مش طايقة حبيبي ومعجبة بزميلي

كنت بحب واحد من زمان بقالي 5 أو 6 سنين، كنا حاجة أساسية في حياة بعض، بس كان بيحصل خلافات كتير بيننا نروح سايبين بعض، بس كان أمر موثوق منه إننا بنرجع تاني، لأننا مابقيناش نعرف نعيش من غير بعض.
بس هو فيه حاجات كتير مش زيي، أو بمعنى أصح حاجات كتير نفسي فيها، بس طبعا كنت عارفة إن عمري ما هالاقي إنسان كامل، فكنت عادي متعايشة مع الوضع، مشكلته بقى يشوفني على طول غلط، مقيد حريتي، مش بيقتنع بكلامي.
طبعا أنا باجي على نفسي كتير علشان المركب تمشي، لكن طبعا مع الوقت زهقت، وكنا في آخر مرة رجعنا لبعض فيها كنا لاغيين كلمة نسيب بعض دي، وقعدنا فترة كبيرة جدا مش بنسيب بعض.
عدى الوقت واتعرّفت على واحد في العمل، يعني معرفة ماكانش وراها أي حاجة غير المنفعة، ومن خلال تعاملي معاه لقيت فيه كل الصفات اللي مالقيتهاش في حبيبي، بس طبعا ماكانش ينفع أميل له، كان كلامي معاه واضح إنه زمالة، بس هو كان سألني إنتي مرتبطة قلت له لأ، على أساس مايقولش لحد من اللي معانا في العمل، لأني مابحبش حد يعرف عني حاجة.
بس أنا وحبيبي دخلنا في فترة مش عارفين نتعامل مع بعض فيها، كل ما نصلح حاجة حاجة تانية تبوظ، مابقيناش زي الأول، وبقت علاقتنا متوترة، وفي نفس الوقت كنت باكلم زميلي في إطار إنه زميلي عادي، وطبعا الموضوع ده كان مضايق حبيبي، بس كنت باقول له مافيهاش حاجة ده زميلي.
وفي يوم اتخنقنا لدرجة مابقيناش طايقين بعض، وبقيت بادعي إن اللي فيه خير ربنا يكتبه ليّ ويصبّرني على كل حاجة، بعدها قال لي إحنا لازم نسيب بعض، قلت له موافقة وبعدها مازعلتش خالص ولا حسيت إني متضايقة، بعدها بيوم لقيت زميلي ده بيعترف لي إنه بيحبني من ساعة ما شافني بس كان مستني يعرفني أكتر.. طبعا أنا معجبة بشخصيته وبحاجات كتير فيه، بس هل أنا كده خاينة أو ماكنتش بحب حبيبي ده ولا إيه بالظبط؟ وأوافق على زميلي ده ولا أعمل إيه؟ أرجو الرد سريعا.
nono_bom


صديقتنا العزيزة.. الشكر ليكي على ثقتك الغالية في موقعنا "بص وطل" وعلى تواصلك معانا، تفتكري اللي يسيبوا بعض من وقت للتاني كل فترة كده وعلاقتهم متوترة ممكن تكون علاقة الزواج بينهم ناجحة؟ أولا العلاقة ما بينكم غير رسمية رغم مرور 5 أو 6 سنين زي ما بتقولي.. مستنيين إيه؟ طيب أصلا دلوقتي هو مالوش أي حقوق عليكي لأنه لا خطيبك ولا جوزك ومش من حقه يحاسبك! وبالتالي ما ينفعش تقولي دي خيانة ولا مش خيانة، أصلا تواصلك معاه في علاقة بدون مسئوليات من ناحيته دي خيانة لنفسك.
تاني حاجة لازم ما تطلعيش من مشكلة تقعي في مشكلة تانية، ما تضيعيش وقتك مع حد مش متحمّل للمسئولية، اللي بيحبك اطلبي منه إنه يتقدم لك وشوفي إيه اللي هيحصل؟! وهنروح بعيد ليه؟ لو غبتي عن الاثنين شهر يا ترى مين هيسأل عنك؟ مين هيتصل بيكي ويسأل عليكي؟ لازم تعرفي الإجابة على الأسئلة دي.
جرّبي تسيبي الحبل وتسيبي لهم حرية الاختيار، لو حد فيهم بيحبك فعلا هيرجع ويكلمك، ولو مش بيحبك يبقى خلاص هينسى، واللي هيرجع يكلمك فهميه إن الطريق الوحيد ليكي هو إنه يتقدم لك ويقابل أهلك.
جربي تبعدي لمدة شهر، لا تتصلي بيهم ولا تبتدي كلام مع حد فيهم، اسألي نفسك.. مين عاوزة تتجوزيه؟ مين عاوزاه يبقى أبو أولادك؟ وشوفي كل واحد هيعمل إيه، لو فيهم واحد جاد واتقدم لك وبيّن رجولة وإحساس بالمسئولية ناحية العلاقة، يبقي ساعتها تفكري فيه بجدية إنتي كمان، وتحبيه وتخلصي له وتدي له حياتك، أما لو بعدوا خالص إنتي كمان هتكوني هديتي شوية وتقدري تفكري، إنتي فعلا عاوزة إيه وهتكملي مع مين.
لكن صدقيني تضييع وقتك في علاقات حب بدون هدف أو خطة بيضرك إنتي أكتر ما بيضر الطرف الثاني، لأنك بعد شوية هتحسي إنك مستهلكة ومجروحة وماعندكيش رصيد من الصبر ولا الحب للعلاقة الجديدة.. خلي بالك على نفسك، وربنا يوفقك للي فيه الخير ليكي.

لو عايز تفضفض لنا دوس هنا