مكرونة بالفراخ على الطريقة الإيطالية في عزومة "سفرة دايمة"

يوم الجمعة بتحلى اللمة على الأكل..
علشان كده حبينا نشاركك اللمّة الحلوة دي..
ونكون معاكِ خطوة بخطوة وإنتِ بتحضّري لأحلى وأجمل عزومة في الدنيا..
ونقدّم لك كل أسبوع اقتراح لعزومة مكوّنة من العصير والطبق الرئيسي وطبق السلطة وطبق الحلو..
علشان تنوّعي لعيلتك.. وتبهريهم بأكلاتك الجامدة..
تعالي بقى نشوف هنعمل إيه النهارده..
******************
زيني الكوب بشرائح الليمون
عصير المانجو بالليمون
المقادير:
3 ثمرات مانجو حجمها كبير
1/2 كوب عصير ليمون
1/2 كوب ماء
سكر
الطريقة:
1- قشّري المانجو وقطعيها لقطع صغيرة.
2- حطي قطع المانجو في الخلاط وحطي عليها عصير الليمون والميه والسكر.
3- سيبي العصير في التلاجة وقدّميه ساقع.. وبالهنا والشفا.
******************
ممكن تزيّني طبق السلطة بالجبنة الرومي المبشورة
السلطة الخضراء بالفراخ
المقادير:
1/2 كوب بصل
1/2 كوب فلفل أخضر
1 ثمرة طماطم كبيرة
معلقتين ثوم مفروم
قطعة صدور فراخ مقطعة لمكعبات
ملح وفلفل
3 معالق خل
2 كوب جرجير مقطع
معلقة كبيرة زيت
الطريقة:
1- اغسلي الخضار اللي عندك كويس، وقطعيه لمكعبات.
2- هاتي طبق التقديم وحطي فيه الخضار المقطع وقلبيه مع بعض كويس.
3- هاتي طاسة وحطي فيها الزيت وشوّحي فيه قطع الفراخ ومعاها الملح والفلفل والخل والثوم وسيبيها على النار لمدة خمس دقائق.
4- ضيفي الفراخ على السلطة في طبق التقديم، وممكن تزيّني طبق السلطة بالجبنة الرومي المبشورة.. وبالهنا والشفا.
******************
ممكن تزيني الشوربة بالبقدونس
شوربة الخضار بالفراخ
المقادير:
حبة كوسة مقطعة لمكعبات متوسطة
حبة طماطم مقطعة لمكعبات متوسطة
حبة بطاطس مقطعة لمكعبات متوسطة
جزرة مقطعة لمكعبات متوسطة
صدور فراخ مقطعة لمكعبات
مكعب مرقة دجاج
معلقة كبيرة زبدة أو سمن
4 كوب شوربة فراخ
ملح وفلفل أسود
الطريقة:
1- سيّحي الزبدة على النار، وبعد كده ضيفي عليها الخضار، وقلبيها على النار شوية، وبعد كده ضيفي عليهم قطع الفراخ.
2- بعد كده ضيفي شوربة الفراخ والملح والفلفل، وسيبيهم على نار متوسطة لغاية ما تحسي إن الخضار والفراخ استووا.
3- بعد كده اضربي الشوربة في الخلاط، لغاية ما تحصلي على خليط متجانس، وبعد كده حطيها مرة تانية على نار هادية، وعند التقديم حطيها في أطباق التقديم.. وبالهنا والشفا.
******************
مكرونة في الفرن على الطريقة الإيطالية
مكرونة بالفراخ على الطريقة الإيطالية
المقادير:
2 كوب مكرونة صغيرة
معلقتين زيت زيتون
1/2 كيلو صدور دجاج متبّلة ومقطعة لقطع صغيرة
1/4 كوب جبنة بارميزان أو جبنة شيدر مبشورة
1/2 كوب بصل مقطع لمكعبات
2 طماطم مبشورة
كوب جبنة موتزاريللا مبشورة
1/4 كوب بقدونس مفروم
1/4 معلقة ملح
1/4 معلقة فلفل أسود
معلقة كبيرة زبدة
ثوم
قرنفل
الطريقة:
1- اسلقي المكرونة.
2- هاتي طاسة كبيرة وحطي فيها زيت الزيتون وسيبيه يسخن، وبعد كده شوّحي فيه صدور الفراخ لمدة 3 دقائق.
3- بعد كده ضيفي عليها البصل والثوم وقلّبيهم مع بعض لغاية ما الفراخ تستوي.
4- ضيفي عليهم المكرونة ومعاها الطماطم والملح والفلفل، والجبنة الموتزاريللا المبشورة والبقدونس والقرنفل والزبدة وقلّبيهم كلهم كويس جداً، وسيبيهم على النار لمدة 5 دقائق.
5- وآخر حاجة هتحطيها هي الجبنة البارميزان المبشورة أو الجبنة الشيدر، وقلّبيهم شوية على النار، وبعد كده دخّليها الفرن وسيبيها لغاية ما تلاقي وشها بقى لونه ذهبي، وبعد كده طلّعيها وقدّميها.. وبالهنا والشفا.
******************
كيكة لذيذة جداً
كيكة الكريم كراميل
مقادير كريم الكراميل:
5 بيضة
1/2 كوب سكر
1/2 لتر لبن
فانيليا
طريقة تحضيره:
اضربي البيض كويس مع السكر بالمضرب لغاية لما تحسّي إن السكّر ذاب تماماً، وبعد كده ضيفي اللبن والفانيليا.
لتحضير الكراميل:
1/3 كوب سكّر وبتسيّحيه على النار لغاية لونه ما يبقى ذهبي، وبعد كده حطي الكراميل في القالب أو الصينية اللي هتعملي فيها الكيكة، وحطيه في الثلاجة لغاية ما يجمد.
مقادير الكيك:
2 بيضة
1/2 كوب زيت
كوب سكر ناعم
كوب دقيق
2 معلقة كبيرة لبن
فانيليا
بيكينج باودر
ذرة ملح
لتحضير الكيك:
1- اضربي البيض كويس بالمضرب، وبعد كده حطي السكر واضربيهم مع بعض كويس جداً لغاية ما يذوبوا.
2- بعد كده ضيفي عليهم اللبن والزيت والفانيليا والبيكينج باودر والملح واضربيهم كلهم مع بعض كويس.
3- بعد كده ضيفي باقي المكوّنات، واخلطيهم مع بعض كويس جداً واضربيهم بالمضرب.
طريقة الترتيب في الصينية:
1- بعد ما الكراميل يجمد، طلّعي الصينية من الثلاجة، وبعد كده صُبّي فيها الكريم وبعد كده عجينة الكيكة، وساوي سطح الكيكة كويس.
2- حطي الصينية في حمام ماء ساخن، ودخليها الفرن على درجة حرارة متوسطة، وبعد ما تحسي إن الكيكة استوت، طلعيها وحطيها في الثلاجة شوية، وبعد كده قدميها.. وبالهنا والشفا.
وفي النهاية نتمنى إن عزومة النهارده تكون عجبتِك..
وتجرّبي كل الوصفات وتبعتي تقولي لنا على النتيجة..
وكمان لو عندك وصفة حلوة عايزة تشتركي بها معانا..
ممكن تبعتيها لنا على لينك...
"ورينا شطارتك"
وإلى اللقاء في العزومة الجاية،،،