عبد المنعم حسين يكتب: اوعوا دمى ينشف

اوعوا دمى ينشف
من الشارع
او صورتى يمسحها
كداب بارع
انا عمرى ما كنت عميل
او بايع
ولا بلطجى مرازى
او صايع
ولا ناهش فى لحم بلدى
ولا طامع
انا اللى كنت شايف بكره
رائع
شايل هَم اللى عاطل
واللى جايع
بدرت عمرى حبة حب
فى المزارع
نفخت انفاسى فى مداخن
المصانع
جعلت عزمى جرس كنيسه
وادان جامع
انا كنت ضمير شايف
سامع
شايل حلمكم على كتفى
وطالع
خبيت خوفكم فى صدرى
وفتحت صدرى للرصاص
ولا خانع
وداريت على اللى من الخلف
بيتابع
ووقت ما كنتم بتشجعوا
كنت انا بس
المصارع
اوعوا تقتلونى تانى
بكلام له سم المعانى
مايع
بخنجر اتهامات ولا حد
يمانع
وانا لا كنت عميل
ولا بايع
ولا طامع
الرحمه على روحى
ما تصدقوا كداب
بارع
ولا تسيبوا دمى ينشف
من الشارع