أهلي مصممين يبوظوا جوازتي!

أنا مشكلتي طويلة شوية.. أنا حبيت واحدة جدا وهي كمان حبتني ورحنا أنا وأهلي علشان أخطبها، وفعلا قرينا فاتحة وجيبنا جزء من الدهب، وقبل ما تلبسه أهلي عملوا معايا مشكلة وقالوا مش عايزين الموضوع ده خالص.
فضلت أحاول معاهم علشان يوافقوا صمموا إن الموضوع ده مايتمش مالاقيتش قدامي غير إني أقول لهم أنا هاخدها برضه مهما حصل، والدي قال روح خدها بس أنا مش ملتزم بأي حاجة من اللي هتتفق عليها ولا هاجي معاك، ووالدتي وإخواتي برضه حجتهم في الرفض إنهم ناس مش من مستوانا.
مع العلم إننا أسرة متوسطة الحال لا غنية ولا فقيرة، مالاقيتش قدامي حل غير إني أروح وأخطبها لوحدي، وبعد محاولات مع إخواتها -لأن باباها ومامتها متوفيين- وافقوا بس أهلي ماسابونيش في حالي مشاكل كل شوية معايا ومع أهلها وكل شوية يبعتوا لهم ناس يقولوا إحنا مش عايزين الجوازة دي، وإحنا مش عايزين الناس دول، فضلت في المشاكل دي سنة ونص.
وفي السنة ونص دول باحاول إني أصلح علاقتي مع أهلي وأوصل لحل يرضيني ويرضيهم، ودخلت ناس كتير عشان يحلوا بيننا من قرايبنا برضه مافيش فايدة، لما لاقيت إن مافيش أمل رحت عشان أتفق مع إخواتها على الفرح، ولما أهلي عرفوا زادت المشاكل أكتر..
وبسبب كده إخواتها قالوا إحنا مش هنقدر نكمل ولا هنقدر نسيب أختنا تعيش طول حياتها في مشاكل، وتكون مكروهة من الكل، ونهوا معايا الموضوع.. بس أنا بحبها ومش قادر أستغنى عنها أبدا، ولا قادر أبعد عنها ومش عارف أعمل إيه؟ وأهلي علاقتي بيهم دلوقتي متدمرة مش طايق أي حد منهم بعد اللي عملوه معايا.
أنا بحبها جدا ومش قادر أعيش من غيرها، ومش عارف أعمل إيه ولا أحل المشكلة دي إزاي، ولو حاولت أكلم إخواتها تاني مش هيوافقوا إلا وأهلي معايا، وأهلي عمرهم ما هيوافقوا.. أعمل إيه؟؟ أرجو الرد سريعا.

dragonsakr


الصديق العزيز.. في البداية نرحب بك صديقا ل"بص وطل" ونتمنى من الله أن نكون عند حسن ظنك بنا، عليك أن تعلم أيها الصديق أن رضاء أهلك أمر مهم في حياتك قبل زواجك، وأن تعلم أن طريقة تعاملك مع أهلك سبب رئيسي في تعقد الأمور بينك وبين الفتاة التي تريد أن تتزوجها، وهو ما تسبب في وقف الموضوع تماما.
الصديق العزيز عليك في البداية أن تصلح من الأمور بينك وبين أسرتك، وبعد أن تنصلح الأمور بينك وبينهم أعلمهم بالعقل بأنك تريد هذه الفتاة ولا تريد غيرها، وحاول أن تسمعهم حول أسباب رفضهم للأمر.. اسمع أسباب رفضهم كاملة وقم بتفنيدها جزئية جزئية، حاول أن تزيل عنهم أسباب الرفض، وربما يكون لديهم وجهة نظر سليمة حول أسباب هذا الرفض.
وفي الوقت نفسه حاول ألا تقطع الود مع أهل الفتاة التي تريد أن تتزوجها، وحاول تدريجيا أن تقنع أهلك بهذا الأمر، وفي النهاية هم لن يستمعوا لأحد إلا أنت، ولكن عليهم أن يقتنعوا بأنك أنت من تريد الفتاة، وليس كما يتصورون هم بأنك مضحوك عليك أو أنهم يطمعون فيكم لأي سبب كان.
الصديق العزيز.. رضاء أهلك في المقام الأول هو الأهم؛ لأنهم هم الباقون لك في حياتك، وغرضهم الأول والرئيسي هو أنت، لذا فعليك أن تسترضيهم وتحاول أن تقرب وجهة نظرك من وجهة نظرهم، وأن تتفهم موقفهم وتفهمهم موقفك؛ لأنك لو تزوجت وهم غير راضين عنك ستصبح الأمور والحياة أكثر تعقيدا فيما بعد، وستصل حياتك إلى مفترق طرق صعب.. فعليك أيها الصديق أن تعمل جهدا وبهدوء لتقريب وجهات النظر حتى تتطور حياتك نحو الأفضل..
وفقك الله لما فيه الخير والصواب وهداك إليه.

لو عايز تفضفض لنا دوس هنا