كوردون بلو.. مقرمش ولذيذ

النهارده هنقدّم لكم وصفة سهلة ولذيذة طلبها عدد كبير من أصدقائنا وهي الكوردون بلو ومعاه صوص الكريمة اللباني
كوردون بلو
المقادير:
* كيلو صدور فراخ مخلية
* 2 ثمرة فلفل رومي مفروم
* ملعقة صغيرة قرفة
* ملعقة كبيرة خل
* 1 كوب دقيق
* 2 بصلة كبيرة
* 3 ليمونات
* ملح وفلفل
* خلة الأسنان
* 2 بيضة
* 2 كوب بقسماط مطحون
* كمية كبيرة من الزيت للقلي
للحشو:
* 1/ 8 كيلو لانشون
* 1/ 8 كيلو جبنة شيدر
* 1/ 8 كيلو زيتون مقطع
الطريقة:
1- افرمي البصل كويس جداً واعصريه وخدي الميه بتاعته؛ لاستخدامها في التتبيلة.
2- ضعي ماء البصل في طبق غويط، ومعاه الملح والفلفل والخل وعصير الليمون والفلفل الرومي والقرفة، وقلّبيهم كويس مع بعض، وبكده تبقي حضّرتي التتبيلة.
3- حطّي صدور الفراخ في التتبيلة وسيبيهم لمدة ساعتين.
4- بعد ما الفراخ تتّبل، هنبدأ في حشو صدور الفراخ وكل اللي عليكِ إنك تفردي قطعة الفراخ، وتحطّي عليها شريحة من الجبن الشيدر، وشريحة لانشون، وقطعتان من الزيتون.
5- لفي صدور الفراخ على الحشو واقفليه كويس، واحكميها بغلق الجوانب المفتوحة بخلة الأسنان.
6- قلّبي صدور الفراخ الملفوفة في الدقيق وبعد كده حطيها في البيض، وبعدين غطيها بالبقسماط من كل الجوانب بعد ما تتبّليه بالملح والفلفل.
7- سخني الزيت كويس جداً على نار عالية وابدئي بوضع الكوردون في الزيت واحدة واحدة بحرص، وبعد كده خففي النار علشان تتحمر على نار هادية، وقبل ما تشيليها من الزيت، زودي النار علشان تكون مقرمشة.
ولو عايزة تظبطي الأكلة تمام وتبقى ولا أحسن شيف ممكن تقدّمي مع الكوردون بلو صوص الكريمة بالكرّات..
صوص الكريمة بالكرّات
المقادير:
* كرّات مقطع قطع صغيرة
* 2 معلقة كبيرة زبدة
* 1⁄2 كوب كريمة لباني مخفوقة
الطريقة:
1- سخني الزبدة في طاسة صغيرة على نار هادية، وبعدين ضيفي عليها الكرّات المقطع، وسيبيهم على النار من 7 : 8 دقائق مع التقليب المستمر.
2- ضيفي عليهم الكريمة وسيبيهم لغاية ما الكريمة تسخن، وبعد كده قدّمي الصوص مع الكوردون بلو وهو ساخن.. وبالهنا والشفا
وبكده تكون خلصت وصفتنا النهارده..
نتمنى إنكم تجربوها وتبعتوا تقولوا لنا رأيكم فيها..
وكمان لو عندك أي وصفة عايزة تعرفيها ممكن تبعتي لنا..
وإحنا هنقدمها لك في أقرب وقت..