نهى البلك تكتب: فلسطين .. ضُمى القدَم ..

يا بطن ماتشيل غير حلال ..
يا ام الرجال
يا جميلة وبتتعايقى بالخلخال..
ساترة البدن , والسحر فوق توبك
جنن عقول ,
واتجرأوا الأندال !
نايمة فى خدرك عدرا متطهّرة
على فرشة مغسولة
ومتبخّرة
الكحل فى عيونك..
وعشقك حلم
شعرك جدايل عِفّة متضفّرة..
ياشفيقة : متولى وقف ع الباب
يحمى الشرف, من ندل إسمه دياب
العرض تار ,
مايخلصه غير دم
والتار دا همّ , متولى شاله وغاب..
"إحسان" صبية , حسنها دبلان
م الفقر داب على جسمها الفستان
حبِّتْ بطل , هربان من الحواديت
غنّى لها بيت
ورسم لها الجدران !..
"إحسان " باعوها
واشتروا فيها
وجوّزوها ل(حيطة) تداريها
"محجوب" رضى يدارى على البهوات
وهمّا بيقاسموه
فى لياليها!..
" متولى " مات يا شفيقة
أو نايم !
دياب على بابك ,
شيطان حايم
دخل , ومتولى قفل له الباب
متولى بقى " محجوب
عبد الدايم " !
يا شَريفة وبتصرخى
بتستنجدى بينا
واحنا السبايا وحيط العجز مدارينا !
متكتِّفة إيدينا
بخيط من قلة الحيلة
وبحبل خوف
ملفوف فى رقابينا !
يا شَريفة ضُمى القدم
بدنك بيتعرّى
وحدك معاهم واحنا المحبوسين برّة
لو ألف حَمْل خبيث
برضه الشرف متصان
لو ألف حَمْل خبيث
راح تجهضه الحُرّة !!