بمناسبة الاحتفال برأس السنة، هيكون عددنا النهارده عن الحلويات، وإزاي نعمل الكيكة بطرق مختلفة ولذيذة... بس أوقات كتير الكيكة بتطلع مش مظبوطة معانا، أو بتهبط مننا، ومابنكونش عارفين إيه السبب مع إننا عملنا كل حاجة مظبوطة... علشان كده قبل ما ندخل المطبخ، تعالوا الأوّل نعرف مع بعض إيه الأسباب اللي بتخلّي الكيكة تطلع مش مظبوطة معانا... أوّل حاجة... إن درجة حرارة الفرن مابتكونش مظبوطة أوي؛ يعني إما إنها تكون أعلى من اللازم، وده بيخلّي الكيكة تهبط، أو إن الحرارة تكون قليّلة أوي، وده بيخلّي الكيكة تطلع مكتومة وناشفة، علشان كده لازم تلتزمي بدرجة الحرارة اللي مكتوبة على الوصفة، ولازم كمان تفتحي الفرن قبل ما تبدئي في عمل الكيكة؛ علشان يلحق يسخن قبل ما تدخليها فيه. تاني حاجة... إنك تستخدمي كمية دقيق أقل أو أكتر من اللي مكتوبة في الوصفة اللي بتعمليها؛ لأن أهم حاجة في الكيكة إن المقادير اللي فيها تكون مظبوطة جداً، علشان تطلع معاكِ كويسة. تالت حاجة.. إنك تفتحي الفرن كل شوية على الكيكة، لإن ده بيخلي الكيكة ماتعلاش في الفرن. وعلشان تتجنّبي المشاكل دي، وتحصلى على كيكة مرتفعة، اتّبعي الخطوات دي: 1- افصلي البياض عن الصفار، واضربي البياض لوحده لحد مايكون زي الكريمة. 2- اضربي البيض مع السكر لمدة خمس دقائق على الأقل. 3- صبّي العجينة في الصينية على مرة واحدة. 4- بعد ما تخلّصي العجن، سيبي الخليط لمدة 10 دقائق على جنب، ولو لقيتيه غيّر شكله اضربيه تاني. 5- يُفضل إنك تدخلي قالب الكيك في الرف المتوسّط من الفرن. ودلوقتي تعالوا ندخل المطبخ مع بعض، ونشوف طرق ووصفات لأصناف مختلفة من الكيك...
*******************
بعد ما الكيكة تستوي صبّي عليها صوص الشيكولاتة كيكة بصوص الشيكولاتة المقادير: * 5 بيضات * كوب ونصف سكر * 3/ 4 كوب لبن * 3 كوب دقيق * 3/ 4 كوب زيت * كاكاو بودرة * 4 ملاعق صغيرة بيكينج باودر * فانيليا مقادير صوص الشيكولاتة: * 1/ 4 كيلو شيكولاتة خام * 2 ملعقة كبيرة سكر * ملعقة زبدة * ملعقة كبيرة نشا * 2 كوب لبن الطريقة: 1- لتحضير صوص الشيكولاتة، بنخلط الشيكولاتة الخام مع السكر والزبدة والنشا واللبن، ونقلبّهم كلهم على النار لغاية ما يسيحوا تماماً. 2- اضربي البيض مع الفانيليا بالمضرب الكهربائي، وبعد كده ضيفي عليهم السكر والزيت، واخلطيهم كويس مع بعض.
3- اخلطي الدقيق مع البيكينج باودر، وبعد كده صبّي عليه خليط البيض، وقلّبيهم مع بعض كويس باستخدام ملعقة خشب، لغاية ما الخليط كله يتجانس ويتماسك مع بعضه، وبعد كده ابدئي ضيفي الكاكاو شوية بشوية؛ لغاية ما تديكي اللون اللي إنتِ عايزاه. 4- هاتي الصينية اللي هتعملي فيها الكيكة، وادهنيها بشوية زيت صغيرين، ورشّيها بشوية دقيق، وصبّي فيها العجين، ودخّليها في فرن ساخن، وسيبيها لمدة 30 دقيقة، وبعد ال30 دقيقة ما يعدّوا، افتحي الفرن، واغرسي فيها السكينة؛ علشان تتأكّدي إنها استوت كويس؛ يعني لو السكينة طلعت نظيفة تماماً، تبقى الكيكة استوت. 5- بعد كده طلّعي الصينية من الفرن، وصبّي عليها صوص الشيكولاتة البارد، وسيبيها شوية علشان تهدى، وبعدين قطّعيها وقدّميها.. وبالهنا والشفا.
*******************
طلّعي الكيكة من الفرن وقطّعيها وقدّميها كيكة البلح بالشوفان المقادير: * كوب ونصف دقيق * 1/ 2 كوب دقيق شوفان * ملعقة صغيرة بيكينج بودر * ملعقة صغيرة قرفة * رشة ملح * 3 بيضات * كوب سكر * كوب زيت مقادير الحشو: * 2 كوب تمر بدون نوى * 2 كوب ماء الطريقة: 1- لتحضير الحشو انقعي التمر في الماء لمدة نصف ساعة. 2- اضربي البيض مع السكر والزيت كويس، وبعد كده ضيفي عليهم المكوّنات الجافة كلها؛ وهي: الدقيق، والشوفان، والبيكينج باودر، والقرفة، والملح، واخلطيهم كلهم كويس مع بعض، وبعد كده ضيفي عليهم حشوة التمر، وقلّبيهم كويس مع بعض. 3- حطّي الخليط في صينية مدهونة بشوية زيت ومرشوشة بالدقيق، وسيبي الكيكة في الفرن لمدة من 45 : 50 دقيقة تقريباً على درجة حرارة عالية، وبعد كده طلّعي الكيكة من الفرن، وزيّنيها بالمكسرات، وقطّعيها وقدّميها.. وبالهنا والشفا.
*******************
بعد ما تطلّعي الكيكة من الثلاجة زيّنيها بقطع الأناناس تشيز كيك بالأناناس المقادير: * علبة بسكويت * 1/ 4 كوب زبدة * علبة جبنة بالكريمة * 6 ملاعق صغيرة جيلي بطعم الأناناس * علبة أناناس محفوظة * 1/ 2 كوب عصير برتقال * 1/ 2 كوب سكر * 2 ملعقة كبيرة عصير ليمون * 2 كوب كريمة للخفق الطريقة: 1- دقي البسكويت كويس لغاية ما يبقى ناعم، وضيفي إليه الزبد الطري، وامزجيهم كويس مع بعض. 2- حطي البسكويت والزبدة في صينية مستديرة يكون لها جوانب متحرّكة، واضغطي عليها بإيدك كويس علشان الخليط ينزل في قاع الصينية، وبعد كده حطّي الصينية في الفريزر لمدة ساعة. 3- دوّبي بودرة الجيلي في عصير البرتقال، وحطّيهم هما الاتنين على نار هادية لغاية ما الجيلي يذوب تماماً مع التقليب باستمرار، وبعد كده اطفي البوتاجاز، وسيبي الجيلي لغاية ما يبرد. 4- اضربي الجبنة مع السكر في وعاء باستخدام مضرب بيض كهربائي لغاية ما الخليط يبقى ناعم، وضيفي إليه عصير الليمون مع الاستمرار في الضرب لمدة دقيقة كمان. 5- اخفقي الكريمة كويس باستخدام مضرب البيض، وضيفي نصف كمية الكريمة لمزيج الجبن، وقلّبيهم مع بعض كويس. 6- هاتي قطع الأناناس وضيفيها للجبنة، وضيفي إليها عصير البرتقال، وقلّبيهم مع بعض كويس، وبعد كده صبّي المزيج على البسكويت اللي إنتِ عملتيه، وسوّي السطح بظهر الملعقة، ودخّلي الكيكة في الثلاجة لمدة 7 ساعات، وبعد كده طلّعيه من الثلاجة، وزيّنيه بقطع الأناناس، والباقي من الكريمة المخفوقة.. وبالهنا والشفا.
*******************
زيّني الكيكة بصوص الكراميل كيكة الكراميل مقادير الكيك: * 2 بيضة * ملعقة صغيرة فانيليا * كوب سكر بودرة * 2 ملعقة كبيرة لبن * 1/ 2 كوب زيت * كوب دقيق * 1/ 2 ملعقة صغيرة بيكينج بودر مقادير الكريم الكراميل: * 2 1/ 2 كوب سكر * 4 ملعقة كبيرة ماء * 5 بيضات * 2 كوب لبن * ملعقة صغيرة فانيليا الطريقة: 1- سخّني الفرن على درجة حرارة 180، وسيبيه لغاية ما تحضّري الكيكة. 2- علشان تجهزي الكراميل، هاتي وعاء صغير، وحطّي فيه كوبين من السكر ومعاه المية، وحطّيهم على نار متوسّطة، وسيبيهم لغاية ما تحسّي إن السكر داب تماماً، وإن لونه بقى ذهبي، وبعد كده شيليه من على النار، وحطّيه في القالب اللي هتعملي فيه الكيك، وسيبيه على جنب لغاية ما يبرد. 3- علشان تحضّري الكريم، اضربي الخمس بيضات في وعاء عميق بالمضرب الكهربائي، بس خلّي بالك إن المضرب يكون على سرعة متوسّطة، وفي أثناء ما إنتِ بتضربي البيض، ضيفي السكر (نصف كوب) واللبن (2 كوب) والفانيليا على البيض، مع الاستمرار في الخفق لغاية ما تحسّي إن الخليط تجانس مع بعضه. 4- صبّي الكريم فوق الكراميل البارد اللي حطيناه في قالب الكيك. 5- لتحضير الكيك.. اضربي البيض في وعاء عميق بالمضرب الكهربائي على سرعة متوسّطة، وبعدين ضيفي الفانيليا والسكر البودرة مع الاستمرار في الخفق لغاية ما تحسّي إن المكوّنات تجانست مع بعضها. 6- ضيفي اللبن والزيت على الخليط السابق مع الاستمرار في الخفق. 7- اخلطي الدقيق مع البيكينج بودر، ويُضاف للخليط تدريجياً، ويُستمر في الخفق لغاية ما المكوّنات تتجانس مع بعضها. 8- صبّي خليط الكيك فوق الكريم والكراميل، ووزَّعيه بطريقة متساوية في قالب الكيك. 9- حطّي قالب الكيك في قالب تاني أكبر فيه مية "حمام ماء" ودخليهم الفرن، وسيبيه لمدة ساعة أو لغاية ما تحسّي إن الكيكة استوت. 10- بعد ما تخرّجيه من الفرن، سيبي الكيكة تبرد شوية، وبعدين حطيها في الثلاجة علشان الكريم كراميل يتماسك تماماً. 11- حطّي قالب الكيك في حمام ماء دافي لمدة 3 دقائق؛ علشان الكراميل يذوب شوية وتقدري تقلّبيه بسهولة في طبق التقديم، وزيّنيها بصوص الكراميل.. وبالهنا والشفا.
وبكده تكون خلصت وصفات الكيك بتاعتنا النهارده... نتمنّى إنكم تجرّبوها وتبعتوا تقولوا لنا النتيجة كانت إيه... واستنونا مع وصفات تانية...
