فتة الفراخ بصلصة اللبن والثوم على سفرة دايمة

وصفتنا النهارده هتكون جديدة ومميزة، هنقدم لكم فتة الفراخ بصلصة اللبن والثوم..
تابعونا وماتنسوش تبعتوا لنا آرائكم ومقترحاتكم.
فتة الفراخ
المقادير:
* فرخة صغيرة
* 10 فصوص ثوم
* 1/ 4 كوب زيت
* كوب عصير ليمون
* ملعقة صغيرة بهارات
* 1/ 4 ملعقة صغيرة قرفة
* 1/ 4 ملعقة صغيرة جوز الطيب
* ملح وفلفل
طبقة الأرز:
* 2 كوب أرز بسمتي
* 1/ 2 ملعقة صغيرة زعفران
* 2 ملعقة كبيرة زبدة
* 4 أكواب ماء
* ملح
لعمل الصلصة:
* 3 كوب لبن
* ملعقة زبدة
* مرقة دجاج
* 2 فصوص ثوم مهروسة
* 2 كوب خبز محمص
* كوب مكسرات
الطريقة:
1- اخلطي الثوم المهروس بالملح، والفلفل، والبهارات، والقرفة، وجوز الطيب.
2- قطعي الفرخة 4 قطع، وبعدين إدعكيهم كويس بالخلطة دي، وأقليهم في الزيت لحد ما تتحمر كلها.
3- بعد ما تتحمر صبي عليها عصير الليمون، وقللي الحرارة، وغطي الحلة وسيبيها تستوي على نار هادية لمدة 40 دقيقة.
4- في الوقت ده حضري الرز، شوحي الرز في الزبدة لمدة 3 دقائق.
5- بعدين حطي عليه الميه والزعفران وغطيه، وسيبيه لحد ما يغلي، وبعدين قللي النار لحد ما الرز يستوي.
6- بعد ما قِطع الفراخ تستوي أخليها من العظم والجلد، وقطعيها بحجم القطع اللي أنتِ عايزاة أو سيبيها بحجمها.
7- حضري صلصة اللبن، شوّحي الثوم الفروم في الزبدة، وبعدين حطي عليه اللبن وسيبيه يغلي، وتبليه بالملح والفلفل.
8- شوّحي العيش المحمص بالزبدة.
9- عند التقديم حضري قالب شفاف، حطي الأول طبقة العيش المحمص، وبعدين طبقة من الرز، وبعدين رُصي عليه الفراخ، وبعدين اسقيه باللبن.
10- انثري عليها المكسرات وقدميها بالهنا والشفا.

خلصت أكلة النهارده..
ولسه معانا وصفات يوميا على سفرة دايمة..
سلام،،،
*********************
للتعرف على مزيد من الوصفات الشهية
اضغط هنا "سفرة دايمة"
*********************