دبور بيزن على خراب عشه

أنا فتاة عندي 24 سنة، مشكلتي إني مخطوبة لشخص بيحبني أوي أوي، وبيعمل لي أي حاجة ممكن أطلبها حتى لو على حساب تعبه؛ بس المشكلة إني ساعات كتير باحس إني مش بحبه، ومش عايزة يبقى في حياتي، وباتضايق من اهتمامه الزيادة عن اللزوم على الرغم من إنه لما بيزعل مني أنا باكون مخنوقة جدا، ومش طايقة نفسي.. مش عارفة أعمل إية؟ أفضل معاه لأنه كويس وبيحبني ولا أسيبه عشان ما اظلمهوش؟؟
ف

واضح من كلامك أنكم مخطوبين من فترة طويلة شوية، وده خلاكي تحسي بالملل أو بمعنى تاني إنتي حاسة إنه كده كفاية، وعايزة تغيّري العلاقة دي وبتحاولي تخلقي مبررات.

جايز يكون خطيبك بيحبك أكتر ما إنتي بتحبيه؛ بس مين قال لك إنك كده بتظلميه؟ أنا شايفة إنه مش مظلوم ولا حاجة؛ واضح من كلامك إنه إنسان كويس وجميل وطيب وبيحبك، ومخلص في حبه ليك، وبيعمل كل شيء عشان يخليكي سعيدة؛ حتى لو هيتعبه وبيستمد سعادته من سعادتك.

في الحقيقة إنتي مش بتظلميه، إنتي بتظلمي نفسك لأنك مش قادرة تحبيه ولا تسعديه أو تكوني سعيدة معاه وعلى طول مخنوقة ومتضايقة.

يا صديقتي الجميلة.. لازم تفهمي إن الحب مش مجرد كلام ولا مشاعر مؤقتة، الحب تفاصيل كتير متلازمة ومترابطة، اسألي نفسك إذا كنتي بتحبيه قدر ما بيحبك، ولو لأ اسألي نفسك إيه السبب؟ فيه حاجة معينة مضايقاكي؟ وهل هو يقدر يغيرها؟

لو مش عاوزة تظلميه وتظلمي نفسك، قربي منه وحبيه وإدي نفسك فرصة تفتكري كل التفاصيل والحاجات الحلوة بينكم؛ لأنك هتظلمي نفسك أكتر لو سيبتي إنسان بيحبك وبيقدّرك لمجرد إحساسك بالملل أو عدم قدرتك على الحب بسبب الخوف أو أي سبب تاني.

عشان كده هاقول لك: ما تستعجليش على نفسك وعلى خطيبك إنتي بتحبيه فعلا؛ بس عندك ملل من حالة الخطوبة أو الانتظار اللي إنتي عايشاها ونصيحتي ليكي إنك أولا تهتمي بيه نفس القدر من الاهتمام اللي هو بيهتم بيكي، ثانيا الجواز هيغير حالكم وساعتها هيحصل توازن في العلاقة بشكل ممتاز.