هموت وأتجوز

السلام عليكم ورحمة الله وبركاته..أولا باشكر الموقع جدا، وكذلك كل القائمين عليه؛ لأنهم بجد ناس رائعين , وثانيا :أنا كنت عايزة أتكلم في مشكلة , أنا مخطوبة من سنتين تقريبا وفاضل لي سنة وأتجوز بإذن الله
، بس للأسف من فترة حصلت مشكلة بيني وبين خطيبي؛ لأنه فجأة عايز يؤجل الجواز عدة شهور، مع إن الشقة تقريبا خلصت والعفش هنكمله كمان فترة بسيطة، ولما سألته عن السبب قال لي كده أحسن بلاش نتجوز في الصيف اللي جاي خلينا في الشتا، مع العلم إني اتنازلت إني ماستناش نتيجتي وأتجوز واتنازلت إني أزنق نفسي في الامتحانات علشان أجيب كل متطلبات الجواز، يعني ضحيت بحاجات كتير عشان نتجوز قريب زي ما كنا متفقين من الأول خالص , بس هو فجأة عايز يؤجل، وزي ما قلت أسبابه مش منطقية بالمرة.
وكمان مامته بقت تكلّمني وحش مش زي الأول، وده علشان مشكلة حصلت بينها وبين أهلي؛ لأنهم اختلفوا على حاجة في الجهاز، وفي الآخر هما اللي شالوها فعلشان كده متضايقين مننا أوي، أنا مش عارفة أعمل إيه، أنا بحبه أوي وماقدرش أستغنى عنه، وقلت كذا مرة لو مش عايز تكمل خلاص، بس هو بيقول لي لأ أنا هاضحّي بأي حاجة علشان خاطرك مهما كانت، بس برضه مش عارفة ليه أجّل الجواز.. أنا بنت آه بس تعبت من طول فترة الخطوبة، أنا كده هاقعد 3 سنين ونص مخطوبة، نفسي أتجوز بقى بس مكسوفة أقول له كده؛ لأنه عارف من غير ما اتكلم وده اللي مضايقني أكتر؛ لأنه عارف وبرضه بيأجل.. أعمل إيه؟ نفسي حد يفهمني.. أنا آسفة إني طوّلت عليكم..
أقصر طريق بين نقطتين دائماً هو الطريق المستقيم، وفي إعتقادي أنك استطعتِ أن تضعي يدك على سبب المشكلة ، وهي اختلاف الأهل على بعض تفاصيل الجهاز , ولكن في حالتك يبدو أن خطيبك في حالة ضيق من السبب الذي دفع والدته للعصبية أو الإنفعال على أسرتك ، وربما ما ترينه عليه من سلوك غير مبرر ى أكثر من مراضاة لوالدته أو نوع من المشاركة الوجدانية , وربما يكون هناك سبب آخر يخجل من البوح به بوضوح , مثل العجز المادي الذي من أجله فكر في التأجيل , ولذلك .. عليك بالجلوس مع خطيبك والحديث معه بهدوء لكن بشئ من الجدية ، مؤكدة له أنه مهما كان السبب الحقيقي للتأجيل فإنك ستقفين معه وتساندينه , بينما إذا فقد رده المنطق , أنصحك بتدخل والديك , في مثل هذه الأمور يفضل تدخل الأهل ليصبح للجلسة إحترامها ويُجبر الخطيب على الكلام بصراحة أكبر .