنى بقت عملية اختزالية مفاهيمية بقت منطق الوعى العقل متأسف 1+1=2،2*2=4 العقل ، العقل ، العقل العلم الحديث مش الأحدث لإن أنا دلوقتى على فكرة اللى بيشتغلوا فى العلم فيه علم حديث وعلم أحدث العلم الأحدث عمره 20 سنة العلم الحديث عمره 100 سنة فخلى بالك فيه ناس توقفوا عند كلمة العلم الحديث دى تبع العقل العلم الأحدث تبع العلوم الجديدة الحاسوبية زى التركيبية وشواف وأيضا العلوم الكماوية زى الرياضة الكماوية الطبيعة الكموية دى علوم رائعة بتخش على طول على الوعى على جماع العقول كلها أنا لى عقل بكلمك به دلوقتى إنما فيه فريق وراه بيغذى هذا العقل اللى بكلمك به لو انفصل العقل الظاهر ده عن بقية الفريق بقى عقل فقط وساعات يسموه بقى يعنى اسم قبيح عقلنة اللى هو طق حنك اللى هو الكلام لا مؤاخذة ما تآخذنيش يا مفيد اللى بنسمعه ليل مع نهار فى التليفزيون ليل مع نهار كلام
مفيد فوزى: طق حنك صح
د.يحيى الرخاوى: تدور على الوعى ، تدور على نبض الناس تدور على الحس ما تلاقيش إنما تلاقى مناقشات المناقشات دى لها وظيفة جيدة جدا ويفتكروا ده حوار لا الوعى بيعمل جدل مالى بيحتك احتكاك حقيقى والوعى يطلع وعى جديد لإن المناقشات فيها مكسب وخسارة أنا بقول كلام أحسن يبقى أنا أقنعتك يبقى أنت اقتنعت يبقى أنا بحبك يبقى انت بتحبنى والخناجر شغالة من تحت لتحت ما ينفعش اللى جاى دلوقتى كم من الكلام والعقلنة أصبحت يعنى أتحفظ عليها حتى وانت بتجيى لى النهاردة قلت ربنا يستر هو كلام وللا خناقة ، الخناقة وعى الكلام مناقشة وفوز وخسارة إنما الخناقة الحقيقية إن أنا أخرج النهاردة وأنا معايا حتة من مفيد وانت تخرج بحاجة ده بقى وعى ، وعى عدم الفهم أقول لك على حاجة بسيطة جدا الفرق بين الفكر والإدراك الفكر مش هو الإدراك الفكر بيسموه حل المشاكل الإدراك هو العملية اللى يتكيف بها الكائن الحى مع من حوله يصبح أكثر تلاؤما مع من حوله زى الأميبا ، الأميبا لما تلاقى محيط مالح زيادة ما تروحوش تلاقى محيط مناسب إن هى تتعامل معاه وتاخذ غذاءها تروحه تصور الأميبا خلية واحدة تقدر تتكيف مع المحيط مع اللى حواليها ما هو ده إدراك فالأميبا تدرك إنما لا تعقل
مفيد فوزى: طيب بالإدراك وبالوعى العام لما طرح السيد رئيس الجمهورية فكرة مشروع النهضة قال إنه ينتهى سنة 2028 ماذا تعنى هذه اٌلإشارة
د.يحيى الرخاوى: أولا يعنى ربنا يوفقه ويدى له الصحة احنا دلوقتى 2000 كام
مفيد فوزى: و12
د.يحيى الرخاوى: من 2028
مفيد فوزى: 16 سنة يعنى 4 مدد
د.يحيى الرخاوى: ما ينفعش هذه الإشارة تعنى أنه حسن النية وضعيف العلاقة بالزمن وعايزين نفرق بين النهضة وبين الحضارة وبين النهضة وبين الدولة تنظيم الدولة ممكن يتم فى سنة الدولة الجديدة اللى احنا بنعملها عبارة عن مؤسسات لها قوانين منضبطة قادرة على الفعل وعلى تنفيذ قوانينها ده الدولة لما نتنقل بقى من الدولة للنهضة نلاقى حدوتة عايزين عقود 60،70،80 سنة
فاصل
عبارة عن جزء من خطاب الدكتور محمد مرسى رئيس الجمهورية
مفيد فوزى: هل النهضة هى مدينة الدولة
د.يحيى الرخاوى: هو فيه كلام طبعا عن الفرق بين المدنية والحضارة ، المدنية بيتكلموا فيها على شكل العمران ، شكل العمران وقوته وجماله وأداؤه العمران الحضارة الحقيقة بينتقلوا إلى نوعية الحياة البشرية اللى هى عملت هذا العمران واللى هى سكنت هذا العمران واللى هى تحفظه وترتقى به
مفيد فوزى: هل هى تمس الوجدان ولو إن أنا مش عارف إحساسك إيه بكلمة الوجدان يعنى عارف إنك لك أحيانا نوع من الاستشعار وبعض الكلمات ما بتقبلهاش قوى
د.يحيى الرخاوى: هو صحيح الله يخليك ويطول عمرك هو أصبح الوجدان دلوقتى عقل آخر عندنا حاجة اسمها إيه معالجة المعلومات كانوا فاهمين إنها اختصاص العقل فقط طلع إن الوجدان وأنا باخد منك معلومات وبرد عليك بيشتغل فى نفس اللحظة معالجة المعلومات بيشتغل بطريقته الخاصة وأعمق وبيغذى العقل إذن الوجدان ليس نقيض العقل إنما هو مكمل للعقل وبياخد المعلومة يفحصها ويحطها ويرتبها ويدخلها ويطلعها بطريقة أخرى غير العقل اللى بنسميه المفاهيمى أو المنطقى
مفيد فوزى: ده دور الوجدان
د.يحيى الرخاوى: آه هو غير العقل غير المفاهيم لما نيجى بقى نتكلم على المخين نصفين المخين
مفيد فوزى: مخين
د.يحيى الرخاوى: نصفين كوريين
مفيد فوزى: آه الفصين يعنى
د.يحيى الرخاوى: الفصين هم مش فصين هم نصفين كوريين فلما نيجى نتكلم على النصفين الكرويين نلاقى النصف اللى احنا بنكتب به اللى هو اليمين ، اليمين عند عامة الناس اللى هو الأيسر ده عفى قوى وتبع العقل
مفيد فوزى: حضرتك أشول
د.يحيى الرخاوى: لا
مفيد فوزى: بتكتب باليمين
د.يحيى الرخاوى: أنا بكتب باليمين فاليمين قصاد الشمال ده تبع أرسطو وتبع 2*2 ب 4 وتبع المنطق الخلطى ، النصف المنتحى بقى اللى هو عندى أنا مثلا يبقى اليمين ويمكن عندك يبقى اليمين ده تبع كلية الإدراك اللى احنا كنا بنتكلم عليها تبع الصورة وتبع النغمة وتبع الكلية وتبع شوية الوجدان وده يكمل ده والتناغم بين النصفين هو ده كفاءة الوجود البشرى الفائق
مفيد فوزى: أنا إذا فكرت بالفص اليمين الآن
د.يحيى الرخاوى: طيب اليمين اللى هو المتنحى
مفيد فوزى: أيوة وقلت لك إن الدين إذا تغول فى السياسة ما عواقبه وممكن أفكر كده وأقول التدين فى مصر بين الظاهرة والمعتقد هل تفكيرى سليم
د.يحيى الرخاوى: الله يخليك
مفيد فوزى: انت بتجاملنى والله يا دكتور يحيى بتجاملنى بس أنا لازم أعترف لك إن هذا النوع من النقاشات ما بنشوفوش على الشاشات اللى هو النقاش الفكرى دايما باستمرار فيه خناق
د.يحيى الرخاوى: انت استعملت كلمة معتقد وده جيد جدا الذى يشيع الآن فى الأديان وفى دينى الذى أعرفه وفى دينك الذى أتعرف عليه هو معتقد والمعتقد ليس الدين والإسلام ليس هو الإيمان والشريعة ليست هى الإسلام ده كلام ألف باء ، ألف باء العلم وألف باء الدين وحت الصوفية لما يتكلموا على الشريعة والطريقة والحقيقة الشريعة تنظيم سلوكى ويهدى إلى طريقة ما أما الحقيقة فهى هتبقى تبع المخ التنحى مضافا إليه المخ الافتكار متصاحبين خالص ، خالص عند مرحلة الحقيقة لما نيجى نتكلم على المعتقد الدين ليس معتقد الله سبحانه وتعالى لا يثبت بالتفكير نهائيا وإنما يثبت بالإدراك أما نيجى عندنا احنا فى ديننا يقول أشهد أن لا إله إلا الله ما بيقولش أعتقد أن هناك إله
مفيد فوزى: أشهد
د.يحيى الرخاوى: أشهد شوف الشهادة رؤية كلية ، الشهادة رؤية كلية
مفيد فوزى: طيب لو عدنا إلى فكرة الدين
د.يحيى الرخاوى: إذا توغل فى السياسة ييجى بقى الدين أنهى دين بيتوغل على مستويين مستوى انتهازى استغلالى بيخاطب جزء من الوعى العاطفى بقى مش حتى الوجدان ، الوجدان ده يعنى وجد الشئ فى آخره يعنى على المستوى العاطفى بقشور دينية ده مستوى الحقيقة يعنى فإذا توغل وفيه دين انتهازى بقى يعنى الدين الانتهازى غير الدين اللى بيدغدغ البدائية الدين ده على فكرة موجود قبل اللغة يعنى التركيب الدينى للبشر فى علاقته بالطبيعة فى علاقته بالنغم الكونى فى علاقته بالمطلق إلى وجه الله موجود قبل نشر اللغة يعنى حاجة عميقة جدا وعريقة جدا ولا يمكن تهميشه
مفيد فوزى: أنا لما حضرتك بتتكلم على الدين كده بستدعى من الذاكرة كلمة لينين إن الدين أفيون الشعوب هل هى عبارة مجازية صحيحة يعنى أفهمها يعنى
د.يحيى الرخاوى: دلوقتى أفيون الشعوب العلم تصور
مفيد فوزى: أفيون الشعوب العلم
د.يحيى الرخاوى: آه طبعا
مفيد فوزى: وليس الدين
د.يحيى الرخاوى: دلوقتى أفيون الشعوب العلم اللى هو كنا لسه بنقول العلم الحديث مش الأحدث أصبح العلم مقدس كما كان الدين مقدسا عندنا فى ديننا يفرق بين الإسلام والإيمان رغم إنهم بيقولوا دى ميزة الأعراب بس قالت الأعراب آمنا قل لم تؤمنوا ولكن قولوا أسلمنا ولما يدخل الإيمان فى قلوبكم يا نهار أبيض ، يا نهار أبيض قالت الأعراب آمنا قال لا تقولوا آمنا ولكن قولوا أسلمنا ولما يدخل ، لما ييجى الدين يتوقف عند أسلمنا بتاعت الأعراب يفتح الله ، يفتح الله أما ييجى الدين يبقى الإسلام طريق إلى الإيمان والإيمان طريق إلى الله يبقى نتحد كلنا فى الهدف الأكمن وفى كل الأديان هى طريق إلى الله فبيحصل إيه إن بييجى الدين يعمل شوية قواعد زى ما يكون بسلك فونية الوعى الشخصى إلى مطلق الوعى المطلق إلى وجه الله لما نيجى بقى نقف عند مرحلة التسليك دهية من غير ما نشوف نتيجتها يبقى توقفنا عند مرحلة الإسلام دون الإيمان ودون السعى كدحا إلى وجه الله
مفيد فوزى: دكتور يحيى الرخاوى هل حضرتك عندك قلق ما على حرية الإبداع فى مصر فى الزمنات القادمة ؟
د.يحيى الرخاوى: 100 %
مفيد فوزى: 100 % ما صمام الأمان
د.يحيى الرخاوى: الوعى العام
مفيد فوزى: طيب الرئيس والمرشد علاقة تاريخية لماذا ضرورة فصلهما عن بعض الرئيس
د.يحيى الرخاوى: أنا منزعج جدا من حكاية فصلهما عن بعض ومنزعج من السيد الرئيس يقول أنا سبت الإخوان وسبت الحرية والعدالة ده كلام غير مقبول إطلاقا
مفيد فوزى: هل هو فك مجالس
د.يحيى الرخاوى: لا للأسف أنا بصدقه بس للأسف تصديقى له بيبقى فيه نوع من الملامة من ناحية والرفض غير أنه يقصد ذلك
مفيد فوزى: ليه
د.يحيى الرخاوى: لإنه يستحيل إنه ينفصل وأنا لسه قريب منبه على الحكاية دى النحاس باشا ما يقدرش ينفصل عن الوفد أنا انتخبت هذا الرئيس لأنه من الإخوان أو اللى انتخبوه يعنى انتخبوه لأنه من الإخوان ومن الحرية والعدالة ليس من حقه أن ينفصل زى زمان لما كنا بنقول واحد اترشح مستقل وبقى لما ينجح ينضم للحزب الوطنى عشان يخدم الناس دى نفس الحكاية بس بالشقلوب واحد اترشح حزب حرية وعدالة وإخوان وبعد ما ينجح يقول لهم شاو لا مش من حقك انت خدت اسمى وتاريخ 80 سنة ونبض الناس وفيه حاجة اسمها الدين الشعبى مش هقول للناس عليه الدين الشعبى ده دين راقى جدا ما هواش
مفيد فوزى: اللى هو إيه فى تلخيص
د.يحيى الرخاوى: اللى هو لما نرجع للوعى العام نلاقيه أقرب إلى الله من الفزلكة بتاعت التفسيرات والمعاجم الدين الشعبى ما هواش مجرد الموالد مع العلم إن الموالد من أروع والذكر من أروع أشكال الدين الشعبى اللهم آمنى إيمانا كإيمان العجائزعادة العجائز ما بيفكوش الخط يبقى ده الدين الشعبى اللى هو تلاقى الواحد دين الأطفال الدين الشعبى قريب قوى من دين الأطفال مش دين بدائى لا ده دين كلى تلقائى لما نيجى نلاقى هذا الدين الشعبى هو مصحصح قوى وفاهم قوى ورافض قوى وقابل قوى و ونقدر نلاقى سكة نكلمه بها هيبقى شئ ثانى خالص
مفيد فوزى: دكتور يحيى الرخاوى هل ربح الثوار رئيسا من الإخوان
د.يحيى الرخاوى: هذا وارد لكنه لم يحدث
مفيد فوزى: هذا وارد لكنه لم يحدث
د.يحيى الرخاوى: إذا كان الرئيس ده سواء الرئيس فى المدة دى أو أى رئيس فى المدة دى يستطيع أن يستوعب كلمة ثورة أنا ماليش دعوة بمطالب الثورة لأن هو الثورة إبداع جماعى ، الثورة إبداع جماعى الإبداع هو مراحل ، مراحل تفكيك وإعادة تشكيل نحن مازلنا فى أول مرحلة ، مرحلة التفكيك لما تفشل يبقى إبداع مجهض اللى هو شغلنا احنا بقى يبقى جنون ، جنون متفسخ لما نيجى نفك وننجح فى إعادة تشكيل يبقى عملنا ثورة حقيقية جماعى
مفيد فوزى: الثورة فى أى مرحلة دلوقتى حسب مفهومك
د.يحيى الرخاوى: أنا أظن مؤخرا لما امتلأ ميدان التحرير ويتلخلخ شوية ويسمع شوية يبقى فى مرحلة بداية التشكيل
مفيد فوزى: التشكيك
د.يحيى الرخاوى: بداية التشكيل
مفيد فوزى: التشكيل آه
د.يحيى الرخاوى: يعنى بينى وبينك أنا قلت لا تذم ولا تشكر إلا بعد سنة و6 أشهر ففات سنة و6 أشهر قلت لى بقى ليه بدأ تكوين المؤسسات ومؤسسات أرجو أنا شايف فيها ملامح مختلفة عن المؤسسات اللى هى قبل مؤسسات 25 يناير إذن احنا بنعيد التشكيل
مفيد فوزى: الناس اللى بتشتغل فى هذه المؤسسات هل تطلب لها الخبرة يعنى هل أنا ممكن أشوف شاب من الثوار لمجرد إنه من الثوار يبقى مسئول عن مرفق مهم أو وزير مهم
د.يحيى الرخاوى: آه طبعا ممكن
مفيد فوزى: هل وليس لديه الخبرة هل ممكن
د.يحيى الرخاوى: لا الخبرة ممكن يجيبوا خبراء ويتعلم بس يبقى طازج وقادر على التعلم وتصحيح نفسه
مفيد فوزى: آه ده كلام مهم وأحب أسمعه
د.يحيى الرخاوى: يبقى طازج قادر على الاستماع وتصحيح نفسه أولا بأول أخد منه زخم الشباب وآخد منه طهارة الشباب وحماس الشباب وأغذيه بخبرة مستقرة ومثقولة من حواليه
مفيد فوزى: أنت عندما تدخل فى النقاش مع شباب الثوار هل بتقدر توصل إلى قناعات دون جدل عقيم ؟
د.يحيى الرخاوى: أولا أنا مش عايز أقول شباب الثوار
مفيد فوزى: صحح لى من فضلك أقول إيه
د.يحيى الرخاوى: أصل كلمة تصنيف الناس إلى ثوار وفلول عيب قوى ، قوى ، قوى أنا قعدت أدور على نفسى هو أنا ثوار وللا فلول كلام ، تعريف الشباب من هو الشاب اللى سنه 18 سنة و25 الشباب اللى قام ببداية الثورة أنا مش بعاملها على إنها ثورة لحد دلوقتى أنا بقول علينا أن نحمل مسئولية أن تكون ثورة فدولة ، فنهضة ، فحضارة دى بقى شغلتنا كلنا 80 مليون الطفل اللى مولود فما أقدرش أنا أجيب شوية شباب عملوا جميل فى لا حدود له لم أكن أحلم به وأقول إن هم دول الثوار طب وبقية الشعب اللى فرح به ثائر ، اللى دعا له إن ربنا يوفقه ودعا لمصر ثائر اللى غير نوع عمله نتيجة لهذه الحركة ثائر اللى اجتذب السلاح والذهاب إلى ميدان التحرير دون أن يعمل ال3 حاجات دول الفرحة والدعاء والعمل المختلف ما هواش ثائر إن شا الله يروح ميدان التحرير 100 مرة فما أقدرش أقول إن ده ثائر وده ، نيجى للفلول مش كل واحد عمل مع مبارك يبقى فلول يعنى إيه فلول ؟ فلول يعنى بقايا جيش منهزم ما نعرفش مين الجيش ده ، الجيش ده قدر يكمل مصر ويوقفها لمدة 30 سنة مع محاولات فاشلة وناجحة إنما كان فيه نجاح بما يسمى الرأسمالية الوطنية صحيح كانت بتصب فى فئة خاصة لو كانت دية انتبهوا وصبت فى عامة الناس كانت بقت فى مواجهة الرأسمالية العولمية المالية آكلة لحوم البشر اللى هى موجودة فى العالم كله ، العالم كله يا مفيد دلوقتى فى صراع مش بين الشيوعية والرأسمالية لا بين الرأسمالية الوطنية والرأسمالية العولمية فى أمريكا هذا الصراع موجود أوروبا كلها بتتكتل علشان تقفز الرأسمالية الوطنية فى مواجهة عولمة الدولة الواحدة العالمية الواحدة عن طريق البنوك والقروض واللعب فى المال يعنى سورس ومش سورس وحاجات زى كده المفروض إن احنا بكل عيوب مبارك ننتبه إن كان فيه على وشك إن احنا نشارك الرأسمالية الوطنية فى موجهة الرأسمالية العالمية كان ناقصها حاجة واحدة إن ما تبقاش شلة مستحوذة على الرأسمالية الوطنية لو هذه الشلة كانت من الوعى جميعنا أغنية وكل حاجة وحلال عليهم إنها تصب العائد ده فى الناس كنا قلنا خير وبركة إنما بيلموا وياخدوا يلموا وياخدوا بس كانت رأسمالية وطنية ، كانت رأسمالية وطنية حقيقية مع شوية بقى كلام من ده النهاردة لما تيجى أمريكا تفكك مش بس الشرق الأوسط تفكك العالم لحساب الرأسمالية العولمية اللى هى الدولة الواحدة والبنك الواحد والدولار يبقى هو السيد من العملات لحساب شلة لا نعرفها مالهاش وطن الشركات عابرة القارات دى مالهاش وطن لما تيجى تركب هذه المنطقة حسابها واحنا يتهيأ لنا إن ده حسابنا بقت معركة جديدة نقدر نعمل التفكيك اللى هى بسوء نية وناخده لنا ونعيد تشكيل دولتنا وده عندى أمل شديد احنا قلنا بداية تشكيل واحنا بنعمل كده نبقى منتبهين ما نتكلمش عن أى مشكلة فى مصر منفصلة عن العالم العربى عن الشرق الأوسط ، عن أوروبا ، عن سائر العالم ، عن الصين
مفيد فوزى: هسألك هل المصالحة الوطنية فكرة رومانسية خلينى أعرف يعنى كده ببساطة
د.يحيى الرخاوى: أولا كلمة رومانسية أنا مش ضدها خالص بس هى فكرة هقول عليها بشكل بايخ شوية هى توفيقية قد تنقلب إلى تلفيقية
مفيد فوزى: توفيقية قد تنقلب إلى تلفيقية
د.يحيى الرخاوى: توفيقية قد تنقلب إلى تلفيقية
مفيد فوزى: بمعنى
د.يحيى الرخاوى: توفيقة يعنى لازم أتوافق بيسموها التلاؤم أو التكافل أنا عندى حاجة وانت عندك حاجة نكمل بعضنا إنما التلفيق إن أنا أتنازل عن حاجة أصيلة عندى عشان أقدر أتفاهم معاك وانت تتنازل عما يميزك زى ما سيادة الرئيس دلوقتى بيتنازل عما يميزه يا جدع مش كده تمسك بما أنت فيه وتعلم الاختلاف تمسك بالإخوان وتعلم الاختلاف ، تمسك بالحرية والعدالة وتعلم الاختلاف إنما يروح يتنازل عن الحرية والعدالة يتنازل عن تاريخ 80 سنة يتنازل عن معتقل إنه كان معتقل وكافح ويضحى ويقول أنا مع الناس انت مع الناس وانت مع الإخوان بالعكس ده انت كده أقدر أختلف معاك يبقى لك شكل وأنا لى شكل
مفيد فوزى: طيب على بلاطة أعتقد أن الناس ربما يخشون فى المستقبل القريب صور انتقامية من الشرطة ومن القضاء لأنهم كانوا يوما ما الذين حبسوا الإخوان حين كانت محظورة هل هذا يعنى يخاصم الصواب وللا يقترب من الشكوك وللا هو مجرد افتراض
د.يحيى الرخاوى: هو افتراض ظالم وغبى نبتدى بالقضاء القضاء ما حبسش الإخوان القضاء طبق قانون غبى ما يقدرش إلا إنه يطبقه
مفيد فوزى: انت بتتكلم عن القضاء فى الأحكام الماضية
د.يحيى الرخاوى: الأحكام الماضية اللى حبست الإخوان كان بيحبس الإخوان بقانون الطوارئ قانون الطوارئ ده قانون كان بيحبس الإخوان بجرائم محددة بيعملوها ده قانون فلا نستطيع أبدا إن احنا نحط القضاء مع الشرطة بهذه البساطة القضاء له أخطاؤه كما الأطباء لهم أخطاءهم وله درجات التقاضى اللى بتصلح الأخطاء ومازال المؤسسة العظيمة الوعيدة اللى قعدت متماسكة قبل وبعد 25 يناير لأن مبدأ الشرعية لا جريمة ولا عقوبة إلا بنص والنص ده كمكتوب النص ده مكتوب والقاضى بيبقى فى ضائقة نفسية شديدة جدا وهو شايف الحقيقة ومش لاقى نص يدعمها ويضطر يحكم بالنص مش باللى هو شايفه مش ممكن حدود فضيعة وييجى المرحلة الثانية مش عاجبنى أطلع للاستئناف مش عاجبنى أطلع للنقض وبس إنما لا الشارع ولا الميدان ولا الرئيس ولا جنس مخلوق له حق أن يتكلم عن إن الحكم ده غير صحيح تطلع لمرحلة ثانية من القضاء يقول لك إن هو غير صحيح
مفيد فوزى: طب و الأمن
د.يحيى الرخاوى: نيجى الأمن ، الأمن له أخطاؤه واخطاء كانت وصلت لدرجة بشعة يعنى ومع ذلك كان حامى مصر ومازال رجع ثانى كتر ألف خيره يحمى مصر ويتعرض للجروح وتعرض للإهانات فاضل بقى إن يبقى بنى آدمين بيعاملوا بنى آدمين إنما لما كانوا فاهمين إن محدش بيحاسبهم أخطئوا أخطاء جسيمة العملية الانتقامية اللى انت شاورت عليها فى أول السؤال أنا رأيى إنها غير واردة يعنى الشعب المصرى ما هواش شعب منتقم لذلك التعليق على قتلة الثوار مش لما نعرف مين هم قتلة الثوار مين اللى يعرف والثوار مش هيفرحوا قوى لما نقتل اللى قتلهم من غير ما نحاكمه وحتى لو حاكمناه هم هيفرحوا بنهضة مصر
مفيد فوزى: دكتور يحيى الرخاوى المستشارة تهانى الجبالى فى حوار سابق فى حديث المدينة قالت لى أزمة مصر فى فقهاء القانون مختلفون حتى النهاية وبالقانون التعليق
د.يحيى الرخاوى: ده صحيح الست دى من علامات مصر الرائعة أنا بكلمك جد وعى ومسئولية وإبداع على فكرة القانون فيه إبداع فيه اختلاقات رائعة ومازال هذه المؤسسة اللى متماسكة بقول لحضرتك قبل وبعد كما هى عشان كده أنا حزنت حزن شديد خفت على الثورة ، خفت على الثورة مش خفت على القضاء للى ما بياخدوش بالهم من هذا الصرح العظيم ويحافظوا عليه بالعكس ده فيه ناس من المترشحين لما نزلوا التحرير يعنى ناس كويسين جدا يعنى صباحى وأبو الفتوح نزلوا يحتجوا على حكم المحكمة أنا لمتهم لوما شديدا الإيلام وكان نفسى أروح أخنقه ده احنا كنا فرحانين بكم ما تنزلوش عشان ترسوا الشباب على حساب القضاء أبدا شوفوا مسلك يرد على القضاء بالقضاء اللى قالته تهانى الجبالى دى ربنا يبارك فيها وفى أمثالها مهم جدا ، جدا ، جدا
مفيد فوزى: دكتور يحيى أنا بشوفك كمفكر محترم وبيحترم رأيك إيه المحتوى اللى انت بتتصوره يكون وعاءً للتعليم فى الزمن القادم
د.يحيى الرخاوى: يا خبر أبيض انت بتقلبنى كده ما عندناش تعليم ، ما عندناش مدارس أنا بقول لولد عنده 14 سنة والمدرسة يوميا والمذاكرة 4 ساعات واللعب 3 ساعات فى الأسبوع عشان خاطر الكلام ده اضبطى بقى بتقول إيه يا دكتور أقول له المدرسة يوميا يقول لى هو مفيش مدارس طفل عنده 13 سنة 16 سنة أقول له أمال فيه إيه يا ابنى يقول لى فيه مراكز لدرجة إنى كتبت مقالة إنهم يدوا بدل عينى للأهالى قصاد التعليم بدل ما يفتحوا مدارس مفيش غياب ن مفيش مدارس والإعلام قايم لحد النهاردة والثانوية العامة شغالة أهى بموقف شديد الغباء والسلبية لما يكون كل ثروتهم ينشروا لى دموع البنات وأمهاتهم ده جريمة غير أخلاقية مش غير تعليمية
مفيد فوزى: ليه يا دكتور يحيى يمكن ده يغير منهج الصحافة من فضلك تقول لى ليه يعنى أنا شخصيا بشوف الصور فمرة يبص يقول لك إيه امتحان التفاضل والتكامل سعداء والوشوش بتضحك مرة أشوف الأمهات يعنى مرميين فى حضن أمهاتهم فى حالة بكاء هيستيرى
د.يحيى الرخاوى: بقول لحضرتك تجاوزت عن كذا حاجة إن لازم الامتحان يبقى فيه جزء صعب لو ما كانش فيه جزء صعب ما يبقاش امتحان ما يبقاش امتحان خالص لازم يبقى جزء مستحيل ما يبقاش امتحان لازم نجيب صورة واحدة بتعيط هو فيه امتحان مافيهوش واحدة بتعيط أقوم أنقى اللى بتعيط كده وأطلعها ده فيه واحدة كده مرة بسجل معاها فجابت لى واحدة بتشتكى من المراقب عارف بتشتكى منه ليه لإنه بيراقب بتقول لى أصل المراقب بيراقب قوى وزعلانة جدا تقوم المذيعة اللى كانت معايا تعاطفت معاها قلت لها انتى بتعملى إيه تيجى التسجيل عشان المراقب بيراقب بكلمك جد وصل الأمر إن أمهات بتقول يا حرام المراقب بيراقب فالبت بقى لما لقت المراقب بيراقب قامت البت عيطت
مفيد فوزى:حضرتك قلت عبارة مهمة جدا لم تسقط سهوا لما بتقول مفيش امتحان فى الدنيا مافيهوش صعوبة لازم يبقى فيه
د.يحيى الرخاوى: نشن على الصعوبة ونشن على البكاء
مفيد فوزى: اللى ما يطلعش حد
د.يحيى الرخاوى: مفيش حاجة اسمها 90 و 98 مجاميع دايما أقول إن أنا دخلت الطب ب71 % ما كانش عيب إنى أخش ألاقى دى مش عارفها خلاص ما غيرى برضه مش عارفها وينبغى إن القيمة دى توصل للناس بوضوح
مفيد فوزى: لما حضرتك اتخرجت وانت عندك 21 سنة وكنت امتياز فاكر حضرتك اسم الممرضة اللى كانت يعنى بتاخد بالها منك
د.يحيى الرخاوى: آه طبعا بس مش 21 هو 23
مفيد فوزى: الحكيمة
د.يحيى الرخاوى: آه طبعا ست نعيمة
مفيد فوزى: ست نعيمة آه فاكرها
د.يحيى الرخاوى: آه طبعا علمتنى
مفيد فوزى: يعنى يا دكتور يحيى حضرتك بتقول علمتك وهى حكيمة وادتك خبرة بتصور فى اختيار الوزراء فى الفترة القادمة بتشوف إن الوزير هو خبرة وللا يبقى بيتعلم بس هيتعلم فينا
د.يحيى الرخاوى: لا مش هيتعلم فينا الوزير لازم يكون سياسى
مفيد فوزى: سياسى
د.يحيى الرخاوى: لا هو تكنوقراطى ولا متخصص قوى فى الصنف بتاعه ما يكونش أستاذ فى الجامعة كلية الطب يقوم ييجى وزير صحة وزير الصحة زمان قبل 52 كان محامى معاه ليسانس حقوق ليه يدير أمور الصحة دى مش عايزة واحد طبيب
مفيد فوزى: إنما الوزير يبقى
د.يحيى الرخاوى: سياسى ، سياسى يعنى يعى الوعى العام ويخدم جموع الناس