3 سنين ونص مخطوبة.. عايزة أتجوز بقى

السلام عليكم ورحمة الله وبركاته..
أولا باشكر الموقع جدا، وكذلك كل القائمين عليه؛ لأنهم بجد ناس رائعين..
وثانيا أنا كنت عايزة أتكلم في مشكلة؛ أنا مخطوبة من سنتين تقريبا وفاضل لي سنة وأتجوز بإذن الله، بس للأسف من فترة حصلت مشكلة بيني وبين خطيبي؛ لأنه فجأة عايز يؤجل الجواز نصف سنة فوق السنة دي، مع إن الشقة تقريبا خلصت والعفش هنكمله كمان شهور، ولما سألته عن السبب قال لي كده أحسن بلاش نتجوز في الصيف خلينا في الشتا، مع العلم إني اتنازلت إني ماستناش نتيجتي وأتجوز واتنازلت إني أزنق نفسي في الامتحانات علشان أجيب كل متطلبات الجواز، يعني ضحيت بحاجات كتير عشان نتجوز في الصيف الجاي زي ما كنا متفقين؛ بس هو فجأة عايز يؤجل، وزي ما قلت أسبابه مش منطقية بالمرة.
وكمان مامته بقت تكلّمني وحش مش زي الأول، وده علشان مشكلة حصلت بينها وبين أهلي؛ لأنهم اختلفوا على حاجة في الجهاز، وفي الآخر هما اللي شالوها فعلشان كده متضايقين مننا أوي، أنا مش عارفة أعمل إيه، أنا بحبه أوي وماقدرش أستغنى عنه، وقلت كذا مرة لو مش عايز تكمل خلاص، بس هو بيقول لي لأ أنا هاضحّي بأي حاجة علشان خاطرك مهما كانت، بس برضه مش عارفة ليه أجّل الجواز.. أنا بنت آه بس تعبت من طول فترة الخطوبة، أنا كده هاقعد 3 سنين ونص مخطوبة، نفسي أتجوز بقى بس مكسوفة أقول له كده؛ لأنه عارف من غير ما اتكلم وده اللي مضايقني أكتر؛ لأنه عارف وبرضه بيأجل.. أعمل إيه؟ نفسي حد يفهمني.. أنا آسفة إني طوّلت عليكم..
nemo
صديقتي العزيزة.. أقصر طريق بين نقطتين دائماً هو الطريق المستقيم، وأعتقد أنه من خلال رسالتك أنك استطعتِ أن تضعي يدك على سبب المشكلة، وهي اختلاف الأهل على بعض تفاصيل الجهاز والذي مع الأسف عادة ما يتسبب في الكثير من المشاكل، بل والأكثر أنه يتسبب في بعض الأحيان في إنهاء الزيجة كاملة.
ولكن في حالتك يبدو أن عريسك متضايق شويتين وربما يكون عايز يراضي والدته، بما أنها أظهرت ضيقها مما حدث بالفعل، إذن فمن الوارد جداً إنه يكون بيراضيها بهذه الطريقة، كما أنه من الممكن أن يكون هناك سبب آخر يخجل مثلاً أن يقوله لك بصراحة، كأن يكون لديه عجز مادي لن يساعده على إتمام الفرح في الموعد المحدد، أو أنه لن يتمكن من استلام العفش في الموعد المتفق عليه أيضاً بسبب عجز مادي، الأمر الذي يضطره لتأجيل استلام العفش، وبالتالي تأجيل الزواج، وأعتقد أنه لو كان أحد هذه الاحتمالات حقيقيا فلن يتمكن خطيبك من مصارحة أهلك؛ لأنه سيدخل في مشاكل جديدة معكم، وهذا آخر شيء يتمناه أي أحد.
ولذلك يا عزيزتي، عليك بالجلوس مع خطيبك والحديث معه بهدوء وصرامة، مؤكدة له أنه مهما كان السبب الحقيقي للتأجيل فإنك ستقفين معه وتساندينه، أما إذا استمر في هذا اللفّ والدوران فلن تستطيعي أن تكملي معه المشوار؛ لأنه من المفترض أن تبدأ الحياة الزوجية على الصراحة والشفافية، حتى لو كان أهلك لن يوافقوا على أسبابه فعليك أن تسانديه في حال صارحك بالحقيقة.
أما بالنسبة لحماتك فعليك أن "تجرّي معاها ناعم" كما يقولون؛ حتى تلين وتخبرك بالذي يضايقها منك، ولتخبريها بأن ما يفعله أهلك يفعلونه بدافع من حبهم لك لا أكثر، وأنها كانت ستفعل المثل في زواج ابنتها، وحاولي استرضاءها قدر الإمكان؛ لأن كل ما ستفعلينه معها سواء خير أم شر سيكون رصيداً لك عندما تصبحين حماة إن شاء الله.
وأخيراً يا عزيزتي استعيني بالله واسأليه الفرج وتحدّثي مع خطيبك؛ حتى تعرفي أسبابه الحقيقية، وأخلصي النية لله أنك ستقفين بجانبه إن كانت أسبابه قوية مقنعة، أما إذا كانت غير ذلك فلتشركي معك أحدا من عائلتك، ويفضّل أن يتمتع هذا الشخص بالحكمة واللين.
مع تمنياتنا لك بزواج سعيد وحياة موفقة.

لو عايز تفضفض لنا دوس هنا