كلام مسئول

6/8/2010
محمد صلاح: يا مساء الخير حبيت بلدى وعشان بلدى أنا عايزك تكبر يا ولدى دى أغنية كان بيغنيها زمان سيد إسماعيل كنا عاوزين الولاد تكبر عشان نشوفهم بيخضروا ويعمروا يبنوا مصانع ويسعدوا أهاليهم اللى هما أحنا يعنى دلوقتى الولاد بيكبروا عشان يروحوا يقعدوا على النت كافيه ولا على قهوة بلدى عينهم على الفيس بوك ياخدوا منه قيم ومعارف وساعات مبادىء ومفيش فلتره كله بيصدق إشاعة ماشى صور ما يضرش أى صحوبية وخلاص مفيش تنقية وسنك وجيلك ومستواك الحاجات دى بالنسبالهم كراكيب كده ملهاش لزمة يعنى كلام فارغ ملوش داعى الولا بيكبروا وهمهم بيزيد كتير من الأهالى يقولك يا ريتهم فضلوا صغيرين الشباب شبابنا يعنى بيعملوا أيه النهاردة ؟ أيه اللى جواهم ؟ أيه اللى جوا دمغاهم ؟ عزيمة وتصميم ولا وقت فضى وتهريج ؟ إذا كان الكبار بيشتكوا من الأحوال والمسئوليات حاجات بقى من اللى أنتم عارفينها الكراكيب الجامدة يعنى يبقى يصح الشباب يتحمل يصمم يعيش ويخطط لأحلامه الكبيرة منقلش بقى هيطير فى السما وبعدين يقعوا على جدور رقبتهم لأ دا لازم الشباب يحلم ويحقق أحلامه حتى لو وقف ضد عيلته وأصحابه الشارع فترة المراهقة والشباب هى فترة الأحلام الوردية حتى لو عايش الشباب دا فى ضنى الحلم لو ماكنش حلم كبير بتبقى الحقيقة فقيرة والنهاية تعيسة لو شوفنا نجومنا ومناراتنا دلوقتى هنلقاهم طلعوا فى ظروف أصعب من اللى أحنا عايشين فيها دلوقتى برغم كده بنقول إن مصر مش هطلع زيهم مش هيتعوضوا طلعوا وسط بلد محتل فقر مضجع كان فيه زمان يا جماعة قبل الثورة قانون لحماية الحفاه اللى بيمشوا حافيين يعنى ما كنش معاهم حق شبشب لكن كان فيه أحلم كبيرة والعزم والتصميم حديد جه وراهم جيل طلع مع الثورة وسط بلد بتحارب وكان وراهم بقى يدخلوا الجيش وميعرفوش هيطلعوا أمتى ؟ إلا بعد الإنتصار وأنتصرنا والشباب على الجبهة فى الداخل كنا شباب فى سن المراهقة 15 ، 16 سنة كنا عايزين نروح نحارب كنا هنا بعيد عن الجبهة فى المقاومة الشعبية وطاقة الحلم كانت مفتوحة اللى عايز يبقى دكتور مهندس ظابط سفير عالم ذرة الشباب دلوقتى يا ترى بيفكر كده ؟ أشك عن الشباب والمراهقة هيكون لينا كلام مسئول
تقرير
جاء منظر الشاب المعلق تحت كوبرى قصر النيل قبل أسابيع منتحرا من أجل الحب مأساويا هو الذى ترك رسالة إلى حبه الأول والأخير طالبا منها أن تذكره بعد وفاته كان الحب فى وقتا من الأوقات طاقة من الأمل والتضحية إيثار للحبيب وإحترام لسمعته وعائلته وكان الإنتحار طريق الهروب للضعفاء تنوعت طموحات الشباب فى العقود الأخيرة كانت الهجرة العادية فى البداية أحد منافذ الطموح ثم غير الشرعية بعد تضييق الخناق ووضع شروط تعجيزية كأحد منافذ الهروب لا أحد حسب الإحصائيات يريد الهجرة بلا عودة لكن 40% من شباب المهاجرين بشكلا شرعى أو غير شرعى يعانون من مشكلة البطالة 90% من الذين ترحلهم السلطات الأجنبية إلى مصر يحاولن مرة ثانية وتصطدم هذه الرغبات بالمسكوت عنه لدى العديد من قطاعات الشباب والمتمثل فى إعلاء القيم المالية والمظهرية وغياب الإجتهاد ومحاولة التعلب على الصعاب كما فعلت الأجيال السابقة هاجرت فى وقتا من الأوقات فى طلب العلم وعادت نجوم فى الأدب الطب الهندسة والإقتصاد ونقلوا خبرات وقدموا معارف .
محمد صلاح: مبقلش أنوا جيلى أحس جيل وشباب اليومين دول وحش وطائش وخلاص بقى نسلت إيدينا من الموضوع عايزين نصارح نفسينا والشباب كمان يصارح نفسه أيه الل ناقصه عشان يحط رجله على التراك ويروح لبعيد ويحقق أحلامه وأحلام أهله اللى عايزين يجيبوا من السما ويديلوا الشباب عنده أزمات نعرفها لكن هو اللى بيختار فترة المارهقة خطيرة لكن ممكن تجاوزها الشباب عايز قدوه ندله عليها بس هو يورينا جمال خطوته نفسيا عنده مشاكل ومش ولا بد نشوف ليه ؟ ونحاول نحلله عقده وكلاكيعه أستاذ الطب النفسى يحيى الرخاوى هيكون لينا معاه كلام مسئول ومن كلام الدكتور يحيى الرخاوى فاقد الشيىء يمكن أن يعطى الكثير والكثير سواء من نفس نوع الشيىء الذى فقده أو بصفة عامه لأن العطاء بصفة عامه ليس مربوطا بما أمتلكه أنا شخصيا الأن فالعطاء آلية مستقلة يمكن أن يتمتع بها أى أنسان كريم عارف قيمة نفسه وطبيعة أنسانيته النجاح ليس مجرد تحقيق الشهرة أو المال أو أى إنجاز كمى مادى وعلينا أن لا نربط نجاح بعض المصريين بالخارج على أنه يعنى فشل المصريين فى الداخل وقال الدكتور يحيى الرخاوى حركة الشباب على الأنترنت وتواصله دون وصاية وإتباعه للغات الخاصة المتحدية كل اللغات يشير بطريق مباشر أو غير مباشر إلى أنهم لم يفقدوا الأمل بعد الشارع العربى مفرغ من المعنى ومن الإنتماء ومن الهدف مؤقتا على الأقل اللهم إلا من إجتهاد أفراد يحاولون هنا وهناك الشباب يعنى الطموح والأمل يعنى الحياة اللى من غير يأس أللى ما يجوزشى مع الحياة الشباب دا برده الكتلة الحرجة اللى فى المجتمع كله اللى تطبب الميزان وتاخدنا وتاخدهم لمستقبل نستحقه عن الشباب والمراهقة هيكون لينا مع الدكتور يحيى الرخاوى كلام مسئول .
محمد صلاح: برحب بالدكتور يحيى الرخاوى أستاذ الطب النفسى منور يا دكتور
د/يحيى الرخاوى: أهلا
محمد صلاح: دكتور يحيى هو دكاترة الطب النفسى اليومين دول يعنى سوقهم رايج ؟ يعنى فيه مشاكل نفسية كتير والناس بتروح ليكم كتير
د/يحيى الرخاوى: لأ هو سوقهم رايج مش علشان المشاكل النفسية كتير
محمد صلاح: آمال علشان أيه ؟
د/يحيى الرخاوى: علشان الناس بيرحولهم من غير سبب يعنى فيه حاجات تستدعى بس أحنا وأنا مسئول برده معاهم روجنا لحاجة أسمها نفسنة المجتمع يعنى أى صعوبة أو فشل ساعات أو أى تقصير نروح مدينله عنوان نفسى حتى السياسة يقولك أيه رأيك فى الموضوع الفلانى ؟ يفتى علطول الفتاوى اللى عمال على بطال وفيه ظاهرة فى المجتمع بقى أسمها إستسهال يعنى بدال ما نقول الأنجليزى صعب يقولك الواد معقد من مدرس الأنجليزى وزى الزفت الثانوية العامة دى فضيحة عالمية أن المسألة بقت قيمة الإستسهال أصبح الذهاب إلى الطبيب النفسى النهاردة نوع من الإستسهال مش كله يعنى إنما الإشعاة بقى إن الشعب المصرى 20% عندهم إكتئاب والكلام ده كلام مش مظبوط
محمد صلاح: حضرتك شايف أنوا فيه ناس بتتصرف غلط فى بعض الأحيان وبالتالى بتعيش حياة غلط وفاكرة نفسها عندها مرض نفسى
د/يحيى الرخاوى: هو الغلط والصح دى قيم معتديش هى حكم مطلق مين اللى هيحكم على الغلط أنوا غلط ؟ أنا بتكلم على صعوبة الحياة على الكدح حتى ربنا بيقول أنك كادحا إلى ربك وأتعب وأعانى من هذا الجهاد العظيم أروح لطبيب نفسى؟ مينفعش الحياة جد ومش جد يعنى غم لأ جد يعنى كدح لما كل حاجة الثانوية العامة الصحف والإعلام عملوا فضايح واللى بيعط بأى حق أنوا يحتجوا على سؤال فى الثانوية العامة ؟ بأى حق يحتج وهو مش فاهم حاجة خالص هو لقى أبنه بيعيط راح معيط ما أبنه خايب يروح لطبيب نفسى ويجيى أيه ؟ للمعارضة والحكومة والقومية كلوا صور واحد بيعيط ويقولك الوزير جبر الخواطر بالجبر علشان الأمتحان جه سهل عمر ما الأمتحان نحكم عليه صعب أو سهل الإمتحان بيحكم عليه بأنوا يقيم أو لا يقيم
محمد صلاح: أه دا فى أوروبا والدول المتقدمة لكن أحنا عندنا
د/يحيى الرخاوى: فيه رشاوى أحنا بنرشى الناس علشان نرضيهم بغض النظر فكرة الإمتحان وموضوعية الإمتحان هذا الإستسهال بيخلى الناس يروحوا لدكتور نفسى من غير داعى ساعات تيجيلى واحده من اللى هما اوولالا
محمد صلاح: أيه أوولالا دى ؟
ديحيى الرخاوى: يعنى أنت مش عارف يا محمد أوو لالا ؟ أوو لالا اللى هما كده يعنى أقولها يا فندم عندك أيه ؟ تقولم مش عارفة مالى ؟
محمد صلاح:بتتكلم جد ؟
د/يحيى الرخاوى: أه والله أقولها حضرتك تستريحى وأما تعرفى مالك تبقى تيجى لغاية فى الأخر قلت فى مرض أسمه مش عارفة مالى
محمد صلاح: دا مرض أنتشر دلوقتى
د/يحيى الرخاوى: أحنا مزودنا والناس مزودنها المرض النفسى موجود ومحترم ومؤلم وجاد هو ليس إستسهال
محمد صلاح: أحنا عندنا خريطة النسب فيه قدأيه كبار ؟ وقد أيه شباب ؟
د/يحيى الرخاوى: لأ أصل دى أسمها أبحاث إنتشارية عبر العالم البحث الإنتشارى عايز حاجة أسمها عينة يعنى 1000 مثلا هل ال1000 ده يمثلوا ال80 مليون ؟ هل خد عينات من محافظات ؟ أنا كنت بعمل بحث عن الأدمان فكنا نروح مثلا بنى سويف نعقد فى الميدان الرئيسى بتاعه وناخد أول رقمين تالت بيت رابع بيت سابع بيت وهكذا ونمشى بدقة شديدة علشان نقول إن هذه العينة تمثل إنتشار المواد المدخرة خد عندك طنطا إنما إن لم تكن العينة ممثلة فجميع الأرقام اللى بتنشر مش عارف 20% مبالغة ضارة
محمد صلاح: طب خلينا نتكلم فى أمور ملهاش نسب هل أنت شايف أنوا الشباب اليومين دول عنده ظروف تستدعى يجيله مشاكل نفسية ؟
د/يحيى الرخاوى: مشاكل نفسية أه إنما أن يذهب لطبيب نفسى يحلها لأ
محمد صلاح: أنت عمال توقف فى سوقك
د/يحيى الرخاوى: وهو كذلك
محمد صلاح: يالله المشاكل نوعيتها أيه ؟
د/يحيى الرخاوى: جميع أنواع المشاكل خصوصا فى مجتمعنا مجتمع بيبعت رسايل مهزوزة اللى بقوله النهاردة بنفيه بكرة وفى حاجة كده أسمها لعبة نعم ولا نعم الظاهرة كده ولكن المسألة مهياش كده هتبص تلاقى كل حاجة أتنفت
محمد صلاح: الكلام ده صعب عليا شوية فسرلى؟ مش فاهم يعنى أيه نوعية المشاكل أللى ممكن تيجى من الرسائل دى ؟
د/يحيى الرخاوى: الرسائل اللى بتصل من مسئولين ومن مدرسين فى المدارس ومن اللى فى الجامعة رسايل مهزوزة مهياش واضحة المعالم هو المفروض متبقاش واضحة المعالم لما تكون فى مجال البحث إنما أنا أجى أقول للولد أبنك أنت حر وأنت شخصيا كأب منتاش حر ومنتش عارف الحرية يعنى أيه ؟ وبتديله مصروفه هو اللى بياخد مصروفه دا يبقى حر ؟ فكلمة أنت حر لازم يبقى لها قيمة أنت حر يعنى قادر على الإختيار قادر على تنفيذ ما أخترت متحمل نتيجة مسئولية اللى أنت أختارته لما أقوله أنت حر معناها أيه ؟ وبعدين لما أجى أقول الأمتحانات تبقى سهلة مين قال الكلام ده ؟ القيمة مهزوزة لما أجى أقول للناس اللى بتعيط دول هما الحكم على مستوى الإمتحان الأهل يا عينى بيصعبوا عليا وكل حاجة إنما هى دى القيمة اللى تتطلع صورة فى الأهرام المحترم جريدة قومية زى للأهالى بالظبط يعنى أتفقت المعارضة والحكومة على رشوة الناس يجيى الشباب يبص يقول هو المفروض أيه ؟ أذاكر ولا مذاكرش ؟ لما تنتشر ظاهرة الغش فى الصعيد ومدارس إعدادى القيمة تبقى أيه ؟ أما تهتز القيمة ونرسل رسالة مزودجة أيوه ولأ أنت حر بالفعل أنت مش حر أنا هسمعلك أهو وهنصتلك بس مردش عليك هى دى الرسائل المهزوزة
محمد صلاح: أساليب التربية أختلفت دلوقتى يا دكتور يحيى عن زمان ظروف المجتمع أثرت إنشغال الأب والأم فى السفر أو فى التواجد؟
د/يحيى الرخاوى: يعنى حضرتك قلت 7 أسئلة نوبة واحدة
محمد صلاح: ما أنا بدى بال7 علطول
د/يحيى الرخاوى: أولا الأساليب أختلفت وهذا ليس عيبا كل جيل غير جيل لما أقول أبويا عاملنى بيه أنا أعامل بيه أبنى غلط فلازم نقبل أنها تختلف أختلفت إلى أحسن أو إلى أوحش أنا رأيى أنوا حصل إهتزاز فى قيمة الأب وبالتالى فى هيبة الأم فى نفوس الأولاد يعنى هقولك على حاجة لما أبن يطلع يلاقى أبوه حرامى حرامى ويعلم علطول طول الوقت حرامى ماشى يا يظبط نفسه يا أما يبقى زى أبوه يا يبقى ضد أبوه ليه ؟ أبوه ليه شكل الحرامى ليه شكل معالم لما يطلع يلاقى أبوه حرامى وعمال ينصحه نصائح دينيه ما بيعملش بيها ومره كده ومره خطيب يوعظ يعنى تبقى أيه القيمة المتماسكة أللى وصلتله حتى لو قيمة سيئة الولد يحسب حساباته يا أما يبقى ليه شكل فلما الأب يبقاله شكل مش هنقول شكل أيه ؟ الأبن يبقى له شكل والبنت تبقى ليها شكل لما أمها تبقى ليها شكل عملية لما الأب يكون مهزوز مهزوز صحيح يعنى مهوش عارف وبعدين أصبح الإعلام ما هو أحنا من ضمن النظام الإنتشار الفظيع الفظيع بيقولوا مش عارف أيه ؟ 250 قناة 300 قناة ببلاش
محمد صلاح: لأ 400
د/يحيى الرخاوى: أه يعنى أزاى تجتمع الأسرة يعنى أنا فاكر مسلسل بابا عبده فاكره ؟ بتاع عبد المنعم مدبولى وصلاح السعدنى ويحيى الفخرانى كنا نقعد نتفرج ونضحك بابا عبده نصبح الصبح نسأل شفت حلقة أمبارح كانت القناة الأولى والقناة التانية بابا عبده فى القناة التانية أحنا أتفرجنا عليها فى رمضان ننصحى نتكلم فيها تعال شوف البيت الواحد النهاردة يتفرج على 5 دقايق من مسلسل أ و7 دقايق من مسلسل ب يعنى الدنيا بتدربج فى مخه الرسايل اللى بتوصل من الإعلام مع وفرة هذه الكمية الهائلة وما بنعلمش أولادنا الإنتقاء لا فى الأنترنت ولا إن هو يواصل التلقى من مصدر واحد علشان يكمل جملة مفيدة وتكون النتيجة أيه ؟ ما يقدرش يكمل جملة مفيدة يعنى الجملة ليها أول وأخر ونقطة مبتدأ وخبر ونقطة هنا الإهتزاز أذى الأولاد جدا
محمد صلاح: كان فيه كلام أنوا عاداتا الأمراض النفسية بتنتشر فى المدن أكتر من الريف دا حاصل دلوقتى ولا الوضع أتغير ؟
د/يحيى الرخاوى: هو سؤال وجيه بينى وبينك لكن علشان أرد عليه نرجع للسؤال الأولانى هل توجد أبحاث وإحصاءات إيجابية يعنى هقولك عل حاجة لطيفة خالص عندى مرضى من كل مصر الحمد الله الدمايطة على شاطرتهم وذكائهم وحرصهم شطار شطار يعنى يجيله منهم كتير الرشايدة على نفس خط العرض ساحلية وجدعان ونفس الحرص ميجيليش منهم حد بيستخسروا يعيوا لأ يعنى أيه ؟ من كتر شاطرتهم مش محتاجين يعيوا يعنى مش مستخسر الفوس يعنى لسه هعيى يعنى وأروح مصر يعنى وأتعالج ما ،ا أزرع زرعة كويسة ولا أتونس بقاريبى يعنى فى خلال 50 سنة شفت كام واحد من رشيد ؟ مثلا والله ما إن أستاذنا الجارم من رشيد الله يرحمه ويحسن إليه وأبنه برده من رشيد إنما دا شيىء عصبى إنما نفسيا والله أنا بحترم الحكاية دى أقول دا بلد متماسك وشاطر وقوى وقادر يعدى مشاكله ودمياط الناحية التانية مش معنى كده إن دمياط ناسها يعنى مهزوزين لأ بس بيجوا وبيتعالجوا وبيخفوا
محمد صلاح: يعنى النظرية مش ثابتة فى الريف والحضر يعنى حضرتك أديت نموزجين جنب بعض رشيد ودمياط
د/يحيى الرخاوى: لأ علشان خط عرض واحد ومدينة ساحلية وكده نيجى بقى للريف والحضر أظن أنا ريفى فلاح فلاح يعنى نوع الأمراض اللى تظهر فى الريف غير نوع الأمراض اللى بتظهر فى الحضر يعنى مثلا الضوضاء فيه أمراض نتيجة للضوضاء هتيجى أزاى فى الريف ؟
محمد صلاح: الضوضاء بتجيب أيه يعنى ؟
د/يحيى الرخاوى: يا خبر أبيض تيجيب قلق وتجيب إكتئاب وتجيب إنعزال وتجيب خوف خد عندك مثلا العلاقة بالطبيعة العلاقة بالطبيعة دا دوا يعنى يقولك فى الفلاحين بتشتغل يقولك من شرقتها لغطستها بيقيس الوقت بشروق الشمس وغروبها من شرقتها لغطستها شوف هنا كام واحد فى القاهرة الشباب وغير الشباب شاف شروق الشمس فى ال10 سنين الأخيرة ؟
محمد صلاح: بيبقوا نايمين الصبح الشباب بيبقوا نايمين
د/يحيى الرخاوى: مع إن دا متعة حقيقية أنك أنت تشوف الشمس وهى بتطلع صباحا تشوفها فين ؟ عمارات وبلاوى وعربيات وزحمة مع إن تقدر لو حبيت تشوفها تشوفها تقدر تخبط مشوار ببلاش لمكان أنت عارفه خالى وعارف إن الشمس بتطلع هنا
محمد صلاح: ممكن يطلع فوق السطوح يشوفها يبص من الشباك
د:يحيى الرخاوى: واللله هتلاقى الأسطح التانية تصدها عنك
محمد صلاح: إنما يا دكتور يعنى فيه ظاهرة موجوده دلوقتى هل عملية الإنتحار هل الشكل أتغير ؟ بغض النظر عن الدراسات والأبحاث ؟ شايف أنوا الإنتحار أتغير فاكر أنت طبعا حادثة كوبرى قصر النيل ليه الإنتحار بقى إستعراضى كده ؟
د:يحيى الرخاوى: كتر خيرك أنك أثرت هذا الموضوع لأن برضوا هقول على نفسى معلش مش هقول على زملائى لما يجيى على واحد طبيب نفسى ألو ألو أيه رأيك فى الشاب اللى أنتحر أمبارح وساب خطيبته
محمد صلاح: ما كل البرامج أشتغلت فى اليوم ده على الموضوع ده
د:يحيى الرخاوى: أرد عليه أزاى ؟ أحترم نفسى أزاى وانا معرفش معرفش ظروفه اللى أنتم بتقولوه دا سمعتوه أحكم عليه أزاى ؟ بقى عند ربنا من مجرد تليفون وهو سمع كمان طريقة غريبة شوية إن هو ربط نفسه بس الشباب ليهم طريقة غريبة فى القراية طرق غريبة فى النت اللغة بتاعة الشباب لغة غريبة علينا وأنا ما برفضهاش اللى بيقول اللغة الشبابية واللغة البيئة أنا لا أرفضها لأن اللغة كائن حى وسيلة التواصل إذا كان الشباب معرفش يتواصل مع الكبار معرفش يتواصل مع المسئولين بيخلق لغة سريعة وبتؤدى الغرض دايما بضرب مثلا وبتكسف لما بكرره
محمد صلاح: لا لا لأ متكسفش هنا خالص
د/يحيى الرخاوى: واحدة تيجى تشتكى بنتى تصور أمبارح وهى بتتكلم صحبتها فى التليفون بتقول ماشى أيه يا حاجة ؟ هى كلمة غلط ماشى ؟ تقولى لأ دى بيئة ستى ماشى دى كلمة عربية جميلة ماشى كلامك لمحمد قنديل مشيناها خطى كتبت علينا يا ستى ماشى أوكيه تقولى لأ أوكيه إنما دى بيئة كل كلمة ما نفهمهاش أديله لما يقولك هات من الأخر يعنى ما تضيعش وقت
محمد صلاح: ولما يقولك نفض يعنى أقلب الموضوع
د/يحيى الرخاوى: أه وكبر دماغك خليك أكبر من هذه المسائل اللى هتشغلك أزاى نرفض كده بالجملة
محمد صلاح: أنت مش مع إن أحنا نرفض ؟
د/يحيى الرخاوى: مش بالجملة
محمد صلاح: مش بالجملة طب خليك معانا يا دكتور ولسه الكلام ما خلصش ما نرفضش بقى ولسه الكلام ما خلصش
فاصل
محمد صلاح: الدكتور يحيى الرخاوى مش ضد نفض والحاجات دى دكتور يحيى معانا مجموعة من الشباب سألناهم على حكاية اللغات اللى بتستخدم يعنى شوية الأنجليزى على العربى ده
د/يحيى الرخاوى: دا وحش
محمد صلاح: ونفض وكبر نفض حلوه ؟
د/يحيى الرخاوى: أه
محمد صلاح: طب نشوف التقرير والشباب بتقول أيه ؟
تقرير
شاب: مش عارف دى حاجة الزمن أخترعها كل جيل وكل زمن بيخترع كلمات ليه يعنى زمان كان فيه كلمات أحنا مكناش نعرفها بس هو كل زمن وكل جيل بيخترع كلمات ما ينفعش يقول كلمات معينة قدام ناس معينة طب ما يخترع كلمات علشان ما يقدرش يقول الكلام ده قدام حد بس عادى هى بدعة وتقليعة الموضوع مش صعب يعنى كله بيعدى
شاب: الناس خدوا على كده فى ناس يعنى بتبقى واخده على الكلام ده وفيه ناس يعنى بيسمعوا الكلام ده وبيكرروه وفيه ناس ما بتعرفش معناه وفيه ناس بتعرف معناه يعنى الحكاية منتشرة بينا
شاب: أهو الحاجة اللى ببسمعوها بيقولوها على حسب البيئة اللى عايشين فيها
شاب: ما هو علشان الزمن اللى أحنا فيه كل حاجة يقولك كبر دماغك ريح دماغك
شاب: يعنى لخص فى الكلام يعنى هو بيلخص فى الكلام يعنى يكبر دماغه يعنى كده يعنى اللى بيسمع بيقول
محمد صلاح: بيلخص فى الكلام يعنى الناس اللى بتهتم باللغة العربية بتضايق من الحكاية دى قوى مش معاهم حق برده ولا أيه ؟
د/يحيى الرخاوى: شوف لما أقولك اللغة كائن حى بيتخلق من حاجة الناس ليؤدى وظيفة التواصل والإنجاز يعنى علشان أنا أوصلك معنى فاللغة بتروح عاملة هذه الوظيفة علشان نقدر نتفاهم ونوفر وقت إن لم تقوم هذه اللغة كاكائن حى بالتجدد عارف اللغة الأنجليزية بتخش فيها كل سنة كام كلمة جديدة ؟ يعنى مئات الكلمات المجمع اللغوى هنا يعنى حضرتك بتقول اللغة العربية نهار ما يدخل كلمة جديدة
محمد صلاح: فاكر السندوتش والحاجات دى شلطر ومشطور وبينهما
د/يحيى الرخاوى: لأ دى إشاعة ما نظلمش المجمع إنما كمية التزمت والرفض أنا أحب اللغة الفصحى تماما ونهار ما أبتديت أكتب شعر باللغة العامية أعتذرت للغة الفصحى وقلتلها وكلام وأنا بكرره حبيبتى حبيبتى اللغة الفصحى راح أقولها أيه ؟ اللى ما عمرها قالت لأ ولا مش قادرة ولا فيها شيىء يتعايب حلوه وغنية وبنت أصول معلش النوبة المرادى سماح أصل المرادى العملية كان كلها حس والحس طلعلى بالعامى بالبلدى الحلو والقلم أستعجل ملحقش يترجم لتفوته أيها همسة أو لمسه أو فتفوتة حس معلش النوبة المرادى سماح وهى لسه حبيبتى حتى لو ضرتها غازية بتدق صاجات
محمد صلاح: يا عينى
د/يحيى الرخاوى: ومع ذلم لما كتبت روياتى مقدرتش أكتبها باللغة العامية أنا مقدرتش حاولت مقدرتش أكتبه باللغة العامية من كتر حبى بالفصحى وبالتالى لما الجماعة بتوع الفصحى يبقوا قلقانين من اللغة الشبابية ما ينفعش لمجرد عدم الألفة يدوروا على ما معنى ظهور هذا اللفظ فى هذا الوقت بين هؤلاء الشباب فى هذا السن ؟ كده يبقى أحترمنا اللغة اللغة بتظهر من خلال إحتياجات لما الشباب يكلموا بعض باللغة دية يبقى معناه إن هما بيأرتصونا أحنا وطبعا بيأرتصونا دى كلمة من كلماتهم
محمد صلاح: ما ترجعنى لموضوع الإنتحار تانى قتلى أنك ما تعرفش ظروف الراجل دا
د/يحيى الرخاوى: قلتلك ما يصحش الطبيب النفسى يفتى والمعلومات ناقصة ما يصحش طبيب نفسى يعمم وأما الإنتحار لأ مصر الحمد الله أقل بلاد العالم إنتحارا النازع الدينى قوى جدا وبعدين نوع العقوبة مثلا فى دينى اللى هو الإسلام اللى هو ضرب نفسه بما معناه بحديدة فهو بالنار يضرب نفسه بالحديدة طب ليه بقى ما دخلش النار وبس ؟لأنوا ربنا سبحانه وتعالى هو اللى منح الحياة وهو اللى ياخدها بيقول للى منتحر أنت منتحرتش بأمارة أنك عمال تنتحر عمال تنتحر ولم تنجح أن تقبض الروح اللى أنا حطتها أنا حطتها أنا أخدها وفيه تعبير جميل جدا عند الناس ولاد بلدنا يقولك ربنا أسترد أمانته إذنا الروح دى أمانة ما يصحش إن أحنا نتعدى عليها فهو يستر أمانته وقتما يشاء
محمد صلاح: هل الشباب مقتنع بالكلام دا ؟ بيسمع الكلام دا ؟ حاصل عندنا فى البلد هنا
د/يحيى الرخاوى: آمال الإنتحار قليل ليه عندنا ؟ فيه ناس يروحوا الناحية التانية يقولك أصل أحنا ميتين هو فيه ميت بيموت نفسه ؟
محمد صلاح: دكتور يحيى فيه دراسة عملتها باحثة فى جامعة عين شمس الدكتورة عبير فريد فى مارس 2008 قالت إن الواقع الدينى عند الشباب مزيف ووعيهم بالوطن مفقود
د/يحيى الرخاوى: الجملة الأولانية جيدة الجملة التانية بلاش نعممها قوى كده مفقود نقول ضعيف نقول مهزوز
محمد صلاح: ليه ؟ فى الحالتين ليه ؟
د/يحيى الرخاوى: نمسك الجملة الأولانية الواقع الدينى مزيف الخطاب الدينة من الجهات الرسمية الحقيقة عمل عمل مش عايز أقول كلام مجعلط قوى يعنى هو عمل فى حسن نية وفيه إلتزام إنما سطحى الدين مغروز فى الخلايا البشرية كل الأديان أما أجى أنا أعامل الأطفال وأعامل الشباب إن أنا أنمى هذه الفطرة الجميلة اللى هى جاهزة للإتصال فى الكون إلى وجه الله لما أبتدى من بدرى خالص بالحلال والحرام والحلال والحرام فقط أما أجى أعود أبنى على الصلاة دا بديله برنامج فى مخه ما شى مع الإيقاع الحيوى بتاع طلوع الشمس وغروب الشمس لما أجى أعوده على أنوا لما ينام بالليل ممكن تنقبض نفسه يعنى لما يصحى يبقى ولد من جديد يعنى الحمد الله الذى أحيانى بعد أن أماتنى دا دين إنما الدين بتاع القهر والتضحية والحلال والحرام طبعا حلال وحرام على عينى وعلى راسى إنما دا يبقى كله الششعور بالذنب الحمد الله الإسلام مفيهوش الإلحاح على الشعور بالذنب ليه ؟ وهو حاططلك الحرام يروح حاططلك رحمة ربنا قد كده
محمد صلاح: يعنى تفوق برده ما تستمرش فى الكدب والسرقة وكذا وكذا وبعد كده تقول يا رب
د/يحيى الرخاوى: ومع ذلك بينى وبينك من يتعلم من أخطائه أفضل ممن يشعر بالذنب وبعدين رحمة ربنا فوق كل شيىء يا سلام يقولك يعنى لو ما خلقتش ناس يخطأوا ويتوبوا ويلجأوا إليا لذهبت بكم وجبت ناس يخطأوا ويتوبوا فأتوب عليهم
محمد صلاح: خلينا فى الجزء التانى من العبارة
د/يحيى الرخاوى:نيجى بقى لإفتقاد الوطن للأسف الشديد دى حقيقة لأن الرسالة أيام الأنجليز أنا عجوز شوية جت هنا القاهرة من بلدنا سنة 45 وشفت العساكر الأنجليز وهما بيدلدلوا رجليهم الحمر من ثكنات قصر النيل أللى هى مطرحها جامعة الدول العربية كنت يعنى ملىء بالغيظ فكان حضور المحتل بيخلى الناس على طول تقول لأ عايزة تخرج ده يبقى فيه وطنى دا مرحلة المرحلة لما جت ثورة 52 وقلنا هيه يا ولاد هيه دا الحكاية يا ولاد هيبقى فيه وطن أبتدى يضمحل الوطن مره بان هو ساح فى أوطان أخرى وهذا ليس عيبا بس بقى كان لازم يبقى فيه معالم لكل وحدة ثما تتكافل مع الوحدة الأخرى ميبقاش يلغى الوطن لحساب وطن أكبر هنا الجزء ما يضعش فى الكل الجزء يصنع وحدة من الكل جت مرحلة تالتة اللى هى تغيير مشاركة الناس فيه قراراتهم هتبص تلاقى الدولة قايمة بالواجب أو مش قايمة بالواجب دا موضوع يحكم فيه يمقاييس أخرى إنما كونى أنا مشاكش مشاركة ليها قيمة
حمد صلاح: أنت قاصدك فترة الستينات بالعربى يعنى
د/يحيى الرخاوى: لأ مش بس الستينات لأ وممتدة لحد دلوقتى المشاركة الموجوده بإجتهاد إن الناس تقول رأيها إنما المشاركة بتاعة 70 و35 و5% و12 % دية تمهيد للمشاركة المشاركة لازم تبقى مشاركة على الحركرك 52 يبقى 48 علشان أنا ياللى خد 52 أبقى مهدد أنى أللى قلى لأ يعمل برنامجه
محمد صلاح: النقطة اللى بتتكلم عليها دى يا دكتور هى اللى خلت الشباب معندهوش أفق للمستقبل ؟ مش عارف هيشتغل أيه بعد كده ؟ ولا هيعمل أيه ؟
د/يحيى الرخاوى: فيه مشاكل زى البطالة يجيله واحد مثلا عنده 26 أتخرجت أمتى ؟ مش عارف من 5 سنين طب من 5 سنين لحد دلوقتى عملت أيه ؟ ولا حاجة يعمل أيه ده من 21 عز الشباب لى 26 ، 27 فيه واد زى العفريت يطلع من حقوق يطلع من تجارة يشتغل مبيض محارة ينزل مش عارف أيه ؟ لأ فيه ولاد زى العفاريت بحترمهم إحترام شديد فيه ولاد مستنين مستنيين صحيح إنتظار قبيح
محمد صلاح: أيه الفرق بقى ؟ يعنى ليه دا بقى كده ودا بقى كده ؟
د/يحيى الرخاوى: بينك وبينك نرجع للى أنت شاورت عليه فى الأسرة أما يكون أب جميل وطيب وعمال يؤدى كل حاجة لأبنه أبنه هيتحرك ليه ويشتغل ؟ ما هو مستمر لما يكون أتخرج وهو مقلوش يا لأبنى يا تروح تشتغل فيه راجل بقى شغال وعلاقته بالحياة عملية وأول ما أبنه يتخرج زى الخواجات يقوله أنت مالكش عندى حاجة ساعتها أقول للأب إذا ما أشتغلشى خرجه يعنى قوله يا بنى أنا بصرف عليك لحد سن 22 لحد ما أتخرجت من الجامعة هصرف عليك تانى ليه ؟ يقولى مش لاقى شغل أقوله لا فيه عيال يقوموا رايحين شرم الشيخ وةيروحوا الغردقة بيلاقى حلول يروح رايح شارى شوية حاجات ويروح بايعها عندى والله شاب قريب كان عنده أظن 27 سنة بديله دوا وبتاع وبقوله الإستشارة بعد أسبوعين قاللى لأ مش هكون موجود فى مصر ليه يا بنى ؟ قاللى هكون فى الصين قلتله بتشتغل عند حد يعنى قاللى لأ بس بروح أستورد شوية حاجات وبعمل شوية عقود وباجى أعملها فى المنصورة ولد لوحده عرف يعنى أيه الصين؟ عرف يعمل أذن تصدير وإستيراد ويعمل سجل مدنى على قده عرف من الصين لبكين للمنصورة
محمد صلاح: مش محتاج بقى واسطة ولا مستنى واسطة
د/يحيى الرخاوى: قعد أتعلم منه يا بنى عملت دا أزاى ؟ وطلعت دا أزاى ؟
محمد صلاح: عايز تروح الصين ولا أيه يا دكتور ؟
د/يحيى الرخاوى: لا دا أنا عايز أتعلم منهم هذا العدد المهول
محمد صلاح: خليك معانا يا دكتور معانا تقرير حوالين نظرة الشباب للوظيفة وللأفق نشوف الشباب بيقول أيه ؟ نشوف ها نشوف الشباب بيقول أيه ؟
تقرير
شاب: أنا نفسى أطلع لاعيب كورة علشان أفرح أهلى بيا يعنى هى الكورة هى اللى فى بلدنا ليها مستقبل حلو غير كده مفيش حاجة ليها مستقبل مفيش حاجة ليها مستقبل غير الكورة حتى لو دخلت كلية أى كلية من كليات القمة مش هتوظف ولا أ حاجة من دى هى الكورة اللى ليها مستقبل بس
شاب: أنا نفسى أطلع ظابط حربية أو ظابط شرطة علشان أساعد فى الجيش حصلت حرب أو حصلت أى حاجة زى كده وبرضه فى الشرطة أقدر أساعد برده أقبض على الناس بتوع المخدرات اللى هما مش كويسين
شاب: أنا لسه ظروفى متلخبطة مش مستقر اغاية دلوقتى يعنى
شاب: أنا نفسى أطلع حلاق ومثلى الأعلى هو خالى
شاب:هو والدى كان شغال مبيض محارة بس قعد أنا دلوقتى بتعلم ومعايا دبلوم صنايع وعايز حاجة يعنى بس مش قادر أحدد أيه الحاجة دى دلوقتى مش عارف هيجى اليوم وأعرف أحدد الحاجة دى
محمد صلاح: أمتى يا عم هتحدد الحاجة دى ؟ يعنى واحد فى مرحلة الشباب ولسه مش عارف والأستاذ الأولانى اللى قال عايز يبقى لاعيب كورة مستقبل حلو يعنى
د/يحيى الرخاوى: طب وأيه المانع ؟ دى صنعة وطبعا حضرتك عارف الأرقام اللى بيسمعوها أرقام مذهلة جدا يعنى أنا ماليش فى الكورة قوى إنما بشوف الأرقام يعنى بصراحة واحد زى ده يقولك عايز أبقى لاعيب كورة يا رب يقدر يبقى لاعيب كورة من أبو مليون يورو والكلام ده دا ياخد كارير أكتر من لما يبقى أستاذ فى الجامعة لا مانع أنوا الأولاد تطمح إنما كم واحد ؟ يعنى مثلا عندنا شباب 30 مليون كم واحد يقدر يكمل لحد ما يوصل ؟ أما يحط هذا الهدف دون سعنى أصل الجماعة بتوع الكورة دول دا بيبتدى من سن 4 ومن سن 8 وأيه تدريب متصل وحواديت ومهارات لما واحد يقول أنا عايز أبقى لاعيب كورة وهو ما بيلعبشش كورة أو بيلعب يعنى كولشن كان يبقى مجرد كلام لأنوا مش عيب الواحد يبقى لاعيب كورة بقت صنعه يعنى مفيش أى مانع يعنى
محمد صلاح: دكتور يحيى كان فيه رواية حصلت هنا وكان الأزهر معترضين عليها الشعر كان طويل شوية البنطاونات اللى هى الجينز كانت ضيقة قوى الجيل اللى موجود دلوقتى جيل الشباب والمراهقين الصغيرين برده عندهم قصة شعر معينة
د/يحيى الرخاوى: فيه قصة شعر أيه دى ظلبطه زيرو والكاسكته دى يا خويا
محمد صلاح: أنتى متابع كل حاجة أهو وف البنطلوات الساقطة أللى هو البنطلون مش طالع كده غى مكانه هو البنطلون معمول علشان يبقى فى مكانه بس هو مش فى مكانه
د/يحيى الرخاوى: والمرقع ما هو فيه بنطلونات يبقى فيها حتة سودا تبقى عايز تقوم تمسحها زى بتاع الميكانيكيه هى تنزل من المصنع حتة سودا وحتة متربة
محمد صلاح: أيه رأيك فى الكلام دا ؟
د/يحيى الرخاوى: أنا رأيى من حقهم أنت عارف لو الواد ده أشتغل يبقى 100% إنما هو ما يلبسليش كده ويمد أيده لأبوه ويشحت
محمد صلاح: بس فيه ناس مقتنعة أنوا الجيل ده بالشكل دا والعيال أللى أنت بتقول عليهم ما يعرفوش يشتغلوا أصلا
د/يحيى الرخاوى: لا والله ما أنت روح يا أخى شرم الشيخ روح روح الغردقة
محمد صلاح: ما بيلبسوش كده بيقعدلوا ساعتين يعمل شعره يا دكتور
د/يحيى الرخاوى: دلوقتى حكاية أنوا يعمل شعره بالشيل وما تشيلش دى
محمد صلاح: لأ جيل
د/يحيى الرخاوى: لأ هما بيقولها شيل لما جم حلقوها بقى بالظلبطة بقت حاجة لطيفة جدا أنا مش فاهمها
محمد صلاح: بس أنت طبيب نفسى يعنى
د/يحيى الرخاوى: أنا بصرحة فى الأول يكنش علامة ذكورة ؟ الست منزلة شعرها وهو ولا حاجة خالص لقيت عيال كده ومش عندهم ذكورة كتيرة مش حمشين يعنى وكده حالق وخلاص قلت يكنش ريح نفسه من عملية أنوا يسرح ويحط شيل وبتاع ؟ طلع مش كده إنما عمالة تنتشر على فكرة مش بس فى الشباب دى أنتشرت أيضا فى أواسط العمر طبعا واحد زى حلاتى مش محتاج يعنى الصلعة قامت بالواجب
محمد صلاح: دكتور يحيى ليه شباب كتير فكر فى الهجرة ؟ الهجرة كانت موجوده زمان بس كانت مقننة وبشكل مضمون شوية أللى عنده عقد بيسافر طبعا السعودية عملت ناس كتير قوى مجتمع الخليج بشكل عام وأتطورت يعنى المجتمع أتطور السفر للخارج كان موجود يعنى بس أيه أللى يدفع بشاب أنوا يركب مركب ويروح يغرق على سواحل أوروبا وعاش هنا يعنى ؟ مع أنوا نفس المبلغ اللى معاه ممكن اللى سافر بيه ممكن يستغله ويعمل بيه مشروع
د/يحيى الرخاوى:أنا هقول لحضرتك على حاجة عايزين نميز بين الهجرة اللى هى متنامية اللى بيسموها زى كرة الثلج أنا كنت فى فرنسا فى سنة من السنين واحد تلميذى يعنى عايش هناك دلوقتى يعنى فراح فى مكان هناك أسمه سوق باريس فبص لقى مصريين كتير قوى سأل بيشتغلوا ويشيلوا ويحطوا وبتاع طلعو من ميت بدر حلاوة فبعت يقولى هى ميت بدر حلاوة دى تطلع أيه ؟ طلعت أنها بلد يروح واحد يروح مسهل للتانى للتالت لحد ما يبقى سوق باريس يبقى أغلبه من ميت بدر حلاوة دى هجرة جميلة وجيدة وبيعملوا مجتمعات صغيرة وبيحافظوا على ولادهم وعلى دينهم فيه الهجرة التانية اللى حضرتك قلت عليها دى الهجرة اليائسة المغامرة بيبقى دافع من هنا يأس ودافع المغامرة واللى يحصل يحصل وبيبقى فيها نوع من الإنتحار يعنى يا صابت يا أتنين عور يالله أهو هايركب إذا مات يبقى أنتحر إذا وصل يمكن يكون يتحرك فى أمل ما عملية الضياع هنا لما يستسلم لها شديدة القبح اليأس شديدة الإيلامفيروح ناطط ينط فى مركب يبيع قراطين يديهم للواد السمسار الله يسامحه بقى يركب مركب لا لها نيلة ولا قطران
محمد صلاح: ما يعمل مشروع بالقرشين
د/يحيى الرخاوى: عمل مشروع فى بلد الإقتصاد بتعاهما مالوش معالم زى الصين والمشاريع الصغيرة ملهاش قوة زى البنوك بتسلف بالعافية مهواش سهل قوى وبعدين أنت عارف الحيتان الكبيرة تاكل الحيتان الصغيرة فيعنى عملية مهياش سهلة هى الصنعة ميكانيكى مبلط قيشانى شوف بقى يقولك يلزق متر القيشانى بكام ؟ نهار ما يتعلمها أنا أظن مش هيحتاج يسافر البنى بياخد كام النهاردة
محمد صلاح: دى عايزه مجال للكلام عن نظام التعليم يا دكتور إن أنت بتعلم ناس وبتخرجها كدولة كحكومة يعنى وتدفعها فى سوق العمل لوظايف مش موجوده أصلا طب كان من الأول أتعلم
د/يحيى الرخاوى: يا ريت يا ريت فيه مشروع عملوه مع ألمانيا للتعليم المهنى شديد الجوده فلازم نحترم ده ونقول اللى عايز صنعة ما يتعلم من الأول أفرض يا أخى أتخم وقعد يحفظ ويسمع ويحفظ ويسمع وطلع لقى الواقع وراح داخل هو بنفسه على الصنعة وبيلقطوا العيال المصريين شباب وكبار بيلقطوا الصنعة يعنى مثلا واحد يجى يسافر العراق دا كان زمان دلوقتى يسافر الخليج أقوله هتروح تشتغل أيه ؟ يقولى طرزان أقوله أزاى طزان ؟ يقولى زى طرزان لما كان بيمسك فى الشجرة ومطرح ما يقعد يشتغل مبيض محارة يمشى نقاش يمشى
محمد صلاح: الناس بتوع الهجرة الغير الشرعية ليه مش طرزانات يعنى ؟
د/يحيى الرخاوى: لأ دول مش طرزانات دا دى مغامرة ويأس طرزان بيروح رايح من غير معالم محددة يعنى متعدد التوجه يعنى الحاجة اللى تلاقيها يروح شابط فيها يعنى يشتغل الأول مناول وبعدين بنى
محمد صلاح: طب خلينا نشوف تقرير عن أراء الناس فى ظاهرة الهجرة والكلام ده أيه رأيك يا دكتور نشوف ؟ نشوف يا دكتور ؟
د/يحيى الرخاوى: على البركة
محمد صلاح: على البركة نشوف التقرير ده
تقرير
شاب: أنا فكرت إن أنا أهاجر بس طبعا لو فكرت أهاجر يبقى لازم يكون شرعى ليه لازم يكون شرعى ؟ أنا هنا فى مصر فيه فرص كتير بس بره أكيد الفرص أحسن المرتبات بتفرق كل حاجة بتفرق بره لكن غير أهانة لنفسك يعنى أنت لو هتتهان وتتبهدل لأ بلدى أولا بيا لو جاتلى فرصة بشكل أحسن وشرعى ماشى لو ما كنش كده يبقى أفضل فى بلدى أحسن
شاب: فكرت بس ما هجرتش ما حصلش نصيب إن أنا أهاجر
شاب: بص حضرتك مش هتلاقى شرعية علشان يا ريت فيه شرعية مفيش شرعية ولا غير شرعية أساسا لو عرفت تهاجر هتاجر بأى طريقة
شاب: لأ مفكرتش أهاجر لأنى بلدى نفيش زيها ويعنى مش هلاقى الناس طيبة القلب اللى فيه هنا ولا هلاقى زى صحابى الناس كويسة لكن بفكر إن مصر تبقى أحسن من الأول
محمد صلاح: الشاب الأخير دا مش عايز يسافر علشا أحنا طيبيين يعنى الشعب المصرى شعب طيب ؟
د/يحيى الرخاوى: كلمة طيب دى ليها معنيين هو شعب طيب وطيبة حقيقية ودافىء ومتسامح إنا ما تصلش إلى درج السذاجة لدرجة إن حد يستعبطوا أدى معنى طيب إنما هو شعب طيب
محمد صلاح: هل حصل عندنا تدنى فى مستوى الأخلاق ؟ حصل عندنا متاجرة بالدين ؟ حصل عندنا إنهيار فى القيم ؟
د/يحيى الرخاوى: هو حصل إختلاف وأغلبوا سلبى إنما فيه سلبى بمعنى سلبى بتكذب بتسرق ما بتوفيش بالوعد إنما الخطورة الحقيقية إن الأخلاق سلبية وتعتبر فضيلة أو ميزة هى دى المشكلة اللى هى الشطارة مثلا الرشوة أنك أنت بتمشى حالك الألعن الغش والغش فى الإمتحانات والغش الجماعى لما يبقى فضيلة المدرس الطيب يغشش اللجنة كلها بقى طيب أعتبروه طيب أهو دا بقى لما تبقى الرزيلة تاخد مشروعية وشيوع وتصفيق هو دا الخطر فدى فى منتهى الخطورة أن نجد قيمة سلبية تصبح فضيلة وموضع تفاخر واحدة جابتلى أبنها عمال يعيط عنده إكتئاب بقى ليه يا حبيبى بتعيط؟ أصل واحد زميلى أبلد منى نجح وأنا سقط ليه ؟ زميلى دا أبن رئيس مجلس المدينة وأنا أبن وكيل مجلس المدينة فهما حابوا رئيس مجلس المدينة نجحوه تقوم أمه تقولوا أيه وهى قاعدة قدامى على المكتب ؟ يا حبيبى والله ما تعيط دا هما وعودنا انوا فى الدور التانى هيغششوه عمال تطبط عليه علشان تعالجه من مش زعلانة إن هو سقط زعلان علشان خاطر أنوا أبوه أقل فى المركز من رئيس مجلس المدينه
محمد صلاح: أه فا فاتتوا فرصة أنوا يغش
د/يحيى الرخاوى: فعماله تقنعوا أنوا إن شاء الله بأذن ال له هيغششوه فى الملحق يعنى ما ينفعش الكلام ده خالص
محمد صلاح: دكتور يحيى يعنى فى وسط الكلام اللى بتتكلم عليه ده مسألة الأنهيار ولو بدرجات يعنى مسألة القيم والأخلاق والمتاجرة بالدين والتحول من السلوك السيىء إلى الفضيلة قد قصر على عمر أو سن المراهقة يعنى ؟ لأن ناس كتير خايفة على أولادها من المرحلة اللى قبل الشباب كده بشوية اللى هو العقل بيتشكل وبيتأثر ونشوف دلوقتى ولاد فى سن المراهقة بيشربوا حشيش أو بيشربوا بانجو أو إنحرافاتهم كبيرة قوى عارف أنت شايف يعنى
د/يحيى الرخاوى: هما مرتبطين فعلا مع بعض إنما يستحسن نتناول كل واحدة على حده نقلة من مرحلة نمو إلى مرحاة نمو أى نقلة نوعية فيها مخاطر الواحد لما يعدى من شط لى شط ممكن يغرق فهى دى المرحلة نقلة من الإعتماد من سمعان كلام إلى أنا مين ؟ أنا فين ؟ وأنا ليا رأيى أنا كبرت أنا بقيت راجل ولا لسه عيل ؟ دى مرحلة المراهقة لازم نحترمها وهى طويلة شوية يعنى من 12 لى 19 لى 20 فلازم نحترمها أثناء هذه النقلة لو لم يجد من يجب أن يسمع ويأذن ويدعم ويحمى يحود يحود على بقى الأدمان الأدمان ظاهرة شديدة البشاعة وفى السن دا بالذات وساعات لما ما يلاقوش حلجة من الحاجات الغالية يدمنوا شيىء يعنى يذيب خلايا المخ مش عايز أقولها أساميها علشان المستمع يعنى فيه أشياء رخيصة شديدة السؤ
محمد صلاح: رجعنا للمراهقة تانى بقى نتكلم فى المراهقة تانى دا ما يحصلش أزاى ؟
د/يحيى الرخاوى: هنرجع نقول الأسرة وحضور الأب الحقيقى والقيم الحقيقية وهيبة الدولة على جميع المستويات وسلاسة وتماسك الرسائل اللى بتوصل من أعلى المستويات لى أقل المستويات تبقى الرسالة ليها معنى ومصداقية مقعدش أوعد وأخلف المعلومات تبقى متماسكة ويمكن أختبارها مش مجرد شعارات وحاجات كده
محمد صلاح: دكتور يحيى ممكن أسألك سؤال تقريبا أنا متوقع إيجابته أنت الفيس بوك وتكنولوجيا الإتصال الحديثة والشات أنت معاها ولا أنت ضدها؟ أكيد أنت معاه مش ؟
د/يحيى الرخاوى: أه ما أنت قلت متوقع يعنى بس لما يجيلى واحد بنته عندها 14 سنة وبيقولى مش عارف أيه وبتتأخر بالليل وبتاع وجاى من بلد من الصعيد أو فى وجه بحرى فى بلد نائية أول سؤال بسأله غير أنها فى سنة أيه ؟ معاها موبايل ؟ يقولى أه أديتهولها ليه ؟ يقولى بطمن عليها طب ما أحنا طول عمرنا أهلنا بتطمن علينا من غير موبايل هى البنت تروح ماسكة الموبايل من هنا سن 13 وهات يا لعب فيه وموبايل بقى الإتصالات والأماكن حاجة فظيعة جدا إذنا هذا اللى حضرتك قلته له وعليه إنما فى محصلته أنا معاه المحصلة كلها الشباب النهاردة بيتصل ببعضه الناس بتتصل ببعضها رغم أنف الإعلام المركزى
محمد صلاح: فى كلام كتير دايما نحذر الشباب فى خطر وفترة الشباب وفترة المراهقة واللى حاصل فى البلد والظروف والجيل اللى جاى بقى الله أعلم هيكون عامل أزاى ؟
د/يحيى الرخاوى: دى حقائق لابد مش ننحنى لها نحترمها لننتقى منها الجيد عارف أحنا نعلم أولادنا مش أزاى يخشوا النت ؟ أزاى ينتقوا النت ؟ ونعلم أولادنا مش أزاى يشوفوا الدش ؟ لأ أزاى من ال400 محطة دول يعرف أزاى المحطة الفلانية؟
محمد صلاح: أنت مش قلقان على الشباب فى مصر يعنى ؟
د/يحيى الرخاوى: لا فى مصر ولا فى غير مصر هو الشباب شباب والسلطات يوش وما بوشى الشركات العملاقة وشركات الدوا وشركات السياحة بتهدد البشرية كلها وأملنا فى الشباب أنوا ينتبه من خلال هذا التواصل اللى هو فيه وعليه علشان يرد على الناس دول ويوقفهم عند حقهم
محمد صلاح: أملنا فى الشباب والبركة فى الشباب زى ما قال أستاذ الطب النفسى دكتور يحيى الرخاوى كلامه معانا النهاردة كان كلام جميل كلام معقول أكيد كان كلام مسئول خلص الكلام سلام نلتقى فى الحلقة المقبلة .