عزومة 26 رمضان

عصير الكاجو باللبن والعسل
العصير ده مفيد جداً، وخصوصاً للناس اللي بتعاني من النحافة لإنه بيحتوي على نسبة كبيرة من السعرات الحرارية..
المقادير:
* كوب لبن
* 1/4 كوب من الكاجو المنقوع في الماء لمدة 5 ساعات
* ملعقة كبيرة عسل
* ملعقة صغيرة ماء زهر (حسب الرغبة)
الطريقة:
اخلطي كل المقادير مع بعضها، واضربيها في الخلاط، وبعد كده صفي العصير وصبيه في الكوبايات.

*******************
شوربة الجبنة الشيدر
شوربة الجبنة الشيدر
المقادير:
* 1/2 كيلو جبنة شيدر مبشورة
* 3 ملاعق كبيرة زبدة
* 3 ملاعق كبيرة دقيق
* ملح وفلفل وبهارات
* 3 أكواب لبن
* ثمرة بصل مقطعة قطع صغيرة جداً
* 3 أكواب شوربة فراخ أو لحمة

الطريقة:
1- ذوّبي الزبدة في إناء على النار، وضيفي إليها البصل وقلبيه كويس لمدة 5 دقائق أو لغاية ما تلاقي إن البصل لونه بقى ذهبي.
2- لما تلاقي إن البصل لونه بقى ذهبي ضيفي إليه الدقيق مع التقليب المستمر لغاية ما الدقيق لونه يبقى ذهبي، بعد كده ضيفي الشوربة واللبن بالتدريج مع استمرار التقليب علشان الدقيق ما يكلكعش منك، وسيبيهم على النار لمدة 5 دقائق أو لغاية ما يغلوا.
3- اطفي البوتاجاز وسيبي الخليط علشان يبرد، بعد كده اضربيه في الخلاط كويس، بعد كده حطيه في حلة ورجعيه على النار مرة أخرى وضيفي إليه الجبنة مع استمرار التقليب لمدة 5 دقائق علشان الجبنة تذوب مع إضافة الملح والفلفل والبهارات.

*******************
السلطة البلدي
السلطة البلدي
المقادير:
* بصلة مقطعة قطعاً صغيرة
* ثمرة فلفل أخضر حار مقطع قطعاً صغيرة
* فص ثوم مفروم
* ملعقة صغيرة خل
* 2 ملعقة صغيرة عصير ليمون
* حزمة بقدونس مقطعة قطعاً صغيرة
* 2 ثمرة طماطم مقطعة مكعبات صغيرة
* 2 ملعقة كبيرة زيت ذرة
* حزمة جرجير مقطعة قطع صغيرة
* 2 ثمرة خيار مقطع مكعبات صغيرة
* ملح وفلفل
* خس مقطع قطع صغيرة
الطريقة:
دي ما فيش أبسط منها كل اللي هتعمليه إنك هتخلطي كل المقادير مع بعضها، وتحطيهم في طبق السلطة.

*******************
كفتة الفراخ
كفتة الفراخ
المقادير:
* كيلو صدور فراخ مفرومة كويس
* حزمة بقدونس أو كزبرة خضراء مقطعين قطعاً صغيرة جداً
* 1/2 ملعقة نعناع مفروم
* بيضة
* ملح وفلفل أسود وبهارات
* بصلة مقطعة قطعاً صغيرة جداً
* 2 قرن فلفل أخضر حار
* 3 فصوص ثوم مفرومين كويس
* بقسماط
* زيت للقلي
الطريقة:
1- هاتي صدور الفراخ المفرومة واخلطيها مع البقدونس والنعناع والفلفل الأخضر والثوم والبهارات والبيضة والبقسماط والملح وشوية زيت ذرة.
2- بعد ما تخلطي المقادير دي كلها مع بعضها شكليها على شكل كرات، ودخليها الثلاجة لمدة ساعة.
3- بعد مرور نص ساعة خرجيها من الثلاجة، واقليها في الزيت وخدي بالك إنك تهدّي النار عليها علشان تتحمر كويس، وبعد ما تتحمر طلعيها وحطيها على ورق نشاف علشان يتشرب الزيت.
4- بعد كده رصيها في طبق التقديم، وممكن تقدميها مع بطاطس أو رز أو مكرونة.

*******************
خشاف البلح والتين
خشاف البلح والتين
المقادير:
* 1/2 كيلو بلح
* 1/2 كيلو تين مجفف
* 1/2 فنجان سكر
* كوب كبير مية مغلية
* 1/2 كوب زبيب
* 1/2 كوب بندق مقشر
* 1/2 كوب لوز مقشر
الطريقة:
1- هاتي البلح واقسميه إلى نصفين، وشيلي منه النوى، وهاتي التين واقسميه إلى نصفين.
2- حطي البلح والتين في كوباية فيها المية المغلية وضيفي إليه السكر وقلبيه كويس، بعد كده سيبيه لمدة ساعة أو لغاية ما المية تبرد.
3- بعد كده ضيفي إليه البندق واللوز والزبيب، وقلبيهم مع بعض كويس، وسيبيهم في الثلاجة لمدة ساعة، وبعد كده طلعيهم وحطيهم في أطباق الخشاف.

*******************

وبكده تكون خلصت عزومتنا النهارده وياللا بسرعة على المطبخ علشان تلحقي تعمليها على الفطار، بس أوعي تنسي بعد الفطار تدخلي على قمر 14 علشان تبعتي وتقولي لنا على النتيجة...
واستنينا بكرة في عزومة جديدة، ومن هنا لبكرة أوعي تنسي تبعتي رأيك وتعليقك..
كمان لو عندك أي استفسار أو لو عايزة تعرفي تعملي أكلة جديدة، ومش عارفة تعمليها ابعتي وقولي لنا عليها واحنا هنقول لك على الطريقة على طوووول..

وإلى اللقاء غدا إن شاء الله
مع أطيب التمنيات بصوم مقبول وإفطار شهي بإذن الله
سلااااااااام
*********************
للتعرف على مزيد من الوصفات الشهية
اضغط هنا "سفرة دايمة"
*********************