يوم الجمعة بتحلى اللمة على الأكل.. علشان كده حبينا نشاركك اللمة الحلوة دي.. ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا.. ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو.. علشان تنوّعي لعيلتك.. وتبهريهم بأكلاتك الجامدة.. تعالي بقى نشوف هنعمل إيه النهارده.. ************************ عصير التفاح بالتوت المقادير 6 ثمرات تفاح مقشرة ومقطعة لشرائح نصف لتر عصير توت "متوافر في السوبر ماركت" سكر عصير التفاح الطريقة 1- ضعي التفاح وعصير التوت في وعاء، وحطي عليهم كمية من الماء بحيث تغطي التفاح الموجود في الوعاء، وضعيهم على النار وسيبيهم لغاية ما يغلوا. 2- بعد ما المكونات تغلي على النار، قللي النار شوية، وسيبيهم على النار لمدة 10 دقائق أو لغاية لما تحسي إن التفاح استوى، وفي الوقت ده أحضري معلقة خشبية وابدئي اهرسي التفاح كويس جداً، واستمري على كده لغاية ما تلاقي بقى عندك خليط سميك متجانس. 3- ارفعي الخليط من على النار، وصفيه باستخدام المصفاة في إناء آخر، وممكن تستخدمي المعلقة الخشبية في إنك تضغطي على بواقي الخليط الموجودة على المصفاة علشان تنزل كل العصير اللي فيها. 4- دوبي فيه كمية من السكر على حسب الطعم اللي إنتِ عايزاه، وبعد كده حطي العصير في الثلاجة وسيبيه لغاية ما يبرد، وعند التقديم صبيه في كاسات العصير وممكن تزينيها بفراولة أو توت.. وبالهنا والشفا. ************************* سلطة البطاطس سلطة البطاطس بالمايونيز المقادير 3 ثمرات بطاطس مسلوقة 5 فصوص ثوم مفروم 2 معلقة مايونيز ملح وفلفل عصير ليمونة الطريقة قشري البطاطس وقطعيها لقطع صغيرة، وبعد كده اهرسيها كويس أوي مع الثوم المفروم، وبعد كده ضيفي المايونيز والملح والفلفل وعصير الليمون وقلبيهم كلهم مع بعض، وممكن تضربيهم في الخلاط علشان المكوّنات كلها تتجانس مع بعض، وبعد كده حطيها في طبق التقديم وممكن تزينيها بأعواد البقدونس.. وبالهنا والشفا. ************************ شوربة خضار على الطريقة الإيطالية شوربة خضار على الطريقة الإيطالية المقادير 2 كوب كرفس مقطع قطع صغيرة 1/4 كوب كرات مقطع لقطع صغيرة 1/2 كوب جزر مقطع قطع صغيرة 1/2 كوب كرنب مقطع قطع صغيرة 1/2 كوب بطاطس مقشرة ومقطعة لمكعبات 4 ثمرات طماطم ومقطعة مكعبات صغيرة 1/2 كوب كوسة مقطعة لمكعبات صغيرة كوب فاصوليا بيضاء مسلوقة 1/2 كوب بصل مفروم 6 فصوص ثوم مفروم 2 معلقة كبيرة بقدونس مفروم 2 معلقة كبيرة زيت زيتون 8 أكواب شوربة لحمة ملح وفلفل الطريقة 1- ضعي زيت الزيتون في وعاء على نار متوسطة، وضيفي عليه البصل والكرفس والكرات والجزر والثوم والكرنب والبطاطس والطماطم، وقلبيهم كلهم مع بعض كويس جداً، بس خلي بالك إنك تحطي البطاطس في الأول؛ لأنها بتحتاج لوقت أطول شوية في السوى عن باقي الخضار، وبعد كده حطي باقي الخضار تدريجياً. 2- أول لما تحسي إن الخضار ابتدى يذبل، ضيفي الكوسة والفاصوليا المسلوقة، وبعد كده ضيفي الشوربة، وسيبيهم على النار لغاية ما الشوربة تغلي. 3- بعد كده تبّلي الشوربة بالملح والفلفل، وقدميها ساخنة وممكن كمان تضيفي لها شعيرية بحيث تبقى وجبة متكاملة فيها كل العناصر، وعند التقديم ممكن تزينيها بوضع أي نوع من الأعشاب على الوش زي الريحان أو الزعتر أو النعناع.. وبالهنا والشفا. ************************* ستيك اللحم بالمشروم ستيك اللحم بالصلصة البيضاء والمشروم المقادير 1/2 كيلو لحم بقري مقطع لشرائح علبة مشروم "متوافر في السوبر ماركت" شرائح جبنة شيدر أو جبنة رومي ثمرة فلفل أخضر مقطّعة لقطع صغيرة ثمرة طماطم مقطعة لقطع صغيرة زيت وزبدة ملح وفلفل مقادير الصلصة البيضاء 4 معالق كبيرة دقيق أبيض 2 كوب لبن زبدة ملح وفلفل أبيض ثوم مفروم جبنة كيري أو نستو "اختياري" الطريقة 1- تبلي اللحمة بالبصل والملح والفلفل، وسيبيها شوية لغاية ما تتشرّب من التتبيلة بتاعتها. 2- أحضري طاسة وحطي فيها شوية زيت وزبدة، وحطيها على النار، وابدئي شوّحي فيها قطع اللحم لغاية ما لونها يبدأ يميل للإحمرار، وبعد كده قلّبي شريحة اللحم على الوجه الآخر واستمري على كده لغاية ما تحسي إن اللحمة استوت. 3- أحضري طاسة تانية، وحطي فيها كمية من الزيت والزبدة علشان تشوّحي فيها المشروم وبعد ما يدخل في السوى ضيفي الفلفل والأخضر والطماطم، وقلبيهم كلهم مع بعض. 4- لتحضير الصلصة البيضاء: ضعي الدقيق واللبن والثوم والملح والفلفل الأبيض والجبنة مع بعض في الخلاط، واضربيهم كويس مع بعض لغاية ما تحسي إن كل المكوّنات تجانست مع بعض، وممكن تزوّدي ميه لو احتجتي، وبعدين اسكبي الخليط ده في وعاء وحطيه على نار متوسطة مع التقليب المستمر لغاية ما تحصلي على القوام اللي إنتِ عايزاه. 5- اخلطي الصلصة البيضاء مع خليط المشروم والفلفل الأخضر والطماطم وقلبيهم كلهم مع بعض كويس على نار هادية لمدة 10 دقائق. 6- في النهاية ضعي الخليط ده على اللحمة الستيك في طبق التقديم، وممكن تقدمي معاه مكرونة بالصلصة أو أرز أبيض.. وبالهنا والشفا. ************************* سوفليه الموز سوفليه الموز والطبق ده يُفضّل إنك تعمليه قبل التقديم على طول.. المقادير 2 ثمرة موز 2 كوب لبن 4 معالق كبيرة سكر 6 معالق كبيرة دقيق 6 بيضات معلقة كبيرة زبدة 2 معلقة كبيرة سكر لوضعه في القوالب الطريقة 1- سخني اللبن في وعاء على النار، لغاية ما يبدأ في الغليان وبعد كده ابعديه عن النار. 2- اخلطي الدقيق مع السكر وقلبيهم مع بعض كويس. 3- أحضري البيض وابدئي افصلي الصفار عن البياض. 4- اضربي صفار البيض بالمضرب الكهربي لغاية ما تلاقي إن لونه بقى أصفر باهت، وبعد كده ضيفيه على خليط الدقيق والسكر. 5- ضيفي قليل من اللبن الساخن على الخليط وقلبيه كويس، وبعد كده ضيفي الخليط كله على باقي اللبن، وحطي الخليط كله على نار متوسطة مع التقليب المستمر. 6- بعد لما تحسي إن الخليط تجانس مع بعضه ارفعيه من على النار وسيبيه على جنب لغاية ما يبرد. 7- في الوقت ده، اهرسي الموز كويس لغاية ما يبقى ناعم جداً، وبعد كده ضيفيه على الخليط اللي إنتِ عاملاه، وقلّبي كل المكوّنات مع بعضها كويس. 8- اضربي بياض البيض بالمضرب الكهربي كويس لغاية ما تلاقي إن حجمه زاد وبقى شبه الكريمة. 9- ضيفي بياض البيض بعد ما تضربيه على الخليط السابق، وقلّبي كويس وبالراحة جداً علشان تحافظي على الهواء اللي فيه. 10- أحضري القوالب اللي هتعملي فيها السوفليه، وادهنيها بالزبدة ورشي عليها سكر، وبعد كده ابدئي قسمي الخليط على القوالب، ودخليهم الفرن في درجة حرارة متوسطة، وسيبيهم في الفرن لمدة ربع ساعة أو لغاية ما تحسي إنه استوى، وبعد كده طلعيه وقدميه على طول وبالهنا والشفا. وفي النهاية نتمنى إن عزومة النهارده تكون عجبتِك.. وتجربي كل الوصفات وتبعتِ تقولي لنا على النتيجة.. وكمان لو عندك وصفة حلوة عايزة تشتركي بها معانا.. ممكن تبعتيها لنا على لينك... "ورينا شطارتِك"
