يحدث في مصر

ريهام ابراهيم:مساء الخير اعزائى المشاهدين فى كل بيت فى مصر
احمد بصيلة :اهلا بكم مشاهدينا الكرام اليوم معنا فى هذه الحلقة من برنامج يحدث فى مصر احد اهم المشروعات القومية الكبرى والتى تمس الحياة اليوالمياه للجميع وهى مشروعات مياه الشرب فيه جميع انحاء الجمههورية التى يبلغ حجم الاموال المنفقة للاحلال والتجديد ما يقرب من مليار جنيه خلال العام الحالى 2009 ، 2010 وفق اخر احصائية صادرة عن الشركة القابضة لمياه الشرب والصرف الصحى والتى هى محور هذه الحلقة .
ريهام ابراهيم:الشركة القابضة للمياه والصرف الصحى بها 2665 محطة مياه ما بين محطات عملاقة محطات متوسطة محطات صغيرة فى كافة انحاء الجمههورية تنتج 27,4 مليون متر مكعب من المياه الصالحة للشرب يوميا بيستهلك منها كل مواطن فى يومه ما بين 140 لى 490 متر
احمد بصيلة : قبل ما نتكلم فى هذا الموضوع ونتابع التقاريرنرحب بضيف هذه الحلقة دكتورعبد القوى خليفة رئيس مجلس ادارة الشركة القابضة لمياه الشرب والصرف الصحى اهلا بيك يا فندم
د/عبد القوى خليفة:اهلا بحضرتك
ريهام ابراهيم:اهلا بحضرتك يا دكتور
احمد بصيلة :اسمحلنا فى البداية نتابع تقرير عن حجم ما تحقق فى هذا القطاع المهم وخدمات مياه الشرب
تقرير
ترى من اين ياتى هذا الكوب من الماء النظيف ؟ سؤال قد لايعرف الكثيرون ايجابته وهنا يبرز دور الشركة القابضه لمياه الشرب والصرف الصحى والتى تقوم بتنقية وتحلية مياه الشرب والتخلص الامن من مياه الصرف الصحى
ايمن عبد القادر ( رئيس شركة مياه الشرب والصرف الصحى فى المنوفيه ): قبل قيام الشركة كان موجود عدد عمليات المياه الاورتوازى والبحارى وكان مفيش اهتمام بصيانة المحطات او الشبكات او جوده المياه او الوضع المطلوب لكن احنا لما ابتدينا شركة مياه الشرب والصرف الصحى كان الهدف الاساى بتاعنا هو ان احنا نوفر مياه الشرب لى كافة المواطنين فى المحافظة وبالجوده المطلوبه.
من هنا تدخل المياه القادمة من نهر النيل ثم تمر بعدة مراحل وصولا الى مرحلة المياه الصالحة للشرب تبدا اولا بمرحلة التصفيه والتى يتم خلالها ازالة الاشياء او القطع الصلبه التى يمكن تعيق المضخات او التغطية اللاحقة ثم تاتى مرحلة الترويد وهى مرحلة ازالة الشوائب التى لا تترسب بسهولة لذلك يتم اضافة المواد الكيماوية المجلطه مثل الشبه الى المياه وتاتى بعدها مرحلة الترشيح وفيها يمر الماء وسط مرشحات تخلصه من المواد العالقه التى لم يتم التخلص منها بالترشيح
عمرو حسن*رئيس شركة مياه الشرب والصرف الصحى فى المنوفية: شبكات المياه الصيانه فيها ضرورة ولازم تتعمل والا هنلاقى فى يوم من الايام المزاسير بتنفجر والمياه طالعة مش جديده وبيتكون فيها نوع من البكتريا ففى كل فترة بيتعمل عملية تطهير للشبكة وبتتعقم بالكلور بنعيدها كذا مرة يمكن كل شهري او شهرين ولو حصل لاى عطل قبل ما بنشغل التانى بنعمل اعادة تعقيم للشبكة
واخيرا مرحلة التعقيم للقضاء على البكتريا الضارة ومن الطرق المستخدمة للتعقيم الكلوروهنا يبرز دورنظام التحكم وهو النظام الالكترونى الجديد الذى ادخلته الشركة القابضة للخدمة بتكلفة تقدر ب41 مليون و100 الاف جنيه ويقوم بمراقبه نقل المياه داخل الشبكة تقوم الشركة القابضة بمجهودات فقد تم انشاء وتعميم الخطين الساخنين 125 و175 لخدمة العملاء لمياه الشرب والصرف الصحى والتعامل معها فورا وعلى مدار ال24 ساعة يوميا طوال ايام الاسبوع فى جميع الشركات التابعة
المهندس/ محمد عبد الرحمن*رئيس شركة مياه الشرب والصرف الصحى فى القاهرة:المواطن النهاردة هو همنا وبنطمع فى رضاه عن اداء الخدمة بالاضافه انوا اتعمل الخط الساخن 175 اللى بيتلقى الشكاوى على مستوى الجمههورية خلال 24 ساعه ويمكن حضرتك او الجمهورحاسس بالنقله فى عملية التشغيل والصيانة وعملية الاحلال والتجديد فى الخطوط فبقينا افضل بكتير جدا ويمكن معدل الشكاوى انخفض بنسبه كبيرة جدا
كما تقوم الشركة بتسهيل اجراءات التعاقد لاول مرة او لتعديل بيانات المشتركين فى مركزخدمة العملاء التابع للشركة ويبقى على المواطن مهمة ترشيد استهلاك المياه حيث قل نصيب الفرد عن 1000 متر مكعب سنويا
ريهام ابراهيم:عدنا مرة اخرى مشاهدينا الكرام لمتابعة موضوع حلقة اليوم من يحدث فى مصر وقطاعات المياه الشرب وابدا بسؤالى لضيفنا النهاردة يعنى زى ما شفنا فى التقرير يا دكتور خطوات كتيرة جدا لحد ما المياه توصل لبيت المستهلك معقمة نقية صالحة للاستخدام مدتها قد ايه الفترة الزمنية والكوادر البشرية اللى تكون معانا فى كل هذه الخطوات ؟
د/عبد القوى خليفة:هو الحقيقة يمكن العرض كان واضح ان احنا مصدر المياه الاساسى بتاعنا هو نهرالنيل 85% من مياه الشرب احنا بنستخدمها يكون مصدرها نهر النيل طبعا المراحل بناخدها من نهر النيل بتتنقل لى المحطة اللى بيتم فيها التقنيه بنتعامل مع المياه الاول ان احنا بنحط المواد المرسبه علشان يحصل الخلط بعد كده بتتنقل فى احواض بيتم فيها ترسيب كل الشوائب اللى هى موجوده فى مياه الشرب وبعد كده بتتنقل لى مرحلة المرشحات او الفلاتر ودى المياه بتخترق فلترعمقه حوالى متربتكون فى الوقت ده تخلصت من كل الشوائب الموجوده فيها بعد كده بتتنقل على مرحلة التعقيم ودا بيتم بخلط نسبة قليله جدا من الكلور واللى بيحصل لازم يبقى فيه وقت تلامس ما بين الكلور والمياه بعد كده بتبقى المياه جاهزة لتضخ لى الشبكة وتصل لمنازل المستهلكين
احمد بصيلة :هنتكلم بشكل اكترعلى موضوع نقاء المياه ووصولها للمستهلك ولكن علشان نعرف التطوراللى حدث فى قطاع مياه الشرب لازم نعرف كان شكل القطاع ايه من سنوات حتى اصبح بالشكل اللى احنا شايفينه دلوقتى من ادخال تكنولوجيا اومحطات جديدة ازاى كان شكل هذه المحطات وشكل المياه اللى كانت بتوصلنا لو بصينا كده فى الماضى ؟
د/عبد القوى خليفة:هو قبل انشاء الشركة القابضة كان المسئول عن ادارة وتشغيل مياه الشرب فى كل محافظة هو ادارة المحافظة ادارة اسمها ادارة المرافق كل محافظة فيها ادارة خاصة بيها اسمها ادارة المرافق اللى كانت بدير المحطات والشبكات وطبعا كانت الامكانيات المتاحة ليهم ما كنتش زى دلوقتى لان العملية محتاجة ميزانيات محتاجة تكنولوجيات حديثه للتطوير بصفة مستمرة الحاجات دى ما كنتش متاحة قبل انشاء الشركة القابضة
احمد بصيلة :هى انشات سنة كام يا دكتور ؟
د/عبد القوى خليفة:الشركة القابضة فى القرار الجمهورى كان فيه ابريل فى 2004 اللى هو قرار 135 لسنة 2004 لانشاء الشركة القابضة لكن الشركة القابضة ابتدت نشاطها فيه اول 2005 حضرتك القرار ده بناءا عليه تحولت كل الادارات اللى هى تابعة للمحافظات الى شركات بتتبع قانون 2003 لسنة 1991 القانون ده الحقيقة بيخلى الشركات دى بيديها مرونة انها تشتغل زى القطاع الخاص مش بمعنى القطاع الخاص يعنى تكلفة المياه و الى اخره لا بيديها المرونة انها تشتغل كقطاع خاص علشان تقدم خدمة متميزة
ريهام ابراهيم:ايه شكل الخدمة المتميزة دى ؟
د/عبد القوى خليفة:ابسط حاجة شكل الخدمة المتميزة ان احنا مثلا يبقى فيه خدمة متميزة زى اللى تمت دلوقتى 175 و 125 دول خطوط موجوده 24 ساعه بيردوا على شكاوى المواطنين بنسمع اى شكو وبتبلغ للاجهزة اللى عندنا سواء كانت شكوى كانت فى قطاع المياه او فى جوده المياه وبتبدى هذه الاجهزة تتحرك فورا لعمل هذا الاصلاح دى مكانتش موجوده قبل كده
ريهام ابراهيم:بتاخد قد ايه يا دكتورعلشا توصل للمواطن فى اى مكان يعنى وتعرف انها تحسن من جودة المياه وتشوف مشكلته ؟
د/عبد القوى خليفة: احن ما مجرد بناخد الشكوى بالتليفون داخل الشركات فى اجهزة لاسلكى بتبلغ فورا بالالسلكى على الموقع اللى هو فيه الشكوى وبيبقى فيه عندنا عربيات موجودة -عربيات الطوارىء دى عريبات مجهزة انها تتحرك على طول لاى اصلاح فا دى يعنى بنتكلم فى ساعات
احمد بصيلة :التغطية يا دكتورعلى مستوى الجمههورية قد ايه دلوقتى ؟
د/عبد القوى خليفة:احنا الحمد الله بعد ما عملنا خطة اللى تم تنفيذها من سنتين دى وصلنا الى تغطية مياه الشرب 100 % عندنا لا قريه ولا نجع مفيهوش مياه شرب النهاردة ودا الحقيقة اللى احنا بنعمله النهاردة بنحسن فى جوده مياه الشرب فى بعض المناطق لان فيه مناطق كانت بتعتمد فى مياه الشرب بتاعتها على ابار بعض هذه الابار بيبقى فيها نسبة املاح عاليه ونسبة الحديد والمنجنيز بتبقى برده مرتفعة شويه هو الحديد والمنجنيز غير ضار صحيا ولكن غير مستساغ طبعا احنا منقبلش ان مواطن يشرب المياه ما بيستسغش طعمها فاحنا عندنا دلوقتى خطة لعمل محطات لازالة الحديد والمنجنيز بحيث ان احنا ان كل المواطنين بتوصلهم المياه بالجوده المطلوبه عايز برده اطمن حضارتكم ان المياه الابار الموجوده فى الجمههورية كلها لا تتعدى نسبه 4% من النسبة اللى احنا بننتجها يعنى احنا دلوقتى بنتكلم على المياه اللى فيها مشاكل نسبتها 4% نسبة مش كبيرة واحنا ان شاء الله قبل 30/6/2010 نكون عملنا كل المحطات اللى هى تغطى ال4 %
ريهام ابراهيم:ايه مراحل الجوده دى يعنى حضرتك بتقول ان فيه خطط لتحسين مياه الشرب بالقضاء حتى على النسبة المئوية اللى حضرتك بتقولها دى علشان تبقى الامور كلها على ما يرام ؟
د/عبد القوى خليفة:الخطة دى حضرتك معمولة لى ال4% دى اذا كان مفيش وسيلة ان احنا نوصل مياه النيل فبيتعمل محطات ازالة حديد ومنجنيز فاذا كان فيه نسبة منهم قريبه من محطة مرشحة بنوصل على طول من المياه المرشحة لهذه المياه الى جانب طبعا المنظومة بقى وهى منظومة جوده المياه ودى منظومة بتبتدى الحقيقة على كذا ليفل احنا بنبتدى من الاول خالص من ليفل اللى هو معامل تحاليل المياه متنقله المعامل دى محموله على سيارات وبتتحرك فى جميع القرى والنجوع
احمد بصيلة :يعنى فيه نسب من منطقه لى منطقه نسبة النقاء فى المياه بتختلف من منطقة لى منطقة ؟
د/عبد القوى خليفة:طبعا المصدر نفسه المصدر نفسه بيختلف من منطقة لى منطقة المياه لما بتدخل المحطة كلها بتدخل لمصفاه واحدة لكن كلنا نعرف كويس جدا ان مياه نهر النيل فى اسوان درجة النقاوة بتاعتها عاليه جدا لان طبعا قاع النهر فى اسوان قاع صخرى حركة المياه نفسها
ريهام ابراهيم:يعنى المياه فعلا فى الاماكن دى نقية جميلة؟
د/عبد القوى خليفة:ما هو دا سببه زى ما بقول لحضرتك ان القاع النهر بيبقى قاع صخرى فحركة المياه ما بتحركش اى شوائب من القاع لكن لما بنيجى بعد كده للشمال بيبقى القاع انواع من الطين والطمى فالبتالى بتبقى حركة المياه نفسها بتعمل جزئيات بتتحرك وبتبقى موجودة فى المياه الحاجة التانية طبعا شمال ووسط الدلتا بيبقى فيه مصادرلى تلويث مياه نهرالنيل لكن المفروض ان جميع محطات التنقيه بتطلع منها المياه بمواصفات عالمية
احمد بصيلة :دكتور لما بتقول نسبة التغطية اصبحت 100% من مياه الشرب دا شامل المناطق العشوائية على جميع مستوى الجمههورية ؟
د/عبد القوى خليفة:العشوائيه حضرتك فيها مياه شرب الا لو كان المبنى غيرامن يعنى لوالحى قالنا ان المبنى ده غير امن دا الحته الوحيدة اللى احنا ما نوصلش فيها المياه لكن طالما الحى قال ان المبنى دا امن وهو فيه منطقه عشوائية ومبنيةغيرمخططة بنوصله المياه الحاجة الوحيدة اللى احنا ما بنقدرش نوصلها المياه لو المبنى فيه خطورة فى السلامة بتاعته
ريهام ابراهيم:دكتورعبد القوى خليفة هنكمل حوارنا على مياه الشرب لكن بعد الفاصل ونعود مرة اخرى مشاهدينا الكرام ونكمل حوارنا
احمد بصيلة :ما زالنا معاكم اعزائى المشاهدين فى هذه الحلقة من "يحدث فى مصر" والحديث عن مياه الشرب دكتورعبد القوى علشان نصل الى نسبة تغطيه 100% لجميع محافظات الجمههورية لازم يبقى عدد محطات كبير جدا محطات منتشرة على مستوى الجمههورية ايا كان فى القرى او فى المدن او حتى فى النجوع عدد المحطات اللى موجوده عندنا فى مصر قد ايه ؟
د/عبد القوى خليفة:احنا عندنا محطات تنقية المياه 2665 وعندنا محطات رفع حوالى 600 يعنى اجمالى حوالى 3200 محطة لتوصيل المياه هذا بالاضافة الى الشبكات نفسها
ريهام ابراهيم:يعنى المناطق كلها مستفيدة ؟
د/عبد القوى خليفة:الحمد الله كل القرى والنجوع مستفيدة معندناش موقع من المواقع او قريه او النجوع مفيهاش مياه شرب
احمد بصيلة : تكلفة هذا الكم من المحطات سواء كان محطات الشرب او محطات الرفع وايضا محطات التنقيه تكلفة الدوله قد ايه ؟
د/ عبد القوى خليفة:احما مياه الشرب بتاعتنا والصرف الصحى الاستثمارات اللى احنا بنديرها النهاردة اللى بتديرها الشركة القابضة والشركات التابعه فى كل محطة التكلفة الاستثماريه بتعاتها وصلت الى 100 مليار جنيه دا بالاسعار طبعا بتاعة السنين الماضية لو قيمنا المحطات دى باسعار النهاردة طبعا تفوق ال100 مليار
ريهام ابراهيم:فى كل هذا التطور اكيد فيه سبكات فيها نوع من التهالك محتاجة احلال محتاجة تجديد ازاى بتتعامله معاها ؟
د/عبد القوى خليفة:هو برده انا عايز اضيف ان احنا فى الفترة دى قطاع مياه الشرب والصرف الصحى بيعيش العصر الذهبى لى هذا القطاع من ضمن الحاجات اللى اضيفت ما كنش فيه ميزانية احلال وتجديد لاول مرة يضاف لهذا القطاع ميزانية احلال وتجديد اول ميزانية ينزل فيها ميزانية هى للاحلال والتجديد هى اللى احنا موجودين فيها دلوقتى
احمد بصيلة :يعنى قبل كده ماكنش فيه ميزانيات للاحلال والتجديد ؟
د/عبد القوى خليفة:ما كنش فيه ميزانيات
ريهام ابراهيم:يعنى كان الشبكة المتهالكة دى خلاص ؟
د/عبد القوى خليفة:ودا اللى بنعانى منه دلوقتى ان الشبكات المتهالكة دى محتاجة احلال وتجديد لانها ظلت لفترات طويله احنا عندنا اطوال شبكات المياه فى الجمههورية كلها 100 الف كيلو متر مواسير يعنى لو رصينا المواتسير من القاهرة لاسوان بيعمل 100 مشوار دول 100 الف كيلو متر مواسير لمياه الشرب فقط
احمد بصيلة :دا المفروض يبقى فيه متابعة دايما علشان يبقى فيه احلال وتجديد
د/عبد القوى خليفة: محتاجين على الاقل 5% كل سنة يحصل احلال وتجديد ليهم و كنا احنا قعدنا عشرات السنين منعملش احلال وتجديد فيه عندنا فى القاهرة مواسير تحت الارض بقالها اكترمن 100 سنة ما تمش احلال وتجديد ليها
احمد بصيلة :وعندنا خرايط للحاجات دى ؟
د/عبد القوى خليفة:عندنا خرايط دلوقتى وعندنا ميزانية اللى هو مليار جنيه كل سنة بس دا لجميع محافظات الجمهورية ودا كله معظمه بيوجه لاحلال وتجديد الشبكات
ريهام ابراهيم:طب بتعرفوها ازاى يا دكتور ؟ ان المكان ده او المنطقة دى محتاجة للاحلال والتجديد من الواضح طبعا فيه ميزانية كبيرة ليها فانها تستحق ده ؟
د/عبد القوى خليفة:الحقيقة لواحنا عندنا ريكورد للكلام ده ومسجل كنا بنعرف ان الماسورة دى ركبت مثلا بقالها سنة او بقالها 50 سنة يعنى عمرها الافتراضى انتهى نروح على طول نغير المعلومة دى مش موجودة عندنا لان احنا عندنا مواسير عمرها اكتر من 100 سنة وماكنش فيه سجل لامتى تم تركيبها ؟ النهارده احنا بنعمل ايه ؟ بنشتغل بطريقه عكسية شوية احنا عندنا سجلات للمناطق اللى بيحصل فيها انفجارللمواسير عندنا سجلات للمناطق اللى بيجى منها شكاوى كتيرة جدا من المواطنين ان الضغط ضعيف اوالى اخره بنحدد بقى فين الناطق اللى بيجى منها هذه المشاكل المهندسين بيبتدوا يدرسوا هذه المناطق ويشوف هل دى فعلا ان المشاكل دى سببها ان المواسيرعمرها الافتراضى انتهى ؟ ولا مثلا الاقطار بتاعتها اقل ؟ لان ممكن جدا منطقة تكون الشبكة بتاعتها كانت مصممه على ان العمارات تكون دورين او 3 ادوارالنهاردة بقت مثلا ابراج 13 ، 15 دور مينفعش نفس الماسورة دى اللى كانت معمولة لدورين هتخدم ال15 دور فنضطر نعملها احلال رغم ان عمرها الافتراضى منتهاش
احمد بصيلة :دا السبب الاساسى ان فيه بعض المناطق بيبقى ضعف للمياه او موجودة المياه ولكن ضعيفة او بتتقطع ساعه وترجع
د/عبد القوى خليفة:دى كانت عندنا من سنتين فى مدينة نصرلما تبص تلاقى مناطق كتير فى وقت الضهر معندناش المياه دا كان سببه كده ان الشبكة الموجودة فى مدينة نصر طبعا كلنا نعلم جيدا انها وقت ما انشات كانت كلها عمارات 4 ادوارالنهاردة نادرا ما تلاقى عمارة 4 ادوار فطبعا دا تطلب منننا اننا عملنا احلال لى اطوال كبيرة جدا من الشبكات علشا نقدر نغطى هذه النقط
احمد بصيلة :المياه طبعا دا شىء اساسى ومهم جدا لاى واحد علشان نعمل عملية احلال وتجديد للمياه علشان متبقاش ضعيفة فى منطقة دا بيحدث فى وقت قد ايه ؟
د/عبد القوى خليفة:هى مشكلتنا دلوقتى فى الاحياء القديمة ووسط البلد الحقيقة ان احنا ناخد تصريح من المحافظة ان احنا نحفر شارع تخيل حضرتك شوارع فى وسط البلد زى شارع سليمان عندى خط مواسير فى هذا الشارع المفروض انى انا احفر هذا الشارع واغير هذا الخط دى مشكله كبيرة جدا وعاداتا بتاثر على حركة المرور المحافظة طبعا بيبقى صعب عليها جدا انها تدينا هذا التصريح ان احنا نروح على شارع نكسره فبنضطر طبعا يبقى الشغل بتاعنا بعد الساعه 12 بالليل ودا طبعا بيطول فترة التنفيذ يعنى كل اللى بيسمحولنا بيه من 12 بالليل لى 6 الصبح احنا الحقيقة كانت من اكبرالمشاكل اللى موجوده عندنا فى القطاع الموراد البشرية
ريهام ابراهيم:طب وتم التصرف معاها ازاى ؟ يعنى مثلا الاعتماد على الخريج اللى عايز ينزل سوق العمل بكل حماس الاعتماد بيبقى اكترعلى الخبرة اللى موجودة فى هذا المجال ؟
د/عبد القوى خليفة: احنا تعاملنا مع الموارد البشرية فى هذا القطاع من كذا اتجاه اولا الموجودين فى القطاع خلاص دول موظفين عندنا موجودين ولازم نرفع المهارت بتاعتهم ودا بيتم عن طريق مراكز التدريب عندنا 14 مركز تدريب بندربهم سواء كان تدريب فنى او مهنى او ادارى كل المستويات موجوده فدا بالنسبه للمجموعه اللى موجوده فى الشركات فيه مجموعات تانيه هتدخل لى الشركات دى بنتبتدى نعدها من دلوقتى احنا ابتدينا فعلا مع وزارة التربيه والتعليم نعمل مدارس فنية متخصصه فيه مجال مياه الشرب والصرف الصحى وفعلا افتتحنا منهم 3 مدارس حاليا فى مسترد فيه واحدة بنى سويف فيها واحده محافظة البحيرة فيها واحدة دول بيخرجوا فنيين متخصصين لتشغيل محطات مياه الشرب والصرف الصحى واصلاح الشبكات الجزء التانى ان احنا جامعة القاهرة كلية الهندسة فيه بروتكول بين الشركة القابضة وكلية الهندسة وفعلا فتحوا قسم بيخرج مهندسين متخصصين فى مياه الشرب والصرف الصحى والشركة القابضه طلعت من الميزانية بتاعتها منح بتعطى للمهندسين اللى هما هيدخلوا ويتخرجوا من هذا القسم
ريهام ابراهيم:يعنى اخدنا الدعم وكل حاجة تمام ازاى بيكون فيه ترشيد لهذه المياه وزى ما شوفنا ليها خطوات كتيرة جدا علشان توصل للنقاء المطلوب للمواطن ايه هى اوجه الدعم اللى بتقدموه ؟
د/عبد القوى خليفة:احنا الحقيقة فى كل الشركات عندنا في ادارات لتوعية المواطنين وليهم برامج وبيبتدوا التوعية دى من المدارس يعنى فيه برامج مشتركة بينا وبين المدارس احنا نجحنا مع وزارة التربيه والتعليم ان يبقى فيه مناهج دلوقتى بتدرس عن المياه فيه المدارس
ريهام ابراهيم:مناهج جديدة ؟
د/ عبد القوى خليفة:اه مناهج جديدة بتدرس فيه بعض المدارس كتجارب لى الطالب بيعرف المياه واهميتها
احمد بصيلة :الحاجات دى بتجيب نتيجة يا دكتور ؟
د/عبد القوى خليفة: والله بتجيب نتيجة فعلا
احمد بصيلة :يعنى احنا مثلا بعد الحملات اللى اتعملت دى هل استهلاك المواطن قل ؟
د/ عبد القوى خليفة: قلت والجمعيات الاهلية شغالة معانا كويس قوى فى موضوعات التوعية وفيه دلوقتى على فكرة اجهزة بسيطة جدا بتركب على الخلاطات والحنفيات دى بتقلل الفاقد لحوالى 70 % من الاستهلاك فاحنا موضوع التوعيه الحقيقة مهم جدا لان دا بيوفر لما انا اوفر النهاردة 70 % من الاستهلاك بتاعى او 50 % فدا بيمثل كم من الاستثمارات
ريهام ابراهيم:اكيد بنشكر حضرتك دكتورعبد القوى خليفة رئيس مجلس ادارة الشركة القابضة لمياه الشرب
د/عبد القوى خليفة:شكرا يا فندم
احمد بصيلة :تابعنا معاكم اهم الانجازات فى مياه الشرب قطاع مهم جدا مفيش حد لايستخدم المياه نسبة التغطية فى مصر وصلت لى 100% المرحلة القادمة هى مرحلة والجودة نشكركم والى اللقاء .