اتجاهات

مسعد أبو ليلة : أعزائى المشاهدين مساء الخير وأهلا بكم فى حلقة جديدة من اتجاهات ، معًا من أجل مصر وفى حب مصر دائما كلنا بنردد اللى بيشرب من مياة النيل لابد يرجع له مرة ثانية إذا كانت العبارة دى بتتردد فى أوساط السائحين و الزائرين الأجانب لمصر فما بالك بأبنائها اللى نشئوا على ترابها واتربوا فى أحضانها وبعدين بعدوا عنها لأى سبب من الأسباب عشان نعبر عن الحالة دى مش هنلاقى أفضل من اللى قاله البابا شنودة " مصر وطن يعيش فينا وليس وطن نعيش فيه " أبناء مصر فى الخارج منتشرين فى كافة أنحاء الدنيا بيشتغلوا فى كل التخصصات وفى أعظم الأعمال العلمية والفنية والاقتصادية نذكر منهم على سبيل المثال الدكتور أحمد زويل عالم نوبل الشهير ، الدكتور مجدى يعقوب أفضل جراح قلب فى العالم ، وغيرهم من النماذج المشرفة واللى بتمثل كافة طوائف الشعب المصرى ومنهم برضه اللى معروفين إعلاميا بأقباط المهجر والإسم ده اللى أصبح بيطلق على مجموعات الناشطين والمسيحيين المصريين فى الخارج واللى جاء عدد منهم مؤخرا فى زيارة لمصر للتعرف على أحوال الوطن بعد ثورة 25 يناير جاؤوا فى الحقيقة ومعاهم قلق من نوع خاص قلق كانوا عايشين به قبل الثورة وزاد بعد الأحداث دى شئ طبيعى إن احنا نقلق كلنا على بلدنا خصوصا إن الخطر اللى بتتعرض له المرة دى جاء من الداخل من الطبيعى برضه إن احنا نقف كلنا كمصريين فى الداخل وفى الخارج إيد واحدة فى مواجهة هذا الخطر مصر دلوقتى فى حاجة لوحدتنا مصر دلوقتى بتنادينا فهل نلبى النداء ؟ هنجاوب على السؤال ده مع بعض ومع مجموعة من أقباط مصر فى المهجر بعد ما نشوف التقرير مع بعض .
فاصل تقريرى
المذيعة : ستبقى مصر وطنا لكل أبنائها دون تفرقة حقيقة خرج من أجل التأكيد عليها عشرات الآلاف من المصريين إلى ميدان التحرير فى جمعة الوحدة الوطنية مؤكدين على أهمية الحفاظ على نسيج الأمة الواحدة بمسلميه وأقباطه ونبذ محاولات الفتنة الطائفية ومحاربة من يقف وراءها وكذلك من يسعى لإجهاض ثورة ال25 من يناير مرددين " مسلم .. مسيحى إيد واحدة " وبصوت العقل والحكمة دعا قداسة البابا شنودة الثالث بابا الإسكندرية وبطريرك الكرازة المرقسية المسيحيين المعتصمين أمام مبنى اتحاد الإذاعة والتليفزيون إلى فض اعتصامهم فورا وفى بيان للتليفزيون ألقاه نيابة عنه الأنبا يوآن سكرتير البابا قال قداسته إن ما يحدث لا يرضى أحدا وإن صبر الحكام قد نفد ولأن مصر وطن لكل المصريين التقى اللواء أركان حرب إسماعيل عتمان مدير إدارة الشئون المعنوية واللواء أركان حرب محمود حجازى رئيس هيئة التنظيم والإدارة وفدا من رجال الدين المسيحى وأقباط المهجر تناول اللقاء الأحداث التى تشهدها مصر والمخططات التى تتعرض لها مصر أحداث امبابة وكيفية كشف فتيل الفتن وسبل تعزيز روح التواصل بين أبناء المجتمع كما جاء الرد سريعا وقاطعا من حكومة كل المصريين حيث اتفق الدكتور عصام شرف رئيس مجلس الوزراء على تشكيل لجنة العدالة الوطنية بمجلس الوزراء وذلك لصد محاولات الفتن الطائفية وتأكيد هذه اللجنة بإعداد مشروع قانون يجرم كل أنواع التمييز بين كل المواطنين المصريين عملا بنصوص المواد الواردة فى الدستور وذلك لضمان حقوق وحريات المواطنين
مسعد أبو ليلة : أعزائى المشاهدين نرحب بضيوفنا فى هذا اللقاء بداية المهندس كاميل عزيز رئيس التجمع القبطى الأمريكى أهلا بحضرتك ، معانا أيضا الأستاذ هانى عزيز أمين عام جمعية محبى مصر أهلا أستاذ هانى ، أيضا معنا الأستاذ بطرس حكيم رئيس الهيئة القبطية النمساوية أهلا بك يا دكتور ، الحقيقة احنا قدمنا فى المقدمة اسم أقباط المهجر عايز بداية إيه رأيكم فى الإسم ده ؟ أستاذ كميل إيه رأيك ؟
م . كميل عزيز : التسمية أوليهم لازم نعرف مين هم المصريين المسيحيين اللى برة مصر وده متهيأ لى من الحاجات المجهولة فى مصر والنظام القديم كان ما بيحبش بيين أى حاجة فيها مجموعة المسيحيين اللى راحوا مصر ابتدوا يروحوا فى الستينات ولما رحنا احنا فى الستينات دخلنا الكنائس الأمريكية وبعدين بعد ما دخلناها اكتشفنا إنها كنائس مش مصرية ما فيهاش الثقافة المصرية فقلنا لا احنا مش هنقدر نقعد .
مسعد أبو ليلة : الكنائس تختلف
م . كميل عزيز : الكنائس فى الدين كلها واحدة بس الكنائس فيها ثقافة
مسعد أبو ليلة : الروح والثقافة
م . كميل عزيز : الروح والثقافة وفيها كمان جزء اجتماعى فاحنا قلنا لا احنا لازم نكون الكنيسة المصرية فى الخارج البابا شنودة طبعا عمل مناهضة جامدة جدا فى بداية تكوين الكنائس والكنيسة القبطية فى العالم كله جزء من مصر يعنى لازم نعرف إن دلوقتى أى بلد فى العالم وبتفتح دليل التليفون تلاقى الكنيسة القبطية تروح فيها بتبقى فى مصر ما بتكونش فى أمريكا فكان فيه غزو للثقافة المصرية فى الخارج .
مسعد أبو ليلة : أستاذ هانى كنت أقصد بهذا السؤال يعنى بعد هذه اللمحة التاريخية وهذه اللمحة الثقافية بالنسبة للكنيسة المصرية والكنيسة الغربية التسمية يعنى أقباط المهجر بنأتى بعد أحداث ثورة 25 يناير أليس من الأبدى إن احنا نقول بقى المصريون فى الخارج وخلاص ؟ وللا نقول بقى مصريون المهجر ؟ وللا مهندس كميل لما آجى لكم برة وآجى أقول لك أقعد معاكم تقول لا ؟
م . كميل عزيز : لا احنا الهيئة بتاعتنا اسمها التجمع القبطى الأمريكى احنا عايزين نغيره نعمله التجمع المصرى – الأمريكى بعد الثورة .
مسعد أبو ليلة : ده صحيح أستاذ هانى .
أ . هانى عزيز : أنا ضد كلمة أقباط المهجر من زمان ولى كتابات كثيرة ومؤتمرات كثيرة فى الداخل أو فى الخارج إن أنا معنى بهذا الملف من سنة 2000 مفيش حاجة اسمها أقباط المهجر المصريين فى الخارج واحنا عندنا اتحاد المصريين فى الخارج كنت بشرف إن أنا كنت الأمين العام له بالتعيين سنة 2000 يعنى لى باع كبير قوى فى موضوع المصريين فى الخارج ، المصريين فى الخارج شرفاء جدا والمسيحيين المصريين فى الخارج شرفاء جدا وطنيين جدا بيحبوا مصر جدا إنما فى أوقات كثيرة كانوا بيتهموا فى الإعلام إنهم خونة لما يطلع حد يتكلم فى الإعلام فى فترة من الفترات كان الأخ مايكل منير اتهمهم بالعمالة والخيانة مش عايز بقى أقول ...
مسعد أبو ليلة : هنيجى لبعض السلبيات هنجيى لها فى حديثنا
أ . هانى عزيز : احنا عايزين نطوى صفحة ما قبل 25 ونبدأ بداية فى كل شئ فى ثقافتنا وحياتنا إن المصريين جميعا سواء كان فى الداخل أو فى الخارج هم أمامهم هدف واحد معندهمش خيار ثانى أدام هدف واحد وخيار واحد هو مصر اللى ارتبينا فيها واتعلمنا فيها واللى خرج برة هو أحسن سفير لمصر برة ده هم فى وقت من الأوقات أنا قلت يا نلحقهم يا ما نلحقهمش الكلام ده مسجل فى مدارك كثيرة لازم نلحقهم الآن .
مسعد أبو ليلة : طب أستاذ هانى نستأذن فى معاودة الحديث ومع ضيوفنا الأعزاء بعد الاستماع إلى آذان العشاء الذى حان موعده الآن
فاصل
آذان العشاء
مسعد أبو ليلة : بالتأكيد كلنا سمعنا صوت الآذان بتعانق مع صوت أجراس الكنائس هذا الصوت حضرناه فى هذا اللقاء اللى بيجمعنا مع المهندس كميل العزيز رئيس هيئة التجمع القبطى ، وأيضا الأستاذ هانى عزيز رئيس جمعية محبى مصر ، أستاذ بطرس حكيم رئيس الهيئة القبطية النمساوية ، السؤال لك يا أستاذ بطرس وأنت جزء من قلب مصر الثورة كيف نظر المسيحيون فى الخارج أو المصريين عموما فى الخارج فى أحداث الثورة وأيضا الأجانب فى الخارج على أحداث الثورة وصورة مصر والمستقبل القريب فى مصر ؟
أ . بطرس حكيم : الحقيقة الثورة دى كانت حلم يعنى حلم العمر زى ما بيقولوا يعنى كان كل أحلامنا وأمالنا إن مصر تنهض وترتفع وتكون على قائمة الدول الحرة والجميلة على مستوى العالم وده حلم الثورة اللى بيحدث الآن ودى نظرة العالم كله للأقباط يعنى أنا واحد كنت متابع بشغف أنا كنت عايش على إنى فى ميدان التحرير يعنى كل لحظة فى ميدان التحرير الجميل فى الموضوع إن أنا سعيد إن تخوفات الناس بدأ يحدث أن تتجه اتجاه لا يسعد الكثيرين سمعت من الأوروبيين نفسهم إنهم بيقولوا إن عجلة الزمن لا تعود إلى الوراء لن يقبل الشعب أن يكون الوضع كما كان أو أسوأ مما كان هذا يطمئن إن مصر هتكون فى حالة
مسعد أبو ليلة : أحسن تعليق سمعته من أجنبى هناك ؟ تعقيبا على أحداث الثورة .
أ . بطرس حكيم : هى فعلا كانت الجزئية دى إن استحالة الثورة ينتج عنها شئ يكون أسوأ مما كان دى كانت سعادتى لأننا كنا جميعا قلقين على مصر ومتفائلين آه بس بحذر وخايفين عليها .
مسعد أبو ليلة : مهندس كميل اتصل بحضرتك مجموعة من أقباط المهجر قبل المجلس الأعلى للقوات المسلحة ماذا دار فى هذا اللقاء ؟ أبرز ما دار
م . كميل عزيز : أنا ما كنتش موجود فى الاجتماع الأخ هانى بس أنا قابلت ال...
أ . هانى عزيز : بس أنا دعيت حضرتك .
م . كميل عزيز : قابلت اثنين من المجلس وعندى ميعاد معاهم بكرة ثانى قالوا لى احنا عاوزين نقعد نتكلم كثير فالمقابلة بتاعتى كانت قصيرة وما كانش فيها متهيأ لى بتوع النمسا وأوربا قعدوا معاهم
أ . هانى عزيز : هم كانوا لقاءين بدأ الأولانى لما بدأت كل الناس تسمع المؤسسة العسكرية هم فاهمين إن المؤسسة العسكرية بابها مقفول فأنا قلت للأستاذ مدحت وباقى الزملاء قلت لهم مين قال هذا الكلام المؤسسة العسكرية بابها مفتوح للجميع فطلبت من سيادة الفريق رئيس الأركان تحديد موعد واختيار أحد أعضاء المجلس فذهبنا إلى المجلس بحضور سيادة اللواء محمود حجازى رئيس هيئة التنظيم والإدارة وعضو المجلس الأعلى وفى اليوم الأول برضه كان موجود مع سيادة اللواء إسماعيل عتمان المعروف للجميع المجلس الأعلى فى منتهى الشفافية والمصداقية والصراحة فوق الخيال وطلب منى لا انت هتقاطعنى كتير انت عمال تبص لى وهتقاطعنى أكمل الجملة
مسعد أبو ليلة : ده له صلة بما صرحت به يا أستاذ هانى
أ . هانى عزيز : طب اتفضل
مسعد أبو ليلة : ما صرح به الأستاذ هانى قال إن المجلس الأعلى أثبت عكس توقعاتهم أو شكواهم تجاه الدولة فسر لى
أ . هانى عزيز : أنا ما كملتش الجملة الحوار بالطريقة دى أنا ما أقدرش
مسعد أبو ليلة : طب اتفضل .
أ . بطرس حكيم : وأنا بعتذر .
أ . هانى عزيز : فيه متلقى الآن بيسمعنا .
مسعد أبو ليلة : اتفضل يا أستاذ هانى .
أ . هانى عزيز : لا مش هكمل اتفضل .
أ . بطرس حكيم : احنا نقلنا للمجلس ا لرئاسى إن مصر بتتجه نحو الدولة الدينية لإن كما قيل يعنى ما هو أسوأ من الدولة العسرية أن يكون حكم دينى واحنا نقلنا لهم دى مخاوفنا بصراحة وهم فعلا كان وجودنا معاهم مع الأستاذ هانى عزيز أسعدنا جدا يعنى لإن هم طمنونا واحنا بنثق فيهم وبنثق فى الجيش طبعا واحنا فعلا كلنا متفائلين وسعداء باللقاء ده لإنه فعلا اطمأنينا للوضع لكن تفاؤل حذر لإن مخاوفنا إن الجيش يساعد على وجود دولة ديني كان لها مؤشرات منها الأحكام اللى ما كانتش موجودة فى قرية صول أو اللى قطع ودن القبطى إلخ إلخ يعنى فدى كانت من ضمن المخاوف يعنى الشعب كله بيطالب بدستور جديد تنهض بمصر مرة واحدة لقينا النتيجة تعديلات دستورية برضه التعديلات الدستورية دولة قائمين عليها تفصيلات مش عايز أتطرق إليها .
مسعد أبو ليلة : لا حسمت باستفتاء شعبى يعنى
أ . بطرس حكيم : أنا برضه ياريت حضرتك تحط لى الخطوط العريضة هقدر أمشى عليها الخطوط العريضة مريحة لجموع الشعب يعنى برضه قالوا التعديلات الدستورية هيبقى عليها حوار مجتمعى والحوار المجتمعى بمعنى إن احنا كلنا هنتناقش فى التعديلات ويبقى فيه تعديلات تطرح للاستفتاء وده ما حصلش حصل إن التعديلات الدستورية الموجودة إن احنا عملنا عليها الاستفتاء
مسعد أبو ليلة : ما هو ده قائم بنسبة لتغيير الدستور
أ . بطرس حكيم : فهى دى كانت كل مخاوفنا بالنسبة للاتجاه الدينى كانت نقلناها كلها للمجلس الرئاسى أو المجلس العسكرى وهم فعلا طمئنونا وقالوا إن مصر لايمكن تكون دولة دينية يعنى .
مسعد أبو ليلة : أستاذ هانى اتفضل.
أ . هانى عزيز : معذرة للى حصل أنا كنت عاوز أقول أهم ما فى الحادث إن أتى أبونا ميتياس نصر اللى موجود دائما فى ماسبيرو وتحت ماسبيرو أتى إلى المجلس العسكرى لما طلبوا منى أصدقائى مدحت قلادة والأستاذ بطرس والأستاذ عوض قالوا لى هو ممكن أبونا كيتاس يحضر معانا هذا اللقاء فقلت لهم طبعا المجلس العسكرى ما بيفرقش بين أحد وأحد أنا قلت للأستاذ مدحت قلادة أنا متأكد من غير ما أستأذن وأقول إن بابه مفتوح فأتى البابا ميتياس نصر المجلس العسكرى
مسعد أبو ليلة : إيه كان سبب تخوفهم أو قلقهم يا أستاذ بطرس ؟
أ . بطرس حكيم : هم كانوا متخوفين من اعتقاد طوال 30 سنة النهاردة مش هتيجى بعد يوم 25 يناير تنسى 30 سنة بسرعة مستحيل يعنى إنما هم خرجوا من هذا المكان كلهم ثقة ورجع أبونا ميتياس نصر إلى المنصة أمام ماسبيرو وقال فيه مصداقية للحوار مع المجلس العسكرى وانفض جزء من الطريق اتفتح بناءً على هذا اللقاء وحضرتك طبعا بتيجى كل يوم التليفزيون كان يومها اتفتح الطريق ، المجلس العسكرى لما بيقعد مع حد بيقوله النهاردة كل الناس بتقول المجلس العسكرى قبطى ويعنى ما عملش حاجة فى قنا وما عملش حاجة فى أطفيح جابوا الشيخ حسان وقعدوا ودفع به لما بدؤوا يسمعوا الكلام دوة وبيسمعوا وجهة نظر الجيش إيه وبيجتمعوا وبيطلعوا مجتمعين بينقل هذا الاجتماع والإحساس بالمصداقية من الجيش للناس ما حدث فى اللقاء الأولانى إن ما ينفعش إن يحضر جزء من أقباط المهجر مسيحيين المهجر وكان الأخ كميل موجود فى مصر وحددنا ميعاد وذهب وحضرتك قعدت ساعة كاملة مع المجلس هم حسوا إن الراجل ده عنده الكثير والكثير فطلبوا الميعاد اللى بعده عدد كبير قوى يذهب وحتى دخلوا فى وجود الأستاذ كميل فقالوا له لازم نقعد مع حضرتك مرة أخرى نسمع بره بيتقال إيه وجوة بيتقال إيه يعنى المؤسسة جادة فى علاج مشاكل الأقباط سواء فى الداخل أو فى الخارج .
مسعد أبو ليلة : إذن سؤالى للمهندس كميل انتوا بعض الزملاء الذين حملوا الاجتماع الذى لم يشأ إن انت تحضره انطباعك بعد ما نقلوا لك هذا الانطباع ؟ أو نتائج هذا الاجتماع ؟
أ . كميل عزيز : أنا اتكلمت مع بعض أعضاء المجلس على طبعا احنا عملنا ثورة بهرت العالم كله الثورة المصرية وأنا عارضت تخوفى الشديد إن فيه قوى بتحاول تحطم الثورة بتاعتنا فى مجالات كثيرة المجال طبعا الفتنة الطائفية حاجة وثانى حاجة المجال بتاع كامب ديفيد الموضوع بتاع فلسطين و فيه قوى بتحاول توصل اتجاه عايز يخلى مصر ترجع من كامب ديفيد وثالث حاجة القوة الثالثة اللى بتوقف الاقتصاد فى مصر وبتحاول تخلى مصر بعد 3 ، 4 أشهر اقتصاديا تنهار وتظلم الثورة ما نفعتش كانت غلطة إن الثورة اتعملت فده كان الاتجاه اللى اتكلمت فيه واتكلمنا فى الاتجاهات الاقتصادية وبعدين اتكلمنا فى الاتجاهات الطائفية وبعدين ما اتكلمناش كثير فى قضايا الأقباط بس أنا قلت لهم إن الشعب القبطى فى مصر خايف إن الأحداث دى تتكرر أهم نقطة إن مفيش خطوات اتخذت لحد دلوقتى إن عبير وللا اسمها إيه ما تتكررش الأسبوع اللى جاى فأهم حاجة الناس هنا عايزين يعرفوا إن عبير ما تتكررش ثانى لأن تكرار عبير فى مصر هيحطم الدولة واحنا شفنا إيه اللى حصل فى العراق اللى حصل إيه فى لبنان ولازم ندخل من الأساسيات بتاعت التفكير المتطرف ده يمكن يعنى ...
مسعد أبو ليلة : أستاذ بطرس هاخد من كلام المهندس كميل ذكر نموذج عبير يعنى أحداث وصفت من الجميع بأنها تافهة وتسبب فتنة يعنى هل نستمر فى هذا وكيف نقف أمامه ما خطورة استمرار هذا الوضع ؟
أ . بطرس حكيم : حاليا إن الثورة بتاعت الشعب دى كلنا متخوفين إن ينهبها التعبير ما أعرفش دقيق وللا لا المتأسلمين وهم يريدون أن نعود إلى الخلف وإلى الوراء والمشكلة إن احنا بننساق وراءها كعميان فنضل الطريق يعنى الناس دى لابد أن يكون فيه صحوة فكرية يبقى لهم عقاب رادع يعنى أى إنسان يتعدى على إنسان هو بيعتدى دلوقتى على قلب مصر لما تكون الاعتداءات من هذا القبيل تبقى اعتداءات على قلب مصر فأعتقد إن لا يسمح له وإن بدأ يعاقب وعقاب رادع وشديد لكن لحد دلوقتى مفيش أى عقوبات رادعة لكل الذين قاموا باعتداءات شديدة ومريعة لحد دلوقتى مفيش عقاب .
مسعد أبو ليلة : لكن يا أستاذ هانى المجلس الأعلى للقوات المسلحة فى بيانه الأخير حذر الفئات اللى هى العابثة بمقدرات الوطن وحذر من نفاد الصبر .
أ . بطرس حكيم : ده بيان وزع على كل الحاضرين .
أ . هانى عزيز : لما حضر أبونا ميتياس وقال أسماء الأولاد اللى هم محتجزين وكانوا 18 واحد فى أحداث ماسبيرو أظن 9 أو حاجة ودول عددهم 18 ففهموا إن الإجمالى 147 واتحاكموا وخدوا محاكمات عسكرية 18 مسيحى ضمن 147 مصرى فأبونا ميتياس قال ما أعرفش بس احنا عاوزين الكل يطلع يعنى احنا ولادنا يطلعوا آه وكل المصريين طالما فيه عدالة قلب المشير الحنين ما صدقش على الأحكام فصدر البيان 50 بيقول إيه بيقول إعادة إجراءات واللى يثبت أنا بقول يعنى المفهوم بتاعه اللى يثبت إن هو مش مدان يخلى سبيله فورًا يعنى ده باختصار البيان يعنى إذن المؤسسة العسكرية لما بتوصل لها الحقائق صح بتوصل لها المعلومات صح بتوصل لها إن فيه أهالى الأولاد دول يا عينى ...
مسعد أبو ليلة : لهم مطالب بتستمع إليها .
أ . هانى عزيز : لهم مطالب بتستمع إليها فأنا فعلا بقول من هذا المكان ومن خلال تليفزيوننا التليفزيون المصرى إن فى القريب العاجل هيخرج بعض اللى هم هيعاد التحقيق معاهم وتثبت عدم ...
مسعد أبو ليلة : أستاذ هانى الخطوات اللى هى برضه متلاحقة لاحتواء هذا الموقف ومحاولة التصدى لمثل هذه الأمور التى حدثت من اعتداءات أمام ماسبيرو وما حدث فى امبابة يعنى وغيرها .
أ . هانى عزيز : اللى حصل إن امبارح بعد لقاء الأخ كميل كان دعى كل من هو مهتم بالشأن القبطى المسيحى احنا كلنا أقباط طبعا الشأن المسيحى القبطى كل من هو مهتم الحقوقيين اللى بيطلعوا فى الإعلام واللى بيقفوا تحت على المنصة وكل من هم مهتمين بالشأن ده منذ 30 عامًا أتوا إلى المجلس العسكرى وكل واحد اتكلم احنا قعدنا قرابة 6 ساعات متخيل إن تقعد مع اثنين من أعضاء المجلس العسكرى 6 ساعات وهم صدرهم رحب جدا وبيسمعوا والقاعدة الأولانية كانت كام ساعة ؟
أ . بطرس حكيم : 4 ساعات تقريبا
أ . هانى عزيز : 4 ساعات يعنى بيسمعوا كل ما يخطر على بالك فعلا احنا وصلنا ل20 توصية بتدرس وأعتقد إنها موجودة الآن على فاكس البرنامج مع الزميل فى الكونترول يا ريت ...
مسعد أبو ليلة : 20 توصية
أ . هانى عزيز : توصيات كلها مهمة كل اللى بينادوا به المسيحيين منذ 30 عامًا اتفتح إمبارح بالكامل ما كانش فيه حد بيحجر على حد ويقول له إيه يعنى عمر ما دول كانوا يتفقوا مع بعض أبدا وكان يعد مكان أكبر العدد زاد منهم مستشارين جالسين يعنى رؤساء محاكم جالسة حقوقيون عندهم منظمات نشطة فى الداخل وفى الخارج محاميين مهتمين بقضايا المسيحيين أقباط مصر يعنى إذن باب الحل أصبح مفتوح نستغله صح أنا بطلب من الكل إننا ندى فرصة للمجلس العسكرى بدليل إن بعد البيان 50 الأنبا ميتياس قعد مع المجلس فياخد وقته لإن فيه حاجات قوانين وفيه حاجات لها إعداد وهم طلبوا إن احنا نعمل لجنة مصغرة نكتب هذا الكلام فيه ونعرضه عليهم
مسعد أبو ليلة : بعد ما أستاذ هانى بياخد سلسلة الإيجابيات اللى حصلت والتحالف اللى حدث مثلا فى كنيسة صول بعد أطفيح وإعادة بناء أطفيح فى وقت قياسى ما حدث فى امبابة قل لى بقى إيه الآخر
أ . هانى عزيز : أنا بأحيى الجيش كله على كنيسة أطفيح بس أنا كان عندنا رد إنهم هيرجعوا الكنيسة روعة كده بالجمال والإمكانيات احنا ما نعرفش إن هم كده احنا وانتم وكان فيه كثير ناس عايزة تعملها وكان فضيلة الإمام الأكبر كان طالب من المسلمين وفعلا مسلمين أطفيح كانوا هم اللى يعملوها بس إمكانية الجيش محدش طبعا يقدر عليها هم حبوا يعملوها فى وقت سريع عشان يقام فيها الصلاة بسرعة بس المطلوب إن كان العدالة الأول قبل بناء الكنيسة يعنى المتسبب فى هذا الحادث يقدم للعدالة قبل ما نبنى الكنيسة بالنسبة لامبابة الكنيسة النهاردة المقاولين العرب ومحدش يعنى يقدر يتكلم على شركة المقاولين العرب إنها بتشتغل بمنتهى الجدية والقوة إنها ترجع الكنيسة فى 20 يوم أعتقد إن محافظ الجيزة ده راجل مهذب ومحترم قال لى تليفونيا أنا بوعد خلال 20 يوم إن أنا أرجع الكنيسة أكثر مما كانت وأنا بطلب من سيادة المحافظ زى ما هنرجع الكنيسة فيه بيوت فى المنطقة سواء كانت بيوت أهالينا المسلمين أو بيوت مسيحيين إن احنا فى نفس التزامن الوقت مع إعادة بناء الكنيسة نعيد بناء البيوت دى أثق فى شركة المقاولين العرب
مسعد أبو ليلة : احنا دلوقتى معانا الدكتور على عبد الرحمن محافظ الجيزة عبر الهاتف دكتور على مساء الخير سمعت المناشدة بتاعت الأستاذ هانى فى إعادة بناء أو إعادة البيوت التى احترقت حول الكنيسة فى امبابة إلى حالتها الطبيعية جنبا إلى جنب مع ترميم الكنيسة ؟
د . على عبد الرحمن : تحية لحضرتك ولضيوفك الكرام يعنى أنا أعد بأن أعمل على إنهاء الأعمال فى المحلات وفى المقهى وفى المخبز
مسعد أبو ليلة : يعنى المحلات كمان بجانب البيوت
د . على عبد الرحمن : والشقق السكنية يعنى فى نفس الوقت الذى ستنتهى فيه الكنيسة وعودتها إلى ما كانت عليه
مسعد أبو ليلة : نبتدى بقى فى المدة الزمنية المحددة اللى هى ال20 يوم برضه للكنيسة ؟
د . على عبد الرحمن : يعنى فات 10 أيام لكن هى ليست بالمدة الطويلة .
مسعد أبو ليلة : هل هيتم التعامل مع حد من التنفيذيين اللى هيقوموا بهذا العمل ؟
د . على عبد الرحمن : يعنى احنا بنحاول أن نفتح المجال لعمل مقاولين يعنى حضرتك تعلم إن مجال التشييد فى الفترة الحالية بيعانى من ركود كبير وإتاحة الفرصة يعنى لمساهمة الكثيرين المقاولين والشركات بيحلموا إن يكون لهم دور لإن ده شرف لهم فيعنى بنطرح هذه الأعمال على المقاولين المقيدين لدى المحافظة ومحافظة الجيزة تشرف عليهم الأعمال داخل الشقق والمحلات ما هياش متخصصة زى الأعمال فى الكنيسة الطراز المعمارى بيبقى له خصوصية الطراز المعمارى والزخارف وما إلى آخره
أ . هانى عزيز : دكتور على عبد الرحمن يعنى له تاريخه وهو اللى رجع مجلس الشورى بأسرع وقت ممكن فيعنى اللى موجود فى الجيزة أقل من مجلس الشورى واحنا عارفين يا دكتور انت إمكانياتك الفنية والعلمية والثقافية فاحنا بنثق فيك وياريت فى أقرب وقت
د . على عبد الرحمن : عندى الوضع فى الكنيسة له قيمة عالية جدا عندى
أ . هانى عزيز : دى احنا متأكدين منها يا فندم
مسعد أبو ليلة : دكتور على عبد الرحمن
أ . هانى عزيز : يا فندم بعد إذنك احنا زى ما اتفقنا المجتمع الأهلى احنا جايين نقعد مع سيادتك يوم الأربعاء المجتمع الأهلى لازم يكون له دوريعنى انت حضرتك عليك الجزء المهم والسريع بإمكاناتك لكن المجتمع الأهلى بنوعد من خلال تليفزيوننا المصرى يوم الأربعاء لما نجتمع بحضرتك عشان ننطلق فى الجهات اللى حضرتك هتحدده بيت بيت فى امبابة مسلم أو مسيحى وفاق برنامج مهم إسمه وفاق برنامج بروتوكول مع الصندوق الاجتماعى وأنا بشكر حضرتك إنك هتستضيفنا يوم الأربعاء القادم
د . على عبد الرحمن : وأنا برحب بهذه الزيارة
مسعد أبو ليلة : شكرا دكتور على عبد الرحمن محافظ الجيزة شكرا جزيلا ونعود للمهندس كميل تعقيبك على اللى انت سمعته ؟
م . كميل عزيز : احنا عملنا ثورة قبل الثورة كانت القضية الطائفية بتستعمل إنها تشغل الشعب المصرى مصر مافيهاش اضطهاد بين الشعب المصرى بين الشعب المسلم والأقباط النظام القديم كان بيعمل الحوادث وعمره ما عالجها بطريقة عادلة ولا حتى عالجها هو كان بيحب إنها تبقى طالعة فوق عشان يشغل الناس دلوقتى احنا فيه حوادث بتحصل لكن احنا عندنا انتخابات جاية فى سبتمبر قريب يعنى 3 أشهر فاضل على الانتخابات احنا فيه حد فينا اتكلم النهاردة عن الانتخابات بنتكلم على صول بنتكلم على امبابة الناس اللى واقفين بره فى ماسبيرو عايزين الموضوع ده يخلص مش عايزين يرجعوا ثانى ماسبيرو حكاية إنك تصلح البيوت وتصلح الكنيسة ده مش كفاية ، كفاية إننا نقضى على الطائفية من جذرها فى مصر والناس اللى بيهجموا على البنت عايزين يطلعوها تتحاكم وما ترجعش ثانى صول ولا ترجع امبابة الناس دى عايزة تخرج من ماسبيرو مش عايزة ترجع ثانى احنا عايزين نتكلم فى السياسة عايزين نتكلم فى الدستور ، عايزين نتكلم فى قواعد الدستور مش عايزين نتكلم فى المادة الثانية عايزين نتكلم فى ال239 مادة الثانيين اللى هى بتاعت الديمقراطية والسياسة احنا مش عايزين نتكلم فى طائفية ثانى فمجلس الوزراء والمجلس العسكرى لازم يطلعوا بقرارات يعنى الطائفية تخلص وتنتهى فى مصر مصر بين الشعب المسلم والمسيحى مفيش مشاكل دى مشاكل بيعملوها شوية من قوى خارجية تحطم الثورة بتاعتنا اللى تعبنا فيها جامد وداخلية من النظام القديم فلازم نحارب القوى كلها إنما نتحد كلنا نوقف الطائفية تنتهى من جذرها مش عايزين نرجع ماسبيرو .
مسعد أبو ليلة : معنا على الهاتف الأستاذ مدحت قلادة رئيس اتحاد منظمات أوروبا مساء الخير يا أستاذ مدحت .
أ . مدحت قلادة : أهلا مساء النور ازى حضرتك ؟
مسعد أبو ليلة : استمعت لما اثاره المهندس كميل كيف يمكن أن نقف أمام أحداث بسيطة يمكن أن يصدر عنها فتنة كبيرة يروح ضحاياها الكثيرون نحن فى غنى عن هذا ويعنى الملاحم اللى حصلت فى ميدان التحرير وعملية التآخى والتلاحم واختلاط الدماء كيف نفوت الفرصة على من قال عنهم المهندس كميل من القوى الداخلية والقوى الخارجية هذه الفئات التى تريد أن تسير بالثورة إلى الانحراف عن مسارها ؟
أ . مدحت قلادة : أنا وجهة نظرى الشخصية طبعا أنا مع حضرتك إن الثورة عملت تلاحم مع الشعب المصرى وكان هناك فائدة ولكن النتائج بعد الثورة كان فيه بعض فلول النظام أو بعض الجماعات المأزلتين هم الذين قادوا ثورة ضد الثورة نفسها ولكن نقفل على هذا الموضوع بدائرة القانون ما احنا كنا بنقول دائما كدة إن إذا اتحاكم اللى هم هجموا على الكنيسة بقرية صول ما كناش وصلنا لامبابة ولا قنا أنا أتصور إن مصر طبعا ترجع زى ما بيتصورها الباشمهندس كميل عزيز لإن احنا عايزين نعمل لمصر احنا أملنا مصر احنا ولاد مصر وولاد الثورة دلوقتى لازم نبص لأدام .
مسعد أبو ليلة : الأستاذ مدحت قلادة رئيس اتحاد منظمات أوروبا شكرا جزيلا ويبدو أن وقت البرنامج انتهى نكرر الشكر لضيوفنا المهندس كميل عزيز رئيس التجمع القبطى الأمريكى ، الأستاذ هانى عزيز أمين عام جمعية محبى مصر، أشكر الأستاذ بطرس حكيم رئيس الهيئة القبطية النمساوية أيضا شكرا جزيلا ولقاءاتنا متعددة ومتجددة أيضا من اتجاهات إلى اللقاء .