"بيكاتا بالمشروم" و"كيكة بالكراميل" في عزومة "بص وطل"

يوم الجمعة بتحلى اللمة على الأكل..
علشان كده حبينا نشاركك اللمة الحلوة دي..
ونكون معاكي خطوة بخطوة وإنتي بتحضّري لأحلى وأجمل عزومة في الدنيا..
ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوعي لعيلتك، وتبهريهم بأكلاتك الجامدة..
تعالي بقى نشوف هنعمل إيه النهارده..
***********************
ميلك شيك بالفراولة
ميلك شيك بالفراولة
المقادير
2 كوب فراولة مقطعة شرائح
3 أكواب أيس كريم بالفانيليا
كوب حليب
الطريقة
اخلطي كل المكونات مع بعضها في الخلاط، وقدميها ساقعة.
***********************
سلطة البنجر
سلطة البنجر
المقادير
كيلو بنجر
1/4 كوب زيت (ذرة أو زيتون على حسب رغبتك)
4 ملاعق سكر
2 ملعقة كبيرة خل
ملح وفلفل أسود والكمية على حسب الرغبة
الطريقة
1- اغسلي البنجر واسلقيه وبعد كده قطعيه شرائح صغيرة.
2- أحضري طبقا عميقا واخلطي فيه بالزيت مع الخل والسكر والملح والفلفل، وبعد كده حطي عليهم البنجر المسلوق وقلبيهم كويس مع بعض، وقدميه وبالهنا والشفا.
***********************
شوربة المشروم
شوربة المشروم
المقادير
شوربة
بصلة مقطع صغيرة
زبدة
4/1 كوب مشروم
شعيرية
ملعقة كبيرة نشا
كوب ماء
مكعب مرقة دجاج
4/1 ملعقة صغيرة حبهان
4/1 كوب لبن
الطريقة
1- شوحي البصل في الزبدة لغاية ما لونها يبقى ذهبي.
2- ضيفي المشروم والشعرية على البصل وقلبيهم مع بعض، وبعد كده ذوبي النشا في كوب الماء، وحطيها على المشروم والبصل والشعيرية.
3- بعد كده بتضيفي مرقة الدجاج والحبهان، وبعد ما تحسّي إن الشعيرية استوت، ضيفي اللبن.
4- أول ما الخليط يغلي ارفعيه من على النار، وقدميه.. وبالهنا والشفا.
***********************
بيكاتا بالمشروم
بيكاتا بالمشروم
المقادير
1/2 كيلو لحم مقطعة شرائح
كوب كريمة لباني "موجودة في السوبر ماركت"
كوب مشروم "موجود في السوبر ماركت"
بصلة مقطعة صغير جداً
1/2 كوب سمن أو زيت
ملح وفلفل أسود
2 كوب ماء
دقيق
الطريقة
1- تبّلي اللحمة بالملح والفلفل. وبعد كده غطيها بالدقيق.
2- هاتي طاسة وسخّني فيها الزيت أو السمن، وشوحي فيها اللحمة مع الدقيق لغاية اللحمة ما تأخذ اللون الذهبي.
3- ارفعي اللحمة من الطاسة وبعد كده حطي البصل لغاية لونه ما يبقى ذهبي، وبعدين ضيفي عليه المشروم، واستمري في التقليب لغاية ما المشروم لونه يبدأ يتغير.
4- بعد كده ضيفي الكريمة وقلبي الخليط لمدة وبعدين بتضيفي الماء.
5- أول ما الخليط يبدأ يغلي، ضيفي اللحمة مرة تانية، وممكن تحطي معاها مكعب مرقة الدجاج.
6- سيبي البيكاتا على النار لمدة نصف ساعة تقريباً أو لغاية ما تحسي إن الصوص بتاع اللحمة تماسك مع بعضه.. وبعد كده قدميها وبالهنا والشفا.
***********************
كيكة بالكريم كراميل
كيكة بالكريم كراميل
مقادير الكريم الكراميل
كوبان ونصف سكر
4 ملعقة كبيرة ماء
5 بيضات
2 كوب حليب
ملعقة صغيرة فانيليا
مقادير الكيك
بيضتين
ملعقة صغيرة فانيليا
كوب سكر بودرة
2 ملعقة كبيرة حليب
1/2 كوب زيت
كوب دقيق
1/2 ملعقة صغيرة بيكينج بودر
للتزيين
ممكن تستخدمي أي فاكهة تحبيها.
الطريقة
1- سخني الفرن على درجة حرارة 180، وسيبيه لغاية ما تحضري الكيكة.
2- علشان تجهزي الكراميل، هاتي وعاء صغير وحطي فيه كوبين سكر والميه وحطيهم على النار متوسطة، وسيبيهم لغاية ما تحسي إن السكر داب تماماً، وإن اللون بقى ذهبي وبعد كده شيليه من على النار، وحطيه في قاع القالب اللي هتعملي فيه الكيك، وسيبيه على جنب لغاية ما يبرد.
3- علشان تحضّري الكريم، اضربي الخمس بيضات في وعاء عميق بالمضرب الكهربي بس خلي بالك إن المضرب يكون على سرعة متوسطة، وفي أثناء ما إنتي بتضربي البيض بالمضرب ضيفي السكر "نصف كوب" واللبن "2 كوب" والفانيليا على البيض، مع الاستمرار في الخفق لغاية ما تحسي إن الخليط تجانس مع بعضه.
4 -صبي الكريم فوق الكراميل البارد اللي حطيناه في قالب الكيك.
5- لتحضير الكيك:
- اضربي البيض في وعاء عميق بالمضرب الكهربي على سرعة متوسطة، وبعدين ضيفي الفانيليا والسكر البودرة مع الاستمرار في الخفق لغاية ما تحسي إن المكونات تجانست مع بعضها.
- ضيفي اللبن والزيت على الخليط السابق مع الاستمرار في الخفق.
- اخلطي الدقيق مع البيكينج بودر، ويُضاف للخليط تدريجياً ويُستمر في الخفق لغاية ما المكونات تتجانس مع بعضها.
6- صبي خليط الكيك فوق الكريم والكراميل ووزَّعيه بطريقة متساوية في قالب الكيك.
7- حطي قالب الكيك في قالب تاني أكبر فيه ميه "حمام ماء" ودخليهم الفرن ، وسيبيه لمدة ساعة أو لغاية ما تحسي إن الكيكة استوت.
8- بعد ما تخرجيه من الفرن، سيبي الكيكة تبرد شوية، وبعدين حطيها في الثلاجة علشان الكريم كراميل يتماسك تماماً.
9- حطي قالب الكيك في حمام ماء دافئ لمدة 3 دقائق علشان الكراميل يذوب وتقدري تقلبيه بسهولة في طبق التقديم وزينيها بالفاكهة اللي إنتي عايزاها.. وبالهنا والشفا.
وفي النهاية نتمنى إن عزومة النهارده تكون عجبتِك..
وتجربي كل الوصفات وتبعتِ تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتك"

وإلى اللقاء في العزومة الجاية،،،