بسيمة وشكلمة المولد.. عمايل إيدك

يا رب تكون وصفات حلاوة المولد اللي قدمناها عجبتكم وتكونوا جربتوها
والنهارده هنكمل مع بعض باقي الوصفات..
وهنبدأ بطريقة عمل البسيمة
المقادير
1/2 كيلو جوز هند مبشور
1/2 كيلو سكر
1/2 كيلو لبن
ملعقة صغيرة بيكنج بودر
كوب دقيق
1/4 كيلو سمن أو زبدة
الطريقة
1- حطي السمن أو الزبدة على النار لغاية ما تسيح وبعد كده شيليها من على النار.
2- ضيفي على الزبدة السايحة اللبن والسكر وقلبيهم مع بعض كويس، وبعد كده حطيهم على النار تاني لغاية ما السكر يذوب.
3- بعد ما السكر يذوب، شيليهم من على النار وسيبيهم لغاية ما يبردوا.
4- اخلطي الدقيق مع البيكينج باودر جيداً، وبعد ما خليط اللبن يبرد ضيفي عليه خليط الدقيق والبيكينج باودر، وكمان ضيفي جوز الهند وقلبيهم كويس مع بعض لغاية ما الخليط يتماسك مع بعضه.
5- هاتي صينية وادهنيها بالسمن، وبعدين صبي الخليط فيها وافرديه كويس في كل الصينية.
6- قطّعي الخليط بالسكين إلى مثلثات، وحطيها في الفرن لغاية ما الوجه يحمر وتحسي إنها استوت، وبعد كده تقدم وبالهنا والشفا.
ودلوقتي بقى هنعمل شكلمة جوز الهند
المقادير
كوب سكر ناعم
بياض 4 بيضات
4 كوب جوز هند مبشور

الطريقة
1- اضربي بياض البيض مع السكر كويس بالمضرب لغاية ما قوامه يبقى عامل زي الكريمة.
2- ضيفي جوز الهند على البيض والسكر واخلطيهم مع بعض كويس لغاية ما الخليط يبقى متماسك.
3- شكلي عجينة جوز الهند بأشكال مختلفة وضعيها في صينية مدهونة بالزبدة.
4- دخلي الصينية الفرن على درجة حرارة منخفضة، وسيبيها لغاية ما تحسي إن الشكلمة استوت، وبعد كده طلعيها وسيبيها لغاية ما تبرد وقدميها.. وبالهنا والشفا.
ولغاية هنا وخلصت وصفات حلاوة المولد..
نتمنى إنها تكون عجبتكم وتجربوها بنفسكم..
واستنونا مع وصفات أكتر وأكتر..
وكمان ما تنسوش لو عندكم وصفة جديدة جربتوها بنفسكم..
أو أي نصيحة مطبخية تفيد بنات "قمر 14"..
إنك تبعتي لنا على لينك..
ورينا شطارتك