لكل عشّاق الشيكولاتة هنقدِّم لكم النهارده على "سفرة دايمة" طريقة سهلة لعمل كيكة بصوص الشيكولاتة.. جرّبيها وابعتي لنا رأيك فيها. كيكة بصوص الشيكولاتة المقادير: 2 كوب دقيق 2 كوب سكر 3⁄4 كوب كاكاو 1 1⁄2 كوب لبن 2 ملعقة صغيرة قرفة ملعقة صغيرة بيكينج باودر 1 1⁄2 ملعقة صغيرة فانيليا 1⁄4 ملعقة صغيرة ملح كوب زبدة 2 بيضة صوص الشيكولاتة: 1⁄2 كوب قشطة ملعقة كبيرة عسل ملعقة صغيرة فانيليا شيكولاتة خام الطريقة: 1- حطّي الدقيق والبيكينج باودر والقرفة والسكر والملح وقلّبيهم كويس. 2- اعملي خليط الكاكاو (حطي الزبدة واللبن والكاكاو مع بعض على نار هادية، وقلّبيهم كويس أوي على النار لحد ما المكونات تتجانس). 3- حطّي خليط الكاكاو السخن على خليط الدقيق، واخفقيهم بالمضرب الكهربائي على سرعة متوسّطة، وبعد كده ضيفي البيض والفانيليا لحد ما المكونات تتجانس. 4- صبّي الخليط ده في قالب الكيك بعد ما تدهنيه بالزبدة، ورشّي عليه الكاكاو، ودخلي الخليط الفرن لمدة 10 دقائق، واختبريه بطرف السكين. 5- لعمل صوص الشيكولاتة؛ حطّي الشيكولاتة الخام في حمام مائي ساخن، وحطّي عليها القشطة والعسل والفانيليا، وقلّبي كويس لحد ما المكونات تتجانس. 6- حطّي الكيكة في طبق التقديم، وحطي عليها صوص الشيكولاتة.. وبالهنا والشفا.
وبكده تكون خلصت وصفتنا النهارده.. نتمنّى إنكم تجرّبوها وتبعتوا تقولوا لنا رأيكم فيها.. وكمان لو عندك أي وصفة عايزة تعرفيها ممكن تبعتي لنا.. وإحنا هنقدّمها لك في أقرب وقت..