يحدث في مصر

هاله أبو علم : مساء الخير مشاهدينا الكرام وأهلا بكم فى حلقة جديدة من برنامج يحدث فى مصر – مصر ربنا وهبها نهر النيل إللى بيمدها بالخير من أقصى جنوبها لأعلى شمالها .
محمد المغربى : وأيضا مصر بتطل على البحر المتوسط بكل ساحلها الشمالى والبحر الأحمر على حدودها الشرقية وكمان فيه العديد من البحيرات الكبرى .
هاله أبو علم : نستطيع إذاُ أن نقول إن الثروة السمكية هى مصدر مهم من مصادر ما يُطلق عليه الأمن الغذائى القومى فمثلا لدينا مصايد سمكية بيزيد مساحتها والحمد الله عن 13 مليون فدان وهذا يتمثل فى البحار والبحيرات بالإضافة بالإضافة إلى نهر النيل .
محمد : سوف نفتح اليوم هذا الملف بصحبة ضيفنا فى الإستديو د محمد فتحى رئيس الهيئة العامة لتنمية الثروة السمكية بوزارة الزراعة مساء الخير .
د محمد فتحى : مساء النور يا فندم .
هاله أبو علم : أهلا بحضرتك وقبل ما نبدأ الحوار نتابع هذا التقرير ثم نعود لحضرتك مرة أخرى .
فاصل " تقرير "
تمثل الثروة السمكية فى مصر أحد المصادر الهامة للغذاء إذ يُقدر إنتاجها بنحو 15% من الإنتاج الحيوانى ويعطى عائدا يُقدر بنحو 6 مليارات جنيه كما يعمل فى مجال الصيد والصناعة المرتبطة به نحو ثلاثة ونصف مليون عامل غير الجهود المبذولة حاليا التى تسعى لرفع هذا الرقم بل ومضاعفته .
صياد (1) : البحيرة بتمثل لى مصلحة بلدنا وأكل عيالنا وتربية ولادنا ونجوز بناتنا وولادنا ومالناش مصحلة إلا البحيرة .. ربنا سبحانه وتعالى جعل لنا البحيرة ديه زى مصنع كبير .
صياد آخر(2) : بحيرة المنزلة ديه الحمد لله تعالى مش زى أى بحيرة فى العالم يعنى لو جمعت العالم كله ما فيش بحيرة فى العالم زى بحيرة المنزلة بتمثل بحيرة مش موجودة - فالحمد لله تعالى النهارده بحيرة المنزله يطل عليها 3 بواغيط يعنى النهارده فى مدينة المطرية أسر ما فيش مصدر رزق إلا هى بحيرة المنزلة .
وبالرغم من إمتلاك مصر لسواحل ممتدة على البحرين الأبيض والأحمر والتى تُقدر بنحو آلاف من الكيلوا مترات إلا أن الإنتاج السمكى منها يُعد ضئيلا بالمقارنة بمساحتها .. كما تُعد البحيرات مصدرا آخر لتنوع الإنتاج السمكى . وتخضع جميعها حاليا لخطة تطوير لضمان رفع معدلات الإنتاج فيها وتحسين ظروف الصيد .
صياد : كل واحد يوضع يده على أرض فى البحيرة ويتعاقب ويتحاسب قانونا ويدفع غرامة مالية مش الدولة تظهر من هنا والأهالى يعملوا من هنا يبقى مش خلصين .
صياد آخر : زمان كنا بنملى الصندوق فى 3 ساعات ولا فى ساعة واحدة الساعه ديه طول النهار يعنى من الساعة 6 للساعه ديه ماحناش آخدين نصف وقه آهه .
وبالرغم من هذا التنوع فقد برز فى الآونة الأخيرة تجاه بعض الصيادين المصريين للصيد فى المياه الدولية مما يعرضهم للكثير من المشاكل وهو ما تسعى الهيئة للتغلب عليه بعقد إتفاقاتٍ دولية مع الدول المجاورة .
فاصل
هاله أبو علم : دكتور محمد فتحى رئيس الهيئة العامة لتنمية الثروة السمكية مرة ثانية بأرحب بحضرتك معانا وهيكون السؤال الأول عن مدى حجم الإنتاج من الثروة السمكية الآن وإلى أى مدى تطور قطاع الثروة السميكة فى الأعوام الماضية ؟
د / محمد فتحى : أولا بسم الله الرحمن الرحيم بأشكر حضرتك على المقدمة الجميلة ديه وعلى العرض الجيد إللى إحنا شوفناه على البحيرات المصرية .. وفى الحقيقة فى البداية إسمحوا لى أن أقول إن إحنا إنتاجنا فى مصر 2008 مليون و67 ألف طن لإن إحنا بنأخذ الإحصائبة فى السنه إللى بعد منها على طول الثروة السمكية كانت فى بداية الثمانينات كان إجمالى إنتاجنا القومى كان لا يتجاوز ال220 ألف طن يعنى فى خلال ال25 سنه إللى فاتت الثروة السمكية تضاعفت تقريبا 5 مرات كان 220 ألف طن .
هاله أبو علم : كان إيه مصادر تضاعف الثروة السمكية ؟
د / محمد فتحى : ال،220 ألف طن كانوا عباره عن 210 ألف طن جايين من الصيد الحر و10 آلاف طن جايين من المزارع السمكية النهارده الصيد الحر لم يتجاوز ال 330 ألف طن ودا له أسبابه فى حين إن المزارع السمكية تضاعب الرقم بتاعها من 10آلاف طن الى 690 ألف طن بما يمثل حوالى 67% من إجمالى الإنتاج القومى وفى الحقيقة المقدمة الجميلة إللى حضراتكم عرضتوها كانت بتتكلم على إننا بنطل على البحر المتوسط والبحر الأحمر ولكن علميا البحر المتوسط والبحر الأحمر معروف إن هو من البحار المحدودة الإنتاج لإن إحنا بنقع فى موقع متميز صحيح جغرافيا إحنا بنقع فى ملتقى ثلاث قارات ولكن فى نفس الوقت إحنا فى نهاية البحر المتوسط وفى نهاية البحر الأحمر بما يحمله من بقايا ومخلفات بتلقيها بعض الدول بتوصل عندنا حسب تيار البحر المتوسط إللى هو بنقول عليه التيار الشرقى بييجى من الغرب إلى الشرق وبيلف ويطلع على سوريا وتركيا وبيلف ويخرج مره ثانية .. نفس القصة بالبحر الأحمر إللى هو عباره تقريبا عن بحيرة مغلقة بتتميز بإنها فيها شعب مرجانية بكميات كبيرة بتؤدى إلى محدودية إمكانيات الصيد فى هذه المناطق مش بس كده عالميا السيد العالمى بتراجع بمعنى إحنا النهارده حجم الإنتاج العالمى من أربع سنين لو تابعنا الإحصائيات هتجدوا حضراتكم إنها كانت 95 مليون طن بتصادوا من البحر تراجعوا 94 مليون تراجعوا إلى 93 مليون ثم 92 مليون فى حين إن الإستزراع السمكى فى العالم النهارده بيمنل 35 % من إجمالى ما يتم إنتاجه فى العالم من أسماك فى مصر إحنا لسنا بعيديد عن الأرقام العالمية كنا بنتكلم فى الثمانينات على متوسط نصيب الفرد 4 كيلوا سمك النهارده بنتكلم على متوسط نصيب الفرد 16 كيلوا سمك الرقم العالمى كام 16,4 إذاً الثروة السمكية عندنا فى مصر إستطاعت خلال الفترة اللى فاتت من 20 سنه أن تحقق نجاح يضعها النهارده عالميا ودا بإعتراف منظمة الأغذية والزراعة إن إحنا الدولة رقم 11 من حيث الترتيب فى أكبر دول منتجة فى عالم الأسماك من المزارع السمكية .
محمد المغربى : د. محمد إسمح لى يمكن أنا خايف شويه المشاهد يتوه مننا فى شوية الأرقام الكتيره ديه عايزين نعرف الأول دور الهيئة إيه فى الحفاظ على الثروة السمكية إيه اللى منوط بها هى تعمله تأخذ بالها من إيه لصالح المواطن ؟
د / محمد فتحى : فى الحقيقة الدور إللى بتقوم به الهيئة وبينظمه القرار الجمهورى 190 لسنة 1983 إللى هو قرار إنشاء الهيئة وحط لها 12 و ظيفة من أهمها تنمية الثروة السمكية فى مصر ودا أعتقد إنه من خلال الإستعراض اللى أنا إستعرضته سريع إن دا حدث إنه حصل تنمية للثروة السمكية فى مصر بطرقها المختلفة سواء إن كان عن طريق الصيد الحر عن طريق المزارع السمكية عن طريق إستغلال المساحات المائية إللى موجودة بالكامل داخل الجمهورية وإللى النهارده إحنا بنفتخر أو على المستوى الشخصى على الأقل وأنا أتصور إن دا حاجه نفتخر بها كلنا إن إحنا أصبح لدينا ثروة سمكية بكميات كبيرة تستطيع أن تغطى إحتياجات المواطن إللى بنقول عليها النهارده الثروة التى لا تنظضج .
هاله أبو علم : يعنى إحنا النهارده نقدر نقول عندنا إكتفاء ذاتى من الأسماك من الإنتاج السمكى ؟ والا بنضطر إن إحنا نستورد بعض الأسماك من الخارج ؟
د / محمد فتحى : شوفى حضرتك من الناحية الرسمية بنستهلك حوالى مليون وإثنين من عشره طن إنتاجنا مليون طن فيه 200 ألف طن فرق ال200 ألف طن متمثلين فى أسماك أنا ما أقدرش إنتجها فى مصر زى مثلا سكمك الليرنج ( الرنجه ) الرنجه سمكة مياه بارده أنا محتاج إن أنا أستوردها لإن فيه زوق مصرى بيستهلكها دائما ما أقدرش أحرم المستهلك من هذه السمكه صناعات قائمة عليها فيه مصانع بتشتغل عليها فيه عاملين بيشتغلوا فيها فلو أنا النهارده وقفت إستيراد الرينجه كل دا هيقفل أنا بأستورد ماكريل الماكريل أسماك مياه باردة معروفه عالميا إن الأسماك بتعيش فى نطاقين بنسميها أسماك المياه الباردة وأسماك المياه الدافئة .. أسماك المياه الدافئة إللى إحنا بنقع فيها إللى بتتميز بتنوع كبير قوى بالمقارنة بالعالم بنستورد سلمون عشان صناعات السلمون بنستورد سردين لإن السردين كان عندنا فى يوم من الأيام – أيام ما كان الفيضان بنزل فى البحر المتوسط كان بنزل معاه مغذيات طبيعية بتجذب السردين إن هو يخش إلى أقصى شرق البحر المتوسط النهاده السردين بعد التوقف بتاع الفيضان أصبح متمركز فى المغرب موريتانيا أسبانيا ودا بالتالى هيظل إننا نستورد أسماك .
هاله أبو علم : لكن عندنا بالنسبة للوجه الآخر بقه إحنا كدا بنستورد هل عندنا فرصه إن إحنا نورد للخارج .
د / محمد فتحى : من الناحية العملية إحنا بنسعى إلى إننا نصدر كمية من الأسما لكم إمتى أصدر الأسماك إللى هى بيقبل عليها العالم هو عندى نوعين من الأسماك إللى هى الأسماك البحرية زى الدنيس والأروس واللوت وزى الأسماك الداخليه زى البلطى .. البلطى النهارده له سوق عالمى ضخم جدا لكن أنا فيه معيار بيخلِّينى مش قادر أصدر البلطى إن أنا إنتاجى من البلطى بيتم من خلال إستخدام مياه الصرف الزراعى معظم ما يتم فيه نسب من التلوث بتحد من إمكانية تصدير البلطى لكن أسماك المياه المالحة أنا بأصدرها .
محمد المغربى : إسمح لنا بقه نقف عند الحنه ديه عشان ديه حته مهمة جدا يعنى إحنا لدينا حوالى 87 % من صافى إنتاجنا من الثروة السمكية بينتج فى مزارع دا صحيح ؟
د / محمد فتحى : يعنى إسمح لى أصلح الرقم إحنا بننتج690 ألف طن بما يُعادل 67% من أجمالهم منهم حوالى 65% جايين من المزارع السمكية إسمها المزارع السمكية بتاعة المياه العزبه .
محمد : 65% من كامل الإنتاج القومى هو نتاج المزارع؟
د / محمد فتحى : من كامل الإنتاج القومى مظبوط يافندم .
محمد المغربى : دا إللى دخلنا فى مشاكل وقف التصدير بعد كده يمكن مع الإتحاد الأوربى تحديدا .. صحيح إيه المشكلة الهيئة عملت إيه فى المشكلة ديه ؟
د / محمد فتحى : مظبوط .. المشكلة للأسف القانون إللى هو صدر سنة 1983 إللى هو القانون 124 إللى بينظم عمل الهيئة أحد نصوصه بتقول إستخدام مياه الصرف الزراعى فى المزارع السمكية وفى الحقيقة إحنا بنحاول فيه إجراء لتعديل هذا القانون حتى يمكن أن نصدر للخارج .. الواقع إن ديه مش سبه يعنى إستخدام مياه الصرف الزراعى إذا كانت بجودة معينة دا مش سبه إن أنا أقول إن العالم كله بيستخدم مياه الصرف الزراعى بس بمعايير معينه المعيار دا كمان ما يجبش إن أنا أحطه فى القانون لإن أنا لما بأحطه فى القانون أنا بأدى بالتعبير العامى بأشبه نفسى أى حد هيستورد النهارده لما أقول لأى مستمع أو مشاهد إن أنا بأنتج أسماك من مياه الصرف أول حاجه هيخاف منها لكن إذا قلنا إن معايير مياه الصرف ديه هى معايير عالمية وهى بتسمح بنمو الأسماك بشكل جيد إذن أنا ما عنديش مشكلة لكن إذا تدخل فى هذا الصرف أنواع أخرى من الصرف غير الزراعى هنا تبتدى المشكلة .
محمد المغربى : عندنا 67 مصب مصرفى فى نهر النيل منهم 22 مصب صناعى مش زراعى وبيصل حوالى 3 مليار متر مكعب سنويا مليئة بالمخلفات هل لدا تأثير على الثروة السمكية ؟
د / محمد فتحى : ما فيش شك أنا أعتبر الثروة السمكية – واحد قاعد فى بيته فى المياه وإحنا إتهاجمنا عليه النتيجه إنه هيتأثر ولكن أنا أتصور إن فيه دور كبير قوى بتعمله دلوقت وزارة البيئة فى محاولة توفيق أوضاع المصانع الموجودة على نهر النيل وأنا فى الحقيقة متابعة مستمرة مع جهاز شئون البيئة لهذا الشأن عشان نوقف أى تلوث بيحدث على نهر النيل أو على حتى المصارف .
هاله أبو علم : إيه الحلول العاجلة إللى وضعتها هيئة الثروة السمكية لحماية 12 مليار جنيه العوائد الإقتصادية من خلال الإنتاج السمكى فى مصر ؟
د / محمد فتحى : شوفى حضرتك هو فيه خطة إستيراتيجية حطَّاها وزارة الزراعة فى الوقت الحالى وإحنا شغَّالين عليها ولكن أنا أقول لحضرتك إيه اللى بيتم فى الوقت الحالى لإن طبعا ديه خطة طويلة الآجل إللى هى إحنا منسميها خطة 20 – 30 مقسمة إلى مجموعة من المراحل إحنا إبتدينا فى الحقيقة فى هيئة الثروة السمكية فى الوقت الحالى بنعمل مجموعة من الإجراءات السريعة لحماية الثروة السمكية من ضمنها البحيرات إحنا البحيرات عندنا وصلت إلى مستوى يجب إننا نتوقف عنده ويجب إننا ننبه إلى خطورة الموقف بتاع البحيرات التعدى على البحيرات أصبح فى نهاية الخطورة تلوث البحيرات أصبح فى نهاية الخطورة يجب إننا ننتبه إلى إننا البحيرات ديه بنسميها رئة البحر إللى بحدث فيها تكاثر معظم الأسماك إللى بييجى لنا منها معظم الخير إللى جام من البحر النهارده إحنا دمرنا هذه البحيرات للأسف الشديد هنصل إلى مرحلة هيبتدى يتناقص يتراجع عننا الإنتاج الصناعى فقلنا لأ الحل الوحيد إننا نعمل دراسة عن طريق الأقمار الصناعية بتدينى صورة كل عشر أيام والصوره ديه لايف بحيث أن .
محمد المغربى : لو فيه نيه للمخالفه يتم رصدها والتعامل معاها فى ضوء 10 أيام .
د / محمد فتحى : على طول رصدها والتعامل معها مباشرةً دون الإنتظار إلى .
محمد المغربى : د.محمد كل ما تفضلت به نقبله وأكيد يقبله كمان المشاهد ونفهمه تماما إنما فكرة إن إحنا نستورد سمك بلطى من الصين ؟ ديه هنرجع لها ولكن بعد الفاصل .
فاصل
محمد المغربى : عدنا إليكم من جديد مرةً أخرى مشاهدينا الكرام ويحدث فى مصر وضيفنا فى الإستديو د. محمد فتحى رئيس هيئة الثروة السمكية كان السؤال يا دكتور قبل الفاصل نفهم إن فيه تعديات على البحيرات نفهم إن فيه مشاكل فيما يتعلق بالصرف الزراعى أو الصناعى ولكن فكرة إن إحنا نستورد سمك بلطى نيلى ( من الصين ) مش قادرين نفهمها خالص ؟
د/ محمد فتحى : هههه هى حضرتك طبعا ديه فى الحقيقة من الحاجات المضحكات المبكيات عندنا فى مصر إن إحنا الدولة منشأ للسمك البلطى ومسمى البلطى النيلى ولكن إحنا ثانى دولة فى العالم من حيث الإنتاج للبلطى بعد الصين - الصين أخذته من عندنا .
محمد المغربى : أخذته إزَّاى يا دكتور أحكى لنا بس ؟
د/ محمد فتحى : إتنقلت ذرِّيعة وأخذوا وإشتغلوا عليها هم عندهم كمية كبيره جدا من الأنهار نموه وعملوه فى مزارع سميكية بمساحات ضخمة جدا فى الحقيقة إنتجوه وأصبحوا النهاده الدوله رقم 1 فى إنتاج الصين وإحنا الدولة رقم 2 برغم إن إحنا الأصل بتاع البلطى النيلى دا فى الحقيقة بيرجع لإستيراد البلطى النيلى من الصين إلى إختلاف السعر يعنى طبعا العرب كله النهارده أصبح قرية صغيرة وقرية مفتوحة والتجارة الدولية مفتوحة بين الدول ما تقدرش تقول أنا التاجر بطلع بيشوف أين السلعة الأرخص وبيبتدى يستوردها لكن عايز أقول لحضرتك حاجه مهمه وديه إحنا عارفنها فى مصر كويس قوى مش هأقارن طبعا عشان ما يبقاش .. لكن تعالى نقول .
محمد المغربى : أنا خايف لو قارنا يطلع الكافه لصالح الصين .
د/ محمد فتحى : لأ خالص .. خالص ؤأكد لحضرتك إن فيه عندنا مستهلك يفضل الطازج ولا يفضل المجمد ومش عايز أعلق على اللحوم تباين ما بين أسعار اللحوم الطازجه واللحوم المجمدة إللى بييجى لنا من الصين دا لحم مجمد منتج بطرق جيدة ومافيش فيه أى مشاكل إحنا ما بنشككش فى أى حاجه بتخش البلد لإن فيه جهات رقابية بتراقب تماما جودة إللى بيخش البلد لكنه ما هواش الجريد الأعلى أو ما هواش الدرجه الأعلى من الكواليتى – الكواليتى الأعلى هى اللى موجوده عندنا وأنا متحيز جدا للبلطى المصرى .
هاله أبو علم : أكيد طبعا وخصوصا النيل .. إحنا عندنا النيل إللى هو مصدر الحياة وشريان الحياة فى مصر لكن أنا هأستأذن حضرتك إحنا نروح لمشكلة مهمة جدا خاصة بالثروة البشرية اللى هى بتعمل فى مجال الإنتاج السمكى 3,5 مليون صياد بيعملوا فى هذه المهنة ولكن بسبب بعض المشاكل إللى بتعرضوا لها هجروا هذه المهنة إيه إللى بتعمله هيئة الثروة السمكية لمعالجة هذه المشكلات وعودتهم مرة أخرى لبيتهم وبأستأذن حضرتك هنخرج فاصل هنشوف مع بعض إيه إللى بيقولوه الصيادين ونرجع مع حضرتك مره ثانية.
فاصل " تقرير "
صياد (1) : إحنا بنتمنى .. البحيرة ديه نمسكها شركه بحيرة كبيرة تمسكها شركة تزيل التعديات الثروة السمكية ما فيهاش إمكانيات لإزالة التعديات – تعديات كبيرة تزيل ويرجع يتعمل ثانى .
صياد آخر(2) : إحنا النهارده ما لناش مهنه إحنا صيادين مالناش مهنه خايفين عيالنا تتشرد فالنهارده بحيرة المنزلة ديه مش موجوده فى أى مكان فى العالم والله ثروه قومية فالنهارده مدينة المطرية ماشاء الله زيادة عن نصف مليون صياد فى البحيرة ديه طيب هيأكلوا منين هيشربوا منين فعشان الناس ديه تعيش فإحنا بنوجه كلامنا للسادة المسؤولين .
صياح : دلوقت البحيرة لا تقل عن 200 ألف فدان 150 ألف فدان عشان إيه التعديات – تيجى تبص دلوقت التعديات من السنه إللى فاتت لدلوقت 70 ألف فدان أو 80 ألف فدان ليه إللى بييجى يعمل حوشه بيعمل النهارده 20 فدان ييجى الشرطه أن المسطحات المائية أو الثروة السمكية بيزيل ال20 فدان الحمالة تروح من هنا ال20 يبقوا 80 .
فاصل
هاله أبو علم : د. محمد تعديات مرة ثانيه إللى حضرتك أشرت إليها واضح إن هى مشكلة أساسية بالنسبة للصيادين يعنى هى ديه إللى بتهدد مصدر رزقهم ومصدر عيشهم .
د/ محمد فتحى : دا حضرتك الحقيقه إنه أحد الحاجات إللى بتواجهها هيئة الثروة السميكة التعدى على البحيرات .. إحنا السنه إللى فاتت عملنا أكبر حملة للإزالة فى بحيرة المنزلة وديه كانت أكبر حملة إتعملت فى تاريخ البحيرة تم إزالة 10 آلاف فدان تعديات كانت جوه البحيرة فى صورة أحوشه فى صورة تحويطات للأسف الشديد بعض الصيادين بيعملوها وبيحطوها كمنطقة نفوذ وبيمنعوا غيرهم من الصيادين إن هم يتواجدوا فيها بالإضافة إلى ردم أو عمل تحويطة من التراب عشان يعملها منطقة كحوض سمكى إحنا السنه إللى فاتت أزلنا هذا الكلام بالكامل ولكن زى ما ذُكر فى التقرير إن إحنا بنزيل وفى نفس الوقت بيحدث أحيانا إعادة .
هاله أبو علم : ممكن نزيل من منطقة يحصل تعدى فى منظقة ثانية .
د/ محمد فتحى : ودا فى الحقيقة إحنا بنتابعه وكانت الإزالة فى مرحلة من المراحل نتيجة نقص الإمكانيات كا بيتم كسر بس جزء من التعدى ويترك هذا – الحقيقة إدينا تعليمات بإن الإزالة تبقى إزالة كامله بالكامل برغم تكلفة هذا الكلام والعبء الأمنى إللى بيبقى على وزارة الداخلية وشركة المسطحات والعبء المالى والتكلفة على هيئة الثروة السمكية لإن إحنا دورنا إننا ننمى هذه البحيرات .
هاله أبو علم : حضرتك أشرت لمسألة مهمة جدا وهى إستعانتكوا بهيئة الإستشعار عن بُعد يعنى ديه ممكن يكون حل فعَّل .. ليه ما تمش اللجوء لإنشاء صندوق ممكن يساعدهم فى أثناء تفرة التوقف عن الصيد ؟
د / محمد فتحى : فيه يافندم صندوق .. لأ دا فيه الإتحاد التعاونى للثروة المائية إللى هو الإتحاد إللى مُشكل من 90 جمعية صيادين موجودين على مستوى الجمهورية فيه صندوق لدعم الصيادين لتأمين السيادين لتأمنهم ضد المخاطر لدعمهم أثناء فترات الوقف إذا كان هناك فترات وقف وبالذات فترات الوقت وإسمحوا لى أستغل الفرصة ديه إن إحنا يجب إننا يبقى عندنا فترة بنسميها راحة بيلوجية لأى مسح مائى – الراحة البيلوجية ديه دورها إن أنا أدى فرصة للأسماك إنها تتكاثر مره ثانيه .. وأنا بؤكد لحضراتكم وللساده المشاهدين أن الدولة ليس لديها مركب واحده الدوله ليس لديها صياد يعمل لحساب الدوله إنما كل الخير إللى موجود فى البحيرة وإكثار هذا الخير لصالح الصيادين ففى فترات الوقف فيه صندوق عمله إتحاد التعاون للثروة المائية يُقرض الصيادين قرضا حسن عباره عن حصالة يأخذ منها قيمة إنه هو يقدر يدور بيته ثم يعيد تسديد هذا القرض على بقية السنه بدون أى فوائد بمعنى إنه كأنه عمل حصالة .. إقراض حسن ما فيش فيه أى فلوس أو أى رسوم بتدفع لإنه من الصيادين وإلى الصيادين وهم فى الحقيقة إللى عملوا الكلام ده والكلام ده تحت إشراف الهيئة لإن إحنا بنشرف على الإتحاد .
محمد المغربى : إسمح لى يا دكتور يمكن زى ما بيُقال إن أحيانا يكون صاحب الداء أعلم بالدواء دلوقت شوفنا صياد بيقول بندعوا إلى تأسيس أو إنشاء شركة تكون مسؤولة عن البحيرة .. هل الفكرة ديه مطروحة وإنت دلوقت قلت إن الدوله أو الحكومة مالهاش لا مركب ولا ليها صياد تابع ليها أمال مين بيشرف على البحيرة ؟
د/ محمد فتحى : إللى بيشرف على البحيرات هيئة الثروة السمكية بحكم القانون – بحكم القرار الجمهورى .
هاله أبو علم : إنتاج اللى طالح منها ؟
د/ محمد فتحى : الإنتاج إللى بيطلع بيطلع وبيرصد وبتم رصده عن طريق هيئة الثروة السمكية ولكن بيسلم بعد كده لمنافذ البيع .
محمد المغربى : الفكرة نفسها إللى قالها الصياد ؟
د/ محمد فتحى : التجربه إللى قالها الصياد فى الحقيقة الأخ بتاع المنزله أنا هأدعوه للفكرة بتاعة أسوان .. أسوان إتعملت فيها الفكرة ديه للأسف الشديد وفشلت فشلا ذريعا لإن كانت النتيجة إن الشركة إحتكرت المناطق 6 شركات إحتكروا الصيد فى جسم بحيرة ناصر ومابقوش يسمحوا للصيادين يخشوا غير بأتاوى ففى الحقيقة السيد المحافظ لغى الكلام ده نتيجة إن لقينا إن التجربه فى حد ذاتها ما نجحتش فمش عايزين نكرر هذا الخطأ فى المنزلة لكن إللى إحنا بنعمله إن إحنا النهارده بنحاول نوقف أى تعديات على البحيرة بنحاول نوقف أى تلوث فى هذه البحيرة حمايةً للثروة السمكية وحمايةً للصيادين الغلابه إللى كانوا بيتكلموا دول .
هاله أبو علم : دلوقت فيه خبراء فى مجال الزراعة بيقولوا إن الثروة السمكية مهددة بخسارة 350 مليون جنيه مصرى سنويا بسبب وقف مشروع أقفاص إنتاج الأسماك فى فرع دمياط وفرع رشيد فعايزين رد من حضرتك على هذا الكلام .
د / محمد فتحى : أولا أنا بأشكر حضرتك إنك فتحتى الموضوع دا لإن الموضوع دا على جانب كبير جدا من الأهمية .. الأقفاص السمكية حينما كانت متواجدة فى فرع دمياط ورشيد كانت بتنتج ما يُقدر بحوالى 60 ألف طن سنويا – ويعنى لو قلنا 60 ألف طن فى 10 آلاف جنيه للطن إحنا بنتكلم على 600 مليون جنيه رقم مش صغير ولكن نتيجة إن الأقفاص السمكية كانت فى فترة من الترات موضوعة وبشكل عشوائى وللأسف الشديد يجب نعترف بهذا أدى إلى ظهور بعض المشكلات وكان طلب هيئة الثروة السمكية إننا نقنن وضع هذه الأقفاص إننا ندرس كيف يمكن التغلب على المشكلات الخاصة بالثروت السمكية على سبيل المثال إنها تستخدم أعلاف عالية القيمة إنها تكون فى مواقع تبادلية ما تبقاش مواقع ثابته بعيده من مصادر مآخذ مياه الشرب عشان ما تأثرش عليها إتحددت مساحات وكان صدر قرار وزارى بتشكيل لجنة من وزارة الصحة ووزارة البيئة ووزارة الزراعة المحليات وجميع الجهات شاركت فيها فى الحقيقة وطلعت بعض التوصيات ولكن نتيجة للممارسات كانت فيها بعض الأخطاء كان القرار إزالة الأقفاص اللى فيها وأنا بأعتبر ديه فى الحقيقة أحد الحاجات إللى إحنا محتاجين إننا نعيد دراستها مره ثانية أنا عندى شُريان كبير يجب إن أنا إستغله بما لا يؤثر على جودة هذا الشُريان .
محمد المغربى : إلى أى مدى تبارك هيئة الثروة السمكية فكرة الصيد فى المياه الدولية ؟ الى أى مدى هناك إتفاقيات مع دول الجوار تحديدا تنظم عمليات الصيد ؟
د/ محمد فتحى : شوف حضرتك هو إحنا عندنا نوعين من المياه إللى إحنا بنتعامل معاهم إللى هم المياه الإقليمية إللى هى بتعادل 12 ميل بحرى .. ديه حدودنا الدوليه لكن هناك نا نطلق عليه المياه الإقتصادية ودول 200 ميل بحرى أو نصف المسافة بينى وبين الدولة المقابلة يعنى دا القانون الدولى النهارده بيقول إن أنا من حقى إستغلال لحاد 200 ميل بحرى وليس من حق الآخرين التعامل مع هذه المنطقة بمعنى إن ديه منطقة إستغلال إقتصادى .
محمد المغربى : ديه مياه دوليه .
د/ محمد فتحى : لأ حضرتك مش دوليه ديه مياه إقتصاديه .. المياه الدولية بقة فى المحيط ما بقاش عندنا مياه دولية خلاص .
هاله أبو علم : مياه إقليمية يعنى خاصة بكل دولة .
د/ محمد فتحى : المياه الإقليمية حضرتك ديه لو حد دخلها أقدر أضربه وأقدر أطلع له طيران يضربه لكن المياه الإقتصاديه لأ – المياه الإقتصادى من حقى إن أنا أقبض عليه أنا لى 12 ميل مياه إقتصاديه دا من حرم الدولة ولكن هناك 200 ميل بحرى مياه إقتصادية .
هاله أبو علم : أيوه قبل ما نختم الحلقة مع حضرتك أنا عايزه كلمه من حضرتك تطمن بها الجمهورعلى مسألة العلف اللى بيعطى للسمك لإن كان هناك أقواويل وكلام كثير أحاط بهذا الموضوع ؟ السمك بيأكل إيه ؟
د/ محمد فتحى : السمك النهارده حضرتك نتيجه للظروف الإقتصاديه إللى بيمر بها القطاع كان فى فترة من الفترات إللى هى فى بداية الثمانينات كان التعامل مع الأسماك كان إنتاج الحوض أو الفدان لا يتجاوز ال200 كيلوا إحنا النهارده بنتكلم على متوسط 2 طن ونصف ال 2,5 طن لا يمكن ييجوا بالشكل التقليدى يجب إن هم يحصلوا على إحتياجاتهم الغذائية من أعلاف عالية القيمة دا حتى النهارده العلف إللى بينتج للسمك يعادل فى قيمته للبسكويت بمنتهى البساطة كده أقدر أقول إن بينتج بماكينة إللى هى بننتج بها الحاجات بتاعة الأطفال لإن الأسماك إذا تعاملنا معاها من الناحية العلمية فهى كائن ذو قناه هضمية بسيطة يجب إن أنا أدى له الغذاء فى صورة شبه مهضومة وبالتالى النهارده أصبح الجودة بتاعة الأعلاف .. هأقول لحضرتك حاجه لطيفه النهارده أعلافنا من الأسماك بنصدرها لكثير من دول العالم .
محمد المغربى : آخر سؤال د. محمد وأرجوا الإجابة تكون فى غضون 30 ثاينه يعنى ما هى رؤيتك مستقبل الثروة السمكية فى مصر فى ظل وجود تنافس شديد من البلطى الصينى وفى ظل وجود ما يُعرف بالباسا سمكه الباسا الفلبينية اللى سابت الفلبين ومستنقعاتها وجايه تتباع هنا ؟
د/ محمد فتحى : حضرتك المستقبل أنا بأكد لحضرتك وللساده المشاهدين إن مستقبل السمك عندنا فى مصر بخير لدينا من الإمكانيات .. إحنا متجهين دلوقت للسمك البحرى بننشئ مشروعات مزارع سمكية فى البحر أقفاص عملاقة فى البحر لإنتاج الأسماك لوصولها للمستهلك بأسعار وبجودة عالية .
هاله أبو علم : شكرا للدكتور محمد فتحى رئيس الهيئة الثروة السمكية على وجود حضرتك معانا النهارده وعلى كثير من النقاط إللى تم إيضاحها من خلال هذا الحوار .
د/ محمد فتحى : شكرا جزيلا .
محمد المغربى : إنتهت حلقة اليوم مشاهدينا الكرام من يحدث فى مصر لكن لم تنتهى أحداثنا
هاله أبو علم : إلى اللقاء