أتمنى إن كل الوصفات اللي بنقدمها لكم في "سفرة دايمة" تكون عجبتكم، وتكونوا جربتوها بنفسكم... والنهارده هنكون معاكم خطوة بخطوة وهنحضر مع بعض عزومة جامدة جداً.. والعزومة مكوّنة من المشروب، والسلطة، والشوربة، والطبق الرئيسي، وطبق الحلو... تعالوا نشوف هنعمل أصناف أكل إيه النهارده...
******************* قهوة مثلّجة بالشيكولاتة قهوة مثلّجة بالشيكولاتة المقادير: * كوب لبن * ملعقة كبيرة بُن مطحون أو كاكاو * 1/4 كوب ثلج مجروش * 2 ملعقة كبيرة آيس كريم شيكولاتة * قطع شيكولاتة للتزيين الطريقة: 1- سخني اللبن على النار وضيفي عليه البن أو الكاكاو، وقلبيهم مع بعض لغاية ما يوصلوا لدرجة الغليان، وبعد كده ارفعي الخليط من على النار وسيبيه يبرد. 2- اضربي خليط اللبن والبنّ مع الثلج والآيس كريم في الخلاط لغاية ما كل المكونات تتجانس مع بعضها، وبعد كده صبيه في كاسات التقديم، وممكن تزينيه بإنك ترشي كاكاو على الوش أو بقطع من الشيكولاتة.
******************* ممكن تزيني الطبق عند التقديم بالحمص المسلوق وزيت الزيتون سلطة الحمص المقادير: * كوب حمص مسلوق * 1/2 كوب طحينة * عصير ليمونة * كمون * ملح * ماء الطريقة: نفرم كل المكونات دي في الخلاط لغاية ما تبقى ناعمة تماماً، ومفيش فيها أي قطع صحيحة، وبعد كده نشيل طبق السلطة في الثلاجة علشان يبرد وبعد كده نقدمه، وممكن نزين الطبق عند التقديم بكمية من الحمص المسلوق وزيت الزيتون.
******************* شوربة مفيدة جداً شوربة كريمة البروكلي المقادير: * 1/4 كيلو بروكلي * ثمرة بطاطس مقشرة * 2 كوب كريمة لباني أو قشطة * 6 أكواب شوربة فراخ * بصلة متوسطة مفرومة * 1/4 كيلو كرفس مفروم * ملح وفلفل وكمون الطريقة: 1- نجيب البروكلي ونقطّعه لقطع صغيرة، ونقطّع البطاطس لمكعبات صغيرة ونضيفهم على الشوربة، ونضيف معاهم البصل المفروم والملح والفلفل ورشة الكمون، ونسيبهم على النار لغاية ما يغلوا، وبعد كده نقلل النار على الشوربة ونسيبهم لغاية ما يستووا. 2- بعد ما نتأكد إن البروكلي استوى، نضرب الشوربة في الخلاط لغاية ما كل مكوناتها تتجانس، ونضيف معاها كمية من الكريمة اللباني، وبعد كده نرجّع الشوربة على النار ونضيف عليها باقي كمية الكريمة اللباني والكمون. 3- بعد كده نصب الشوربة في أطباق التقديم، ونزيّنها بقطع البروكلي الأخضر.. وبالهنا والشفا
******************* طبق سوري طعمه تحفة فتة الحمص باللحمة الطبق الرئيسي عندنا النهارده هو طبق سوري، وبجد طعمه تحفة وهيعجبكم أوي لو جربتوه... المقادير: * 4 أكواب حمص مسلوق ومهروس ومتبّل * 2 ملعقة صغيرة زيت زيتون * ملعقة كبيرة صنوبر * كيس عيش شامي "موجود في السوبر ماركت" * 2 ملعقة كبيرة عصير ليمون * 1/2 كوب من البقدونس المفروم * ماء سلق الحمص * لحمة مفرومة معصّجة أو قطع لحمة محمرة الطريقة: 1- هاتي الطبق اللي هتقدمي، وحطي فيه الحمص المهروس بعد ما تتبليه بالملح والكمون والبهارات. 2- بعد كده هاتي 3 أرغفة عيش شامي وقطعيهم لقطع صغيرة وحمّصيها في الفرن، وبعد كده ضيفيها على الحمص المهروس. 3- حمري الصنوبر في زيت الزيتون لغاية ما يبقى لونه ذهبي. 4- اخلطي اللحمة المفرومة أو قطع اللحمة المحمرة مع البقدونس، وافرديها على العيش، وبعد كده وزعي الصنوبر على الوش.. وبالهنا والشفا.
******************* ممكن تزيني سطح الكيكة بالكريم شانتيه وقطع المانجو كيك بجيلي المانجو المقادير: * كوب زبدة * 2 كوب سكر * كيس جيلي بالمانجو * 4 بيضات * 1/2 كوب مانجو مهروس أو مضروب في الخلاط بدون ماء * 3 إلا ربع كوب دقيق * 2 ونصف ملعقة صغيرة بيكينج باودر * ملعقة صغيرة فانيليا * كوب لبن للحشو: * جيلي مانجو بارد (في قالب بنفس مقاس قالب الكيك) الطريقة: 1- اخلطي الزبدة مع السكر بالمضرب لغاية ما يبقى الخليط عامل زي الكريمة، وبعد كده ضيفي حبيبات الجيلي مع الاستمرار في الخلط، لغاية ما كل المكونات تتجانس مع بعضها. 2- بعد كده ضيفي بيوريه المانجو والبيض مع الاستمرار في الخلط. 3- اخلطي الدقيق مع البيكينج باودر والفانيليا، وبعد كده ضيفيهم للخليط السابق مع الاستمرار في الخلط، وبعد كده ضيفي اللبن واضربي كل المكونات مع بعضها لغاية ما تحسي إن كلها تجانست. 4- هاتي الصينية اللي هتعملي فيها الكيك وادهنيها بالقليل من الزبدة وشوية دقيق، وبعد كده تخلصي من الدقيق الزيادة، وبعدين صبي فيها خليط الكيك اللي جهزتيه، وساوي السطح. 5- دخلي الصينية في فرن ساخن على درجة حرارة 180، وسيبيها تستوي لمدة نصف ساعة أو لغاية ما تحسي إنها استوت. 6- طلعي الكيكة من الفرن وسيبيها لغاية ما تبرد خالص تماماً، وبعد كده اقسميها بالعرض إلى 3 طبقات متساوية في الارتفاع. 7- حطي أول طبقة من الكيكة في طبق التقديم، وافردي عليها طبقة من جيلي المانجو، وبعد كده حطي طبقة تانية من الكيكة وكرري نفس الحركة مع باقي الطبقات، وبعد كده ممكن تزيني سطح الكيكة بالكريم شانتيه وقطع المانجو وقدميها.. وبالهنا والشفا.
وبكده تكون خلصت عزومتنا النهارده أتمنى إنها تكون عجبتكم وتجرّبوا كل الوصفات اللي قدّمناها وتبعتوا تقولوا لي النتيجة كانت إيه ********************* للتعرف على مزيد من الوصفات الشهية اضغط هنا "سفرة دايمة" *********************
