د.محمد أبو الغيط: الفاكهة أساسية لريجيم مرضى السكر!!

السلام عليكم أنا عندي مشكلة ومش عارفة أوصل فيها لحل يا ريت ألاقي حل عندكم لأني بصراحة تعبت.. أنا عندي 23 وطولي 155 ووزنى يعني لما زاد بالعافية وصل 40 وعلطول ثابت على 38 و39 ورحت لدكاترة كتير، منهم قال العبي رياضة ومنهم من عمل لي فاتح للشهية، وعملت تحاليل وقالوا لي مافيش عندي حاجة. قلت لهم أروح لدكاترة غدد قالوا إنهم بيضحكوا على الناس والرياضة طبعا مش متاحة لي إني أروح جيم طيب أعمل إيه بجد أنا زهقت لأن جسمي مش بيتغير وثابت أنا آسفة على الإطالة ويا ريت ألاقي حل يريحني.
الصديقة العزيزة..
لو التحاليل والكشوفات أثبتت إن مافيش مشكلة عضوية عندك.. يبقى أحسن حل هو إنك تزوّدي في كميات الأكل وتاخدي خمس وجبات في اليوم، وتدخلي في أكلك الحاجات اللي فيها سعرات حرارية عالية زي الحلاوة والعسل وغيرها ده بجانب ممارسة التمارين الرياضية لبناء الجسم.. ولازم يكون عندك إرادة وصبر وتعرفي إنك لو زدتي كيلو أو اثنين في الشهر فده معدل كويس جداً.
أنا عندي سؤال لدكتور محمد وهو إني عندي السكر وعمري 23 طولي 160 ووزني 78.. وعندي سكر نوع 1.. أنا بقالي 3 أسابيع باعمل ريجيم المفروض إني في الفترة دي أخس 7 كيلو بس أنا مش خسيت غير 4 كيلو بس.. أنا باخد كمان أورليستات هو المفروض بيعمل steatorrhea بس مش بيعمل معايا كده.. مش عارفة بقى هو طبيعة جسمي كده.. ولا ده بسبب السكر.. والمفروض المعدل للنزول الطبيعي لمريض السكر بالنظام اللي ماشية عليه يبقى إيه؟
الصديقة العزيزة..
يمكنك اتباع ريجيمات عادية مع إضافة 1/2 رغيف بلدي لكل وجبة وفاكهة بعد الوجبة بثلاث ساعات مع ممارسة الرياضة ويمكن الاستعانة بدواء ميريديا.
وللعلم مع العلاج بالأنسولين معدل التخسيس يكون عادةً 2-4 كيلو في الشهر وليس من الممكن إنه يكون 7 كيلو؛ لأن بكده المعدل هيكون أسرع من العادي.